Bikoluwa ndia Bhakwenda 13
13
Bhai̱ki̱li̱za ka Anti̱oki̱ya nibhakibhutika Balanaba na Saulo
1Ka bhai̱ki̱li̱za ndibha ka tau̱ni̱ ndia ka Anti̱oki̱ya ndia ka Si̱li̱ya yabhi̱ku̱ bhanabbi̱ na bhaegesi̱ sa kigambo ndia Mambombi̱: Balanaba na Si̱mi̱oni̱ i̱naki ndietolo nandiye muluku mau̱nda na Lu̱ki̱yo mindia ka Kilene na Maneni (mindia abomba imamoti̱ na Helude ntua esaza) na Saulo. 2Nibhalia ki̱si̱ba na lami̱a Sali̱a Yesu, Mwoyo Mawelikana nakibhugia bhiyo; “Bhumbuwe kami Balanaba na Saulo nanga mulimo ndie ni̱bhu̱eki̱li̱o.” 3Ndia bhadhakia si̱ba na lami̱a Mambombi̱, nibhaki̱bhu̱bi̱sabe kibhoko na pabho nki̱sa du̱mbi̱ nibhakibhulaka.
Balanaba na Saulo nibhakitebeza Makulu Mabhonga ka Ki̱pu̱lo
4Mwoyo Mawelikana nakintika Balanaba na Saulo, nibhaki̱ya yasi ka mwalo ndia ka Selu̱ki̱ya nibhakidhaya meli̱ kayabho ka Ki̱pu̱lo. 5Ndia bhaki̱dha ka Salami̱si̱, bhatebeza kigambo ndia Mambombi̱ ka Ndabho kindia Bhayu̱daya yabhalami̱li̱aga. Yohana yabhi̱ nabho bhia nkonyi̱.
6Bhatomba ka kizinga doi̱sa ndia bhaki̱dha ka Pafo. Nibhakintakana Mu̱yu̱daya nkoli̱ kima ka mani̱ sa limba toli̱ nandi nabbi̱ sa mbela nandiye Bbalu-yesu, 7abhi̱ bhotua gavuna Selu̱gi̱yo Paulo toli̱ muluku ngezi̱. Gavuna miyo anti̱ki̱sa Balanaba na Saulo andu̱lu̱ aoke kigambo ndia Mambombi̱. 8No nkoli̱ kima sa limba yoho, Eli̱ma (injo nandu̱lu̱ makulu sa i̱naki ka Ku̱gi̱li̱ki̱) abhuhakani̱za nakikabha bhuwa gavuna Selu̱gi̱yo ka hi̱ki̱li̱za kigambo ndia Mambombi̱. 9Du̱mbi̱ Saulo mindia i̱naki ndietolo abhi̱ ndu̱lu̱ Paulo, Mwoyo Mawelikana namulibe anzi̱ba Eli̱ma tonono, nakingia bhiyo; 10“Oli bhia mu̱li̱mo toli̱ ngi̱gu̱ sa kima poni ndia ai̱ki̱o! Oli na mbela na bhulangani̱sa bhakpa. Koda kudhua tola mbela ka kigambo mabhonga ndia Sali̱a Mambombi̱? 11Mambombi̱ aki̱ya fubiliako. Okudhakana i̱so dhakia tolo ndio okoku̱zi̱ba.”
Menjo makubhabhi̱ na ki̱li̱mi̱ki̱aga naki̱mbi̱kabe, naki̱ya nakigbaga kakabha mindia akingbeliaga. 12Gavuna Selu̱gi̱yo ndia atangia ndia aenikani̱o naki̱hi̱ki̱li̱za nanga ndia bhaegesa ndia agbei̱be Sali̱a Yesu antina nki̱li̱.
Balanaba na Paulo nibhakitebeza Makulu Mabhonga ka tau̱ni̱ ndia ka Anti̱oki̱ya ka Pi̱si̱di̱ya
13Paulo na bhadaki bhatuka ka Pafo nibhakidhaya meli̱ yabho ka Peluga ka tau̱ni̱ ndia ka Panfi̱li̱ya, kindia Yohana Maliko abhudhuwa naki̱si̱ki̱a ka Yelusalemu. 14Bhatuka ka Peluga nibhaki̱ki̱dha ka Anti̱oki̱ya ndia ka Pi̱si̱di̱ya, du̱mbi̱ ka tolo sa Sabbato nibhakigodha ka Ndabho kindia Bhayu̱daya yabhalami̱li̱aga nibhaki̱li̱kaga. 15Ndia bhadhakia soma tuka ka kitabo sa Kilagilo ndia Mambombi̱ ampesi̱a Musa na ndia bhanabbi̱ bhahandika, bhalemi sa Ndabho kindia Bhayu̱daya yabhalami̱li̱aga nibhaki̱ti̱ki̱sa makulu nibhakigia bhiyo; “Bhukubha nibhuli na kigambo ndia aki̱bhu̱si̱ki̱saku̱ bhakpa mani̱, bhubhutolie.”
16Paulo nakitelema nakibhudakisa na kibhoko du̱mbi̱ nakibhugia bhiyo; “Bhaisaleli̱ dami na bhenu̱ Bhakpa ndibha kali Bhayu̱daya no nibhukumulami̱aga Mambombi̱, bhuniokiane. 17Mambombi̱ mindia bhakpa ndibha ka Isaleli̱ abhubhuwa bhatatasu̱ naki̱bhu̱pesi̱a tungo na mani̱ nibhalia ka Mi̱si̱li̱, toli̱ nakibhubhuwaku̱ ka mani̱ ndiaki. 18Akaulilia ngeso ndiabho dhakia mwaka maku̱mi̱ ana nalia nabho ke lungu. 19Mambombi̱ abhu̱pesi̱a Bhaisaleli̱ mani̱ nibhakisweki̱sa nsi ncambu̱ ndia ka Kanani, du̱mbi̱ naki̱bhu̱pesi̱a dhudhu ndiabho. 20Yoho poni adhakia mwaka bbina na maku̱mi̱ atano.”
Du̱mbi̱ Mambombi̱ naki̱bhu̱pesi̱a bhacu̱ musango lemabho doi̱sa tolo ndia nabbi̱ Samwi̱li̱ abhulema. 21Du̱mbi̱ bhakpa nibhakinkunga Samwi̱li̱ sali̱a mindia akibhulema. Mambombi̱ nakimbuwa kabho Saulo mi̱ki̱ mindia Ki̱si̱, tukaki ka ntu̱la ndia Bbenjami̱ni̱, mindia alema dhakia mwaka maku̱mi̱ ana. 22Mambombi̱ ndia ambuwabe Saulo kusali̱a, ambuwa Dhau̱dhi̱ bhia sali̱a mindiabho. Mambombi̱ naki̱mpesi̱li̱a bwakai̱so bhiyo; “Dhau̱dhi̱ mi̱ki̱ mindia Yese, andiye muluku mindie ninkabhi̱o nanga akikola poni ndie nikikabha akole.”
23Tuka ka bhanana Dhau̱dhi̱, Mambombi̱ ambi̱ki̱si̱ ka Isaleli̱ Yesu Ki̱li̱si̱to nzu̱ni̱ nesi̱ abhulaki̱sana bhatatasu̱. 24Yesu ndia kabi̱ki̱mbe, Yohana atebezabe kwesi̱ki̱aku̱ na bati̱za ndia bhakpa bhamamada ka Isaleli̱. 25Yohana kadhakililia mulimo ndiaki, agia bhiyo; “Bhukweli̱li̱kana andimi ani? Kandimi mindio bhukakabhaki, no alibe mindia akabi̱kaki mbu̱sami, mindie kikitoka kudha mpungo sa nkai̱to ndiaki.”
26Bhaisaleli̱ dami, bhanana Ibbulahi̱mu̱ na bhenu̱ Bhakpa ndibha kali Bhayu̱daya no nibhukumulami̱aga Mambombi̱ makulu yoho ndia agbei̱be nesi̱ Mambombi̱ akikizunaga ali ndiasu̱. 27Bhakpa ndibha ka Yelusalemu na bhalemi ndibhabho bhakambi̱saku̱ Yesu ngu̱ko bhia nzu̱ni̱, no kasogosaki, abhi̱ nesi̱yo moti̱ sa hi̱ki̱li̱za kigambo ndia bhanabbi̱ bhakisomaga tolo poni sa Sabbato. 28Bhankunga Pilato eti bhamuole Yesu ndia kali na musango. 29Ndia bhadhakia kola poni ndia bhamuhandikabe Yesu, bhabhotuaki bhabhuwa ki̱nda ndiaki ka musalaba nibhaki̱lu̱mba ka bhutulo. 30No Mambombi̱ naki̱mu̱hu̱mbu̱la, 31toli̱ dhakia tolo mamadha yabhuenikilianaga bhenjo ndibha yamamikanaga naye tukilia ka Galilaya duwa ka Yelusalemu. Endindi bhali bhakai̱so ndibhaki ka bhakpa.
32“Toli̱ kibhutolie Makulu Mabhonga ndia Mambombi̱ abhulaki̱sana bhatatasu̱ Bhayu̱daya.” 33Mambombi̱ adhaki̱ koliliasu̱ ndia akilaki̱sana na bhani̱ki̱ ndibhabho nanga amu̱hu̱mbu̱li̱ Yesu nesi̱ bhahandika ka kitabo sa Zabbu̱li̱ nsula ndiake bhali bhiyo;
“Ondi mi̱ki̱ mindiamo,
lelu nemi nindi abako.”#13:33 Zabbu̱li̱ 2:7. 34Mambombi̱ amu̱hu̱mbu̱la Yesu andu̱lu̱ kala kitodha ku̱waki. Mambombi̱ aonga bhiyo;
“Nikukupa nki̱sa sa mbagani̱za nesi̱ nimulaki̱sana Dhau̱dhi̱.”#13:34 Isaya 55:3. 35Bhaonga ka nsula ndietolo ka kitabo sa Zabbu̱li̱ bhiyo; “Kokudhuwa nkoli̱ mindiako mawelikana nakitodha ku̱waki.”#13:35 Zabbu̱li̱ 16:10.
36Dhau̱dhi̱ ndia adhakia kola mulimo ndia Mambombi̱, aku̱wa, nibhaki̱mu̱lu̱mba bi̱ya na kindia bhabhu̱lu̱mba bhatataki toli̱ ki̱nda ndiaki nakihola. 37No mindia Mambombi̱ amu̱hu̱mbu̱la kahola.
38Bhanamami, nikikabha bhu̱i̱be eti, kowa Yesu, Mambombi̱ akingani̱li̱a nkpa poni kibi ndiaki, kilagilo ndia Musa kabhi̱kitoka zunako kibi ndiako poni. 39Kowa Yesu, nkpa poni mindia aki̱mu̱hi̱ki̱li̱zaga kali na kibi, kima ndio kobhi̱ kutunga ka kilagilo ndia Musa. 40Bhwegendi̱e andu̱lu̱ ndia bhanabbi̱ bhaongi̱o kala kibhuenikanabe.
41“Bhuokiane bhenu̱ bhatebiagi̱,
nki̱li̱ abhutine toli̱ bhusweke.
Nanga nikaya kola kima gbolu̱si̱ nibhulia ka nsi
ndio bhukukutoka hi̱ki̱li̱zai̱
nkpa nakabhutolia.”
42Paulo na Balanaba ndia bhabhi̱ ka tukabho ka Ndabho kindia Bhayu̱daya yabhalami̱li̱aga, bhakpa bhabhukunga todha ongabe kima injo ndia bhatebezabe ka Sabbato ndia akidhabhiabe. 43Lami̱a ndia asiaku̱, Bhayu̱daya bi̱yabho na Bhakpa ndibha kali Bhayu̱daya ndibha bhepesi̱aku̱ si̱ki̱abho ka di̱ni̱ sa Ki̱yu̱daya nibhakintomba Paulo na Balanaba, nibhakionga nabho toli̱ nibhakibhukunga li̱ka nibhesi̱gi̱ kobhu̱ ndia Mambombi̱.
44Ka Sabbato ndia adhabhiabe bhakpa poni ka tau̱ni̱ injo bhekumesa oka kigambo ndia Mambombi̱. 45Bhasali̱a ndibha Bhayu̱daya ndia bhabhutangia bi̱ya bhakpa nibhasi̱dha-si̱dhani̱, i̱ni̱ nakibhugba. Nibhakitandika koma loki̱ ndia Paulo ali̱ka ongai̱ toli̱ ongiaki loki̱ mazinana.
46Du̱mbi̱ Paulo na Balanaba nibhaki̱bhu̱si̱ki̱aku̱ na mani̱ bhiyo; “Kiteketi tolianu̱ kigambo ndia Mambombi̱. No nesi̱ bhukomi̱o, toli̱ nibhukwei̱sa bhia bhakpa ndibho bhukugbokiliani̱ bwomezi̱ ndia kadaki̱si̱abe, bhudhuwe ki̱ye ka Bhakpa ndibha kali Bhayu̱daya.”
47Nanga yoho andu̱lu̱ Mambombi̱ ndia akilagi̱li̱o:
“Ni̱ku̱bi̱si̱be bhia bemu ndia Bhakpa ndibha kali Bhayu̱daya,
andu̱lu̱ bhu̱bi̱ki̱sebe zunua ka bhakpa ndibha ka nsi poni.”#13:47 Isaya 49:6.
48Bhakpa ndibha kali Bhayu̱daya ndia bhaoka yoho, nibhakidhedhelua toli̱ nibhaki̱mbi̱saku̱ Sali̱a Yesu ngu̱ko. Bhenjo poni ndibhabhi̱ nibhabhubhoi̱ku̱ bha na bwomezi̱ ndia kadaki̱si̱abe nibhaki̱hi̱ki̱li̱za.
49Kigambo ndia Sali̱a Yesu adhakiaga kyalo poni. 50No bhalemi ndibha ka Yu̱deya bhabhu̱gu̱ngaku̱ bhakali̱ bhagudha kala ndibha yambi̱sagaku̱ Mambombi̱ ngu̱ko toli̱ nibhali bhatua ngu̱ko imamoti̱ na bhaluku bhalemi ka tau̱ni̱. Bhamueni̱sa bhu̱su̱ Paulo na Balanaba, nibhakibhubhiya ka kyalo ndiabho. 51Paulo na Balanaba bhalagali̱a bu̱lu̱ gua nkai̱to ndiabho ka ani̱sa nesi̱ ndia Bhayu̱daya bhakola kabhongi̱ du̱mbi̱ nibhaki̱ya ka I̱koni̱yo. 52Bhai̱ki̱li̱za bhadhedhelua toli̱ Mwoyo Mawelikana nabhulibe.
Iliyochaguliwa sasa
Bikoluwa ndia Bhakwenda 13: KWAMBA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc., 2025
