Imamat 6
6
1Ma JOU 'o kanau ra Musa ma betongo so'o ne: 2<<Si'ade-ade i'a matengo 'o sitotomo ua 'ai jaji dadi 'o 'a'a ḏosa ra Ma JOU sababu 'o soloto dawongo ngowa'a Israel lelegu 'ai 'ori i'a di'a 'a sigogono, bolo unanga 'o soloto tori'i ua ngowa'a Israel lelegu 'ai harata, bolo unanga 'o soloto sanga ngowa'a Israel lelegu 'ai 'ori i'a sababu 'o sihaga ngowa'a Israel lelegu gena-ge, 3bolo unanga 'o sanga ngowa'a Israel lelegu 'ai 'ori i'a ga'a ri iranga, kara unanga 'o masa-sakala 'o aje gena-ge ta unanga, re 'o masisasi sa-sakala mangale ḏosa-ḏosa ga'a unanga 'o 'a'a. 4Wakutu unanga 'o 'a'a ḏosa re 'o waro 'ai sala, 'oru ga'a unanga 'a tori'i bolo 'a sanga sababu 'o sihaga ngowa'a bolo dawongo sababu ngowa'a 'o sigogono ra unanga bolo 'ori i'a ga'a ri iranga unanga 'a sanga, 'oru ḇato gena-ge unanga balasu 'a siḏibo toma 'ori i'a ma dutu, 5bolo 'oru ḇato ga'a si'a'a unanga 'o masisasi sa-sakala, unanga balasu 'a siḏibo mo-moini re ḏuanga i'a dogo persen nyagi romoḏiḏi ḏi'i re 'a sipula'a toma 'ori i'a ma dutu toma wangere gena-ge ḏua unanga 'o sidoa'a 'ai jou-jou ngali rugi. 6Gena ḏua, unanga balasu 'o gasa sa'olo 'ai du-duusu toma imam: Gena-ge doba ma nau'u rimoi tai duo-duo ga'a ma lese lolara, bolo doba ma ijana mete'e pipisi salaka ga'a 'i sipake toma Suyu'u Lo-lomu, sa'olo 'ai jou-jou ngali rugi. 7Re 'imam balasu 'o sidoa'a jou-jou ngali rugi gena-ge di'a unanga 'ai ḏosa re Ma JOU ḏuanga i'a 'o singi-ngiranga 'ai ḏosa di'a 'oru ḇato mo-moini ga'a unanga 'o 'a'a singadolo 'o dadi sala, re unanga dadunu 'o dadi marimoi ra Ma JOU.>>
Jou-jou tau'u
8Ma JOU 'o kanau ra Musa ma betongo so'o ne: 9<<Siajele ra Harun re 'ai ngowa-ngowa'a nau'u mangale jou-jou tau'u ma 'atoranga-'atoranga. 'Imam balasu 'a sigare jou-jou tau'u gena-ge toma jou-jou tau'u ma ngi'i ma re'u re sieanga i'a utu moi re ma u'u leja-lejanga kama togumu ua. 10Da-daini ma daini i'a 'imam balasu 'o mapake juba re calana ḇoko'o ma dara ga'a si'a'a reo ḇa'a lenan. Wakutu haiwani ma la-la'eme 'i ro'u moini ḏua, unanga balasu 'a 'oro ma 'omanga toma jou-jou tau'u ma re'u kara 'a sigare toma jou-jou ma ngi'i ma gagoro. 11Gena ḏua 'imam balasu 'a ngali 'ai baju gena-ge reo baju ma lelegu kara gasa ma 'omanga gena-ge toma suyu'u ma daeraha ma ḏuḏunu toma ngi'i ga'a 'i siwola i'a sa'olo 'ofi di'a upa'a 'omanga gena-ge. 12U'u toma jou-jou tau'u ma ngi'i ma re'u balasu 'i leja-lejanga kama sengene ua, sisengene awa. Sababu gena-ge, toma 'orasa ma daini i'a wangere ma jelele, 'imam balasu dogo ma ate tau'u, re 'o sifato jou-jou tau'u toma enanga ma ngi'i ma re'u. Re toma jou-jou tau'u ma re'u 'o tau'u haiwani ma gaji mo-moini di'a jou-jou sababu dadunu marimoi moju ra Ma JOU. 13U'u toma jou-jou tau'u ma ngi'i ma re'u balasu 'i leja-lejanga taunu, awa simaha 'i sengene.>>
'Atoranga di'a jou-jou ngo-ngoromo
6:14-23
14'Atoranga mangale jou-jou ngo-ngoromo so'o ne: 'Imam matengo ra Harun 'ai ju'uda ma nau'u, unanga gena-ge balasu 'o tagi toma jou-jou ma ngi'i ma biono di'a sidoa'a jou-jou gena-ge. 15Unanga 'a 'oro gulupungu ma rousu i'a jobo moi toma jou-jou ngo-ngoromo gena-ge re sicapuru reo goroho zaitun re sigare manyanyi toma jou-jou ngo-ngoromo ma re'u, kara 'a tau'u toma jou-jou ma ngi'i ma re'u sa'olo nana'o rimoi mangale jou-jou mo-moini ri siwola i'a di'a Ma JOU, jou-jou gena-ge ma bounu ga'a sisanangi Ma JOU 'ai 'akala re sinyingara. 16'A Harun re 'ai ngowa'a nau'u balasu 'oro gulupungu ma jingianga gena-ge si'a'a roti kama ragi ua re ya oromo toma ngi'i ga'a siwola i'a ḏua sa'olo 'ofi-'ofi, gena-ge toma Suyu'u Lo-lomu ma soana. 17Gulupungu gena-ge toma jou-jou ngo-ngoromo ga'a Ma JOU 'o pula'a ra ananga sa'olo manga balangu, osumu reo ragi awa. Jou-jou ngo-ngoromo gena-ge lai 'ofi-'ofi, ma tero ḏi'i jou-jou di'a sigofi ngowa'a ra Ma JOU 'ai momina re jou-jou ngali rugi. 18Ngowa'a nau'u mo-moini ra Harun 'ai ju'uda tala, ananga nyengara ya oromo jou-jou ngo-ngoromo gena-ge ga'a sidoa'a ḏua di'a Ma JOU, 'atoranga gena-ge di'a kasingado-ngadolo i'a. Mada'a 'a guna ḇato, ga'a imam ua, na'o unanga 'o cigi ngo-ngoromo gena-ge, unanga ḏuanga i'a 'o sanga bodito sababu enanga 'i 'ofi-'ofi.>>#6:18 'A guna ga'a 'o cigi ngo-ngoromo gena-ge, unanga gena-ge balasu siwola i'a di'a Ma JOU sa'olo ngowa'a 'ofi-'ofi.#1Taw. 13:1-10; Nyo. 4:15
19Ma JOU 'o siajele ra Musa 'atoranga-'atoranga so'o ne: 20<<Wakutu 'a Musa ro siba-ba'ala goroho 'urapana ra Harun 'ai ngowa'a nau'u matengo 'ai sae'e togumu i'a, unanga gena-ge balasu 'o sidoa'a gulupungu ma rousu i'a kilo moi ra Ma JOU sa'olo jou-jou ngo-ngoromo. Ma gulupungu gena-ge balasu sibalangu dadi balangu ḏiḏi: Balangu moi di'a jou-jou toma 'orasa da-daini i'a, balangu moi ḏi'i di'a jou-jou toma 'orasa wangere tumunu. 21Gulupungu gena-ge balasu sicapuru mode-mode'e reo goroho zaitun kara tau'u toma roti ma para-para. Gena ḏua na tola-tola'a kara sidoa'a ra Ma JOU sa'olo jou-jou ngo-ngoromo ga'a ma bounu ga'a sisanangi Ma JOU 'ai 'akala re sinyingara. 22Rema duhu so'o gena-ge di'a kasingado-ngadolo i'a na'o sisolano 'imam matengo ra Harun 'ai ju'uda ma nau'u sa'olo 'Imam 'Agung. Unanga gena-ge balasu 'o sidoa'a jou-jou ngo-ngoromo ma tero so'o gena-ge ḏi'i. Re jou-jou ngo-ngoromo mo-moini balasu tau'u sa'olo jou-jou di'a Ma JOU. 23Jou-jou ngo-ngoromo mo-moini ga'a 'imam 'o sidoa'a ra Ma JOU, ananga 'aḏi oromo ceka'a i'a mai yoḏu'u. Mada'a mo-moini balasu 'a tau'u sababu mo-moini gena-ge di'a Ma JOU.>>
Jou-jou di'a sigofi ngowa'a ra Ma JOU 'ai momina
24Ma JOU 'o kanau ra Musa ma betongo so'o ne: 25<<Siajele ra Harun re 'ai ngowa-ngowa'a nau'u so'o ne: <'Atoranga mangale jou-jou di'a sigofi ngowa'a ra Ma JOU 'ai momina: Haiwani ga'a di'a jou-jou di'a sigofi ngowa'a ra Ma JOU 'ai momina, enanga balasu 'i sitola'a di'a Ma JOU toma ngi'i ma tero ga'a imam 'o tola'a haiwani di'a jou-jou tau'u. Ma jou-jou di'a sigofi ngowa'a ra Ma JOU 'ai momina gena-ge 'i siwola i'a sa'olo 'ofi-'ofi madutu. 26'Imam ga'a 'o sidoa'a jou-jou sigofi ngowa'a moju ra Ma JOU gena-ge sababu di'a ḏosa, unanga gena-ge balasu 'a oromo toma Suyu'u Lo-lomu ma soana toma ngi'i rimoi ga'a 'i siwola i'a sa'olo 'ofi-'ofi. 27Ngowa'a nau'u mo-moini ra Harun 'ai ju'uda tala, ananga nyengara ya oromo jou-jou ngo-ngoromo gena-ge ga'a sidoa'a ḏua di'a Ma JOU, 'atoranga gena-ge di'a kasingado-ngadolo i'a. Mada'a 'a guna ḇato, ga'a imam ua, na'o unanga 'o cigi jou-jou gena-ge ma la'eme, unanga ḏuanga i'a 'o sanga bodito sababu enanga 'i 'ofi-'ofi.#6:27 'A guna ga'a 'o cigi ngo-ngoromo gena-ge, unanga gena-ge balasu siwola i'a di'a Ma JOU sa'olo ngowa'a 'ofi-'ofi.#1Taw. 13:1-10; Nyo. 4:15 Na'o ma ngaunu 'i siajala toma baju, ngana balasu na 'uju toma ngi'i rimoi ga'a 'ofi-'ofi. 28Re ma giu'u tana'a ga'a sisa'ai jou-jou gena-ge, enanga balasu 'i sisuka. Re na'o sisa'ai jou-jou gena-ge toma giu'u tamḇaga, enanga balasu na 'ese re sigofi reo ḇanyo. 29'Ngowa'a na-nau'u mo-moini ra Harun 'ai ju'uda tala, ananga nyengara 'aḏi oromo jou-jou gena-ge ga'a 'ofi-'ofi madutu. 30Mada'a na'o ma ngaunu ma mamuni'a toma jou-jou di'a sigofi ngowa'a moju ra Ma JOU, enanga gena-ge gasa toma Kamara Lai 'Ofi-'Ofi toma Suyu'u Lo-lomu ma dara di'a si'a'a ngowa'a Israel dadunu 'aḏi dadi marimoi ra Ma JOU, jou-jou gena-ge matengo i'a mai ua nyengara 'a oromo, mada'a enanga balasu 'i sitau'u toma u'u singadolo moini ḏua.#4:3-12
தற்சமயம் தேர்ந்தெடுக்கப்பட்டது:
Imamat 6: SAJ
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
2025 Indonesian Bible Society (LAI)