Mateus 26

Kkuperi Faiiniri Hesus

(Markus 14.1-2; Lukas 22.1-2; Yohanes 11.45-53)

1Ifiri na eda bwängi yaari Hesus hori kaü uruteri marahar eda haüül marahara lei tabwer bwa, 2“Hami-mo nga hau hüra bwa eda fai liyelari nga eda Paskua. Ifiri mena na labwe hädi Rauri Yalemat lada fangaraho bwa labwe siforungeri Kurus.”

3Marahara tamorul paderei ma tamoni farüye lada welifängääni ma niimweri Kaifas ra Tamoni Paderei 4lada kupeti yarari na labwe hamwaro yael dubuli Hesus lada riiye. 5La dölü bwa, “Di tawai faülü mere wori lani, bwa yalemat late buho.”

La Hapiti Hesus Ma Betania

(Markus 14.3-9; Yohanes 12.1-8)

6Hesus e mire Betania niimweri Simon ra e hamatahi rühür. 7Ifiri na Hesus e mamwangaü nga demarü faifire eda raho iyolor nga e hädi dew dalamire ra alabaster ra e uulo ifiri yalöngüra e tarapar dewa parüyen eda hadelatahe uwawori faduhuri Hesus. 8Marahara lei tabwer la käkäne na e faülüyehi lada dongahiri na e faülü lada dölü bwa, “Meta nifaari me dew tarapari hataworap e faülüyehi? 9E süye-mo labwe hori parüyeri yalöngür lada akka tarapari mwanne ma irang lada hädi ira mwanne lada hariil lei halofalof!”

10Hesus e hüra na la dölü eda haüül bwa, “Meta sapir hauda tiro delayeya faifirer? Tarapari titiro maho na e faülüngeriyei. 11Lei halofalof ra labwe mire sahü iyolomi, nga ngaangu ra i tawai mire sahü iyolomi. 12Faifirer e hadelatahe yalöngür uwawoi bwa e hawerewereyai imowari na labwe ribwayai. 13Ibwe hau dewahami, e tawaweri burukara labwe hor kaü Titiro Maho ma uwawori farüyeri yalemat, nga la tapa na faifirer e faaülü bwa ebwe mire bwa hammängir iyoloil yalemat.”

Yudas e Ngütahe bwa ebwe Fangaraho Hesus

(Markus 14.10-11; Lukas 22.3-6)

14Ifiri mena nga demarü ma uworuul marahara deih ma liyemaru lei tabweri Hesus ra iitar Yudas Iskariot e raho iyoloiri tamoni paderei 15eda hadiya bwa, “Meta na haubwe hariyei ifiri na ibwe hädi Hesus ida harihemi?” Lada hahoya deriih faduri mwannera silver lada hariye. 16Ifiri mena nga Yudas eda kupeti yarara ebwe maho ra ebwe fangangariil Hesus.

Hesus ma Marahara Lei Tabwer la Wödüri Mwangaü Ifiri Paskua

(Markus 14.12-21; Lukas 22.7-13, 21-23; Yohanes 13.21-30)

17Matamowari Lani Faraawa Hara e Tawol Habobor nga marahara lei tabweri Hesus lada raho iyolor lada haüye bwa, “Iya na ho masari bwa haibwe fitehiye na yaamu mwangaüri Paskua ma irang?”

18Hesus eda haüül bwa, “E wol demarü mwaare ra e mire räni wotawot ra haubwe bwitiwo iyolor hauda haüye bwa, ‘Tanaho e dölü bwa: eda mori bwitoho yator, ngaangu ma marahara lei tabwei haibwe saneya Paskua ma räni iimwomu.’ ”

19Marahara lei tabwer lada faülü na e haüül lada hawerewereya harael mwangaüri Paskua.

20Ifiri na eda bwongitoho nga Hesus ma marahara deih ma liyemaru lei tabwer lada maatotiwo bwa labwe hafahaafi. 21Retiperi na la mamwangaü nga Hesus eda haüül bwa, “Ibwe hau dewahami bwa demarühami ra ebwe fangayairaho.”

22E tammaü dewa faringörüngörüül marahara lei tabwer lada pari dölü bwa, “Tamoru, tei ngaangu?”

23Hesus eda haüül bwa, “Yalematara e silarango han faraawa räni yai tahahu na ebwe fangayairaho. 24Rauri Yalematara ebwe made eda weya-mo e dölü Farüförü Liya; nga erau weya meta hamatahütöhü ra ebwe bungutu mwana e fangaraho Rauri Yalemat!”

25Yudas we e ngütahe bwa ebwe fangaraho Hesus na eda dölü bwa, “Tanaho, tei naangu?”

Hesus eda haüye bwa, “Heera sahü re ho tapa.”

Yaari Tamoru Hafahaafi

(Markus 14.22-26; Lukas 22.14-20; 1 Corinthians 11.23-25)

26Ifiri na la mamwangaü nga Hesus eda hädi faraawa eda haparüye Dios eda tipiye eda hariil marahara lei tabwer nga e haüül bwa, “Hau hädi hauda hangi bwa iyer na podüi.”

27Eda par hädi ra kap eda haparüye Dios eda hariil nga e haüül bwa, “Hau uru ma urutemi 28bwa iyer na ssai ra e happou hatödü nipatari Dios ma yalemat. Me ssai ebwe dele nihataingehil pipiyeri yalemat bwa nifaari tatarari tammaü. 29Ibwe hauhami bwa i tawai para urumi binoer eda tohongari lanera ibwe urumi bino ra e taifou ma uwawori farüyeri Papai.”

30Ifiri mena lada singini yatahe lada süya lada bwitahe uwawori duhura Olibet.

Hesus e Uhori Tapa bwa Petrus ebwe Dölü bwa e Tahüra Re Iiye

(Markus 14.27-31; Lukas 22.31-34; Yohanes 13.36-38)

31Hesus eda haüül bwa, “Bwongireiye nga haubwe ppari peitiyeiraho eda weya-mo e dölü Farüförü Liya bwa, ‘Dios ebwe riiye yalematara lei hafaniri siipi, nga siipi hara ra larau mahar fataangi.’ 32Nga werimwiliri na ibwe fadatafaari ida uhoraho Kalilea ma imowami.”

33Petrus na eda titiro eda haüya Hesus bwa, “Ira-mo me urutael yalemat labwe peitihoraho, nga ngaangu i tawai peitihoraho!”

34Hesus eda haüye Petrus bwa, “Bwongireiye, imowari na ebwe ddölü hayang, nga ebwe fadörüwe yaamu dölü bwa ho tahürayai.”

35Petrus eda parüyeri na ramar eda dölü bwa, “Ira-mo me ibwe pülüho maade, nga i tawai ra dölü-mo bwa i tohüraho!”

Urutael marahara lei tabwer nga e dari hafeiye dewa marahara ramael.

Hesus E Sipesipe ma Ketsemani

(Markus 14.32-41; Lukas 22.39-46)

36Hesus ma marahara lei tabwer lada wödü lada raho burukara iitar Ketsemane eda haüül bwa, “Hau maato ihar bwa ngaangu ibwe sipesipe.” 37Eda hädi Petrus ma marahara liyemaru ra rauri Zebedi bwa labwe pülüye. Ifiri mena nga eda moutoho tammaüri faringörüngön ma hamatahiri tipar 38eda haüül bwa, “E rap dewa tammaüri faringörüngöri e weya me ebwe rii madeyai. Hau mire iha nga haubwe haneraho sahü.”

39Eda fatare eda hatawaraho töt eda worosapatiwo uwawori masalo eda sipesipe nga e dölü bwa, “Papai, nga sahü nga e süye hoda hasüya kapari iram ma iyoloi! Nga dari na ho tawai faaülü ra ngaangu i masariye bwa hobwe faaülü ra heer ho masariye.”

40Ifiri na eda wehitafaari nga eda weliil marahawe dörümörü bwa la madülü eda haüye Petrus bwa, “Meta e faülü eda tasüya ngarihami ma haubwe pülüyei haneraho ifiri dewo sikang? 41Hau haneraho hauda sipesipe bwa haute püngütiwo ifiri hapaan. Tip ra e masari nga podü ra e mangüs.”

42Hesus eda par rihitil eda raho eda sipesipe eda dölü bwa, “Papai, nga sahü nga e tasüye bwa hobwe häditengiyei kapaye kapari iram bwa hataingehir dewa bwa ibwe urumi, ira nga yaamu lawe ra ebwe faülüyehi.” 43Eda par wehitafaari nga eda par weliil marahawe lei tabwer bwa lada mori madülü bwa e tayaho dewa bwa labwe haneraho sahü.

44Hesus eda par rihitil eda wehiraho eda faülü hadörüweri yaar sipesipe nga e tapa sahü raam hawe eda mori tapani. 45Eda para wehitafaari iyoloil marahara lei tabwer eda haüül bwa, “Hau süyeri madülü söhü nga hau hadodohami? Hau habaühü bwa eda mori yatori na larau fangaraho Rauri Yalemat lada itenango räni paüül lei tammaü. 46Hau simwatahe bwa dirou süye. Hau habaühü bwa iyer yalematara e fangayairaho.”

La Dubuli Hesus

(Markus 14.43-50; Lukas 22.47-53; Yohanes 18.3-12)

47Hesus e süyeri titiro nga Yudas we demarü marahara deih ma liyemaru lei tabwer eda bwitoho. E pipiye yalemat na la pülüyatahe nga la akka uwadeitap ma wawu. Marahara la bwitahe ra yael marahara tamorul paderei ma marahara tamoni farüye ma hatalitahe. 48Yudas e mori faduri tabongariil bwa, “Mwana ibwe faidangowa iiye na hau kupeti. Hau hädi hauda dubuli!”

49Yudas e fatare eda hawereraho ifiri Hesus eda haüye bwa, “Tanaho, marüyörüye ebwe mire iyolomu,” eda faidangowa.

50Hesus eda haüye bwa, “Bwidi, faaülü na ho bwitoho bwa hobwe faülü.”

Yalematahara la pülüyatahe Yudas lada raho lada dubuli Hesus lada hamasupata. 51Demarü ma uworuul marahara la pülüye Hesus eda urutawau yaar uwadeitap eda fara taringeri mwana yaari Tamoni Paderei lei haküröü eda molaraho. 52Hesus eda haüye bwa, “Hädi na yaamu uwadeitap hoda itenango räni räniyar. Urutael marahara la hori faiini uwadeitap ra labwe made ifiri uwadei. 53Ho tahüra bwa e süye bwa ibwe tingalowa Papai bwa ebwe tapangiyei, nga ifiri mena sahü nga eda hataliletiwo maürühüri deih ma luwouwa moutehiri anghel hara saradau? 54Nga sahü nga eda haitina ebwe feita eda süye bwa ebwe faülüyehi-mo Farüförü Liya e dölü bwa iyer na hataingehiri na ebwe faülüyehi?”

55Hesus eda haüül marahara la ttou bwa, “Ngaangu lei tammaü na hau bwitahe bwa haubwe dubuliyei nga hau hädini yami uwadeitap ma wawu? Fada ma laari nga i maato räni Templo ida kaüül yalemat nga hau tai dubuliyei. 56Nga dari na e faülüyehi uruteri marahar bwa ebwe süye bwa ebwe faülüyehi marahawe profeta la farüüni räni Farüförü Liya.”

Ifiri mena nga urutael marahara lei tabwer lada hilimwaraho lada heitengi.

Hesus E Ddü Imowari Sawori Council

(Markus 14.53-65; Lukas 22.54-55, 63-71; Yohanes 18.13-14, 19-24)

57Marahara la dubuli Hesus lada häditiwo niimweri Kaifas ra Tamoni Paderei bwa ira na la towu irang lei tanahori Farau ma tamoni farüye. 58Petrus e hatawa sahü eda tabweilatiwo eda bwirango nipatari iimweri mwana Tamoni Paderei. Ifiri na e bwirango räni hosawosari iimwara eda maatotiwo iyoloil marahara lei matarahi bwa ebwe habaühü hale meta na ebwe faülüyehi. 59Marahara tamorul paderei ma urutael sawori council lada kkup na labwe hori hatawadiri Hesus bwa ebwe süye bwa labwe riiya. 60E pipiye yalemat na la buwou lada kosowa titiini Hesus, nga dari na marahara yael kosowa ra e tasüye bwa ebwe ira na sapir lada riiya. Haühühür dewa nga liyemaru mwaare lada düütahe 61lada dölü bwa, “Mwaarer e dölü bwa, ‘E süya ngariyei bwa ibwe hamaharatiwo na yaari Dios Templo, nga werimwiliri dörübwongi nga ida par haddüyatahe.’”

62Mwana Tamoni Paderei eda düütahe eda haüye Hesus bwa, “Heer e tawol na hobwe dölü hataingehiri tammaü ha la paari ngeriho?” 63Hesus e tai titiro. Mwana Tamoni Paderei eda par haüye bwa, “Meihira nga i hedi iiteri Dios ida hauho bwa hobwe tapa hatödü: hauhamami hale heer na Mesias ra Rauri Dios.”

64Hesus eda haüye bwa, “Heer re ho dölü mena. Ibwe hauhami bwa meihira eda raho nga hau rou käkäne Rauri Yalemat bwa ebwe maato ifiri hurumalari Dios ra e hädi pipiyeri ppou nga erau bwitiwo ma wori manirengiri weirengi!”

65Ifiri mena sahü nga mwana Tamoni Paderei eda feingi üffar nga e dölü bwa, “E tirobiteliye Dios! E tawol nifaari na dibwe par kkup re ebwe hauhis tammaü ra e faaülü! Hau longolongo bwa e tirobiteliye Dios! 66Meta yami mangimengi?”

Lada ppari dölü bwa, “E mire ifiri tammaü ra hataingehir bwa ebwe made.”

67Lada sanuhutufa uwawor nga la duhuw, nga palüül la pilihi 68lada haüya bwa, “Mesias, hauhamami itöü na e pilihiho!”

Petrus e Dölü bwa e Tahüra re Iiye Hesus

(Markus 14.66-72; Lukas 22.56-62; Yohanes 18.15-18, 25-27)

69Petrus e maato nipatari iimwahara nga demarü faifire ra lei yaari mwana Tamoni Paderei lei fitehi e raho iyolor eda haüye bwa, “Heer demarü-mo ho pülüya Hesus ra sawori Kalilea.”

70Petrus e tai ngütaheye na faifina e tapa imowael marahara la mire ihira eda dölü bwa, “I tahüra dewa nifaari marahara ho dölü.” 71Eda süye ma ihira eda buwou ifiri hatamari ttiri iimwahara. Demarü faifire hara lei fitehi eda käkäne eda haüül mwaare hara la mire ihira bwa, “Mwaarer e pülüya Hesus ra sawori Nasaret.”

72Petrus e tai ngütaheye na faifina e tapa eda hauye bwa, “Hatödü dewa bwa i tohüra re iiye maanar!”

73Fatöt ma imwiliri mena nga palüül mwaare ra la ddü burukara lada raho iyolori Petrus lada haüye bwa, “Hatödü dewa bwa heer demarü uwael. Ramamu e hannaha bwa heer demarü uwael!”

74Petrus eda dölü bwa, “I tapa hatödü bwa e tawol raam doutongi na i tapa! Dios ebwe hafaiyebwiteliyei ifiri na ibwe kosowa! I tohüra re iiye maanar!”

Ifiri mena sahü nga eda ddölü hayang, 75nga Petrus eda mangitafariya-mo Hesus e haüye bwa, “Imowari na ebwe ddölü hayang nga ebwe fadörüw yaamu dölü bwa ho tahürayai.” Petrus eda süye ma ihira nga e hangüsüngüsü ttengi.

Iliyochaguliwa sasa

Mateus 26: SOV

Kuonyesha

Shirikisha

Nakili