ROOMU SOKKA 15
15
WOLE MANNA HAGIIRSIISA
1Ninke amma'natenni jawaantoommori, shaqqaddu daafuro duqqa hasiissannonke ikkinnina umonke hagiirsiinsoonke. 2Mitti mittinke, ledo ammanaasine amma'natenni dhaawate danchanna hagiirsiisannonsa coye assino. 3Kiristoosi isonoo dihagiirsiisino. Kuni ikkinohu,
«Xontannoheri xonono,
aana'ya ubbino»
yine borreessinoonni gedeeti.#Far 69:9 lai. 4Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afi'neemmo cincanna jawaante hexxo uyitannonke. 5Kiristoosi Yesuusi hoode hadhinanna, cincanna jawaante aanno Magani mittimmate ayyaana oo'ne. 6Kunni garinni, Mootichu Yesuusi Kiristoosi Anni Maganu mittu wodaninninna mittu afiinni ayirrissinannisire asso'ne.
DAGATE DANCHA DUDUWO KULLE
7Kiristoosi ki'ne Maganu ayirrinyira yee haa'ri'nente gede, ki'neno mimmito'ne haadhe. 8Hatto yaa'ya, akaakkate uyinoonni hexxo wo'mitanno gedenna Maganu ammanaminoha ikkinota leellishate Kiristoosi Ayihudete soqqamaancho ikkino yaate. 9Kiristoosi Ayihudete soqqamaancho ikkinohu wolu kaimi, daga maarosi daafira Magano galattanno gedeeti. Kunino:
«Dagate mereero galateemmohe;
su'makkino faarsotenni guwiseemmo»#2Sam 22:50; Far 18:49 lai.
yine borreessinoonni garinniiti. 10Qoleno,
«Ki'ne Daga,
mannisi ledo hagiidhe!»
yine borreessinoonni.#Mar 32:43 lai. 11Lendeno,
«Daga baala Kaaliiqa galattesi;
gosa baala iso galattesi!»
yine borreessinoonni.#Far 117:1 lai. 12Isayaasino,
«Isseyi sirchinni ilamannohu daanno;
dagate sooreessa ikkara ka"anno;
insano iso hexxitanno»
yaanno.#Isa 11:10 lai. 13Hexxo'ne Qullaawu Ayyaani wolqanni lophitanno gede, hexxo aanno Magani amma'nitinoonnisi daafira hagiirrenna keere wonsho'ne.
PHAAWULOOSI DAGATE SOQQAMI
14Roduuwa'ya, giddo'ne danchumma wo'miteenna, egennotennino duroo'mitine mimmito'ne seejja dandiitinannire ikkitinoonnita ani umi'ya buuxoommo. 15Mito mito coye qaagiissammo'nera hasi're, Maganu uyinoe eltonni kainohunni tenne sokka waajjummokkinni borreessoommo'ne. 16Maganu tenne elto uyinoehu Dancha Duduwo Dagate kulanni, qeesichu gede ikke Yesuusi Kiristoosira soqqamammoraati. Kunnira, Daga Qullaawu Ayyaaninni qullaawoota ikkite Magano hagiirsiissanno kakkalo ikkitanno gede assateeti.
17Kiristoosi Yesuusiha ikkoommo daafira, Maganoho soqqama dandaa'yara naaxxeemmo. 18Daga Maganoho hajajantanno gede assate Kiristoosi coyi'roommo qaalinninna assoommo coyi widoonni loosinore agurranna wolere coyi'ra dihasi'reemmo. 19Hakku coyi ikkinohu, Qullaawu Ayyaani wolqanni addi addi maalalenninna malaattanniiti. Kunnira, Yerusaalametenni kayise Iliwariqooni#15:19 Iliwariqooni yinannihu Delimaaxa yinannihu ledo mittoho. geeshsha Kiristoosiha Dancha Duduwo gudise duduwoommo. 20Wolu safinohu aana looseemmokki gede, wo'ma woyite Kiristoosire macciishshitinokki gobbara Dancha Duduwo kula halcheemmo. 21Kuni ikkannohu,
«Isire kulloonninsakkiri affanno;
macciishshitinokkirino wodanchitanno»
yinoonni gedeeti.#Isa 52:15 lai.
PHAAWULOOSI ROOMA HA'RARA HEDI
22Xaa geeshsha ki'newa daa hoogoommohu, tenne soqqansho daafira yeeti. 23Xa kayinni kawiicho noo looso gudeemmona, lowo diro ki'newano daate halchanni keeshshoommo daafira, 24Isipeene ha'reemmo woyite ki'ne widoonni daammora hedoommo. Shiima yanna ki'ne ledo keeshshe hedoommowa ha'reemmo woyite kaa'litinaera hasi'reemmo. 25Xa kayinni hakko nooha Maganu manna towatate Yerusaalame ha'reemmo. 26Hakka ha'reemmohu, Meqedooniyunna Akkayu ammanaano Yerusaalamete ammanaano giddo noo buxanera baxxe woxe soyate maltinohuraati.#1Qor 16:1-4 lai. 27Kaa'lo baxxe uyitino; aano hasiissannonsate. Daga Ayihudenniha ayyaanaamo atoote beeqqitino daafira, insarano Ayihudete maalu atoote beehate asali noonsa.#1Qor 9:11 lai. 28Gamba assinoonninsata wo'ma kaa'lo haa're Yerusaalame iillishummohu gedensaanni, Isipeene ha'ranni ki'ne lae saeemmo. 29Ki'newa dayemmo woyite Kiristoosita wo'ma maasso haa're dayemmo'neta afoommo.
30Roduuwa'ya, anera seekkitine Magano huuccatenni hale ikkitinannie gede, Mootichinke Yesuusi Kiristoosinninna Qullaawu Ayyaani baxillinni huucci'reemmo'ne. 31Huuccitinanniehuno Yihudaho noohu amma'ninokki manni anganni gateemmo gedenna soqqansho'ya Yerusaalamete heedhanno ammanaasine hagiirsiissanno gedeeti. 32Maganu yiiro, ki'newa hagiirrunni daye ledo'ne fooliishshi'rammora hasi'reemmo. 33Keere aanno Magani ki'ne wo'munku ledo hee'ro! Hamii'ni.
Iliyochaguliwa sasa
ROOMU SOKKA 15: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
