Mateus 16

La Tingalo Kamarari Yarüdü

(Markus 8.11-13; Lukas 12.54-56)

1Palüül Farisi ma Sadiusi la raho iyolori Hesus bwa la laweri na labwe tafisiye lada haüya bwa ebwe faülü kamarari yarüdü bwa ebwe hannaha ppour e bwito ma ifiri Dios. 2Hesus eda haüül bwa, “Ifiri na ebwe toro yaaro nga hau rou dölü bwa, ‘Ebwe maho lari bwa e losasa hapinengi.’ 3Nga eda bwaitehiraho lari hauda dölü bwa, ‘Ebwe uut bwa e losasa nga e loso hapinengi.’ E süya bwa haubwe hüra faülüri yaulari ifiri yami habaühü hapinengi, nga e tasüya bwa haubwe hüra nifaari meta me e faülüyehi meihira! 4Hamatahütöhüri tammaüül ma tawolari yael hatödü me sawori lahireiya! Hau haüyei bwa ibwe hannaha kamarari yarüdü? Naweri! Hara kamarari yarüdü ra haubwe käkäne ra kamarari yarüdü we yaari Jona.” Eda fatare eda rihitiil.

Habobori Faraawa ra Yael Farisi ma Sadiusi

(Markus 8.14-21)

5Ifiri na marahara lei tabwer lada raho ifiri ngaseri sarüra ma layera delaye, nga la marüyehi bwa labwe ekka faraaw. 6Hesus eda haüül bwa, “Hau hafanihami; hau halihihemi ifiri na yael Farisi ma Sadiusi habobori faraawa.”

7Marahara lei tabwer lada dölü fängääni bwa, “E tapa merer bwanasahü na di tei ikka faraawa.”

8Hesus e hüra na la dölü eda haüül bwa, “Meta e faülü hauda titiro fängääni hauda tapa titiini yami tei ikka faraawa? E happar dewa yami hatödü! 9Hau tösüra hüra-mo? Hau tei mangiye-mo i tipini rimefadu faraawa bwa harael rimangaladi mwaare? Fitouw haraisi-mo ruttehir? 10Nga meta faülüri we fidifödü faraawa we harael faangaladi yalemat? Fitouwa haraisi-mo ruttehir? 11Meta e faülü hauda tahüra bwa iitei hauhemi titiini faraawa? Hau halihihemi ifiri na yael Farisi ma Sadiusi habobori faraawa.”

12Ifiri mena nga marahara lei tabwer lada hüra bwa e tai haüül bwa labwe halihiya podüül ma ifiri habobori faraawa ra la hori rāni faraaw, bwa e haüül bwa labwe halihiye podüül ma ifiri na yael Farisi ma Sadiusi kaaü.

Pedro e Dölü bwa Hesus iiye Mesias

(Markus 8.27-30; Lukas 9.18-21)

13Hesus eda raho uwawori farüyara idelaye wotawotara Sisarea Filipi eda hadiyael marahara lei tabwer bwa, “Itöü na yalemat la dölü bwa Rauri Yalemat?”

14Marahara lei tabwer lada dölü bwa, “Palüül la dölü bwa Yohanes ra Lei Hatütü nga palüül la dölü bwa Elias, nga palüül la dölü bwa Eremias hale para demarü profeta.”

15Hesus eda haüül bwa, “Nga hami, hau dölü bwa ngaangu itöü?”

16Simon Pedro eda parüyeri na ramar eda dölü bwa, “Heer Mesias ra Rauri Dios ra e fad.”

17Hesus eda haüya bwa, “Simon ra rauri Yohanes, ho hafaiyemau. E tawol yalemat re e hauho titiror. Ramara ho tapa ra Papai ra e mire weirengi re e hauho. 18Meihira nga ibwe hauho bwa heer Pedro: heer polou, nga uwawori polour na ibwe haddüya yai iglesia uwawor, nga maade nga e tawau süya bwa ebwe ppou ma imowar. 19Ibwe hariho marahara key eri Farüyeri weirengi, mena ho hatabu ma weidarop ra ebwe tabu ma weirengi, nga mena ho hasüya tabur ma weidarop ra e süya tabur ma weirengi.”

20Ifiri mena nga Hesus eda haüül marahara lei tabwer bwa e tawol demarü yalematara labwe haüye bwa iiye Mesias.

Hesus e Tapa Hairamar ma Mader

(Markus 8.31—9.1; Lukas 9.22-27)

21Ifiri mena nga Hesus eda haffata ramar eda haüül marahara lei tabwer bwa, “Ngaangu ra ibwe bwitiwo Yerusalem ida taraengari tarapari hairam ma iyoloil marahara tamoni farüye ma tamorul paderei ma lei tanahori Farau. Labwe riiyei ida made, nga dari na hadörülan nga ida par fadatafaari.”

22Pedro eda hädi delayeya eda haüye bwa, “Tamoru, e tawau süya dewa bwa Dios ebwe ngütaheye mena! E tawau süya bwa ebwe bwito mena iyolomu.”

23Hesus eda wehitafaari eda haüya bwa, “Satan, süya ma iyoloi! Heer na ho pahuye matari yarai, bwanasahü yaamu mangimengi ra e tai bwitoho ma ifiri Dios bwa e bwitoho ma ifiri yalemat.”

24Ifiri mena nga Hesus eda haüül marahara lei tabwer bwa, “Nga sahü nga e wol ma uworumi re e masari pülüyei, ebwe marüyehi demarüye podür eda yafala yaar kurus eda tabweyai. 25Yalematara ebwe masari na ebwe haruwa fadar ra ebwe taminaho na fadar, nga yalematara e fangaraho fadar nihataingehi ra ebwe welitafariya na fadar. 26E wol nifaari mena yalemat ebwe hädi uruteri farüyeri yalemat, nga e fangaraho fadar? E tawol. E tawol dewa na yalemat e süye bwa ebwe faülü bwa ebwe häditafariya fadar. 27Rauri Yalematara e tai taawa nga eda bwitoho nga e hädi fisirahori Papar nga la wödü ma yaar anghel, eda parüyeri honi ngüsül yalemat eda tabweya na la faaülü. 28Ibwe hauhemi bwa e wol ma uworumi ma ihar ra la tawai made eda tohongari na labwe käkäne Rauri Yalematara ebwe bwitoho nga iiye King.”

Iliyochaguliwa sasa

Mateus 16: SOV

Kuonyesha

Shirikisha

Nakili