Mateus 18
18
Itöü na e Taitei Dewa?
(Markus 9.33-37; Lukas 9.46-48)
1Niyatora nga marahara lei tabweri Hesus lada raho iyolor lada hadiya bwa, “Itöü na e taitei dewa ma uwawori Farüyeri weirengi?”
2Hesus eda fadöngatoho demarü riweisi iyolor eda haddüye imowael ma la deih 3eda haüül bwa, “Ibwe hau dewahami bwa nga sahü nga hau tei faülühemi bwa haubwe weil riweisi, ira nga e tawau süya dewa bwa haubwe itirango uwawori Farüyeri weirengi. 4Yalematara e taitei ma uwawori Farüyeri weirengi ra yalematara e hatahitarowa tipar eda weya riweisir. 5Nga yalematara ebwe hora iitei eda hädi demarü riweisi har ra e hädiyei.
Hapanaraho Ifiri Tammaü
(Markus 9.42-48; Lukas 17.1-2)
6“Nga sahü nga e wol yalematara ebwe faülü demarü yalemataha la halofalof bwa ebwe tawolaraho yaar hatödü iyoloi, ira nga e maho ra labwe ekka tarapari fadu lada hohongari uyeri yalematara lada peitaraho nibororimataw. 7Tarapari halofalof dewa me farüyeri yalemat e taraengari ifiri marahara e faülüül yalemat bwa ebwe tawolaraho yael hatödü! Marahar ra ebwe haye faülüyehi sahü, nga dari na e halofalof dewa yalematara e faülü marahar bwa ebwe faülüyehi!
8“Nga sahü nga humusumu hale pasapasari hubwomu na e faülü bwa ebwe tawolaraho yaamu hatödü, ira hobwe dopiye hoda peitaraho! E fäli maho ra hobwe bwirango ifiri fad nga e tawol humusumu hale pasapasari hubwomu, ma ifiri ra ebwe paado humusumu ma pasapasari hubwomu lada peitihorango wani yefira e tawol haühühür. 9Nga sahü nga matamu na e faülüho bwa ebwe tawolaraho yaamu hatödü, ira hobwe wetihawau hoda peitaraho! E fäli maho ra hobwe bwirango ifiri fad nga ho mat delaye, ma imowari ra ebwe paado sahü matamu lada peitihorango wani yefiri farüyeriyefi.
Haweweri Siipi Ra E Mariraho
(Lukas 15.3-7)
10“Hau habaühü bwa hau tawai wusuw demarü ma uworuul yalematahara la halofalof. Ibwe hauhemi bwa yael anghel ra la mire weirengi ra la mire sahü iyolori Papai ma weirengi. 11[Bwa Rauri Yalematara e bwitoho bwa ebwe haruul marahara la mariraho.]#18.11 ...
12“Meta hau mangiya nga mwana e wol döbühüya raur siipi ebwe faülü ifiri na ebwe mariraho demarü marahara raur siipi? Mwana ra ebwe rihitil iyahara tiwoih ma tiwomaru bwa labwe mwangaü wori ngase duhu iiye eda raho bwa ebwe kupeti ira demarü ra e mariraho. 13Ibwe hau dewahami bwa ifiri na ebwe weli na raur siipi ra e mariraho, nga ebwe kkele dewa ma faringörüngön ifiri yaar welitafariya na raur siipi, ma ifiil iyahara tiwoih ma tiwoumaru ra la tai mariraho. 14E weya sahü faülüri mena ra Papami ra e mire weirengi e tamasari na demarü marahara yalemata halofalof ebwe mariraho.
Ifiri na Yalemat Ebwe Püngütiwo Ifiri Tammaü
15“Nga sahü nga bwidimu e faülüngeriho na e tammaü, ira hobwe raho iyolor hoda hauye na e faülü. Haubwe faülü merer nga hau tawai hannaha nimatael yalemat bwa ebwe nipatami söhü ma hau liyemaru. Nga sahü nga e hadutering ramamu, ira nga erau para maho nipatami. 16Nga sahü nga e tai hadutering ramamu, ira hoda hädi demarü hale liyemaru yalemat bwa labwe pülüho, bwa ebwe süya bwa, ‘uruteri tammaü hara e faülüüni nga marahara liyemaru hale dörümörü ra la mire ihira labwe tapa bwa hatödü bwa e faaülü’, eda weya-mo e dölü Farüförü Liya. 17Nga sahü nga e tai hadutering ramael, ira hauda haüya iglesia na e faaülü. Nga sahü nga e tai hadutering ramari iglesia, ira hauda faülü yalematara bwa ebwe weye me iiye marahara la tai hatödüye Dios hale iiye lei ikkeri tax.
Mena e Tabu Ma Mena E süye Tabur
18“Ibwe hau dewahami bwa mena hau hatabu ma weidarop ra ebwe tabu ma weirengi, nga ira hau hasüya tabur ma weidarop ra e süye tabur ma weirengi.
19“Nga i para hauhemi para palüül faülümire. E weya me liyemaru yalemat ma weidarop labwe dölü fängääni bwa labwe tingalo nihataingehiri dewo faülümire, ira nga Papai ra e mire weirengi ebwe hariil na yael tingalo. 20E faülüyehi merer bwanasahü na liyemaru hale dörümörü yalemat labwe sufängääni lada hori iitei, nga ngaangu ra ibwe mire uworuul.”
Haweweri Lei Haküröü Ra E Tasüya Bwa Ebwe Maruyaharaho Tammaüri Yalemat
21Pedro eda raho iyolori Hesus eda hadiya bwa, “Tamoru, ifiri na demarü bwidi ebwe haye faülüngeriyei sahü na e tammaü, ebwe fari fitouw yai bwe maruyaharaho tammaü hara e faülüngeriyei? Ebwe fari fuduw?”
22Hesus eda parüyeri na ramar eda haüya bwa, “Naweri, e tai fari fuduwa, bwa ebwe fari fidih e yapi fari fuduwa, 23bwanasahü na iyer na e faülüyehi ma uwawori Farüyeri weirengi. E wol fadew ra demarü king e laweri na ebwe hapauni mwanne hara marahara lei yaar fitehi labwe parüyeri tafariya iyolor. 24Masu yaar hapurotahe sahü yaar hapaüpöü, nga la da hädirango demarü marahara lei yaar fitehi iyolor ra ngawureri mwanne na e tösü parüyeri. 25E tai pipiya yaari mwana mwanne bwa ebwe parüyeri tafariya wolari mwannera. Mwana king eda dölü bwa labwe hädi mwana ma liir ma marahara raur la hori parüyeri bwa ebwe iil lei haküröü nga uruteri hapitehir, nga labwe hori parüyeri bwa ebwe süya bwa ebwe parüyeri tafariya na yaar mwanne. 26Mwana lei fitehi eda hadobuhuyetiwo imowari mwana king eda tingalo nga eda dölü bwa, ‘Hobwe fahoyai bwa ibwe parüyeri tafariya uruteri na yaamu mwanne!’ 27King eda fahoya eda hatawolaraho uruteri mwannewe ebwe hawehi tafariya eda hatalaraho.
28“Mwana eda süya eda raho nga eda weli par demarü uwar lei fitehi ra e wol fitopou söhü mwanne ra hataingehiri na ebwe hariye. Mwana eda dubuli eda fiya üyar nga e haüya bwa, ‘Parüyeri tafariya uruteri-mo yai mwanne!’ 29Mwana uwar lei fitehi eda hadobuhuyetiwo eda tingalo nga e dölü bwa, ‘Hobwe fahoyai bwa ngaangu ra ibwe parüyeri tafariya na yaamu mwanne!’ 30Mwana e tai hadutering na ramar eda hädi eda peitarango räni karabuse bwa ebwe mire eda tohongari na ebwe parüyeri tafariya na yaar mwanne. 31Ifiri na par palüül uwael lei fitehi lada käkäne na e faülüyehi eda tammaü faringörüngörüül lada raho iyolori king lada hauye uruteri na e faülüyehi. 32Mwana king eda fadöngarango mwana iyolor eda haüya bwa, ‘Heer demarü tawola sahü! I hatawolaraho sahü uruteri mwanne hawe hobwe hariyei bwanasahü-mo ho tingaloyai. 33Hataingehir dewa-mo hobwe fahoya na demarü uwomu lei fitehi eda weya-mo yai fahoho.’
34“E yalaraho dewa yaar dong mwana king eda hädi mwana eda itenango räni karabuse eda tohongari na ebwe parüyeri tafariya uruteri-mo yaar mwanne.”
35Hesus eda habwangi na ramar eda dölü bwa, “Ira sahü souri na Papai ra e mire weirengi ebwe faülüngerihami ifiri na haubwe tai hatödüri maruyaharaho tammaüra demarühami e faülüngerihami.”
Iliyochaguliwa sasa
Mateus 18: SOV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.
