ROMANEN 12
12
Kal mafuu pǝ yeɓ Masǝŋ
1Wee pa ɓe, Masǝŋ kwo syak ɓo tǝ mana, mor ah me pǝǝ we ka we nyi suu ɓii nyi Masǝŋ tǝgbana fan joŋ syiŋ mai mo ne cee mo nǝǝ ɓo mor yeɓ ah moo 'nyah suu ahe. Ɗul ah masãh ah ko maiko. 2We joŋ tǝgbana za sǝr mai mo tǝ joŋra ka, amma we soɓ Masǝŋ mo zyeɓ we pǝfuu mo fer yella ɓii tǝɗe', ka we gak tǝ fan mai Masǝŋ mo 'yahe: fan sãhe, fan ma 'nyah suu ahe, tǝkine fan matǝ goŋga.
3Mor fan mai Masǝŋ mo nyi ɓo me, me tǝ faa nyi we daŋ, we foo ɓǝ kal tǝ suu ɓii ka. Amma pǝram we foo ɓǝ ne yella, ka koo zune kǝsyil ɓii daŋ mo joŋko tǝgbana iŋ mai Masǝŋ mo nyi ɓo nyi ko. 4Tǝgbana suu dǝfuu a vaŋno, amma ana ne fan wol ah pǝpãare, ara ne yeɓ ɓǝǝ camcam daŋ ta.#1 Kor 12:12 5Nai ne na ta, ana pǝpãare, amma ana ciŋ suu vaŋno ɓo ne Kristu. Ana vaŋno vaŋno daŋ na tai mgbãa ki ɓo tǝgbana fan suu mo wo suu tǝ vaŋno. 6Ana ɗǝǝ fan ɓo camcam ka na joŋ yeɓ ne ko tǝgbana mai Masǝŋ mo nyi ɓo zune daŋ nǝn mǝ ahe. Dǝɓ mo ɗǝǝ ma cuu ɓǝ Masǝŋ ɓo, ka Masǝŋ ye nyi ɓo nyi, mo joŋko yeɓ ah tǝgbana iŋ ah mo ne ko.#1 Kor 12:4-11 7Dǝɓ mo ɗǝǝ ma joŋ yeɓ ɓo, mo joŋko. Dǝɓ mai mo ɗǝǝ ma cuu fan ɓo, mo cuuko. 8Dǝɓ mo ɗǝǝ ma swaa za ɓo, ka mo swaako zana. Dǝɓ moo nyi fan nyi zana, mo joŋko ne zahzyil tǝɗe'. Dǝɓ mo kaa dǝɓlii ɓo tǝ zana, mo ɓaŋko syiŋ yeɓ ahe. Dǝɓ moo gbah jol za ma pǝ bone, mo joŋko ne 'yahe.
9'Yah ɓii mo suuki ne vǝrvǝr ka. We syiŋ ɓǝɓe', we 'yah ɓǝ sãhe. 10We yea ne foo ɓǝ ki tǝgbana wee pam mai moo 'yahra ki, we kee ki ne yii ki. 11We joŋ yeɓɓe, we yea pǝ vǝǝkoi ka, we joŋ yeɓ mor Dǝɓlii ne zahzyil ma ne 'yahe. 12We laa pǝ'nyah ne fan mai we tǝ byakke, we rõm bone, we juupel cẽecẽe. 13We gbah jol wee pa ɓii ne fan mai mo tǝ 'yahra, we nyiŋ za mai moo ginra yaŋ ɓii pǝsãhe.
14We fii Masǝŋ ka mo ẽeko za mai moo foora mor ɓiiri, we fii ko ka mo ẽeko ra, we fii mor ka joŋ ra pǝɓe' ka.#Mt 5:44; Lu 6:28 15We laa pǝ'nyah ne za mai mo tǝ laara pǝ'nyahre, we yeyee ne za mai mo tǝ yera yee. 16We kaa wo ki pǝ'nyahre, we kyeɓ cok mayǝk ah ka, we joŋ suu ɓii na za tan fan ka.#ƁǝT 3:7
17We soo dǝɓ ma joŋ ɓǝɓe' wo ɓii ne ɓǝɓe' ta ka, we kyeɓ ka joŋ fan sãh wo za daŋ. 18Wee gak no ɓe, we kyeɓ ka kaa jam ne za daŋ. 19Bai ɓe ra, we faŋ val ne suu ɓii ka, amma we soɓ kpãh Masǝŋ ye mo joŋ, mor Ɗerewol faa: Dǝɓlii faa azye ye ga faŋ valle, zye ga soo val ahe.#CuuƁ 32:35 20Ɗerewol faa ta: Pa syiŋ ɓo mo ne koŋ ɓe, mo nyi farel nyi ko re, koŋ bii mo i ko ɓo, mo nyi bii nyi zwǝ. Mor mo tǝ joŋ nai ɓe, a ga yea tǝgbana mo tǝ rǝk yakwii ga nyi tǝtǝlli.#ƁǝT 25:21-22 21Mo soɓ ɓǝɓe' jee mo ka, amma amo ye mo kaa swah tǝ ɓǝɓe' ne ɓǝ sãhe.
தற்சமயம் தேர்ந்தெடுக்கப்பட்டது:
ROMANEN 12: MUAR
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Moundang © Alliance Biblique du Tchad, 1996.
