Ijaag Wosɛytaanakoŋk 14
14
Paawuloos A Barnabaas Ikoniyoone
1Guugunyarɓa Paawuloos a Barnabaas godeya tolɛɛɗoŋk Ayuuduk Ikoniyoone oko sinɛɓa barɛrɗik. Nɛɓa waasiɗi saadi ɓaŋkawukaat, nɛɓa ŋaadiɗi joop Ayuuduk a Giriik a ɓɔɔkaaŋ. 2Yakana joop Ayuuduk sigɛ kir ŋaadiɗiitik ɓeesɛrɓa joop sigɛ moko Ayuuduk, nɛ arir kɛnɔ ɓooyɛɛ wosɛytaanak Suumiyoŋk. 3Beeɗirɓa Paawuloos a Barnabaas saadi a jeeɗo ɔɔtɛ nɛɛkɛkiŋ, a waawasar ɔɔtɛ Suumiyoŋk a kir ɓuriit. Nɛɓa Suumii gaɓɛ sɛɛga ɓaŋkawuka kɛnɔ ijaagir sɔɔriyɛ, a ola sigɔ reemɗi ɓayɛk kɛnɔ yaaŋɛ kɛ ege pɛɛni nɛɛkɛk wookanoŋk eekerkan. 4Nɛɓa joop katamɛ nɛɛkik pakatir ɛɛk a pɛɛy. Nɛ ɔgɔ a joop Ayuuduk, ma ɔgɔ a wosɛytaanak.
5Joop sigɛ moko Ayuuduk a joop Ayuuduk sɛɛg a ɔɗɔweer gɛŋk, ɗɛyɛrɓa laaŋoyɛta Paawuloos a Barnabaas, ɛ ɗɛyɛr sɛɛg baabaala giɗeekɛ. 6Saaɓa dɛnɛrɗi any sinik, nɛɓa gonar katamɛɛka Listira a Dɛrbeek a Likaoniyaak, a ɗɔkanɛɛka sigaaga atu tookɛɛtak, 7nɛɓa waasɛr Pɛɛni sinɔ Ɓɛlkɛɛstank saadi.
Paawuloos A Barnabaas Listirakɛ A Dɛrbee
8Lakɛɓa iɗit om sinɔɓa sɛɛgiya deran nɛɛkɛŋɔŋk Listirake. Agut sinɔɓa ege iɗit sini nyɔŋtan a tukiɗi saaɓa ɓartɛɛɗɛɛk nɛɓa ki oolɛ a ŋawite derakɛ gɛɛnɛŋ. 9Geleewɛɓa iɗit sini saaɓa tonɗiiɗ Paawuloosukuŋ, nɛɓa Paawuloos mermen iɗit sinɛ jɛt nɛ dɛnɛ a lak ŋaadiyɛ sigɔ ɗegeera a bɔdugeeɗŋɔŋk, 10nɛɓa tongeeɗ a ɗooruŋ kɛ, "Ɛti derakɛ goonɛ kɛ sɛm!" Nɛɓa sisa iɗit sinɛ ŋaar raŋana nɛ tuke ŋawit.
11Saaɓa joop gɛɛnɛ dɛnɛrɗi any sinɛɓa ijaag Paawuloosuk, nɛɓa tonur ad Likaoniyaak a ɗooruŋ kɛ, "Kurakkɔ jookak son lak eteŋkik a gayi a joop." 12Naɓa riyar Barnabaas kɛ Diya, maɓa riyar Paawuloos kɛ Hermeen, agut sinɔɓa tonɗiiɗ sɛɛn kɛ ɗɔmk. 13Tapaɗ sinɛ goroyoŋk riyɛ kɛ diyaak sinɛ ar katamɛɛ nɛɛkɛ walasik ɗɔkuɓa jeguyatɔk a makɛyɛ saana mɛlɛɛɗɛ katamɛya nɛɛkaakik, nɛ lotɛr ɛɛk a joop sigɛ ɓɔɔkaak nɛ ɗɛyɛr a wideetar uduŋeet Paawuloosa a Barnabaasa.
14Mayakana saaɓa tiyɛrɗi Barnabaas a Paawuloos any sinik, nɛɓa pɔɔpɔkar abiyak gɛŋk nɛɓa reerir son lak joop gɛɛŋkik a ooyɛr a tonur kɛ, 15"Iinak joop sigi, ijaagiir any sini agut jikon? Eteŋk ɓɔrɛ joop oko iinak. Kusiikɔ seena kɛnɔ kɔna waasii Pɛɛni sini Ɓɛlkɛɛstank, kɛnɔ wideer ɛɛk ant sineene kiiɗɛ ɔɔtɛk, nɔ weerikɔɔ Waakoyota sinaana bɔdɛɛk sinaanaɓa riiɓe dari, a ɗook, a gɔrɔ sinɔ ɔbiiŋɔŋk, a ola sigɛ ɓɛɛlɛr sɛɛge takik. 16Emeyikɛ sigaagɛɓa ɗoyurk ŋɔɗurɓa Waakoyot joop baŋɛ kɛnɔ kaar gopɛ nɛŋk. 17Yakanaɓa sɛŋk yaaŋɛ kɛ sɛɛn Suumi sinɔ mentan a ɛtɛ ɛkik, olaatɛ sigaagɛ ijaagik. Nɛ kɔna gaki tul dari, a ɛyɛkeer sigɔ riiɓerɗi ɗamatik taamɛk, ɛ kɔna gaɓɛ ɗamatik, nɛ ari ɓayetun goŋk a yaagarŋ ɗamatikɛ." 18Kɛygunɓa Paawuloos a Barnabaas tonurkɛ any siniŋ, rakatɛrɓa jɛt nɔɓa arirɗi joop gɛɛŋk nɔ nyɛyɛrɗi diil uduŋeetoŋk son lak sɛɛgik.
19Yakana joop Ayuuduk kurakɓa saana Ansokiyaake a Ikoniyoone nɛ ɓeesɛr joop gɛɛŋk. Nɛ baabaalar Paawuloos giɗeekɛ nɛ koɓur kɛ rɛrkɔŋ, nɛ puruuteetar nɛ boŋiitar katamɛɛ nɛɛkɛ walasa. 20Yakanaɓa ɛtɛrɗi nomtaanak gɛɛnɛ tookɛɛta, nɛɓa Paawuloos ŋaar raŋana nɛ kɛɛ katamɛya. Nɛɓa alɛ nɛɛkɛ ŋaarar a Barnabaas Dɛrbeya.
Weeri Paawuloos A Barnabaas Ansokiyaaka Sinaana Ar Sooriyaakek
21Waasɛrɓa Paawuloos a Barnabaas Pɛɛni sinɔ Ɓɛlkɛɛstank Dɛrbee, nɛɓa arir joop a ɓɔɔkaaŋ a ŋaadtaanak. Saadi baŋiya ŋaarɓa Listiraka, a Ikoniyooka, a Ansokiyaaka kɛkar. 22Nɛɓa rɔɔriyar ŋaadtaanak saadi kɛnɔ ɛtɛr ŋaadiyɛɛkɛ gɛŋk a ɓaŋkawuŋ, nɛɓa tonur sɛɛga kɛ, "Ɗɛyɛ tina a laŋkii rakatɛ sinɔ obiiŋɔŋk nɔkoy guugunyɗii burɛya Waakoyotoŋkuk." 23Ɛɓa daamar sɛɛga gutarɛyɛ godeyik Sambatɛyɛɛkoŋkuk baŋɛ. Nɛɓa ɗanɗama ɛ soomɛr, nɛɓa gaɓɛr sɛɛg a adarat Suumiya sinaana ŋaadirk.
24Nɛɓa ɗoyur sinɔɔnɛ Pisdiyamuk nɛ ŋaarar Pinpiliyaa. 25Nɛɓa tonur pɛɛni nɛɛk Pergeme, nɛɓa ɓurɓurɗi Ataliyaa. 26Nɛɓa saadi teeŋɛr emɗa nɛ weeri Ansokiyaaka sinaana ar Sooriyaakek, sinɛɓa geetiɗɛɛ sɛɛg wookan Waakoyotoŋkuk ijaaga sinaanakɔ dusanɛr sisak.
27Saaɓa mɛlɛrɗi Paawuloos a Barnabaas saanak, nɛɓa tolɗi ŋaadtaana agut omoŋ, nɛ tonur sɛɛga any sinɛkɔ ijaag Waakoyot sooy lak sɛɛgik baŋɛ, ɛ kɛ tayɛkɔ tuga sinɔ oolɛrɗi ŋaadiyɛɛk ɛk joopa sigaaga moko Ayuuduk. 28Nɛɓa beeɗir saadi a jeeɗo ɔɔtɛ nɛɛk a nomtaanak agut omoŋ.
Iliyochaguliwa sasa
Ijaag Wosɛytaanakoŋk 14: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
