Mateus 28
28
Simwataheri Hesus
(Markus 16.1-10; Lukas 24.1-12; Yohanes 20.1-10)
1Werimwiliri lani Sabbat nga nimatariyeni lani sänne, nga Maria Magdalena ma par faifina demarü Maria la bwitahe bwa labwe habaühü-mo ribwar. 2Fadewa sahü nga eda üsühehi farüye nga yaari Tamoru anghel eda bwitiwo ma weirengi eda hatapöraraho faduwe ttiri hatamari ribwara eda maato uwawor. 3Hapaühür ra e weya marupe nga üffar ra e bwesebwes dewa. 4E yariraho ngörül marahara lei matarahiri ribwara lada lemoure lada weya hapaühüül lei made.
5Anghel eda haüül faifire hara bwa, “Hau tawai matahü. I hüra bwa hau kupeti Hesus we la siforungeri kurus. 6E tai mire ihar bwa eda mori simwatahe ma ifiri made, eda weya sahü-mo e dölü bwa ebwe faülüyehi. Hau bwitoho bwa haubwe habaühü-mo e woro irang. 7Hau hamatangatang hauda bwitiwo haüül marahawe lei tabwer bwa, ‘Hesus ra eda mori simwatahe ma ifiri made eda uhoraho Kalilea ma imowami, burukara na e süye bwa haubwe käkäne ma irang!’ Hau mangiye na i hauhemi.”
8Lada hamatangatang lada süye ma ifiri ribwara nga la matahü nga e kkele tipael, lada heitiwo bwa labwe tabongariil marahara lei tabwer.
9Ifiri mena sahü nga Hesus eda raho iyoloil eda haüül bwa, “Marüyörüye ebwe mire iyolomi.” Lada raho iyolor lada hamasü pasapasari hubwar lada haparüye. 10Hesus eda haüül bwa, “Hau tawai matahü. Hau bwitiwo hauda haüül marahara bwidi bwa labwe bwitahe Kalilea, bwa ihira na labwe käkäneyai ma irang.”
Ramael Marahara Lei Matarahi
11Ifiri na faifire hara lada süye, nga palüül marahawe la matarahiye ribwara lada bwitiwo räni wotawot lada haüül marahara tamorul paderei uruteri na e faülüyehi. 12Marahara tamorul paderei lada welifängääni ma marahara tarapari yalemat bwa labwe habaühü hale meta na labwe faülü; lada akka tarapari mwanne lada hariil lei matarahi 13nga la haüül bwa, “Haubwe dölü bwa marahawe lei tabwer la bwitahe nibwongi lada hamwararaho podür ifiri na hami hau madülü. 14Nga sahü nga kafernor eda longolongo mena, ira nga hamami hai dowara titirongari haida haüye bwa e tawol tammaü na hau faülü, eda tawai wol na haubwe fangiyengi irang.”
15Lei matarahi hara lada hädi mwannera lada raho lada tapa-mo la haüül bwa labwe dölü. Titiror na eda miretiwo nipatael lei Yudea eda tohotoho me laneiya.
Hesus e Hirengariil Marahara Lei Tabwer
(Markus 16.14-18; Lukas 24.36-49; Yohanes 20.19-23; Acts 1.6-8)
16Marahara deih ma demarü lei tabwer lada bwitahe uwawori duhuri Kalilea ra Hesus e haüül bwa labwe bwitahe uwawor. 17Ifiri na lada käkäne lada haparüye, nga palüül ma uworuul ra e süyeri hamalamal tipael. 18Hesus eda haleparaho iyoloil eda haüül bwa, “Dios e mori hariyei uruteri ppouri weirengi ma weidarop. 19Hau raho iyoloil sawori uruteri farüya hauda faülüül bwa ebwe iil lei tabwei, nga hau hori iiteri Papa ma Raurou ma Ngörü Liya ifiri yami hatütüül, 20nga hau kaüül bwa labwe tabweni uruteri marahawe i hauhemi bwa haubwe faülü. Ngaangu ra ibwe pülühemi söhü eda tohongari ileileri farüyeri yalemat.”
Iliyochaguliwa sasa
Mateus 28: SOV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.
