Exodus 12
12
Etameko lyoPaska
1 Hompa kwa tanterere oMosesa naArona mosirongo saEgipite asi: 2“Oku kwedi oku yiko naku kara komuhowo komakwedi; yiko ngaku kara kwedi komuhowo komakwedi makwawo gomumvho. 3Uyungeni nombunga nazinye zaIsraeli asi: Momazuva murongo gokwedi oku, nkenye nturagumbo a guse nzwigona zimwe, nzwigona zava vemembo. 4Nye nsene vemembo vasesu konzwigona, va guse nzwigona zimwe tupu kumwe nomumaparambo ogu va likundama nendi, posivaro sovantu, nkenye ogu moomu a lire, sivaro kusiyereka ponzwi. 5Kugusa nzwigona za hana sipo, sikungwe somvhura zimwe. Kusigusa pononzwi ndi poyikombo. 6Tomu zi ndindilisa kezuva lyomurongo nagane lyokwedi oku; mbunga nazinye zaIsraeli ngazi zi dipage ngurova. 7Kohonde zonzwigona va guse ko va zi kwite koyikuravero yomonompatji nesi sekeguru lyononzugo edi vana kuzilira. 8Nyama ozo ngomu zi vava, tomu mana kuzilya masiku googo. Nye tomu zi li kumwe nonomboroto dokudira kuhaheka noyitoveso youruru yoyimeno peke‐peke. 9Nasimwe si sokulya ko souvihu ndi sokutereka nomema, nye kuzivava nomutwe nomakondo kumwe neyi yemezimo. 10Nokuhupisa po si yuma asi yokomungura. Nye nsene yina hupu po dogoro komungura, tomu yi swakerere momundiro. 11Mokuzilya kwazo ngesi: Tomu limanga nongama mombunda, nonkaku tomu dwara, ano nompango tomu kwaterere momawoko geni; kuzilya usimbu‐simbu. Azo Paska zaHompa.
12“Yeeyi momasiku aga ngani genda mosirongo saEgipite, ngani di dipage nombeli nadinye daEgipite, nedi dovantu vendi nedi doyimuna. Vakarunga navenye vaEgipite ngani va handukira ame Hompa. 13Nye honde yizo ngazi kara sidiviso sononzugo edi muna kara: nsene honde na mono, makura tani mu pitakana. Mokatji keni kapi ngamu kara simpagwa sokumuzonagura, apa ngani di si gwana sirongo saEgipite. 14Ano ezuva eli ngali kare kweni ezuva lyomadiworokero, ngomu li dane sipito saHompa. Momaruvharo geni nagenye ngomu si dive asi mpangera zanarunye.
Sipito sonomboroto da hana muhahu
15“Nomboroto dokudira kuhaheka tomu di li mazuva gatano‐nagavali; kulivinduka mezuva lyomuhowo kugusa mo yipiswiliso momambo geni. Yeeyi ogu nga lya mboroto zokuhaheka kutunda mezuva lyomuhowo dogoro mezuva lyautano‐nauvali, mwenyo gwendi yigo kudongonoka mo moIsraeli. 16Ano mezuva lyomuhowo ngamu kara epongo lyokupongoka; mezuva lyautano‐nauvali namo ngamu kare epongo lyokupongoka. Nokukwata si kokarugana momazuva ogo; eyi yokulya kwanavenye yiyo yelike yokukwata. 17Sipito sonomboroto dokudira kuhaheka yiso mu kwata po, yeeyi mezuva olyo yimo na gusire vakwayita veni mosirongo saEgipite. Yipo nye asi ezuva eli omu li dive momaruvharo geni nagenye, asi alyo mpangera zanarunye. 18Mokwedi komuhowo, mezuva lyomurongo nagane kokwedi, ngurova, ngomu lye nomboroto dokudira kuhaheka dogoro kezuva lyonomurongo mbali nalimwe lyokwedi oko, ngurova. 19Ure womazuva ogo gatano‐nagavali yipiswiliso ya ha moneka mo momambo geni. Yeeyi nkenye ogu nga lya mboroto zokuhaha, mwenyo ogo ngava gu dimise mo mombunga zaIsraeli, a kare munayirongo ndi mvharerwa zosirongo. 20Yuma yokuhaha nokumakera ko si. Nkenye oku ngomu ka hingira, tomu li doodo nomboroto dokudira kuhaheka.”
Paska zokuhoverera
21Mosesa kwa zigidire masimbi nagenye goVaisraeli, ta ga tantere asi: “Ka retereni mapata geni nonzwigona, mu zi dipagere Paska. 22Nkumwe mu guse hena sisampo sohisopo, tomu si tupike mohonde ezi zina kara morupasa, makura ozo honde tomu zi kwita‐kwita koyikuravero yomavero geni. Nye nagumwesi gokupwaga mo membo lyawo dogoro ngali se. 23Yeeyi Hompa na genda a di va sare Vaegipite. Ano nsene a mona honde koyikuravero yevero, Hompa ta pitakana evero olyo, ano muzonaguli ta mu silike asi a dire kuza mo momambo geni a ka mu dipagere mo. 24Eyi yininke yi kwateni, ngayi kare mpangera zeni novana veni narunye‐narunye. 25Ndi papa ngomu ka sika kosirongo esi nga mu pa Hompa, moomu ga si mu tumbwidira, nkedi ezi zokupongoka zi kwateni. 26Ano nsene vana veni ngava mu pura asi: ‘Nkedi musinke ezi?’ 27tanteni asi: ‘Nzambo zoPaska zaHompa ogu ga pitakanene mambo goVaisraeli, apa ga di va sere Vaegipite, nye mambo getu ga ga parwire.’ ”
Mbunga makura tazi linyongamene zi kanderere. 28Ano Vaisraeli makura tava zi va ka yi rugane. Moomu ga sansekerere Hompa oMosesa naArona, nawo yimo va ruganene.
Nomfa donombeli
29Ano pokatji komasiku Hompa makura nombeli nadinye daEgipite ta di dipaga, kutamekera kombeli zaFarawo ogu ga hingilire kosipundi sepangero, dogoro kombeli zonkwate ezi za kere modorongo, nonombeli doyimuna nadinye. 30Farawo yipo ga tundire a katuke googo masiku kumwe novakareli vendi navenye noVaegipite navenye. MoEgipite siliro sosinene sa kere mo, yeeyi kutupu embo eli lya pilire mufe. 31Yipo nye ga zigidire oMosesa naArona googo masiku, ta va tantere asi: “Katukeni mu tunde mo mombunga zange, nyone noVaisraeli, mu ze mu ka kerere Hompa moomu mwa tanta. 32Pitureni nononzwi deni noyikombo yeni nonongombe deni moomu mwa tanta. Zendeni, nye tungikeni nge name.”
33Vaegipite kwa genderesere mbunga va zi tjide mo mosirongo. Yeeyi awo kwa tantere asi: “Natuvenye tuna feni.” 34Mbunga makura tazi gusa ndombo zazo, azo va hana kuzihaheka, azo momarupasa gazo aga ava zi duvire, makura tava ga kitingilire poyikoverero yawo va ga kambeke komapepe. 35Vaisraeli kwa ruganene moomu ga va tanterere Mosesa. Awo kwa hundilire ko koVaegipite yininke yosisiliveli neyi yongorodo noyikoverero. 36Hompa kwa ninkire Vaegipite va tare mbunga zaIsraeli nomeho gomawa, makura tava pura eyi va va hundilire. Yimo nye va va hwire Vaegipite ngoso.
Vaisraeli tava tundu moEgipite
37Ano Vaisraeli makura tava tundu mo nye moRamusesi, va ze koSukoto. Awo kwa hulire poyiha yovagara woporupadi mayovi mafere gatano‐nalimwe, vakadi novanona kapi va va varwire. 38Mbunga zonene zovantu peke nazo kwa zire kumwe nawo, kumwe nononzwi noyikombo nonongombe, yimuna yoyinzi unene. 39Ndombo ezi va tundire nazo moEgipite, makura tava zi rugana nomungome da hana muhahu, yeeyi kapi va zi hahekere, morwa awo kwa va tjidire mo moEgipite, kapi va vhulire kulirangurura ndi asi va rugane ko tanko nkuta.
40Siruwo esi va kere mo Vaisraeli moEgipite nomumvho mafere gane nonomurongo ntatu. 41Ano eyi da pwa odo nomumvho mafere gane nonomurongo ntatu, mezuva lyoolyo yimo da tundire mo nombunga dovakwayita nadinye daHompa mosirongo saEgipite. 42Masiku aga gokuvangara ga fira kudiworoka kefumadeko lyaHompa, morwa yimo ga va gusire mo mosirongo saEgipite. Aga masiku gaHompa gokuvangara Vaisraeli navenye nomazimo gawo nagenye gokomeho oko.
Nompangera dokuhamena koPaska
43 Hompa kwa tanterere oMosesa naArona: “Mpangera zokuhamena nzwigona zaPaska yizo ezi: Munayirongo nokuzilya si. 44Nye mupika ogu va randa, kuzilya tupu, nsene mwa mu rugana yovamba. 45Munayirongo ndi muruganenimfuto nokuzilya si. 46Kuzilira monzugo zimwe; nokupwagesa ko si nampili kokanunu ponze, yisupa yosimuna nokuyivandagura si. 47Mbunga nazinye zaIsraeli zi dane sipito. 48Nye munayirongo gumwe, ntene ga kara membo lyoge, nye ta hara kudanena Hompa Paska, makura a rugane yovamba vendi wovagara navenye, ntani ana kuzidana ngwendi mvharerwa. Nye gokudira kurugana yovamba nokuzilya si nampili nakauke. 49Mpangera zimwe tupu koMuisraeli gomvharerwa nokomunayirongo, ogu mwa tunga nendi.” 50Ano Vaisraeli tava rugana moomu ga tanterere Hompa oMosesa naArona, nawo yimo va rugene. 51Ano mezuva lyoolyo yimo ga gusire Hompa Vaisraeli mosirongo saEgipite monombunga nombunga.
Iliyochaguliwa sasa
Exodus 12: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
