Bikoluwa ndia Bhakwenda 14
14
Paulo na Balanaba nibhakitebeza Makulu Mabhonga ka tau̱ni̱ ndia ka I̱koni̱yo
1Paulo na Balanaba ndia bhaki̱dha ka I̱koni̱yo, bhagodha ka Ndabho kindia Bhayu̱daya yabhalami̱li̱aga. Nibhakitebeza si̱ni̱ nesi̱ yabhakolaga ka Anti̱oki̱ya nakidhuwa Bhayu̱daya na Bhagi̱li̱ki̱ bi̱yabho nibhaki̱hi̱ki̱li̱za. 2No Bhayu̱daya ndibha bhakoma hi̱ki̱li̱za Yesu bhabhu̱gu̱ngaku̱ kala Bhakpa ndibha kali Bhayu̱daya andu̱lu̱ bhamu̱yale Paulo na Balanaba. 3Paulo na Balanaba nibhakidhakiaku̱ tolo mamadha nibhalia kitebeza na mani̱ kigambo ndia agbei̱be kobhu̱ ndia Sali̱a Yesu mindia abhu̱toki̱sa kola sazi̱bi̱li̱ai̱be ndia akitina nki̱li̱. 4Bhakpa bi̱yabho ndibha ka tau̱ni̱ ndia ka I̱koni̱yo nibhakietinaku̱ dou̱ bhali, bemoti̱ nibhakibha naseke ndia Bhayu̱daya na ndibhetolo nibhakibha naseke ndia bhakwenda. 5Bhayu̱daya na Bhakpa ndibha kali Bhayu̱daya imamoti̱ na bhalemi ndibhabho nibhakibhuleliana bhakwenda bhenjo andu̱lu̱ bhabhu̱bhi̱ndage tali bhaku̱we. 6No bhakwenda nakibhudhoka ka ki̱toi̱, nibhakitetilia ka di̱si̱tu̱li̱ki̱ti̱ ndia ka Li̱koni̱yo ka tau̱ni̱ ndia ka Lisitula na Delubbe na kyalo ndietolo ndia ali bi̱ya, 7kindia bhai̱ya namusa na tebeza Makulu Mabhonga ndia angbei̱be Yesu.
Paulo na Balanaba nibhakitebeza ka Lisitula na ka Delubbe
8Ka Lisitula yabhi̱ku̱ muluku mindia abhi̱ nalamali̱ tuka ka bhokotiana ndiaki toli̱ abha ndia kadhetangimbebe. 9Yali̱kaga namuokiani Paulo ka tebeza. Paulo naki̱nzi̱ba tonono, nakitangia muluku miyo nali na hi̱ki̱li̱za sa lamaki. 10Nanga nsonga injo, nakingia bhiyo; “Oteleme.” Du̱mbi̱ muluku nakitelema, nakitingaga, nakitandika dhetaga.
11Bi̱ya bhakpa ndia bhatangia Paulo ndia akola, bhakuga ka loki̱ ndiabho sa Ku̱li̱koni̱yo bhiyo; “bhamambombi̱ bhaki̱bi̱ki̱ku̱ nibhali bhia bhakpa.” 12Nibhakimpa Balanaba i̱na sa Zeu̱, i̱na kihongano mindia Bhagi̱li̱ki̱ na Paulo nibhakimpa i̱na sa Helume nanga abha nandiye mwongi̱ ngbeku. 13Mbembi̱ mindia ka hekalo kindia Bhagi̱li̱ki̱ yabhamulami̱li̱aga mambombi̱ Zeu̱ ndia abhi̱ kekpengbu̱ na tau̱ni̱, abhu̱bi̱ki̱sa bhantu̱li̱a bhante nabhubhuagi kimole ka kingo naki̱bhu̱bi̱sa ka mpu̱me sa nsaka andu̱lu̱ bhabhubhembilie bhakwenda bhenjo.
14Paulo na Balanaba ndia abhudhoka ka ki̱toi̱, nibhakinuaga ngoye ndiabho ka ani̱sa nesi̱ bhazigidhiluo nanga ndia bi̱ya bhakpa bhabhi̱ kaya kolai̱. Bhatetia ka bi̱ya bhakpa, nibhalia kihabhaga. 15Bhabhotuasu̱, bhuka kola yoho nangeki? Kili bhakpa danu̱. Ki̱bi̱ki̱ tolianu̱ Makulu Mabhonga ndia angbei̱be Yesu, bhudhuwe lami̱a bhakihongano, bhutandike lami̱a Mambombi̱ mindia aki̱pesi̱aga bwomezi̱ toli̱ mindia ahanga nsi, tu̱li̱ na kima poni ndia ali̱ku̱. 16Kalasi̱o, Mambombi̱ abhali̱sana nsi poni lami̱a nesi̱ bhakabhi̱o. 17No kadhueli̱li̱ kweani̱sa. Ahani̱si̱ kobhu̱ ndiaki ka dhoki̱sa mbu̱la na tani̱sa li̱eli̱, akibhupaga li̱eli̱ maliya toli̱ akidhuwaga bhudhedhelua ka mulima. 18Na kigambo injo poni ndia Balanaba na Paulo bhaonga, kadhuwa bi̱ya bhakpa bhenjo bhakabhubhembilie.
19Du̱mbi̱ Bhayu̱daya bemoti̱ bhatuka ka tau̱ni̱ ndia ka Anti̱oki̱ya na I̱koni̱yo nibhakidhuwa bi̱ya bhakpa ka tau̱ni̱ ndia ka Lisitula nibhakikoma ndia Paulo na Balanaba bhabhuegesa. Nibhakimbi̱ndaga Paulo na tali na hu̱i̱saki ka tau̱ni̱ nibhakyeli̱li̱kana eti aku̱wa. 20No bhai̱ki̱li̱za ndia bhekumesa kindia abhi̱o, azu̱zu̱ka nakima naki̱si̱ki̱a ka tau̱ni̱ ndia ka Lisitula. Tolo ndia adhabhiabe, ye na Balanaba nibhaki̱ya ka Delubbe.
Paulo na Balanaba nibhaki̱si̱ki̱a ka Anti̱oki̱ya ndia ka Si̱li̱ya
21Paulo na Balanaba bhatebeza Makulu Mabhonga ka tau̱ni̱ injo toli̱ bhakpa bi̱yabho nibhaki̱hi̱ki̱li̱za. Du̱mbi̱ nibhaki̱si̱ki̱a ka Lisitula na ka I̱koni̱yo na ka Anti̱oki̱ya, 22si̱ki̱saku̱ bhai̱ki̱li̱za mani̱ na dhuwa nibhaki̱hi̱ki̱li̱za. Nibhakigia bhiyo; “Kili na ena bhu̱su̱ andu̱lu̱ kidhedheluwe ka kusali̱a ndia Mambombi̱.” 23Paulo na Balanaba bhabhubhuwa bhangbeku tuka ka bhai̱ki̱li̱za. Ndia bhadhakia saba na si̱ba, nibhaki̱bhu̱pesi̱aku̱ kowa Sali̱a Yesu mindia yabhamuesi̱gi̱o. 24Bhakolilia ka Pi̱si̱di̱ya nibhakiduwa ka Panfi̱li̱ya. 25Ndia bhadhakia tebeza Makulu Mabhonga ka Peluga, bhai̱ya yasi ka Atali̱ya.
26Katukabho ka Atali̱ya, bhadhaya meli̱ nibhaki̱si̱ki̱a ka Anti̱oki̱ya kindia bhabhu̱pesi̱aku̱ dhuwa bhakpa nibhaki̱hi̱ki̱li̱za tuka ka kobhu̱ ndia Mambombi̱ nanga mulimo ndia bhabhi̱ nibhadhaki̱ kolai̱. 27Ndia bhaki̱dha ka Anti̱oki̱ya, bhabhukumesa bhai̱ki̱li̱za toliabho ndia bhakoli̱o ka mani̱ ndia Mambombi̱ toli̱ nesi̱ abhubhali̱sani̱ Bhakpa ndibha kali Bhayu̱daya nabho hi̱ki̱li̱za. 28Du̱mbi̱ Paulo na Balanaba bhali̱kaku̱ na bhai̱ki̱li̱za dhakia tolo mamadha.
Iliyochaguliwa sasa
Bikoluwa ndia Bhakwenda 14: KWAMBA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc., 2025
