Imamat 5
5
Jou-jou di'a sigofi ngowa'a ra Ma JOU 'ai momina
1Si'ade-'ade i'a, ngowa'a matengo 'o 'a'a ḏosa, sababu unanga 'o pula'a sakisi ua 'orasa sitalaḏi toma juruhakimi di'a pula'a sakisi mangale 'oru ga'a unanga ra 'isene bolo ra oḏi'i singadolo unanga balasu 'a doiti enanga ma hukumana. 2Ma 'ade-'ade rimoi ma lelegu: Kalaha matengo i'a kama sangaja ua, unanga ro cigi 'oru ga'a najis: bae haiwani nga-ngabala ga'a ri sengene bolo haiwani nga-ngaro ga'a ri sengene, re haiwani tare-tare ga'a ri sengene, singadolo unanga ro dadi najis. Dadi unanga 'o nga'unu riwara di'a silamo'o re siḏubuso Ma Jou'ongu Madutu. Ḏua unanga ro waro 'ai sala. 3Ma 'ade-'ade rimoi ma lelegu moju: Ngowa'a matengo i'a kama sangaja ua, unanga 'a cigi 'ori i'a ma 'asala toma manusia ga'a 'i najis 'oru ḇato, ḏua ro dadi najis. Ḏuanga i'a unanga ro waro 'ai ga'a gena-ge re unanga 'o dadi sala, 4bolo na'o matengo i'a kama sangaja ua, unanga 'o masisasi sabaranga di'a 'o madiga'a 'ori i'a ga'a rousu bolo cira toma 'oru ḇato ga'a ngowa'a 'aḏi masisasi, kara unanga 'o waro mangale 'ai ga'a gena-ge, re unanga 'o waro 'ai sala toma hali 'oru ḇato gena-ge. 5Wakutu ngowa'a ro waro mangale 'ai sala toma hali 'oru ḇato gena-ge re 'o mangaku unanga 'o 'a'a ḏosa. 6Gena ḏua, unanga balasu 'o gasa doba bolo 'abingi ma were'a tai duo-duo sa'olo du-duusu di'a unanga 'ai ḏosa, gena-ge sa'olo jou-jou di'a sigofi unanga ra Ma JOU 'ai momina di'a 'ai ḏosa ga'a 'o 'a'a. Re 'imam ḏuanga i'a 'o sidoa'a jou-jou gena-ge di'a unanga 'ai ḏosa, la unanga dadunu 'o dadi marimoi moju ra Ma JOU.
7<<Mada'a na'o ngowa'a gena-ge nga'unu ua 'o sidoa'a doba bolo 'abingi sa'olo du-duusu di'a unanga 'ai ḏosa, unanga balasu 'o gasa namo dara sabi moi bolo namo pombo sabi moi ra Ma JOU: rimoi sa'olo jou-jou di'a sigofi ngowa'a ra Ma JOU 'ai momina re rimoi ma lelegu sa'olo jou-jou tau'u. 8Namo-namo gena-ge unanga balasu 'a gasa toma 'imam. 'Imam 'a sidoa'a namo rimoi ma mulaingi sa'olo jou-jou di'a sigofi ngowa'a ra Ma JOU 'ai momina. Namo ma camala balasu 'a wiri'iti, mada'a singadolo tola'a awa. 9Namo gena-ge ma ngaunu mamuni'a siji-jiri toma jou-jou tau'u ma ngi'i ma gagoro. Ngaunu ma jingianga 'i ti'ini sisupu toma jou-jou ma ngi'i ma cimi; gena-ge jou-jou di'a sigofi ngowa'a ra Ma JOU 'ai momina. 10Togumu i'a, 'imam ga'a siḏagi munara, unanga 'o gasa jou-jou namo gena-ge rimoi ma soi ḏiḏi sa'olo jou-jou tau'u moini mete'e ma 'atoranga. Dadi 'imam ḏuanga i'a sidoa'a jou-jou gena-ge di'a unanga 'ai ḏosa ga'a unanga 'o 'a'a, re Ma JOU ḏuanga i'a 'o singi-ngiranga 'ai ḏosa, kara unanga dadunu 'o dadi marimoi moju ra Ma JOU.
11Na'o ngowa'a matengo gena-ge 'ai namo dara bolo namo pombo romoḏiḏi 'i cua sa'olo jou-jou di'a sigofi ngowa'a ra Ma JOU 'ai momina, dadi unanga balasu 'o gasa gulupungu ma rousu i'a kilo moi di'a 'ai ḏosa ga'a unanga ro 'a'a. Awa gulupungu gena-ge sicapuru reo goroho zaitun re manyanyi, sababu enanga gena-ge jou-jou di'a sigofi ngowa'a ra Ma JOU 'ai momina, jou-jou ngo-ngoromo ua. 12Gulupungu gena-ge unanga ḏuanga i'a 'a sipula'a toma 'imam ga'a siḏagi munara. Ḏua 'imam gena-ge balasu 'a 'oro jobo moi di'a dadi nana'o rimoi mangale mo-moini ri siwola i'a di'a Ma JOU, re unanga balasu 'a tau'u toma jou-jou ngo-ngoromo ga'a toma jou-jou tau'u ma ngi'i. Gena-ge jou-jou di'a sigofi ngowa'a ra Ma JOU 'ai momina. 13Dadi 'imam ḏuanga i'a sidoa'a jou-jou gena-ge di'a 'ai ḏosa ga'a unanga ro 'a'a re Ma JOU ḏuanga i'a 'o singi-ngiranga 'ai ḏosa ga'a unanga 'o 'a'a toma hali rimoi gena-ge re unanga dadunu 'o dadi marimoi moju ra Ma JOU. Re jou-jou gena-ge ma jingianga di'a 'imam, gena-ge ma tero sa'olo jou-jou ngo-ngoromo. >>
Jou-jou ngali rugi
14Ma JOU 'o siajele 'atoranga-'atoranga ra Musa ma betongo so'o ne: 15Na'o matengo 'o 'a'a ḏosa kama sangaja ua, sababu unanga 'o sitotomo ua 'ai jaji di'a 'o sidoa'a 'ori i'a ga'a ri siwola i'a ra Ma JOU, ngowa'a gena-ge balasu 'o gasa 'o doba ma nau'u rimoi bolo 'abingi ma nau'u rimoi ga'a ma lese lolara tai duo-duo ra Ma JOU sa'olo du-duusu ra di'a jou-jou ngali rugi. Gena-ge ma ijana mete'e pipisi salaka ga'a pake toma Suyu'u Lo-lomu ma dara. 16Sidogo ḏi'i, Unanga balasu 'o fangu 'ori i'a gena-ge ga'a ro jaji reo dogo persen nyagi romoḏiḏi. Ḏua, unanga 'a pula'a mo-moini toma 'imam. Gena ḏua unanga 'o pula'a doba ma nau'u gena-ge sa'olo 'ai jou-jou ngali rugi. Re 'imam ḏuanga i'a sidoa'a jou-jou ngali rugi gena-ge re Ma JOU ḏuanga i'a 'o singi-ngiranga 'ai ḏosa, re unanga dadunu 'o dadi marimoi ra Ma JOU.
17<<Na'o ngowa'a matengo 'o 'a'a ḏosa kama sangaja ua sababu 'o 'a'a 'ori i'a rimoi ga'a Ma JOU 'o simaha ua, ḏuanga i'a unanga gena-ge ro waro 'ai sala re balasu 'a doiti enanga ma hukumana di'a 'ai ga'a ma rapu. 18Unanga balasu 'o gasa doba ma nau'u rimoi ga'a ma lese lolara toma 'imam, sa'olo jou-jou ngali rugi ga'a ma ijana mete'e pipisi salaka ga'a pake ra Suyu'u Lo-lomu ma dara. Re 'imam ḏuanga i'a sidoa'a jou-jou ngali rugi gena-ge di'a unanga 'ai ḏosa ga'a unanga 'o 'a'a kama sangaja ua re Ma JOU ḏuanga i'a 'o singi-ngiranga 'ai ḏosa, kara unanga dadunu 'o dadi marimoi ra Ma JOU. 19Gena-ge jou-jou ngali rugi, di'a ngowa'a ga'a mode-mode'e 'o 'a'a sala ra Ma JOU.>>
தற்சமயம் தேர்ந்தெடுக்கப்பட்டது:
Imamat 5: SAJ
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
2025 Indonesian Bible Society (LAI)