Amatiyu 2
2
Moazhẽ ba egi etne
1Moa a mbre Eyesu osku ba Ebetalami, obiŋ ba Eyahuda. Omba he lo, Ehirudu angyiŋ a wo anyuŋ-areŋ. Ambla fi nga, moarehwĩ la a la a klo aga ta la eyi enzo, moa a zgi egi etne a ba Orushalima nga moa a zhĩ a lu mi le, 2Anwye able ba moa a mbre ŋa, baŋ angyiŋ á ba a dzu anyuŋ-areŋ moaEyahuda a wo ayaŋ? Agi e ka eyi enzo baŋ omba ba alo e zgi egi etne. Okyku eka he agi e ba okyku o hlu ŋa eshko. 3Omba ba Ehirudu anyuŋ-areŋ a gno eka he nga, esõ e kpla ŋa e gbu. Ekakahelo, esõ e kpo ta la areyaŋ a mbo la a wo osku ba Orushalima. 4Ehirudu nga a pla moandakʼpo olu ba Ahogbrẽ, pa la moa la a nye odaŋ a shki nga a zhĩ mo a lu mi le, Moa nga á mbre Emisiya ayaŋ? 5Moa a tno ŋa ma a lu mi le Moa á mbre ŋa osku ba Ebetalami, obiŋ ba Eyahuda. Okyku eshi arehwĩ ba Ahogbrẽ a hom otum a ta a lu mi le,
6Aŋo Ebetalami obiŋ ba Eyahuda,
Aŋo angyiŋ o wo fifi o gre pyeŋ eshki moareŋ ba Eyahuda mbo.
Okyku eshi andakʼpokyeŋ á zgi okro boŋ á ba a ba.
Aŋa angyiŋ á ba a tsa moarehwĩ me moaEsrayila.
7Okyku eka he nga, Ehirudu a bzi moazhẽ ba egi etne lo a da mo a kpo eshki shu, nga a da mo a lu omba ba moa a ka eyi enzo lo a daŋ. 8Ambla he nga aŋa a hom mo otum a da mo a gre Ebetalami. Aŋa a nyuŋ mo a lu mi le, Agimi e yi e klo anwye lo osusuŋ, o wo bimi e hwiŋ ŋa le, e ba e lu e da me, okyku o da me a mbo e yi e hlu ŋa eshko ko-ko. 9Ambla he nga moazhẽ lo a zhiŋ emo ogbu. Omba ba moa a wo ozhẽ nga, eyi enzo lo e zgi, ehi lo angyiŋ moa a ka egi etne. Alo e gre ozhẽ nga moa a lu lo ma. Alo e gre e yi e tspi okro ba anwye lo a wo ma. 10Moa a kpo ovye a gre eshri omba ba moa a ka eyi enzo lo! 11Moa a gre odne eshyẽ nga moa a ka anwye lo ta la anaŋ Emeri. Moa a kne a shki obiŋ, nga moa a hlu ŋa eshko. Moa a hwile apuoshri mo nga moa a se ototno moa a shri. Moa a shri ezanariya, ta la afarakis ta la emri.
12La onze nga, Ahogbrẽ a shĩ mo ma moa a bla a yi okro Ehirudu nga mbo. Okyku eka he nga moa a sõ ozhẽ-okyeŋ angyiŋ a bla a gre odne a mo.
Moa a knye a gre obiŋ ba Amasla
13Ambla ba moazhẽ lo a zhiŋ ogbu a gre bgu, anwyeadga ba Adigi-odne a lu odlo ta la Oyusufu la onze a lu mi le, Aŋo o kso, nga o sko anwye lo ta la anaŋ, o knye o yi obiŋ ba Amasla, nga o dzu ma ma-me o tsa onda ba ame e doŋ o kso, okyku eshi Ehirudu a klo o bga anwye lo. 14Okyku eka he, okyukyku nga, Oyusufu a sko anwye lo ta la ashe lo, moa a knye a gre obiŋ ba Amasla. 15Aŋa a dzu ahe lo angyiŋ o tsa ba Ehirudu a kpu.
Ohe lo o kpo okyku o bli ekplo ba Adigi-odne a da arehwĩ baŋ a hom otum a lu. A lu mi le, Ame e bzi anwye me obiŋ ba Amasla.
Moa a bga moanwye
16Omba ba Ehirudu a ka a bmye ba moazhẽ ba egi etne a bile ŋa, aŋa a kpo olom. Okyku eka he aŋa a jygu odaŋ ma moa a bga moanwyealom la a kpo eyi eha, pa la moa la a kpo eyi eha mbo moanwyealom la a wo Ebetalami, ta la akekaŋ ba Ebetalami. Aŋa a tsi omba ba moazhẽ lo a lu moa a ka eyi enzo lo e zgi a ka ayga a jygu odaŋ.
17Okyku eka he, ekplo ba Erimiya, arehwĩ ba Ahogbrẽ a hom otum, a lu, e bli. Aŋa a lu mi le,
18Moa a gno okũ osku ba Arama,
Okũ lo o vu olo o gre eshri.
Arahila nga a wu okũ okyku moanwye baŋ.
Esõ e tpi ŋa ayi e gre eshri,
Okyku eshi moa a bga moanwye baŋ pyeŋ.
Moa a bla a zgi Amasla a ba
19Ambla ba Ehirudu a kpu nga, anwyeadga ba Adigi-odne a ba okro Oyusufu la onze obiŋ ba Amasla, a lu mi le, 20Aŋo o kso, o sko anwye lo ta la anaŋ, o bla o yi obiŋ moaEsrayila a mo. Okyku eshi moare la a klo o bga anwye lo a kpu bgu. 21Okyku eka he Oyusufu a kso nga a sko anwye lo ta la anaŋ, nga a bla a gre a yi obiŋ moaEsrayila.
22Omba ba Oyusufu a gno ba Akelos angyiŋ a yga oreŋ adaŋ Ehirudu obiŋ ba Eyahuda nga, eyli e kpo ŋa, nga aŋa a klo o dzu ahe lo mbo. Moa a sa a lu a daŋ la onze ma aŋa a yi obiŋ ba Egalili. Okyku eka he aŋa a gre obiŋ ba Egalili, 23nga aŋa a kpo odne baŋ osku moa a bzi lo ma Anazarata. Aŋa a kpo eka he okyku o bli ekplo ba moarehwĩ Ahogbrẽ a hom otum a lu. Moa a lu mi le, Moa á bzi ŋa Anazari.
தற்சமயம் தேர்ந்தெடுக்கப்பட்டது:
Amatiyu 2: EGONT74
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Eggon New Testament © United Bible Societies, 1974. Bible Society of Nigeria