ข้อพระคัมภีร์ยอดนิยมจาก Ef 4

แบ่งปัน

Dite da'me ami yataqatelo'te nataq'aen aueñi damichiguilo naa'me adai'lidi'; auapalaĝachi nale ga'me laviyaĝajet ga'me adaqayai, qa'a nach'e ena'am ñe'me Dios joote yapalaĝa't gaa'me mach'e qadaviyaĝaje'te, ca'li qo'mi nemelo'te joñe'me Lec'oĝot Jesucristo qaedi male qadec'alegue.

Ena'te ami 'yoĝodenaĝayaqa, dite da'me 'noota qom yataqata ami joĝodayaqa naa'me adai'lidi' nataq'aen da'me anapogaĝadeñi. 'Noota qom auodenataĝañetac nale, chiyaqayi da'me adoqopich'ii.

Ena'te ja no'en nale ga'me anenaĝachidegue dite joda'me at'aqataqadi' jo'ne chimadichidiñe, qaedi alecochiiyalo jogaa'me domachita nale, qama'le nichiquetaye da'me lepe'e'.

Aĝañiñi da'me anaucheñiya ga'me adaqayai; ena'te aualemataitac; ena'te aueloiquiitapega't; ena'te auachinataĝañilegue ga'me adaqayai uotaĝa ta'le a'uotañi nale.

Qom aualemataitac, ja 'noota ga'me adalemataiqui ami yaueguedoue da'me auauoyi ga'me adoequi; ena'te auen taue ga'me nolo' da'me aualemata, qaedi ja anajeñe'teguet da'me ami tauelo joñe'me payac.

Chane'eja ena'te yitaĝa auacoñiyeguet ga'me at'oyaĝaqui toijec jo'ne te'me ami 'naĝa't ca'li, jouaĝat gaa'me namaico jo'ne ja ejoda. Qama'le 'noota ta'le yataqata qoyadalaĝa't jogaa'me adelnataĝacodi', nataq'aen yataqata auacoñiyeguet da'me at'oyaĝaqui dalaĝaic jo'ne 'lonatac joñe'me Dios, qaedi male di'yoq da'me ami yataqatelo'te nataq'aen ami ja 'nalo'te.

Yataqata a'nañaĝachi qaedi nach'e eta't ami uetauelo jena'me jenjo' 'nemaĝac jo'ne onaĝaic, qaedi ja qo'naĝat da'me 'lonataĝanaĝac joñe'me Dios Lepaqal jo'ne ami yemata'a't.

Qama'le nach'eñe jo'ne yauo'oe daa'me nayatenaĝanaĝaco jo'ne yanema jena'me jiyaĝadipi. Chane'eja uo'oe gaa'me qoyanema da'me 'lonata'j jo'ne Dios lamaĝa's, nataq'aen gaa'me laqaya' jo'ne Dios 'laqataĝanaĝanaqa, nataq'aen gaa'me laqaya' jo'ne qoyanema da'me 'yaĝa'tape da'me Dios 'laqatac, nataq'aen gaa'me laqaya' jo'ne yelolo'te jena'me Dios lec'oqo'tepi nataq'aen yapaĝague'tape. Ya'uo ca'li da'me dojo' qaedi yema da'me qo'mi jo'ne jouaqaue jena'me Dios lec'oqo'tepi, jo'ne nach'e ena'am ta'le qo'mi Cristo lapat, yataqata chimaqachiñe da'me qat'onataĝanaĝac, qaedi jauoqo 'lañaĝac ga'me qadepi'iyaĝa'u laqaya'. Qom naq'aeta qama'le yema da'me qo'mi qadalo'ta't da'me qademalegue jena'me onaĝaic qadepe'e ladic, qaedi yataqata jatetonaq joñe'me Dios Lec'oĝot, nataq'aen male yemta jovitaĝa da'me qo'mi p'etaqadayaqa jo'ne chimadichidiñe, chayovida'a da'me qadalaje'ma da'me 'loyaĝac joñe'me Cristo jo'ne yataqata ja 'nalegue.

Male ja jenaqa'ama gaa'me ñoqolqa jo'ne nejouoĝodiñe nale daa'me lelnataĝaco qama'le ena'am ta'le ga'me layat yayoĝo'n. Da'me qo'mi qamqa'me male ja jaconaĝagueta gaa'me lapaĝaguenataĝanaĝaco gaa'me qovinaĝanaĝayaqa jo'ne ch'e yoqovi'n jena'me layi qaedi yejomaĝana'ape. Chane'eja 'noota ta'le da'me qadoqopich'i nach'ena qo'mi yaloĝo'talo qaedi nach'e eta't ja'aĝataĝatac da'me eja, chayovida'a da'me nach'e eta't ñaqaloĝodaqataje'ma joñe'me Cristo, jo'ne nach'eñe qo'mi nejaliaĝatelo'te yemeda naa'me noloqo'ote.