1 कुरिन्थियो 15
15
मसीह रौ पाछौ जी उठणौ
1हे विसवासियो, अबार म्हैं थांनै वोहीज सुभ संदेस बताऊं हूं जिकौ पैला सुणा चुकौ हूं, जीणनै थै स्वीकार भी कियो हो अर जिणमे थै स्थिर भी हो। 2जे उण सुभ संदेस नै जिकौ म्हैं थांनै सुणायो हो उणमे मजबुत रैवौ हो, तो उणीज रै द्वारा थौरो उद्धार भी होवै है। नीं तो थौरो विसवास करणौ फालतू होयौ।
3इण खातर म्हैं सबां ऊं पैला थांनै वोहीज बात पूगा दी, जिकौ म्हनै पुगी ही, की पवितर सास्तर रै वचन रै अनुसार यीसु मसीह म्हौरै पापों रै लियै मर गिया, 4#मत 12:40; प्रेरि 2:24–32अर धरती में बूरया गिया, अर पवितर सास्तर रै अनुसार तीजै दिन जी उठया। 5#लूक 24:34; मत 28:16,17; मरकु 16:14; लूक 24:36; यूह 20:19वो पतरस नै और, इणरै पछै बारैह में ऊं बचयोड़े प्रेरितों नै दिखाई दिया। 6पछै वो पांच सौ ऊं घणौ विसवासी लोगां नै एक साथै दिखाई दिया, जिणमे ऊं घणाहारा अबै तांई जीवता है जद की किता ही मौत री ऊंग सो गिया है। 7पछै वो याकूब नै दिखाई दिया उणरै पछै सगळै प्रेरितों नै दिखाई दिया। 8#प्रेरि 9:3–6वो सगळौ रै पछै म्हनै भी दिखाई दिया। म्हैं अधूरे दिनां रौ जनमियोड़ौ टाबर जैड़ौ हूं।
9 #
प्रेरि 8:3
क्यूंकै म्हैं प्रेरितों में सबां ऊं छोटौ हूं, बल्कि प्रेरित कैवण रै लायक भी कोनीं, क्यूंकै म्हैं परमेसर री कलीसिया नै सताई ही। 10पण म्हैं जिकौ कीं भी हूं, परमेसर रै करपा ऊं हूं। अर उणरी करपा जिकौ म्हारै माथै होई, वो फालतू नीं होई। पण म्हैं उण सबां ऊं बढ़नै मेनत भी की तो भी ओ म्हारी तरफ ऊं कोनीं होयौ, पण परमेसर री करपा ऊं जिकौ म्हारै माथै ही। 11इण वास्तै चाहे म्हैं हूं, चाहे वे हो, म्हौ ओहीज परचार करौ हो, अर इणी माथै थै विसवास भी कियो।
म्हौरौ पुनरूत्थान
12इण वास्तै जद की मसीह रौ ओ परचार कियो जावै है की वो मरयोड़ौ में ऊं जी उठयौ, तो थौरे में ऊं किता क्यूं कैवै है की मरयोड़ौ रौ जी उठणौ है ही कोनीं? 13जे मरयोड़ौ रौ जी उठणौ है ही कोनीं, तो मसीह भी कोनीं जी उठयौ। 14अर जे मसीह कोनीं जी उठयौ, तो म्हौरौ परचार करणौ भी फालतू है, अर थौरो विसवास भी फालतू है। 15अर म्हौ परमेसर रा झूठा गवाई ठैरया। क्यूंकै म्हौ परमेसर रै बारै में आ गवाई दी है की उणै मसीह नै मरयोड़ौ में ऊं जीवतौ कियो। पण जे मरयोड़ा वास्तव में जीवता नीं किया जाय तो परमेसर मसीह नै भी जीवतौ कोनीं कियो। 16अर जे मुड़दा नीं जी उठै, तो मसीह भी नीं जी उठयौ। 17अर जे मसीह नीं जी उठयौ, तो थौरो विसवास फालतू है, अर थै अबै तांई अपणै पापों में फसयोड़ा हो। 18बल्कि जिकौ मसीह में सो गिया है, वे भी नास होया। 19जे म्हौ कैवल इणी जीवन में मसीह ऊं आसा राखौ हो, तो म्हौ सगळै मिनखौ ऊं घणा अभागा हो।
20पण साचांणी मसीह मरयोड़ौ में ऊं जी उठयौ है, अर जिकौ मर गिया हा, उणमे ऊं पैला वो जी उठा। 21क्यूंकै जद एक मिनख रै जरियै मौत आई, तो एक मिनख रै जरियै मरयोड़ौ रौ जी उठणौ भी आयौ। 22अर ज्यूं आदम में सगळा मरे है, व्यौंही मसीह में सगळा जिलाया जावैला। 23पण हरैक अपणी-अपणी बारी ऊं, पैलौ फळ मसीह, इणरै पछै मसीह रै पाछौ आवण पे जिकौ मसीह रा लोग है वो सगळा जीवता किया जावैला। 24इणरै पछै अंत होवैला। उण वगत मसीह सगळी परधानता अर सगळौ अधिकार अर सामरथ रौ अंत करनै राज नै परमेसर पिता रै हाथ में सूंप दैला। 25क्यूंकै जद तांई की वो अपणै बैरियो नै अपणै पगां तळै नीं कर दे, तद तांई उणरौ राज करणौ जरुरी है। 26सबां ऊं आखरी बैरी जिकौ नास कियो जावैला वो मौत है। 27क्यूंकै, “परमेसर नै सगळौ उणरै पगां तळै कर दियौ है।” पण जद वो कैवै है की सगळौ उणरै अधीन कर दियौ है तो साफ है, की जिणै सगळौ मसीह रै अधीन कर दियौ, वो आप अलग रियौ। 28अर जद सगळौ परमेसर रै बेटे रै अधीन हो जावैला, तो बेटौ आप भी परमेसर रै अधीन हो जावैला जिणनै सगळौ बेटे रै अधीन कर दियौ। ताकी सगळै में परमेसर ही सगळौ हो।
29जे मरयोड़ौ में ऊं जी उठणौ है ही कोनीं तो उणौरौ कांई होवैला, जिकौ लोग मरयोड़ौ रै लियै बतिस्मो लेवे है, वे कांई करैला? जे मरयोड़ौ रौ जी उठणौ है ही नीं, तो पछै क्यूं उणरै लियै बतिस्मो लेवो हो?
30अर म्हौ भी क्यूं हर घड़ी जोखम में पड़या रौ? 31हे विसवासियो, म्हैं थौरे बारै में घंमड करूं हूं, की थै जिकौ म्हौरै मसीह यीसु में हो उणरी वजै ऊं म्हैं हर दिन मौत रौ सामनौ करूं हूं। 32जे इफिसुस नगर में लोग म्हारै ऊं जंगळी जिनावरां रै ज्यूं लड़या, तो म्हनै कांई फायदो होयौ? जे मुड़दा जिलाया नीं जावैला, तो ज्यौ कीं लोग कैवै है, “आओ, खाओं-पीओं, क्यूंकै कल तो मर ही जावोला।”
33धोखे में मत रैवौ, भूंडी संगति चौखै चरितर नै बिगाड़ दैवै है। 34धरम रै लियै जाग उठो अर पाप नीं करौ। क्यूंकै कीं ऐड़ा है जिकौ परमेसर नै कोनीं जांणै। म्हैं थांनै बेजता करनै रै लियै ओ कैवूं हूं।
पाछौ जी उठणै रौ सरीर
35अबार कोई ओ कैवैला, “मुड़दा कीण रीति ऊं जी उठै है, अर कैड़ी देह रै साथै आवै है?” 36थै गैला मती बणौ, जिकौ कीं थूं बोए है, जैड़ी तांई वो नीं मरेला उठै तांई नीं जिलायौ जावैला। 37अर जिकौ थूं बोए है, ओ वो देह कोनीं जिकौ पैदा होवणवाळौ है, पण थै तो सिरफ बीज हो, चाहे गेहूंं रौ, चाहे किणी और अनाज रौ। 38पण परमेसर अपणी इछा रै अनुसार उणनै सरीर दैवै है, अर हरैक बीज नै उणरौ खास सरीर। 39सगळौ सरीर एक जैड़ौ कोनीं। मांनखै रौ सरीर अलग है, पसुओ रौ सरीर अलग है। पंखैरूओ रौ सरीर अलग है। मछलियो रौ सरीर अलग है। 40सरीर सरगिए भी होवै है अर सारीरिक भी। सरगिए सरीर रौ तेज अलग होवै है अर सारीरिक सरीर रौ अलग। 41सूरज रौ तेज अलग है, चांद रौ तेज अलग है, अर तारागणो रौ तेज अलग है, क्यूंकै एक तारै ऊं दूजै तारै रौ तेज अलग है।
42मरयोड़ौ रौ जी उठणौ भी ऐड़ौ ही होवै है। सरीर नासवान दसा में बोया जावै है, अर अविनासी रूप में जी उठै है। 43वो बिना कदर रै साथै बोयो जावै है, अर तेज रै साथै जी उठै है। कमजोरी रै साथै बोयो जावै है, अर सामरथ रै साथै जी उठै है। 44सारीरिक सरीर बोयो जावै है, अर आत्मिक सरीर जी उठै है।
जद की सारीरिक सरीर है, तो आत्मिक सरीर भी है। 45ऐड़ौ ही लिख्यौ भी है, “पैलौ मिनख, मतलब आदम, जीवतौ प्राणी बण्यौ” अर आखरी आदम, जिकौ मसीह है वो जीवन देवणवाळी आतमा बणी। 46पैला आत्मिक जीवन कोनीं मिळै है, बल्कि सारीरिक जीवन मिळै है, इणरै पछै आत्मिक जीवन मिळै है। 47पैलौ मिनख धरती ऊं मतलब माटी रौ हो। दूजौ मिनख सरगिए है। 48जैड़ौ मिनख माटी रौ हो, वैड़ौ ही वो भी है जिकौ माटी रा है। अर जैड़ौ मिनख सरगिए है, वैड़ौ ही वो भी सरगिए है। 49अर ज्यूं म्हौ उणरौ जिकौ माटी रै मिनख रौ रूप धारण कियो, वैड़ौ ही उण सरगिए मिनख रौ रूप भी धारण करौला।
50हे विसवासियो, म्हैं ओ कैवूं हूं की मांस अर लोई परमेसर रै राज रै वारिस नीं हो सकै। अर नीं नासवान अविनासी रौ वारिस हो सकै है। 51#1 थिस्स 4:15–17देखौ, म्हैं थौरे ऊं भेद री बात कैवूं हूं, की म्हौ सगळा तो कोनीं मरो, पण बदळ जावोला। 52अर ओ पल भर में, पलक झपकते ही आखरी तुरही फूकते ही होवैला। क्यूंकै तुरही फूंकी जावैला, अर मुड़दा अविनासी दसा में जीवता किया जावैला, अर म्हौ बदळ जावोला। 53क्यूंकै जरुरी है, की ओ नासवान सरीर अविनासी नै पैहर ले, अर मरणहार सरीर अमरता नै पैहर ले। 54अर जद ओ नासवान अविनासी नै पैहर ले ला, अर ओ मरणहार अमरता नै पैहर ले ला, तद ओ वचन जिकौ लिख्यौ है, पूरौ हो जावैला, जीत मौत नै निगळ लियौ। 55“हे मौत थारी जीत कठै रही? हे मौत थारौ डंक कठै रियौ?” 56मौत रौ डंक पाप है, अर पाप रौ बळ है व्यवस्था। 57पण परमेसर रौ धन्यवाद हो, जिकौ म्हौरै परभु यीसु मसीह रै द्वारा म्हौ नै जयवन्त करै है।
58इण वास्तै हे म्हारै प्यारै विसवासियो, मजबुत अर अटल रैवौ, अर परभु रै कांम में हमेसां बढ़ता जाओ, क्यूंकै ओ जांणौ हो, की थौरी मेनत परभु में फालतू कोनीं है।
Iliyochaguliwa sasa
1 कुरिन्थियो 15: RWR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© NLCI CC BY-NC-ND 4.0