رِسَالَةْ كُولُوسِّي 3
3
الْفَصْلْ التَّالْتْ
كِيفَاشْ خَاصّْ الْمَسِيحِي يْعِيشْ
1إِيوَا إِلَا تّْبْعَتُّو مْعَ الْمَسِيحْ، قَلّْبُو عْلَى الْأُمُورْ اللِّي الْفُوقْ، فِينْ ݣَالْسْ الْمَسِيحْ عْلَى لِيمْنْ دْيَالْ اللَّهْ. 2دِّيوْهَا فْالْأُمُورْ اللِّي الْفُوقْ مَاشِي فْالْأُمُورْ اللِّي فْالْأَرْضْ، 3حِيتْ رَاكُمْ مْتُّو وْحْيَاتْكُمْ مْسْتُورَة مْعَ الْمَسِيحْ فْاللَّهْ. 4وْمْلِّي غَيْبَانْ الْمَسِيحْ اللِّي هُوَ حْيَاتْكُمْ، دِيكْ السَّاعَة رَاهْ حْتَّى نْتُمَ غَتْبَانُو مْعَاهْ فْالْعَزّْ دْيَالُه.
5إِيوَا قْتْلُو الطّْبِيعَة دْيَالْ الدّْنْيَا اللِّي فِيكُمْ، اللِّي هِيَ الْفْسَادْ، وْالْأُمُورْ الْمْنْجُوسَة، وْالشَّهْوَة، وْالرَّغْبَة الْقْبِيحَة، وْالطّْمَعْ اللِّي هُوَ الْعِبَادَة دْيَالْ الْأَصْنَامْ، 6عْلَاحْقَّاشْ بْسْبَابْ هَادْشِّي كَيْنْزَلْ غَضَبْ اللَّهْ عْلَى النَّاسْ اللِّي مَا كَيْطِيعُوهْشْ. 7وْرَاكُمْ كْنْتُو بْحَالْ هَكَّا مْنْ قْبَلْ، مْلِّي كْنْتُو كَتْعِيشُو فْهَادْشِّي. 8وَلَكِنْ دَابَا رْمِيوْ عْلِيكُمْ ݣَاعْ هَادْ الْأُمُورْ: الْغَضَبْ، السَّخْطْ، الْخُبْتْ، السّْبَّانْ، وْالْكْلَامْ الْقْبِيحْ اللِّي كَيْخْرُجْ مْنْ فُمّْكُمْ. 9وْمَا تْكَدْبُوشْ عْلَى بْعْضِيَّاتْكُمْ، حِيتْ رَاكُمْ حَيّْدْتُو عْلِيكُمْ الطّْبِيعَة الْقْدِيمَة وْفْعَايْلْهَا،#أفسس 4:22 10وْلْبَسْتُو الطّْبِيعَة الجّْدِيدَة اللِّي كَتّْجَدّْدْ فْالْمَعْرِفَة عْلَى حْسَابْ الصُّورَة دْيَالْ هَادَاكْ اللِّي خْلَقْهَا، 11وْهَكَّا، رَاهْ مَا كَايْنْشْ الْفَرْقْ بِينْ الْيُونَانِي وْلِيهُودِي، اللِّي مْخَتّْنْ وْاللِّي مَا مْخَتّْنْشْ، اللِّي مَا كَيْتّْكَلّْمْشْ بْالْيُونَانِيَّة وْاللِّي مَا مْتْحَضّْرْشْ، الْعَبْدْ وْالْحُرّْ، وَلَكِنْ الْمَسِيحْ هُوَ كُلّْشِي وْفْكُلّْشِي.
12رَاهْ اللَّهْ خْتَارْكُمْ وْقَدّْسْكُمْ وْكَيْبْغِيكُمْ، هَادْشِّي عْلَاشْ خَاصّْكُمْ تْلَبْسُو الرَّحْمَة، وْاللّْطَافَة، وْالتَّوَاضُعْ، وْالضّْرَافَة، وْالصّْبَرْ،#أفسس 4:2 13تّْحَمّْلُو بْعْضِيَّاتْكُمْ، وْسَامْحُو بْعْضِيَّاتْكُمْ إِلَا كَانْتْ عَنْدْ شِي وَاحْدْ شْكْوَى ضْدّْ لَاخُرْ، كِمَا غْفَرْ لِيكُمْ الرَّبّْ، هَكَّا خَاصّْكُمْ حْتَّى نْتُمَ تْدِيرُو.#أفسس 4:32 14وْفُوقْ هَادْشِّي كُلُّه لْبْسُو الْمْحَبَّة حِيتْ هِيَ اللِّي كَتْوَحّْدْ فْالْكَمَالْ. 15وْخَلِّيوْ الْهْنَا دْيَالْ الْمَسِيحْ يْسْكُنْ فْقْلُوبْكُمْ، اللِّي عْلَى وْدُّه عَيّْطْ لِيكُمْ اللَّهْ فْدَاتْ وَحْدَة، وْخَاصّْكُمْ تْشَكْرُوهْ.
16خَلِّيوْ الْكْلْمَة دْ الْمَسِيحْ تْسْكُنْ فِيكُمْ بْالْكْتْرَة، عَلّْمُو وْنَبّْهُو بْعْضِيَّاتْكُمْ بْكُلّْ حْكْمَة، وْغَنِّيوْ وْشْكْرُو اللَّهْ مْنْ قْلُوبْكُمْ بْالْمَزَامِيرْ وْالتَّرَانِيمْ وْالْأَغَانِي الرُّوحِيَّة.#أفسس 5:19،20 17وْݣَاعْ دَاكْشِّي اللِّي كَتْݣُولُوهْ وْلَا كَتْدِيرُوهْ، دِيرُوهْ بْإِسْمْ الرَّبّْ يَسُوعْ، وْبِيهْ شْكْرُو اللَّهْ الْآبْ.
وْصِيَّاتْ لْلْعَائِلَة الْمَسِيحِيَّة
18آ الْعْيَالَاتْ، طِيعُو رْجَالْكُمْ كِيفْ خَاصّْ يْكُونْ قُدَّامْ الرَّبّْ،#أفسس 5:22؛ 1بطرس 3:1 19آ الرّْجَالْ، بْغِيوْ عْيَالَاتْكُمْ وْمَا تْكُونُوشْ قَاسْحِينْ مْعَاهُمْ.#أفسس 5:25؛ 1بطرس 3:7
20آ الْوْلَادْ، طِيعُو وَالِدِيكُمْ فْكُلّْشِي حِيتْ هَادْشِّي كَيْرْضِي الرَّبّْ.#أفسس 6:1 21آ الْوَالِدِينْ، مَا تْقَهْرُوشْ وْلَادْكُمْ بَاشْ مَا يْفَشْلُوشْ.#أفسس 6:4
22آ الْعْبِيدْ، طِيعُو سْيَادْكُمْ دْيَالْ الدّْنْيَا فْكُلّْشِي، مَاشِي غِيرْ مْلِّي كَيْكُونُو مْرَاقْبِينْكُمْ بَاشْ تْرْضِيوْ النَّاسْ، وَلَكِنْ طِيعُوهُمْ بْقَلْبْ صَادْقْ وْخَافُو الرَّبّْ،#أفسس 6:5-8 23وْݣَاعْ دَاكْشِّي اللِّي كَتْدِيرُوهْ، دِيرُوهْ مْنْ قَلْبْكُمْ، بْحَالْ إِلَا دْرْتُوهْ لْلرَّبّْ مَاشِي لْلنَّاسْ، 24وْدِيرُو فْبَالْكُمْ بْلِّي الرَّبّْ هُوَ اللِّي غَيْجَازِيكُمْ بْالْوَرْتْ مْنْ عَنْدُه، حِيتْ كَتْخَدْمُو لْلرَّبّْ الْمَسِيحْ. 25وَلَكِنْ الضَّالْمْ غَادِي يْتّْعَاقْبْ عْلَى الضُّلْمْ اللِّي دَارُه، وْرَاهْ اللَّهْ مَا كَيْدِيرْشْ الْوْجْهِيَّاتْ.#أفسس 6:9
தற்சமயம் தேர்ந்தெடுக்கப்பட்டது:
رِسَالَةْ كُولُوسِّي 3: MSTD
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved