Mateus 17
17
Hesus e Werihehiraho
(Markus 9.2-13; Lukas 9.28-36)
1Worolari ma imwilir nga Hesus eda hädi Petrus ma marahara liyemaru bwidibwidi ra James ma Yohanes eda hädilatahe uwawori tahiyeta duhu eda iilaraho sahü. 2Ifiri na la habaühü nga Hesus eda werihehiraho bwa eda ttire wawor eda weya yaaro, nga üffar nga eda malapuro bwesebweser. 3Nga marahara dörümörü lei tabwer lada käkäne Moses ma Elias la titiro fängääni ma Hesus. 4Petrus na eda titiro eda haüya Hesus bwa, “Tamoru, e maho dewa bwa hai mire ihar! Nga sahü nga ho masari ira nga ibwe haddüye dörüw tento ihar, dewo yaamu, dewo yaari Moses, nga dewo yaari Elias.”
5E süyeri titiro sahü nga dewo manirengi ra e fidifidi eda bwitoho uwawoil nga e wola raam ra e titirotoho ma retiperi manirengira eda dölü bwa, “Iyer me Rai ra i hamamaüye, e maho dewa faringörüngöri iyolor; hau hadutering ramar!”
6Ifiri na marahara lei tabwer la longolongo ramara lada ppari matahü lada worosapatiwo uwawori masalo. 7Hesus eda raho iyoloil eda hamasüül eda dölü bwa, “Hau simwatahe. Hau tawai matahü!” 8Lada petahe nga hara Hesus na e mire; e tawol para demarü yalemat.
9Ifiri na lada wehitiwo ma uwawo duhu, nga Hesus eda hau dewael bwa, “E tawol demarü yalemat re haubwe haüya-mo hau käkäne eda tohongari na Rauri Yalemat ebwe simwatahe ma ifiri made.”
10Marahara lei tabwer lada hadiya Hesus bwa, “Meta sapir lei tanahori Farau la dölü bwa Elias ebwe uhori bwitoho?”
11Hesus eda parüyeri na ramael eda dölü bwa, “Hatödü dewa bwa Elias ebwe uhotoho bwa ebwe hawerewere uruteri faülümire. 12Nga ira ibwe hauhami bwa Elias eda mori bwitoho, nga yalemat la tahüra re iiye, lada faülüngeri na la masari bwa labwe faülüngeri. Ebwe para weya sahü faülüri mena na labwe faülüngeri Rauri Yalemat.”
13Ifiri mena nga marahara lei tabwer lada hüra bwa e haüül titiini Yohanes ra Lei Hatütü.
Hesus E Harewawau Yarüdü Tammaü Ma Retiperi Demarü Riweisi Mwaare
(Markus 9.14-29; Lukas 9.37-43a)
14Ifiri na lada wehitafaari iyoloil marahara la moiye fängääni ihira, nga demarü mwaare eda raho eda hadobuhuyetiwo imowari Hesus 15eda haüya bwa, “Latu, fahoya na rai happala mwaare! Bwa e haye lemadowaraho nga e iram dewa ifiri hamatahir eda haye moutahe uwawori yefi hale e mourango räni sarü. 16Ida mori heditoho iyoloil maraha lei tabwemu, nga e tasüya bwa labwe hasüya na hamatahir.”
17Hesus eda parüyeri na ramar eda dölü bwa, “E tawol dewa yami hatödü nga e taweli dewa na hau faaülü! Ebwe weya meta miriyarairi na yai i mire iyolomi? Ebwe meta miriyarairi yai hasingisingi iyolomi? Hau hadatoho riweisira iyoloi!” 18Hesus eda hammatahü yarüdü tammaüra eda itiwou ma faringörüngöni riweisira. Ifiri mena sahü nga eda mahoraho.
19Marahara lei tabweri Hesus lada raho iyolor ifiri na e tawol yalemat lada hadiya bwa, “Meta sapir eda tasüya ngarihamami bwa haibwe harewawau yarüdü tammaü we?”
20Hesus eda haüül bwa, “Bwanasahü na e happar yami hatödü. Ibwe hau dewahami bwa ebwe weya hohotiri faduri mustard na yami hatödü, nga e süya bwa haubwe haüya duhur bwa, ‘Hobwe süye ma ihar hoda raho ihirar!’ eda raho. E süya bwa haubwe faaülü uruteri faülümire!” 21[Hesus eda parüyeri ramael eda dölü bwa, “Hara sipesipe ma hasih na e süye bwa ebwe harewawau na e weya mere.”]
Hesus Eda Para Tapa Titiini Mader
(Markus 9.30-32; Lukas 9.43b-45)
22Ifiri na marahara lei tabwer la toufängääni ma Kalilea, nga Hesus eda haüül bwa, “E tai taaw nga lada hädi Rauri Yalemat lada hariil yalemat 23lada riiya, nga dari na hadörülan nga eda par fadatafaari.”
E ppari tammaü faringörüngörüül marahara lei tabwer.
Parüyeni Tax ari Templo
24Ifiri na Hesus ma marahara lei tabwer lada ra Kapernaum, nga marahara lei ikkeri tax ari Templo lada raho iyolori Petrus lada hadiya bwa, “Yami tanaho e parüyeri yaar tax ari Templo?”
25Petrus eda haüül bwa, “Üngö”. Eda itirango niimw nga Hesus eda uhori titiro eda dölü bwa, “Simon, meta yaamu mangimengi? Itöü na king la haye ekka tax ma iyoloil? Sawori farüyael hale wadora?”
26Petrus eda dölü bwa, “Wadora”.
Hesus eda dölü bwa, “Ira nga eda haitina nga sawori farüyara ra e tai hataingehiri na labwe parüyeri yael tax. 27Nga ira di tamasari na dibwe hadongael marahar. Hobwe bwitiwo räni sarü hoda peitawau na yaamu yawo hoda yafidarango demarü iih hoda habaühü bwa e wol mane räni yawar ra e paü na ebwe parüyeni yaamu ma yai tax. Hädi hoda parüyeri na yas tax.”
Iliyochaguliwa sasa
Mateus 17: SOV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.
