Yohane 6
6
Yesu koweng'a chijo wanu wengi
(Mat 14:13-21; Malk 6:30-44; Luk 9:10-17)
1Agho haghabitile Yesu kaloka kumwambu mwa litsimbu lya Galilaya au litsimbu lya Tiberiya. 2Kingili kulu lya iwanu limuwinza kwaapfila tsawona ipfihulo pfayatendile pfa ukuwahonya iwatamu. 3Kuya Yesu kagheluka kuchidunda, naye ako kakala hasi hamwe na iwanafunzi wake. 4Na ichihungo cha Ipasaka ya Wayahudi chikala chahabehi. 5Yesu hayenule tsinenge kona mtingano mkulu ghwa iwanu womtsila, kamghutsa Filipi, “Tudaha kughula kwani pfighate tuweng'e iwanu awano waje?” 6Yesu tsakaghutsa apfino kumghetsa Filipi, kwaapfila tsakamanya chayafikitse ukutenda.
7Filipi kamwidika, “Hata fetsa dinari miya mbili ng'atsidaha baye kughula pfighate chila imunu yapate ngaa chidogho!”
8Mwanafunzi yungi wa Yesu, Andereya, ndughu yake Simoni Petiri, kamlongela Yesu, 9“Ahano hana msongolo yumwe, kana pfighate pfitano pfa shayiri na somba weli, lekeni apfo pfitsowenelatse iwanu wengi kama awano?”
10Yesu kalonga, “Walongeleni iwanu wakale hasi.” Hanu ahala tsahana mitsani mingi. Baho iwanu wakala hasi, na ihesabu yawo tsayopfika iwamale kama elufu tano. 11Baho Yesu kasola ipfighate apfila, kalonga, mighede kwa Imulungu, kawagholela iwanu iwakalile hasi mbaka wose wenela. Na kwa wasomba atenda pfipfo. 12Iwanu wose haweghutile, kawalongela iwanafunzi wake, “Dondoleni ipfihande pfa ipfighate ipfikalile, chochose chileke kwagha.”
13Apfo wapfidondola, wamemetsa pfiseghe kumi na pfili, kulawa mna ipfighate apfila pfitano pfa ishayiri iwanu pfiwajile.
14Iwanu hawonile ichihulo ichitendighwe na Yesu, wandusa kulonga, “Kweli ghendo ayuno yuyo inabii iyakutsa muisi.” 15Kuya Yesu kamanya kuwa iwanu tsawabama watse wamghoghe wamtende yawe mfalume, apfo kagheluka keli kuchidunda yeye yaliyeka.
Yesu koghenda mchanya mwa ghamatsi
(Mat 14:22-23; Malk 6:45-52)
16Litsuwa haliswele, iwanafunzi wake Yesu wahulumka mbaka kuna litsimbu, 17wadina mnumbwi waloke litsimbu waghende Kaperinaumu. Lelo kukala na chisi, na Yesu tsakakala ng'ana yawatsile baye. 18Beho kulu lyanza ukuduma, na kutibula ghamatsi. 19Wanafunzi wake hawaghendile utali wa kilomita tano au sita apfino, wamwona Yesu koghenda mchanya mwa ghamatsi, kakutsa habehi na ghumnumbwi, wapfuka ng'ani. 20Lekeni Yesu kawalongela, “Ayo nene, mleke kupfuka!” 21Kuya wabama wambokele mna ghumnumbwi, bahala ghumnumbwi ghupfika kuna ufuo kwawabamile ukughenda.
Iwanu wombama Yesu
22Litsuwa liwinzile, likingili lya iwanu ilikalile kumwambu mwa litsimbu watanga kuwa jana tsa kukala na mnumbwi ghumwe ghuliyeka, na Yesu ng'engile baye mna ghumnumbwi agho hamwe na iwanafunzi wake, ila iwanafunzi wake woka waliyeka. 23Kuya minumbwi ingi ilawile Tiberiya tsaipfika habehi na hanu ahala iwanu hawajile ipfighate, Imndewa hayalongile mighede. 24Iwanu hawamanyile ka Yesu na iwanafunzi wake ng'awalibaho baye hanu ahala, wengila mna iminumbwi waghenda Kaperinaumu kumbama Yesu.
Yesu yuyo ichijo cha ugima
25Iwanu hawamwonile Yesu ubali ungi wa litsimbu, wamghutsa, “Mlangulitsi, apfi ahano upfikile tsuwachi?”
26Yesu kawedika, “Nowalongelani ghendo, mwemwe mwonibama si kwaapfila mwona ipfihulo baye, ila kwaapfila mja ipfighate mwighuta. 27Mleke kuchisang'anila ichijo ichikola, lekeni mchisang'anile ichijo ichikala kwa ugima wa ghamatsuwa ghose, ichijo chayatsomwing'ani Imwana wa Adamu, kwaapfila ayo yeye Baba Imlungu iyamsaghule na kumtoghola.”
28Kuya wamghutsa Yesu, “Apfi tutende choni ili tutende achila chayobama Imulungu tuchitende?”
29Yesu kawedika, “Achino ichinu chayobama Imulungu mtende, mumtoghole ayula iyamtumile.”
30Apfo wamghutsa, “Angu chihulo chachi chausang'ana ili tuchone tukutoghole? Utsotenda choni? 31Iwabala wetu waja mana kunyika; ka pfayandikighwe mna Ghamaandiko, ‘Kaweng'a ichijo kulawa kulanga waje.’ ”
32Yesu kawalongela, “Nowalongela ghendo, si Musa baye iyoweng'a ichijo kulawa kulanga, ila Aba wangu yuyo iyoweng'a ichijo cha kweli kulawa kulanga. 33Kwaapfila ichijo cha Imulungu yuyo ayula iyakutsa kulawa kulanga na kuweng'a ugima iwanu iwali muisi.”
34Wamlongela, “Ghwe Mndewa, utwing'e ichijo achino matsuwa ghose.”
35Kuya Yesu kawalongela, “Nene na ichijo cha ugima, ayula iyakutsa kuna nene ng'atsakwona nzala baye, na ayula iyonitoghola nene ng'atsakwona ng'ilu baye ghendo. 36Lekeni nowalongela, Mmbona, lekeni ng'ambama kunitoghola baye. 37Wose wayongaya Aba watsakutsa kuna nene, na imunu wowose iyonitsila, nene sitsomwasa kunze baye. 38Kwaapfila nene sihulumke kulawa kulanga ili nitende pfanibama nimwenyegho baye, ila kutenda pfayobama ayula iyanitumile. 39Na achino chicho chiyobama ayula iyanitumile, ndeke kumwaghitsa munu wowose mna iwanu awala wayangaile, ila nimtsihilule mna litsuwa lya utsighilo. 40Kwaapfila Aba wangu kobama chila imunu iyomlola Imwana na kumtoghola yawe na ugima wa ghamatsuwa ghose, na nene nitsomtsihilula mna litsuwa lya utsighilo.”
41Wayahudi wandusa kumnung'unikila kwaapfila kalonga, “Nene na ichijo ichihulumke kulawa kulanga.” 42Walonga, “Apfi ayuno si Yesu imwana wa Yosefu baye, yatummanya aba wake na mai wake? Lelo yodahatse kulonga, ‘Nihulumka kulawa kulanga?’ ”
43Yesu kawalongela, “Mleke kwinung'unikila. 44Kuduhu munu iyodaha kunitsila nene ka Aba iyanitumile ng'amkweghile baye, na nene nitsomtsihilula mna litsuwa lya utsighilo. 45Yandikighwa mna ipfitabu pfa manabii, ‘Iwanu wose watsolangulitsighwa na Imulungu.’ Chila munu iyomtegheletsa Aba na kwilangulitsa kuna yeye katsakutsa kuna nene. 46Silonga ka kuna munu kamwona Baba baye, ila ayula iyalawile kwa Imulungu, ayo yuyo yaliyeka iyamwonile Baba. 47Nowalongela ghendo, munu wowose iyotoghola kana ugima wa ghamatsuwa ghose ing'aghomala. 48Nene na ichijo cha ugima. 49Iwabala wenu waja imana kunyika lekeni wafa. 50Achino chicho ichijo ichihulumka kulawa kulanga'ili imunu yachisole yachije, yaleke ukufa. 51Nene na ichijo ichili na ugima, ichihulumke kulawa kulanga; imunu yang'aja ichijo achino, katsokala mgima ghamatsuwa ghose ing'aghohupa; na ichijo chanilapfa nene lulo ilukuli lwangu, kwa ajili ya ugima wa iwanu wa isi yose.”
52Kuya Wayahudi wandusa ukwisonga iwenyegho, weghutsa, “Apfi imunu ayuno yodahatse kutwing'a ilukuli lwake tuluje?”
53Apfo Yesu kawalongela, “Nowalongela kweli ghendo, ka ng'amkuja baye ilukuli lwa Imwana wa Adamu na kuinwa idamu yake, ng'amkuwa na ugima baye mghati mwenu. 54Imunu iyoluja ilukuli lwangu, na kuinwa idamu yangu, ayo kana ugima wa ghamatsuwa ghose ing'aghomala, na nene nitsomtsihilula mna litsuwa lya utsighilo. 55Kwaapfila ilukuli lwangu lulo ichijo cha kweli, na idamu yangu iyo cha ukunwa cha kweli. 56Imunu wowose iyoluja ilukuli lwangu, na kuinwa idamu yangu, ayo koghendelela ukukala mghati mwangu, na nene nokala mghati mwake. 57Ka apfila Baba iyali na ugima pfayanitumile, na kwaajili ya Aba nene nokala mgima, pfipfo imunu iyondiya nene katsokala mgima kwaajili yangu nene. 58Achino chicho ichijo ichihulumke kulawa kulanga, si ka imana iwajile iwabala wenu kuya wafa. Lekeni imunu iyakuja ichijo achino katsokala mgima matsuwa ghose ing'aghohupa.” 59Yesu kaghalonga agho hayang'ali yolangulitsa mna lisinagogi ako Kaperinaumu.
Mbuli tsa Ghamatsuwa Ghose
60Wanu wengi mna iwanafunzi wake hawahulike apfo, walonga, “Ghamalangulitso aghano makomu. Apfi yuhi iyodaha kughatoghola?”
61Kuduhu munu iyamlongele Yesu ichinu chawang'ali wonung'unika iwanang'ina wake, lekeni yeye tsakamanya, apfo kawaghutsa, “Ule ghamalangulitso aghano ghoghetsa ukutoghola kwenu? 62Lelo itsakuwatse hamtsomwona Imwana wa Adamu kakuya kulanga, ako kwayakalile mwanduso? 63Iloho ya Imulungu iyo ighela ugima, ilukuli ng'alughetsa chinu baye. Imbuli yaniwalongele iyo iloho, na iyo ugima. 64Hata apfo, wangi wenu mng'ali ng'amtoghola baye.” Kwaapfila Yesu tsakamanya kulawa mwanduso tsina nani ing'awotoghola na tsakamanya nani iyatsomhunduka. 65Kuya Yesu kalonga keli, “Kwaajili ayo tsaniwalongela kuduhu munu iyodaha kunitsila nene mbaka Baba yamtende yadahe ukunitsila.”
66Kulawa litsuwa alyo iwanafunzi wake wengi woya kuchughu, ng'awamuwinzile kel bayei. 67Yesu kawaghutsa iwanafunzi wake kumi na weli, “Pfii, namwe pfipfila mwobama kuka?”
68Simoni Petiri kamwidika, “Ghwe Mndewa, tughende kwa nani? Ghweghwe kuna tsimbuli itsa ugima wa ghamatsuwa ghose ing'aghohupa. 69Twotoghola na twotanga ka ghweghwe kwa Iyelile wa Imulungu.”
70Kuya Yesu kawedika, “Angu nene siwasaghuleni mwemwe kumi na weli baye? Lekeni yumwe wenu kasetani.” 71Yesu tsayang'ali yolonga mbuli tsa Yuda, imwana wa Simoni Isikarioti, yumwe wa iwanafunzi awala kumi na weli, iyatsomhunduka hambele.
Iliyochaguliwa sasa
Yohane 6: LBV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
