Bikoluwa ndia Bhakwenda 12
12
Bhalemi nibhaki̱ya namusa na eni̱sa bhu̱su̱ bhai̱ki̱li̱za
1Ka bwile injo sali̱a Helude abhugba bhai̱ki̱li̱za bemoti̱ andu̱lu̱ abhu̱eni̱se bhu̱su̱. 2Alagilia eti bhamuole Yakobbo nama Yohana na tampi̱. 3Ndia atangia yoho nabhudhedhi̱ Bhayu̱daya, nakibhulagilia bhasilikale ndibhaki gba Petelo. Yoho aenikana ka bhu̱geni̱ sa mugati̱ ndia kali̱ku̱ ki̱tu̱mbi̱so. 4Ndia adhakia gbaki, naki̱mbi̱sa ka nkomo, nakilagilia nganda bhasilikale i̱ni̱ nali̱ku̱ bhasilikale bhei̱ni̱ bhei̱ni̱ bhundilia Petelo. Helude nakitegeka bi̱ki̱sa Petelo ka bi̱ya bhakpa cueliaki musango Bhu̱geni̱ sa Kanilia Koliakobe nalasi̱be.
5Petelo nibhakimuli̱ki̱sa ka nkomo no bhai̱ki̱li̱za yabhali̱kaga nibhakinsabilia si̱ni̱.
Malai̱ka nakimbuwa Petelo ka nkomo
6Ki̱li̱a, tolo ndia Helude abhi̱ ki̱mbi̱ki̱si̱li̱aku̱ Petelo ka bi̱ya bhakpa cueliaki musango ndia kadoi̱mbe, Petelo ya angi̱ sobhe sa bhasilikale bhebhali nibhamboi̱si̱ njegele na ndibhetolo bhebhali nibhabhu̱ndi̱li̱ ka mpu̱me sa nkomo. 7Menjo malai̱ka mindia Sali̱a aenikana du̱mbi̱ bemu nakibenisa subha nkomo. Malai̱ka naki̱nsi̱gaga Petelo naki̱mu̱mei̱sa, nakingia bhiyo; “Ome, yau̱!” du̱mbi̱ njegele nakikudhukanaga.
8Malai̱ka nakingia Petelo bhiyo; “Olole ngoye ndiako imamoti̱ na nkai̱to.” Petelo nakikolabhu. Malai̱ka nakitodha nakingia bhiyo; “Olole gandula ndiako toli̱ onitombe.” 9Petelo nakintomba malai̱ka hu̱wabho ka nkomo no yakai̱bi̱ eti ndia malai̱ka ali̱ka kolai̱ agbei̱ enikanai̱. Eli̱li̱kana eti Mambombi̱ ali̱ka ani̱saki kima. 10Nibhakibhukolia bhabhu̱ndi̱li̱ ndibha kateketa na ndibha kebhali nibhakiduwa ka mpu̱me sa nguwa ndia aku̱ku̱i̱sa ka tau̱ni̱ manyeta. Ki̱ku̱ku̱ yoho nakieoku̱dha. Nibhaladhetagibe, malai̱ka nakibhuliliana.
11Du̱mbi̱ Petelo naki̱hi̱ba eti ndia amuenikani̱be kandi mbela nakigia bhiyo; “Ni̱hi̱bi̱ nesi̱ Mambombi̱ anti̱ki̱ malai̱ka mindiaki bi̱ka bhuami ka kibhokoa Helude na ka kima poni ndia Bhayu̱daya bhabhi̱ kakabha kolai̱ eni̱sami bhu̱su̱.”
12Petelo ndia akenga yoho, ai̱ya ka ndabho ndia Mali̱ya, ama Yohana Maliko, kindia bi̱ya bhakpa bhabhi̱ nibhekumesi̱o ka saba. 13Petelo nakikologaga ka ki̱ku̱ku̱ du̱mbi̱ nkoli̱ Loda nakimwebhingia oku̱dhi̱liaki. 14Ndia ai̱bi̱li̱a laso ndia Petelo, Loda nakidhedhelua si̱ni̱ naki̱si̱ki̱a ka ndabho nakitetia ndia kamuoku̱dhi̱li̱mbe, nakigia bhiyo; “Petelo ali ka mpu̱me!”
15Nibhakingia bhiyo; “uwe oli ka ndoti̱?” Ndia ali̱ki̱li̱a, nibhakigia bhiyo; “Minjo andi malai̱ka mindiaki.”
16No Petelo naki̱li̱ki̱li̱a kologaga ka ki̱ku̱ku̱. Ndia bhaoku̱dha, nibhakintangia nandi Petelo, nki̱li̱ nakibhutina. 17Petelo nakibhudakisa na kibhoko ndiaki, nakibhutolia nesi̱ Mambombi̱ amboi̱ ka nkomo. Nakibhugia bhiyo “Bhuntolie Yakobbo na bhanamaki kima yoho.” Du̱mbi̱ naki̱ya ka kyalo ndietolo.
18U̱ma-u̱ma, bhasilikale sa nkomo nki̱li̱ nakibhutina nibhakitandika olu̱li̱ana ndia amuenikani̱be Petelo. 19Helude Agu̱li̱pa alagilia eti bhankabhage Petelo, no bhakantangia. Abhuolu̱li̱aga bhasilikale bhehe du̱mbi̱ nakilagilia eti bhabhuole.
Ku̱wa ndia Helude Agu̱li̱pa
Du̱mbi̱ Helude nakituka ka Yu̱deya naki̱ya li̱kaki ka Kai̱sali̱ya. 20Yali̱kaga nali ka bhulemo na bhakpa ndibha ka Ti̱lo na Si̱doni̱. Bhakpa ndibha ka Ti̱lo na Si̱doni̱ bhabhutika bemoti̱ kowabho i̱ya takanana na Helude. Bbulasita, nkoli̱ mindia sali̱a Helude yamwesi̱gi̱o, abhubhalia, nibhakikunga li̱kabho nibhahumulikani na Helude nanga yabhesi̱gi̱ nsi ndia sali̱a Helude alemi̱o bhuwa kau̱ li̱eli̱.
21Ka tolo injo ndia Helude yabhoi̱yo, alola ngoye ndiaki sa kusali̱a na ki̱li̱ka ka mbata ndiaki nakibhuongilia bhakpa. 22Nibhakikugaga makanga dhuelilia bhiyo; “Yoho kandi laso ndia nkpa, andi laso ndia mambombi̱.” 23Menjo malai̱ka mindia Mambombi̱ nakinsindikilia Helude ndwali̱ sa bhakigodho ndibha ka soho nanga yakansindage Mambombi̱. Nibhaki̱mu̱nu̱ni̱a naki̱ku̱wa. 24No bi̱ya bhakpa bhaoka kigambo ndia Mambombi̱ toli̱ nibhaki̱hi̱ki̱li̱za.
25Balanaba na Saulo ndia bhadhakia kola ndia yabhu̱i̱si̱ ka Yelusalemu, bhasi̱ki̱a ka Anti̱oki̱ya imamoti̱ na Yohana Maliko.
Iliyochaguliwa sasa
Bikoluwa ndia Bhakwenda 12: KWAMBA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc., 2025
