Chapa ya Youversion
Ikoni ya Utafutaji

Bikoluwa ndia Bhakwenda 11

11
Petelo nakyetonganabe
1Bhakwenda na bhai̱ki̱li̱za ka Yu̱deya poni bhaoka nesi̱ na Bhakpa ndibha kali Bhayu̱daya bhahi̱ki̱li̱zi̱ kigambo ndia Mambombi̱. 2Petelo ndia aduwa ka Yelusalemu, Bhayu̱daya ndibha bhabhu̱ti̱ni̱o bhansogosa, 3nibhakigia bhiyo; “Oya ka ndabho ndia bhaluku ndibha bhakabhu̱ti̱ni̱ nokuliaga nabho.”
4Du̱mbi̱ Petelo nakitandika toliabho ndia aenikani̱o toto tukiliai̱ ka nsu̱ndo. 5“Ni̱bhi̱ ka tau̱ni̱ ndia ka Yopa ninili ka saba andu̱lu̱ ndia Mambombi̱ aniani̱sa kima. Nitangia nibhadhodhoki̱si̱ kima ndie nyagi̱ suka manyeta nibhakasi̱mi̱sai̱ na nsondosi̱ i̱ni̱ tukai̱ gulu nalia kiniebhingia.” 6Ndie ni̱zi̱ba ka suka injo, nibhutangiaku̱ bhanyama poni bhatua kigu i̱ni̱ na ndibha bhakimamaga nibhakyekulula na bhambu̱lu̱. 7Du̱mbi̱ ninikioka laso ndia nkpa katoliami bhiyo; “Petelo, ome, obhuole toli̱ obhuliye bhanyama na bhambu̱lu̱ bhenjo.”
8No niniki̱nsi̱ki̱aku̱ bhiyo; “Kamazima kakitokikana Sali̱a. Kilimbebe gi̱na ndiamo na kima poni ndia kabhongi̱ liyai̱.”
9Laso ndia nkpa tukai̱ gulu nakionga nemi ndiake dou̱ bhali bhiyo; “Odhuwe i̱sa kima ndia Mambombi̱ abhongi̱si̱o bhai̱ ndia kabhongi̱ liyai̱.” 10Yoho aenikana dou̱ salo du̱mbi̱ kima ndie nyagi̱ suka injo naki̱si̱ki̱a gulu.
11“Ka saha injo toto, bhaluku bhesalo ndibha bhabhutika kowa emi tukabho ka Kai̱sali̱ya bhaki̱dha ka i̱nji̱ ndia Si̱moni̱ kindie yeni̱li̱kaga. 12Du̱mbi̱ Mwoyo Mawelikana nakinigia eti ni̱ye nabho kili kikoma. Ni̱ya na bhanamami nkaga ndibha bhanieki̱sa, nikikigodha ka ndabho ndia Koloneli̱. 13Koloneli̱ akitolia nesi̱ antangia malai̱ka ka ndabho ndiaki nakingia bhiyo; ‘Onti̱ki̱se Si̱moni̱ Petelo ka Yopa. 14Muluku miyo akukutolia ndiye nesi̱ uwe na i̱nji̱ ndiako poni bhukuzunua.’ ”
15“Ka gia eti nitandike onga, Mwoyo Mawelikana naki̱bhu̱bi̱kabe nesi̱ na bhesu̱ ateketa bi̱kasu̱be. 16Du̱mbi̱ ninikikanilia ndia Sali̱a aonga bhiyo; ‘Yohana Mbati̱zi̱ abati̱za na li̱bho no bhenu̱ bhaki̱bhu̱bati̱za na Mwoyo Mawelikana.’ 17Mambombi̱ kabha nabhu̱pesi̱a kisembo sa Mwoyo Mawelikana bhia injo ndia aki̱pesi̱a bhesu̱ ndibha bhamu̱hi̱ki̱li̱za Sali̱a Yesu Ki̱li̱si̱to, ni̱bhi̱ ndimi ani hakani̱za ndia Mambombi̱ anitoli̱o?”
18Bhai̱ki̱li̱za ndia bhaoka kigambo yoho, bhakakoma du̱mbi̱ nibhakitandika sinda Mambombi̱ nibhakigia bhiyo; “Mambombi̱ abhubhali̱sani̱ na Bhakpa ndibha kali Bhayu̱daya kwesi̱ki̱aku̱ kibi ndiabho andu̱lu̱ bhatunge bwomezi̱ ndia kaki̱si̱abe.”
Bhai̱ki̱li̱za ka Anti̱oki̱ya
19Bhai̱ki̱li̱za ndibhabhi̱ nibhahanjikani̱o nanga ena bhu̱su̱ ndia bhamuola Sitefano, bhai̱ya ka Foi̱ni̱ke na ka Ki̱pu̱lo na ka tau̱ni̱ ndia ka Anti̱oki̱ya ndia ka Si̱li̱ya, tebeza Makulu Mabhonga ndia angbei̱be Sali̱a Yesu ka Bhayu̱daya bhokaka. 20Bhai̱ki̱li̱za bemoti̱ ndibhabhi̱ nibhatu̱ki̱ ka Ki̱pu̱lo na ka Kilene ndia bhai̱ya ka Anti̱oki̱ya nibhakitandika nabho onga Ku̱gi̱li̱ki̱ na langililia Makulu Mabhonga ndia angbei̱be Sali̱a Yesu. 21Bhabhi̱ na mani̱ ndia Mambombi̱ ka langililia kigambo ndiaki toli̱ bhakpa bi̱yabho nibhaki̱mu̱hi̱ki̱li̱za Sali̱a Yesu.
22Bhai̱ki̱li̱za ndibha ka Yelusalemu ndia bhaoka makulu injo, bhantika Balanaba ka Anti̱oki̱ya. 23Balanaba ndia aduwa ka Anti̱oki̱ya, atangia ndia Mambombi̱ akoli̱o nanga kobhu̱ ndiaki, nakidhedhelua si̱ni̱ toli̱ naki̱bhu̱si̱ki̱saku̱ bhai̱ki̱li̱za bhoponi mani̱ eti bhali̱ke nibhamu̱hi̱ki̱li̱zi̱ Sali̱a na mulima ndiabho poni. 24Balanaba miyo abhi̱ muluku mabhonga nali na hi̱ki̱li̱za toli̱ Mwoyo Mawelikana namulibe. Bhakpa bi̱yabho bhamu̱hi̱ki̱li̱za Sali̱a Yesu.
25Du̱mbi̱ Balanaba ai̱ya ka Talu̱so kabha Saulo, 26ndia antakana Saulo, ai̱ya naye ka Anti̱oki̱ya. Dhakia mwaka moti̱ nalia naye, bhabhuegesa bhakpa bi̱yabho kigambo ndia Mambombi̱. Bhateketa bi̱sabe bhai̱ki̱li̱za i̱na sa bhaki̱li̱si̱tayo ka Anti̱oki̱ya.
27Ka tolo injo bhanabbi̱ bemoti̱ bhatuka ka Yelusalemu nibhaki̱ya ka Anti̱oki̱ya. 28Moti̱ kowabho mindia yabhangiagaku̱ Agabho, atelema toli̱ kolilia ka Mwoyo Mawelikana nakilanga nesi̱ inja sa mani̱ aki̱ya gu̱wai̱ ka nsi poni ndia ka Loma. Yoho aenikana ka tolo sa lema ndia Ku̱lau̱di̱yo. 29Bhai̱ki̱li̱za bhabhaliana konia bhai̱ki̱li̱za dabho ndibha ka kyalo ndia ka Yu̱deya sigikilia nesi̱ nkpa poni yatokaga. 30Yabhabhusiebhaga bhangbeku ndibha ka Yelusalemu kisembo ndiabho koliliai̱ kowa Saulo na Balanaba.

Kuonyesha

Shirikisha

Nakili

None

Je, ungependa vivutio vyako vihifadhiwe kwenye vifaa vyako vyote? Jisajili au ingia