Mateus 27
27
La Hädiraho Hesus Iyolori Pilato
(Markus 15.1; Lukas 23.1-2; Yohanes 18.28-32)
1Nimatariyeni lanera nga urutael marahara tamorul paderei ma marahara tarapari yalemat lada kupeti yarari na ebwe süye bwa labwe riiye Hesus. 2La hädi lada höhöngari chain lada hädiraho iyolori Pilato ra kafernor Pilato.
Maderi Yudas
(Acts 1.18-19)
3Ifiri na Yudas ra e fangaraho Hesus eda longolongo bwa la dölü bwa labwe riiya Hesus, nga eda tammaü faringörüngön eda hawehitafariye-mo deriih mwanne ra silver iyoloil marahara tamorul paderei ma marahara tarapari yalemat 4eda haüül bwa, “Ida mori ppüngütiwo ifiti tammaü bwa i fangaraho yalematara e tawol tammaür bwa labwe riiye!”
Lada haüye bwa, “E tai yamami fitehi mena. Ira ra yaamu heer fitehi!”
5Yudas eda peitatiwo mwanne hara räni Templo eda süye eda raho eda falohi üyar.
6Marahara tamorul paderei lada hädi mwannera lada dölü bwa, “Merer ra parüyeni maderi yalemat, nga e tabu ma ifiri yas Farau na dibwe hasungeri mwanneri Templo.” 7Werimwiliri na urutael nga lada ppari ngütaheya na labwe faülü lada hädi mwannera lada parüyeri ngeri Masalora Potter bwa peiyael wadora. 8Ira na sapir nga lada haiteitangari masalora bwa “Masalori Ssa” eda tohotoho meihira.
9Mere sapir nga eda nnah bwa hatödü ramawe profeta Eremias e tapa: “La hädi na deriih mwanne ra silver ra sawori Israel la ngütahe bwa ebwe ira na parüyen na podür, 10lada hori parüyeni Masalora Potter eda tabweya na Tamoru e haüyei bwa ibwe faaülü.”
Pilato E Hadiya Hesus
(Markus 15.2-5; Lukas 23.3-5; Yohanes 18.33-38)
11Hesus e ddü imowari kafernor ari Roma. Kafernor eda hadiya bwa, “Heer na yael lei Yudea King?”
Hesus eda dölü bwa, “Heer re ho dölü mena.” 12Nga dari na e tawol na e tapa nihataingehiri hatataleri yasi hara yael marahara tamorul paderei ma marahara tarapari yalemat.
13Pilato eda haüya bwa, “Ho talongolongo uruteri tammaü hara la waworatahe uwawomu?”
14E lüdü dewa kafernor ifiri na e tawola-mo depat raam na Hesus e tapa.
Hesus Hataingehir Maade
(Markus 15.6-15; Lukas 23.13-25; Yohanes 18.39—19.16)
15Fada ma lani Paskua nga kafernor ari Roma e haye hatiwawau demarü sawori karabuse ra yalemat la tingalo bwa ebwe hatiwawau. 16Ifiri mena nga e wol demarü mwaare ra e mire räni karabuse ra e yalaraho yalematara la hüra re iiye ra iitar Hesus Barabas. 17Ifiri na yalemat lada moiye fängääni nga Pilato eda hadiyael bwa, “Itöü na hau masari bwa ibwe hatiwawau ma räni karabuse? Hesus Barabas hale Hesus ra la fadöngüngeri bwa Mesias?” 18Pilato e hüra bwa marahara tamorul lei Yudea la hadaraho Hesus iyolor bwanasahü na la raroitiye.
19Ifiri na Pilato e maato uwawori räniyeri haddiye, nga faifina liir eda tangahiraho iyolor bwa, “E tawol na hobwe faülüngeri yalematara bwa e tawol tammaür na e faülü, bwa i matahü dewa ifiri yai tarahiri bwongi.”
20Marahara tamorul paderei ma marahara tarapari yalemat la hatiparingeriila marahara la towu burukara bwa labwe haüya Pilato bwa ebwe hatiwawau Barabas eda riiya Hesus. 21Pilato eda hadiyael bwa, “Itöü ma uworuul maraha liyemaru na hau masari bwa ibwe hatiwawau ma räni karabuse?”
Lada dölü bwa, “Barabas!”
22Pilato eda haüül bwa, “Meta ida faülüngeri Hesus ra la fadöngüngeri bwa Mesias?”
Lada pari dölü bwa, “Siforungeri kurus!”
23Pilato eda haüül bwa, “Tammaü meta ra e faülü?”
Nga lada kabwat nga la ddölü bwa, “Siforungeri kurus!”
24Pilato eda habaühü nga e tawol nifaari na ebwe tabowaraho yaar titirongariil bwa e mweri me yalemat larau buho, eda akka sarü eda wasa paür imowael nga e haüül bwa, “E tai ngaangu re i dölü bwa ebwe made yalematayer. Hami sapiri mader!”
25Urutael marahara la towu ihira lada dölü bwa, “Maderi yalematayer ebwe miretiwo wawomami ma wonoumami!”
26Pilato eda hatiwawau Barabas ma räni karabuse nga e faaülü bwa labwe wautu Hesus, nga eda hariil bwa labwe siforungeri kurus.
Saradau La Halofalofa Hesus
(Markus 15.16-20; Yohanes 19.2-3)
27Marahara yaari Pilato saradau lada hadarango Hesus niimweri kafernor lada towu ma urutael lada talanga. 28Lada woutaraho üffar lada hädi dew üff ra e maruporupe lada haüffoüfa ngari. 29Lada par fitehi kangisir lada hamalemalengari, nga la akka dooho lada itenango räni hurumalari paür lada hadobuhuyetiwo imowar lada halofalofa nga la dölü bwa, “Ebwe kamese fadari yael lei Yudea King!” 30La sanuhutufa nga la hädi doohora lada wautungeri. 31Werimwiliri na eda bwängiraho na yael halofalofa fatareya lada woutaraho üffawe la haüffoüfa ngari, lada par haüffoüfa ngari we hatödüri üffar lada hädiwou bwa larau raho siforungeri kurus.
Hesus E Siforuyehi Ifiri Kurus
(Markus 15.21-32; Lukas 23.26-43; Yohanes 19.17-27)
32Ifiri na la buwou nga lada weli demarü mwaare ra sawori Sirene ra iitar Simon, nga marahara saradau lada tingingeri bwa ebwe yafala na kurusuri Hesus. 33Lada raho burukara iitar Kolkoda, nifaari mere ra, “Räniyeri Siri Faduhu”. 34Lada haneya bino ra e tora mara malat. Ifiri na e dongi eda tahori urumi.
35La siforungeri kurus lada hamatara marahara üffar nipatael ifiri yael peipei dice. 36Imwiliri mena nga lada maato burukara lada habaühü. 37E farüüyehi uwawori faduhur tammaüra la dölü bwa e faaülü. La farüye bwa, “Iyer na Hesus ra yael lei Yudea King.” 38La hädiil liyemaru lei pilaf lada siforungeriil kurus lada haddüül ifiri Hesus eda demarü e mire ifiri hurumalar nga demarü ifiri hurusehin.
39Marahara la fataretoho burukara la hasimwesimwaraho lada tapa delaye Hesus nga la dölü bwa, 40“Ho dölü bwa hobwe hamaharatiwo Templo hoda haddütafariya retiperi dörülari! Haruw podumu ifiri na ebwe heer Rauri Dios! Taütiwo ma ifiri kurus!”
41Ira sahü söüri na yael marahara tamorul paderei ma lei tanahori Farau ma tarapari yalemat halofalofa nga la dölü bwa: 42“E haruul palüül yalemat, nga e tasüye bwa ebwe haruw podür! E tai iiye King ari Israel? E weya me meihira nga ebwe taütiwo ma ifiri kurus ira nga dibwe hatödüya! 43E hatödüye Dios nga e dölü bwa iiye Rauri Dios. Ira nga hau weti bwa dibwe habaühü hale Dios ebwe masari na ebwe haruw!”
44Marahara lei pilaf ra la siforuyehi ifiri kurus nga ira sahü na e faaülü yael tironühüya.
Maderi Hesus
(Markus 15.33-41; Lukas 23.44-49; Yohanes 19.28-30)
45Ifiri na eda rotoiyet nga eda losopödüraho uruteri farüya retiperi dörüwa sikang. 46Hapaüpöüri dörüw klok rahori yaaro nga Hesus eda hakalofa ramar nga e dölü bwa, “Eli, Eli, lema sabacthani?” Nifaari ramayer ra, “Yai Dios, yai Dios, meta hoda peitiyeiraho?”
47Palüül ma uworuul yalemat hara la ddü ihira na lada dölü bwa, “E fadöngü Elias.” 48Demarü ma uworuul eda heiraho eda hädi dew falewa eda silarango räni bino ra e mwaane eda hamasüyatahe wotabori ilaye eda hatiyatahe bwa ebwe urumi.
49Iyahara palüül lada dölü bwa, “Hau weti bwa dibwe habaühü hale Elias ebwe bwitoho bwa ebwe haruw!”
50Hesus eda par hakalofa ramar nga eda itiwou tipar.
51Nga üffara e sangahi räni Templo eda feingehi ma ifiri tabor ma wenengi eda bwitiwo rutuwou ma wotataro eda liyefao ma irang. E üsühehi farüye nga polou la tirangahiraho 52nga ribwe nga la duhehiraho eda pipiye yalemat hawe lada mori made ra la hatödüye Dios ra lada par fadatafaari.
53La süye ma ifiri marahara ribael nga werimwiliri na Hesus eda fadatafaari ma ifiri made lada ppari bwitiwo räni Wotawotara e Liya ra Yerusalem eda pipiye yalemat na la käkäneiil.
54Tamoni saradau ma saradau hara uwar ra la matarahiye Hesus ra la käkäne üsühehiri farüye ma uruteri marahara e faülüyehi eda yariraho ngörül nga la dölü bwa, “Hatödü dewa bwa iiye Rauri Dios!”
55E pipiye faifire hara la hae tapangi Hesus ra la pülüyatiwo ma Kalilea ra la ddü nitaaw lada habaühü na e faülüyehi. 56Marahara la mire uworuul faifire har ra Maria Magdalena ma Maria ra dini James ma Hosei ma faifina liiri Sebedee.
Ribweribweri Hesus
(Markus 15.42-47; Lukas 23.50-56; Yohanes 19.38-42)
57Ifiri na eda halepari nifahafi nga eda bwitoho demarü mwaare ra e taitei ra sawori Arimatea ra iitar Hosei, nga iiye lei tabweri Hesus. 58Hosei eda raho iyolori Pilato eda tingalowa bwa ebwe hädi Hesus eda hariye. Pilato eda itewau ramar bwa labwe hädi Hesus lada hariya Hosei. 59Hosei eda hädi podüri Hesus eda tühütühüye räni üff bwesebwes taifou 60eda itenango räni ribwara masu yaar habwangi söhü yaar keringi ma retiperi polou bwa ebwe ribwar. E hädi dew tarapari födü eda hatapörüngeri hatamari ribwara bwa ebwe mire bwa ttir nga eda bwängi eda süya. 61Maria Magdalena ma par faifina demarü Maria la maato ihira lada taraengari ribwara.
Marahara La Matarahiye Ribwara
62Waraduri mena nga lani Sabbat nga marahara tamorul paderei ma Farisi lada raho iyolori Pilato 63lada haüye bwa, “Latu, masu yaar mangitoho bwa ifiri-mo e süyeri fad mwaarewe lei tirobwat nga e dölü bwa, ‘Ebwe dörülari ma imwilir ida para fadatafaari ma ifiri made.’ 64Itewau ramamu bwa labwe hamahowa yael matarahiye na ribwar eda tohongari na hadörülan bwa ebwe tasüye bwa marahara lei tabwer labwe bwitahe lada pila na podür lada haüül yalemat bwa eda mori simwatahe ma ifiri made. Tirobwatara labwe faaülü meihira ra ebwe itiraho dewa ma ürühüri iyawe e uhori faülüyehi.”
65Pilato eda haüül bwa, “Hau hädiil saradau hauda bwitahe bwa labwe hamahowa yael matarahiye.”
66Lada süye lada bwitahe lada hamahowa yael hammasüya ttiri ribwara lada yapalari bwa e tawol ebwe hamahütü lada hariil saradau bwa labwe matarahiya.
Iliyochaguliwa sasa
Mateus 27: SOV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.
