ROOMU SOKKA 16
16
ADDI ADDI MANNIRA SONKOONNIHA BAXXINO KEERE
1Kinikiriyu Katami beetekiristaanera ammanamatenni soqqantannota rodoonke Febeni egensiiseemmo'ne. 2Ise anenna wole lowo manna kaa'litannota ikkitinohura, Maganu manni garinni Mootichu su'minni wosinchimma haadhine hasiisannosere baala kaa'litinannise gede eegameemmo'ne.
3Kiristoosi Yesuusi soqqanshora kaa'litinoerira Phirisiqilaranna Aqiilira keere iillishshe"e.#Soq 18:2 lai. 4Insa ane daafira yite reyote nafa qixxaabbinoreeti. Kunnira, lowo geeshsha galateemmonsa. Ane calla ikkummokkinni Dagate giddonni higge amma'nitino beetekiristaanna baala galattannonsa. 5Minensa xaaddanno beetekiristaanera keere iillishshe"e.
Issiyu gobbara Kiristoosa balaxe amma'ninohura baxeemmo manchira Aphenetusira keere iillishshe"e.
6Ki'ne daafira lowo geeshsha daafurtinotera Maariyaamira keere iillishshe"e.
7Ane ledo usurantinorira ane gedee Ayihudera Andironiqoosiranna Yoniyaasira keere iillishshe"e. Insa Kiristoosa ane balaxxe amma'nitino. Soqqamaasinenniwano lowo geeshsha egennantinoreeti.
8Mootichunni baxeemmohura Pheliyatusira keere iillishshe"e.
9Kiristoosi loosira kaa'lo ikkinonkehura Urbaanoosiranna baxeemmohura Isixakusira keere iillishshe"e.
10Fonqolame fulasinni Kiristoosiha ikkasi egensiisinohura Apheliisira keere iillishshe"e.
Arisixobuloosi mini mannira keere iillishshe"e.
11Ane gedee Ayihudichira Heroodiyoonira keere iillishshe"e.
Mooticha amma'nitinorira Narisiisi mini mannira keere iillishshe"e.
12Mootichu soqqanshora daafurtinorira Tirufaanaranna Tirufoosara keere iillishshe"e.
Mootichu soqqanshora lowo geeshsha daafurtinotera Mootichunni lowo geeshsha baxeemmotera Phersiidara keere iillishshe"e.
13Mootichu soqqanshora egennaminohura Rufoosira keere iillishshe"e.
Isirano anerano amate gede ikkitannoetera amasirano keere iillishshe"e.#Maq 15:21 lai.
14Asinqiritoosira, Filegoonira, Hermeesira, Patirobaasira, Hermaasiranna insa ledo noo ammanaanora keere iillishshe"e.
15Filologoosira, Yuuliyara, Neriyaranna rodoosira, Olumbaasiranna ledonsa noo ammanaasine baalate keere iillishshe"e.
16Rodiimmate baxillinni sunqantinanni mimmito'ne keere haadhe. Kiristoosi beetekiristaane baala keere sokkino'ne.
GOOFIMARCHU DHAANSA
17Roduuwa'ya, afidhinoonni rosiwiinni baxxinoha gurcho coye doogo'nera worte mereero'ne babbadama kalaqqannore agadhe. Insawiinni xooqqe. 18Hattoo manni kokkensara calla ikkinnina Mootichinke Kiristoosira soqqamannoha di"ikkino. Owaatunna awishshu qaalinni beebbaataamo manna dogganno. 19Danchu Duduwira hajajama'ne manna baalaho leeltinohura lowo geeshsha hagiidhoommo. Ikkollana danchu coyira busuloota bushu coyira dussoota ikke. 20Keere aanno Magani Sheexaane rahe lekka'nera woroonni cancananno. Mootichinke Yesuusi elto ki'ne ledo heedho.
21Ledo'ya soqqamannohu Ximootewoosi, keere dhaamino'ne. Ane gedee Ayihudichi Luqiyoosi, Iyasooninna Sosiphaxiroosi keere dhaantino'ne.#Soq 19:29; 1Qor 1:14; 2Xim 4:20 lai.
22Tenne sokka borreessoommohu ani Xerxiyoosino Mootichu su'minni keereho yeemmo'ne.
23Anenna gudisama beetekiristaane towatanni noohu Gayiyoosino keere dhaamino'ne.
Katamu hajara sooreessa ikkinohu Erasixoosinna rodiinke Quwarxoosi keere dhaantino'ne. 24Mootichinke Yesuusi Kiristoosi elto ki'ne baalunku ledo heedho! Hamii'ni.#16:24Tini kiiro Giriikete afiinni borreessinoonni borro giddo dino.
GALATU HUUCCATTO
25Maganoho galata uyino. Ani Yesuusi Kiristoosire kuleemmohu Danchu Duduwiranna lowo diro maaxame keeshshe xa xawo fulino halaalira, Maganu amma'natenni jawaattine uurritinanni gede assa'nera dandaanno. 26Kuni halaali xa himanaanote borro widoonni xawe leellino. Mannu baalunku amma'ne hajajamara, hegere Magani hajajo garinni afanno gede assinoonni.
27Callisi egennaamo ikkinohura mittu Maganira Yesuusi Kiristoosinni hegere ayirrinyi iillosi! Hamii'ni.
Iliyochaguliwa sasa
ROOMU SOKKA 16: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
