Yohane 5

Yesu komhonya ichimbete

1Hambele chidogho, hakala na chihungo cha Wayahudi, naye Yesu kagheluka kaghenda Yerusalemu. 2Ako Yerusalemu, habehi na lilango ilikemighwe Lango lya Wang'olo, tsahana tsimbu ilikemighwe Betizata kwa Chieburaniya, litsimbu alyo tsa litsungulukighwa na pfibwalu pfitano. 3Mna ipfibwalu apfo wang'ali wowasa wanu wengi iwatamu, pfipofu, pfimbete, na iwanu iwaholole. Awo wang'ali wobeta ghamatsi ghatibulighwe, 4kwaapfila malaika wa Imtwatsa yang'ali yohulumkagha mna ghamatsi na kughatibula. Imtamu iyakwandusa kwingila mna ghamatsi ighatibulighwe, tsakahonyighwa utamu wo wose uyali nawo. 5Lelo ahala hakala na munu yumwe iyakalile mtamu kwa miyaka selasini na nane. 6Yesu hayamwonile imtamu ayo kawasa ahala, aku kamanya ka yang'ali yoghula kwa matsuwa mengi, baho kamghutsa, “Pfii kwobama uhone?”

7Imtamu ayula kamwidika, “Ghwe Mndewa, nahela munu wa kunyingitsa mna litsimbu ghamatsi haghotibulighwa, hanibama kwingila, munu yungi konongolela.”

8Yesu kamlongela, “Winuke! Sola ichilagho chako uke.” 9Bahala imunu yula kahona, kasola ichilagho chake, koka.

Ichinu achino tsachilawila mna Litsuwa lya Sabato. 10Baho iwakulu wa Wayahudi wamlongela imunu iyahonile, “Leloli tsuwa lya Sabato, ghamalaghitso ghoghoma ghweghwe ukuchiduta ichilagho chako.”

11Lekeni imunu ayo kawedika, “Imunu iyanitendile nihone yeye iyanilongele, ‘Sola ichilagho chako uke.’ ”

12Wamghutsa, “Angu imunu iyakulongele usole ichilagho chako uke nani?”

13Lekeni imunu ayula iyahonile tsang'ammanyile baye imunu iyamuhonetse, kwaapfila iwanu tsawengi na Yesu tsa kenyalabula koka.

14Hambele Yesu kampfika imunu ayula mna Ing'anda ya Imlungu, kamlongela, “Tegheletsa, sambi kuhona. Uleke kutenda nzambi, hela chitsokulawila chinu chihile ng'ani.”

15Kuya imunu ayula koka, kawalongela iwakulu wa Wayahudi ka yamuhonetse tsa Yesu.

Ugima kubitila Imwana

16Apfo Wayahudi wandusa kumwihila Yesu, kwa apfila katenda ichinu achino mna Litsuwa lya Sabato. 17Yesu kawalongela, “Aba wangu kosang'ana ghamatsuwa ghose mbaka sambi, lelo na nene pfipfila nosang'ana.”

18Kwa alyo lyayalongile, wapfilongotsi wa Wayahudi wabama ng'ani wamkome, si kwaapfila kalibetsa Litsuwa lya Sabato liliyeka baye, ila tsa pfipfila kamkema Imulungu Aba wake, apfo ketenda imwenyegho keghala na Imulungu.

Ukulu wa Imwana wa Adamu

19Yesu kaghendelela ukulonga, “Nowalongela ghendo, Imwana ng'odaha baye kutenda chinu chochose imwenyego, ila kutenda achila chayomwona Aba wake kotenda, kwa apfila chayotenda Baba, chicho Imwana naye chayotenda. 20Kwaapfila Baba komkunda Imwana na komlangusa ghose ghayotenda. Kuya katsomlangusa pfinu pfikulu pfa kusang'ana kubita apfino, ili mwemwe mkangawale. 21Ka apfila Baba pfayowatsihilula iwanu iwafile na kuweng'a ugima, pfipfila Imwana komwing'a ugima imunu ayula iyobama kumtenda yawe mgima. 22Wala Baba ng'omhigha munu wowose baye, lekeni isang'ano ya ukuhigha kamlekela Imwana, 23ili iwanu wose wamheshimu Imwana ka apfila pfawomheshimu Baba. Ka imunu ng'omheshimu Imwana baye, ayo pfipfila ng'omheshimu Baba iyamtumile baye.

24“Nowalongela ghendo, imunu wowose iyohulika ghamalonga ghangu na kumtoghola ayula iyanitumile kana ugima wa ghamatsuwa ghose ing'aghohupa; naye ng'atsohighighwa baye, mana ayo kaloka lifwa kengila mna ugima. 25Nowalongela ghendo, litsuwa lyakutsa na sambi ma lipfika, iwanu iwafile hawatsohulika litsi lya Imwana wa Imulungu, na awala iwaolihulika watsakuyila ugima keli. 26Kwa apfila ka Aba imwenyegho pfayali na ugima mgati mwake, pfipfila kamtenda Imwana yawe na ugima mghati mwake. 27Naye kamwing'a Imwana uwetso wa ukuhigha, kwa apfila kaimwana wa Adamu. 28Mleke kukangawala kwa imbuli aino, litsuwa lyakutsa iwanu wose iwafile watsohulika litsi lyake, 29na watsolawa mna ghamakabuli ghawo, awala iwatendile ighanoghile watsotsihulighwa wawe na ugima, na awala iwatendile ighehile watsotsihulighwa wahighighwe. 30Nene sidaha kutenda chinu nimwenyegho baye, nohigha ka apfila pfanihulika, na ukuhigha kwangu kwa haki, kwaapfila sitenda ka pfaanibama nene baye, ila notenda achila chayobama ayula iyanitumile.

Wakalangama wa Yesu

31“Ka nelapfila ukalangama nimwenyegho, ukalangama wangu si wa kutogholeka baye. 32Lekeni kuna munu yungi iyolonga tsimbuli tsangu, na nene nomanya ka achila chayolonga kolongesa. 33Mwemwe tsamtuma iwanu kwa Yohana, na tsimbuli tsangu tsayalongile tsolongesa. 34Nene sibama ukalangama wa imunu baye, ila nolonga alino ili mwemwe mkombolighwe. 35Yohana tsakakala itala ing'ali ikwaka na kulapfa ghumwanga, namwe tsamghudeng'elela ghumwanga ghwake kwa matsuwa chidogho. 36Lekeni nene nina ukalangama mkulu kubita aula wa Yohana, kwa apfila tsisang'ano tsiyangaile Baba nitsimalitse, tsisang'ano tsenyegho tsanisang'ana, tsolapfa ukalangama ka Baba kanituma. 37Naye Baba imwenyegho iyanitumile kanilapfila ukalangama. Namwe ng'ana mhulike baye litsi lyake, wala ukulyona liumbo lyake, 38wala ghamalonga ghake ng'amwinagho baye mghati mwenu, kwaapfila ayula iyatumighwe na yeye mwemwe ng'amumtoghola baye 39Mwosoma kwa kughalolesa Ghamaandiko kwaapfila mwofikitsa ka mghati mwake mtsopata ugima wa ghamatsuwa ghose. Lekeni agho Ghamaandiko ghagho igholonga tsimbuli tsangu! 40Hata apfo, ng'ambama baye ukutsa kuna nene ili muwe na ugima.

41“Nene sibokela utunitso kwa iwanu baye, 42lekeni nimmanyani mwemwe ka ukukunda kwa Imulungu mmwahela mna imimoyo yenu. 43Nene nitsa kwa litaghwa lya Aba wangu, namwe ng'amnibokele baye, lekeni munu yungi yang'atsa kwa litaghwa lyake imwenyegho, ayo mtsombokela. 44Apfi mtsodahatse ukutoghola, mwemwe yambama kubokela utunitso kulawa kuna mwemwe iwenyegho, aku utunitso iulawa kwa Imulungu yaliyeka ng'amuubama baye? 45Wala mleke kufikitsa ka nitsowalongeletsa kwa Baba, lekeni Musa yammwikile lilolelo lyenu, ayo yuyo iyatsowalongeletsa. 46Tsamng'amtoghole Musa, mng'anitoghole na nene, kwaapfila yeye tsakandika tsimbuli tsangu. 47Lekeni ka ng'amchitoghola baye achila chiyandike, angu mtsodahatse kutoghola ghamalangulitso ghangu?”

Iliyochaguliwa sasa

Yohane 5: LBV

Kuonyesha

Shirikisha

Nakili