Yohane 7
7
Yesu na ndughu tsake
1Hambele, Yesu kangila Galilaya; mana ng'abamile kwangila Yudeya baye, kwaapfila wapfilongotsi wa Wayahudi wang'ali wombama wamkome. 2Lelo ichihungo cha Wayahudi cha Ipfibumbulika tsa chahabehi, 3apfo wandughu tsake wamlongela, “Ulawe ahano ughende Yudeya, ili iwanafunzi wako wone ipfihulo pfausang'ana. 4Kuduhu munu iyopfisa aghala ghayotenda aku kobama yamanyike na iwanu. Kwaapfila ghweghwe kwotenda ipfinu apfino, wilanguse kwa iwanu wa isi yose.” 5Mana hata wandughu tsake tsang'awamtoghole baye.
6Yesu kawalongela, “Ghumda ghwangu nene ng'ana ghupfike baye, lekeni ghumda ghwenu mwemwe ghwabaho matsuwa ghose. 7Iwanu wa isi ng'awodaha kuwehilani mwemwe baye, lekeni wonyihila nene kwaapfila nolangusa ka aghala ghawotenda gheha. 8Ghelukani mwemwe mghende kuna ichihungo. Nene sigheluka nighende baye kuna ichihungo achino, kwaapfila ghumda ghwangu ng'ana ghupfike baye.” 9Hayalongile alyo, kaghendelela ukukala kuko Galilaya.
Yesu mna Ichihungo cha Ipfibumbulika
10Wandughu tsake hawagheluke na kughenda kuna ichihungo, baho naye Yesu kagheluka kaghenda, lekeni ng'aghendile mwatsimwatsi baye, ila kaghenda kwa chipfiso. 11Lelo iwakulu wa Wayahudi wang'ali wombama ako kuna ichihungo, waghutsa, “Apfi yalikwani imunu ayula?”
12Mna likingili, iwanu wang'ali wenong'onetsa tsimbuli tsake. Wanu wangi walonga, “Imunu ayuno kanogha;”
Na wangi walonga, “Mbe, ila kowabugha iwanu.” 13Lekeni kuduhu munu iyadahile kulonga mbuli yake yoyose mwatsimwatsi, kwaapfila wang'ali wowapfuka iwakulu wa Wayahudi.
Yesu kolangulitsa mna Ichihungo
14Ichihungo haching'ali haghatighati Yesu kagheluka kuna lihekalu, kandusa ukufundisa. 15Iwakulu we Wayahudi wakangawala, walonga, “Apfi imunu ayuno yaghapatiletsa ghamalangulitso aghano, naye ng'asomile baye?”
16Yesu kawedika, “Ghamalangulitso ghanilangulitsa si ghangu baye, ila gholawa kwa ayula iyanitumile. 17Munu wowose yang'asaghula ukutenda pfayobama Imulungu, katsomanya ka ghamalangulitso ghangu gholawa kwa Imulungu au nolonga ghakwangu nimwenyegho. 18Imunu iyolonga mbuli tsake imwenyegho kobama utunitso wake imwenyegho, lekeni imunu iyobama utunitso wa ayula iyamtumile ayo kawakweli, kuduhu ughutsu mna yeye. 19Apfi Musa ng'aweng'ile Ghamalaghitso baye? Lekeni mna mwemwe kuduhu munu iyokinda Ghamalaghitso. Hebali mbama mnikome?”
20Likingili lya iwanu limwidika, “Ghweghwe kuna chinyamkela; yuhi iyobama yakukome?”
21Yesu kawedika, kalonga, “Nene nitenda chihulo chimwe, namwe wose mkangawala. 22Musa tsakamlaghitseni muwengitse ngoma iwanenu, hata ka si Musa baye ila iwabala wenu iwanduse ichihendo acho, namwe mwomwingitsa ngoma imunu hata mna Litsuwa lya Sabato. 23Ka mwomwingitsa ngoma imunu mna Litsuwa lya Sabato ili kukindilisa Ghamalaghitso gha Musa, hebali mkwona maya kwaapfila nimhonetsa imunu mna Litsuwa lya Sabato? 24Mleke kuhigha kwa ukulola kuliyeka, ila muhighe kwa haki.”
Apfi ayuno yuyo Kiristu?
25Baho wanu wangi wa Yerusalemu wandusa kwighutsa, “Apfi si imunu ayuno baye iwombama wamkome? 26Lola! Kolonga mwatsimwatsi ghendo, wala ng'awomlongela chinu baye. Semeghe iwakulu womanya ghendo ka ayu yuyo Kiristu? 27Lekeni imunu ayuno kwayolawila twetwe twomanya, ila Kiristu hayatsakutsa kuduhu munu iyatsomanya yolawila kwani.”
28Apfo Yesu hayang'ali yolangulitsa mna lihekalu, kalonga kwa kukemelela, “Ona, nene mwonimanya, na mwomanya kwnilawila kwani. Nene sitsile kwa kubama nimwenyegho baye, lekeni iyanitumile ka ukweli, na mwemwe ng'amummanyile baye, 29lekeni nene nimmanya kwaapfila nilawila kuna yeye, naye yuyo iyanitumile.”
30Baho wabama wamghoghe, lekeni kuduhu munu iyagholose ghumoko ghwake kumghogha, kwaapfila litsuwa lyake tsang'ana lipfike baye. 31Lekeni wanu wengi kulawa mna likingili wamtoghola, walonga, “Pfihi Kiristu hayatsakutsa katsotenda pfihulo pfingi kubita imunu ayuno?”
Wabetetsi wotumighwa wamghoghe Yesu
32Mafarisayo wahulika iwanu pfawonong'ona tsimbuli tsa Yesu. Apfo iwatambika wakulu na Mafarisayo wawatuma iwabetetsi wakamghoghe. 33Baho Yesu kawalongela, “Nokala namwe kwa matsuwa chidogho, kuya nitsakuka nighende kwa ayula iyanitumile. 34Mtsonibama, lekeni ng'amtsombona baye, kwaapfila ng'amdaha baye kutsa hanu hanili nene.”
35Pfilongotsi wa Wayahudi welongela iwenyegho, “Angu imunu ayuno yatsoghenda kwani mbaka tuleke kumwona? Pfii katsoghenda kuna tsikaye tsa Wagiriki kwawokala iwanu wetu, na kuwalangulitsa Wagiriki? 36Apfi tsayana mana yachi hayalongile, ‘Mtsonibama, lekeni ng'amtsombona,’ na ‘ng'amdaha kutsa hanu hanili nene baye’?”
Ghumto ighulapfa ghamatsi gha Ugima
37Mna litsuwa lya utsighilo na litsuwa likulu lya ichihungo, Yesu kema, kakemelela, “Munu wowose yana ing'ilu, yatse kuna nene yanwe. 38Munu wowose iyonitoghola nene, ka Ghamaandiko pfagholonga, ‘Imito ya ghamatsi ighoghela ugima itsakwitika kulawa mghati mwake.’ ” 39Aho tsayang'ali yolonga mbuli tsa Iloho, yawatsombokela iwanu awala iwomtoghola. Mbaka litsuwa alila Iloho tsayang'ali ng'ana yalapfighwe baye, kwaapfila Yesu tsakakala ng'ana yatsihiluke baye na kutunitsighwa.
Kwighola kwa iwanu kwaajili ya Yesu
40Hawahulike ghamalangulitso agho, wanu wangi mna ghumtingano walonga, “Kweli ghendo imunu ayuno yuyo inabii ayula.”
41Wanu wangi walonga, “Ayuno yuyo Kiristu!.”
Lekeni wanu wangi wang'ali weghutsa, “Pfihi Kiristu kodaha kulawa Galilaya? 42Apfi Ghamaandiko ng'aghalongile baye kama Kiristu katsolawila mlukolo lwa Daudi, na kulawa Betilehemu, ghumji ghuyakalile Daudi?” 43Apfo iwanu tsawebaghula kwaajili yake. 44Wanu wangi wabama kumghogha, lekeni kuduhu munu iyamgholosele ghumoko.
Iwakulu wa Wayahudi wolema ukumtoghola Yesu
45Baho iwakalitsi wa lihekalu woya kwa iwakulu wa iwatambika na Mafarisayo, nawo wawaghutsa, “Hebari ng'amumghoghile?”
46Nawo wawedika, “Ng'ana munu wowose yalonge kama imunu ayuno pfayolonga!” 47Kuya Mafarisayo wedika, “Pfihi namwe pfipfila mbughighwa? 48Kuna mkulu wowose iyomtoghola? Au yumwe wa Mfarisayo iyomtoghola? 49Lekeni likingili alino lya iwanu ing'awomanya Ghamalaghitso gha Musa, walighitighwa.”
50Nikodemu, Farisayo miyao, ayula tsaiyamghendele Yesu aho mwanduso, kawalongela, 51“Apfi Ghamalaghitso ghetu ghomhigha imunu wowose ka ng'ana tumhulikitse na kumanya chayatendile?”
52Wamwidika, “Pfihi naghwe kolawa Galilaya? Lola Ghamaandiko, kutsomanya ka kuduhu nabii iyolawila Galilaya.” 53Kuya chila munu koka ukaye yake.
Iliyochaguliwa sasa
Yohane 7: LBV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
