Saunt Matthew 16
16
1The Pharisees alsua wi’ the Sadducees cam’, an’ temp’in’ desiret him that he wad shaw them a sign frae heaven.
2He answer’t an’ said until them, Whan it is the gloamin’ ye say, It will be fair weather; for the lift is red:
3An’ in the mornin’, It will be foul weather the day; for the lift is red an’ lowrin’. O ye hypocrites! ye do shaw skill o’ the face o’ the lift; but canna ye shaw skill o’ the signs o’ the times?
4A wicket an’ adult’rous generation seeketh after a sign, an’ there sall nae sign be gien until it, but the sign o’ the prophet Jonas. An’ he quat them, an’ gaed awa.
5An’ whan his disciples were come til the ither side, they had forgotten to tak’ bread.
6Syne Jesus said until them, Tak’ tent, an’ bewaure o’ the barm o’ the Pharisees an’ o’ the Sadducees.
7An’ they reasonet wi’ themsels, sayin’, It is because we hae taen nae bread.
8Whilk whan Jesus perceivet he said until them, O ye o’ little faith, why reason ye wi’ yoursels, because ye hae broucht nae bread?
9Dinna ye yet understan’, neither min’ the five laives o’ the five thousan’, an’ how mony creels‐fu’ ye teuk up?
10Neither the seven laives o’ the four thousan’, an’ how mony creels‐fu’ ye teuk up?
11How is it that ye dinna understan’, that I spakna it til you anent bread, that ye sud bewaure o’ the barm o’ the Pharisees an’ o’ the Sadducees?
12Syne understood they how that he badena them bewaure o’ the barm o’ bread, but o’ the teachin’ o’ the Pharisees an’ o’ the Sadducees.
13Whan Jesus cam’ intil the coasts o’ Cesarea Philippi, he spier’t at his disciples, sayin’, Wha do men say that I the Son o’ man am?
14An’ they said, Some say that thou art John the Baptist, some Elias, an’ ithers Jeremias, or ane o’ the prophets.
15He saith until them, But wha say ye that I am?
16An’ Simon Peter answer’t an’ said, Thou art the Christ, the Son o’ the livin’ God.
17An’ Jesus answer’t an’ said until him, Blesset art thou, Simon‐Barjona: for flesh an’ bluid haena shawed this until thee, but my Father wha is in heaven.
18An’ I say alsua until thee, That thou art Peter; an’ upon this rock I will big my kirk; an’ the yetts o’ hell sallna prevail agayne it.
19An’ I will gie until thee the keys o’ the kingdom o’ heaven; an’ whatsaever thou sallt bin’ on yirth sall be bund in heaven, an’ whatsaever thou sallt lowse on yirth sall be lowset in heaven.
20Syne charget he his disciples that they sud tell nae man that he was Jesus the Christ.
21Frae that time furth begoude Jesus to shaw until his disciples how that he maun gang until Jerusalem, an’ thole mony things o’ the elders, an’ chief priests, an’ scribes, an’ be killet, an’ be raiset again the third day.
22Syne Peter teuk him aside, an’ begoude to rebuke him, sayin’, Be it far frae thee, Lord; this sallna be until thee.
23But he turnet an’ said until Peter, Get thee behint me, Satan, thou art an offence until me; for thou dostna savour the things that be o’ God, but thae that be o’ men.
24Syne said Jesus until his disciples, Gin ony man will come after me, let him deny himsel, an’ tak’ up his cross, an’ follow me.
25For whasaever will saufe his life sall tine it; an’ whasaever will tine his life for my sak’ sall fin’ it.
26For what is a man profitet, gif he sall gain the hale warld, an’ tine his ain saul? or what sall a man gie in trock for his saul?
27For the Son o’ man sall come in the glory o’ his Father wi’ his angels; an’ than he sall reward ilka man accordin’ til his warks.
28Verily I say unto you, There are some stan’in’ here wha sallna prie o’ death till they see the Son o’ man comin’ in his kingdom.
Iliyochaguliwa sasa
Saunt Matthew 16: SCOMAT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Translated by George Henderson. Published in Londin in 1862.
