Exodus 13
13
Epongoro lyonombeli
1 Hompa yiyo ga tanterere Mosesa asi: 2“Pongwera nge nombeli nadinye donongara. Nkenye ogu ana kuzegurura sivharero sozina moVaisraeli, a kare muntu ndi si kare simuna, sange.”
Sipito sonomboroto da hana muhahu
3Ga ninka Mosesa ta tantere mbunga asi: “Omu li diworoke ezuva eli mwa tunda moEgipite moupika, yeeyi Hompa kwa mu gusa mo nokuwoko kononkondo. Yipo nye asi mboroto zomuhahu nokuzilya si. 4Naina mokwedi kwaAbibu yipo mwa tunda mo moEgipite. 5Ano Hompa nsene nga ka mu sikisa mosirongo soVakanani noVaheti noVahevhi noVajebusi, esi ga tumbwidira ozinyakurweni nomugano asi nga si mu pa, mosirongo esi sa zura masini nousi, nkedi ezi zi kwateni, ngomu zi diworoke mokwedi oku. 6Ure womazuva gatano‐nagavali kulya doodo nomboroto da hana kuhaheka, ano mezuva lyautano‐nauvali sipito saHompa. 7Nomboroto da hana kuhaheka yido dokulya mazuva ogo gatano‐nagavali. Poge za ha moneka po mboroto zomuhahu, yi kare yihaheso nayo nokuyimona si ndi asi yi moneke mosirongo seni nasinye. 8Ano mezuva eli sansekera munoge asi: ‘Eyi kukerera po morwa rweyi ga ruganena nge Hompa, apa na tundire moEgipite.’ 9Ano eyi ngayi kare sidiviso kokuwoko koge, ano sidiviso sediworoko ngasi kare pokatji komeho goge, asi veta zaHompa ngazi kare mokana koge, yeeyi Hompa kwa ku gusa mo nokuwoko kononkondo moEgipite. 10Yipo nye asi o sikise mo mpangera ezi nkenye mvhura posiruwo seesi va zi pangera.
Nombeli
11“Ano nsene asi Hompa nga ka ku sikisa mosirongo saKanani moomu ga si ku tumbwidira nomugano kumwe nonyokokuru, nye ta si ku pe, 12ngo gave kwaHompa nkenye esi sosigara esi ngasi zegurura sivharero sazinyaso. Nkenye somuhowo esi ngasi ku vharera simuna, nye sigara, oso sokuhamena Hompa. 13Nye sindongili somuhowo sosigara kusizowesa konzwigona. Ano nsene kapi ono kusizowora, si teza nsingo. Nye nombeli nadinye donongara movana veni, ngomu di zowore. 14Ano munoge gomugara, nsene a ku pura kembo asi: ‘Yinke ayi tanta yene eyi?,’ mu limburura asi: ‘Hompa kwa tu gusa moEgipite moupika nokuwoko kwendi kononkondo. 15Yeeyi Farawo apa ga likukutikire a nyoke kutusiga tu ze, yipo ga dipagere Hompa nombeli nadinye domoEgipite, kutundilira konombeli dovantu dogoro konombeli doyimuna. Yiyo nye nina kuzamberera Hompa nayinye yoyigara eyi ya zegurura sivharero sozinyayo, nye nombeli nadinye dovana vange wovagara tani di zowora. 16Ano esi si kare sidiviso soge kokuwoko koge noliva rontanto zediworokeso posipara soge pokatji komeho goge, yeeyi Hompa kwa tu gusa mo moEgipite kononkondo dendi dononene.’ ”
Emungundi lyeremo neli lyomundiro
17Ano nye apa ga sigire Farawo mbunga zi ze, Karunga kapi ga va ninkire va gende nzira zokuvyuka kosirongo soVafilisiti, mpili ngomu za kere asi yizo zopepi po, yeeyi Karunga kwa tantere asi: “Mbunga neisi ngazi livera, nsene ngazi mona yita, makura ngazi tengure koEgipite.” 18Yiyo nye ga kundwilisire Karunga mbunga zi gende zoyiha yomburundu, zi vyuke kEfuta lyEgeha. Vaisraeli kwa tundire mosirongo saEgipite, vana humata nawa.
19Mosesa makura ta pitura yisupa yaJosefa, yeeyi Josefa kwa ganenene Vaisraeli asi: “Komeho oko apa nga mu diworoka Karunga, ngomu piture yisupa yange.”
20Makura tava tundu po poSukoto tava ka zunga nontanda poEtamu konontere domburundu. 21Ano Hompa makura ta va pitisire komeho, mutenya mongundi zeremo zi va likide nzira, ano masiku mongundi zomundiro zi va minikire komeho, asi va vhure kugenda mutenya nomasiku. 22Ngundi zeremo kapi ngazi tundu ko komeho zombunga mutenya, ano ngundi zomundiro kapi ngazi tundu ko komeho zombunga masiku.
Iliyochaguliwa sasa
Exodus 13: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
