Amatiyu 3
3
Oshpa ba Eyohana la a kpo abaptisma a nyum
1Omba mi lo, Eyohana la a kpo moare abaptisma aŋa a ba a nyum oshpa akla ba obiŋ Eyahuda. 2Aŋa a nyum oshpa a lu mi le, Agimi e nyiŋ odzudzu bimi, okyku eshi Oreŋ ba Ongyeŋ o wo osusku a mo! 3Eyohana angyiŋ a wo arehwĩ ba Eshaya arehwĩ ba Ahogbrẽ a hom otum a lu odlo eshri baŋ a lu mi le,
Arekyeŋ a la a su osu akla a lu mi le,
E nyuŋ ozhẽ ba Adigi-odne e kpo okyku ŋa.
E kpo ozhẽ la o wo tsoŋ okyku o daŋ a dzi ma.
4Moa a ngʼgo aknye ba Eyohana la amasẽ ebyi moa a bzi lo ma arakumi. Aŋa a la a ta ashye akpa osĩ baŋ. Nga a la a taŋ amgbatso, nga a ri ekapsu. 5Moare a zgi Orushalima, ta la obiŋ ba Eyahuda, ta la akekaŋ ba ondzu ba Ordu a ba ibu baŋ. 6Moare a zgi egŋe odlobi mo nga aŋa a kpo mo abaptisma ondzu ba Ordu.
7Omba ba Eyohana a ka moaEfarisi, pa la moaEsaduki nzenze a ba okyku o daŋ a kpo mo abaptisma nga, aŋa a nyuŋ mo a lu mi le, Agimi emabi, ayi a lu a da gimi, bimi é kpo é gbu bimi é gro ombgu ba Ahogbrẽ la ó ba? 8Agimi e kpo ayakplo la á ba a tsa bimi e sheŋ e nyiŋ odzudzu bimi. 9Agimi e ka eka bimi e wo la ombgukyeŋ ma mbo, okyku bimi e wo moanwye ba Ebrahim angyiŋ mbo. Ame e lu e da gimi, Ahogbrẽ a kpo a gbu baŋ a zhiŋ ézhim la e shki hi, a da mo a dzu moanwye ba Ebrahim! 10Ogyu o wo okyku o kplu akiki emgbʼbo. Akiyaŋ a mbo la a fu agbro la a wo adzi mbo, moa á kplu lo okukũ nga, moa á shri lo á ygi ovo. 11Ame e la e kpo gimi abaptisma la amihĩ okyku o tsa ba agimi e ghwo obiŋ bgu. Ambo are la á ba a ba ambla me, aŋa á kpo gimi abaptisma la Ogbgaodzi, ta la ovo. Aŋa a wo ekʼpo a gre me, nga ame e tse ma ba ame e sko akpadga baŋ mbo. 12Aŋa nga a wo la ofpo ma, nga aŋa á jygu ashri lo. Aŋa á pla eyi esekʼpa lo á shri á ygi anjygu baŋ nga á shri ogbagba á ygi ovo la o ri o khwo nga mbo!
Moa a kpo Eyesu abaptisma
13Omba mi lo, Eyesu a zgi Egalili a ba ondzu ba Ordu okyku o da Eyohana a kpo ŋa abaptisma. 14Ambo Eyohana a zga ngre okyku o da Eyesu a nyiŋ aga baŋ. Eyohana a nyuŋ Eyesu a lu mi le, Ame e klo boŋ angyiŋ o kpo me abaptisma, ambo aŋo o ba okro me! 15Ambo Eyesu a tno ŋa ma a lu mi le, Aŋo o da lo o ygi eka he ohuhuhi, okyku eshi ozhẽ he lo angyiŋ, agi é ba e kpo ekployaŋ a mbo ba Ahogbrẽ a klo. Eyohana nga a bmi.
16Ambla ba moa a kpo Eyesu abaptisma a khwo nga, aŋa a zgi ami lo, ongyeŋ o hwile, nga aŋa a ka Ogbgaodzi ba Ahogbrẽ o gile o ba obiŋ eka ba aklungu, nga o tspi eshri baŋ. 17Ambla he nga, enzi e zgi Ongyeŋ e ba e lu mi le, Anwye me ba esesla angyiŋ a wo ahi. Esõ me e la e gno oraŋ ka la ŋa e gre eshri.
தற்சமயம் தேர்ந்தெடுக்கப்பட்டது:
Amatiyu 3: EGONT74
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Eggon New Testament © United Bible Societies, 1974. Bible Society of Nigeria