Ijaag Wosɛytaanakoŋk 13
13
Wosɛyɛɛ Barnabaas A Saaool Rɔɔriyɔɔna
1Godeey Sambatɛyoŋk sinɔɔnɛ ar Ansokiyaakek, lakɛɓa joop pɛrkaakoŋk a rɔɔriytaanak. Joop sigi, Barnabaas, a Simion sinɛ kɔjuk, a Lukiyoos sinɛ iɗit ɗoo Kɛrenaak, a Minahee sinɛ ɔɗɔwen woriya Herodis sinɛɓa ikomu pakattan ɗoo aŋaneen nɛɛkik, a Saaool. 2Nɛɓa a atu ugumeet Suumiya ɛ soomɛr, nɛɓa tonur Wɛɛŋa sigɔ Geetitaanakik kɛ, "Inta pakatɛɛ Barnabaas a Saaool ijaaga sinaanakɔ daamguɗa sɛɛgik." 3Agut sini saaɓa soomɛrɗi ɛ ɗanɗamaak baŋiya, nɛɓa riiɓer sɛɛge arin raŋk nɛ ŋɔɗutar sɛɛgiŋ.
Barnabaas A Saaool Kopiroose
4Wosɛyɛrɓa Wɛɛŋa sigɔ Geetitaanakik Barnabaas a Saaool nɛ kaar Selewukiyaa. Nɛɓa saadi ɗoyitar Kopiroosa emɗ. 5Nɛɓa mɛlɛr katamɛya Silmanaak, nɛɓa rɔɔriyaaɗ pɛɛni Waakoyotoŋk godeyikɛ tolɛɛɗoŋk joop Ayuuduk. Markoos sinɛɓa riyɛ kɛ Yowanisik sɛɛnɓa ɓɔrɛ a sɛɛg kɛnɔ kɔnyɛ sɛɛg.
6Kaarɓa nɛɓa ŋawiiter asuulɛ Kopiroosuk baŋɛ nɛ mɛlɛr Paapuwa. Nɛɓa saadi laŋirki iɗit om Ayuuduk sinɔ riyɛ kɛ Baar Yeeseek sinɔɓa ŋɛyk, ɛ iɗit pɛrkaakoŋk sinɔ nyonkank. 7Beeɗirɓa a iɗit sinɔ suumi ɗookoŋkuk, sinɔ riyɛ kɛ Sɛrgiyoos Paawuloosuk sinɔɓa ɗeger ɛɛkik. Suumi sini riyɓa Barnabaas a Saaool nɛ ɗɛyɛ a tiyɛ pɛɛni Waakoyotoŋk. 8Yakana Baar Yeese sinɛɓa ŋɛyk sinɛɓa riyɛ ad Giriikik kɛ Elimaasik ɗɛyɛɓa suumi sinɛ ɗookoŋk kɛnɔ kat ŋaadiɗi, nɛɓa ɓooyu Barnabaas a Saaool.
9Saaool sinɛɓa riyɛ kɛ Paawuloosuk enyɛɛriɓa Wɛɛŋa sigɔ Geetitaanakik, nɛɓa mermen iɗit sinɛ jɛt nɛɓa tongeeɗ kɛ, 10"Iin tɔɔn diyabiloosuk, iin gumaaken eekeeroŋk baŋɛ siniɓa barɛ raamiyɛ a koɓi sinɔ ŋɛɛwɛnŋɔŋkuk. Kin toŋoɗ ruruŋ gopan Waakoyotoŋk sinɛ ɓɛɛlɛ kɛ sɛmk? 11Dɛnko, sisɔ mɛlki kɔɔna goopan Suumiyoŋkuŋ, dakinkɔɔ a mot ɔɔtɛya sinɔɔna balaaŋɔŋk kinkɔɔ taanta pɛɗɛrka waawuyoŋk." Nɛɓa sisa miinye taamɛ gɛɛŋk gumoy a nyuugur. Nɛɓa weerɛ ɛɛk tookɛɛta nɛ tuke ɗaaɗapɛɛt a warɛ iɗit sinɔ gaamu sɛɛn ari nɛ puruuteŋɔŋk. 12Saaɓa iɗit sinɛ suumi ɗookoŋk dɛnɛɛɗ any sinɛɓa ɓɛɛlɛk, nɛɓa reemɗi ɓayɛ nɛɛkɛ agut rɔɔriyɔn sinɛɓa tiyɛ agut Suumik nɛɓa ŋaadiɗiiŋ.
Barnabaas A Saaool Ansokiyaake
13Saadi baŋiya teeŋɛrɓa Paawuloos a piraakak gɛɛŋk emɗa nɛ ŋaarar Paapuwee, nɛ kaar Pergeya sinaana ar Pinpiliyaakek. Yakana Markoos sinɛɓa riyɛ kɛ Yowanisik, pakatɓa sɛɛge ɛɛk nɛ weeri Yorsaleema. 14Yakanaɓa sɛɛk ŋaarar Pergee nɛ kaar Ansokiyaaka sinaana ar Pisdiyaakek. Nɛɓa waawuy Sambatɛyoŋk Ayuuduk guugunyar godeya tolɛɛɗoŋk nɛ dokurɗe. 15Nɛɓa ambabɛɛ wargatɛyɛ higi Muuseek a Joop Pɛrkaakoŋk, nɛɓa ɔɗɔweer gode sinɛ tolɛɛɗoŋkuk wosɛyɗi son lak Paawuloosakik, nɛ kɛɛɗɛɛ tonɛɛ sɛɛga kɛ, "Iinak manyaakak eeta, ɔkɔn latukari pɛɛni sinɔ gaananɗiŋɔnkuŋ, intina tonɛɛ."
16Nɛɓa Paawuloos ŋaar raŋana, nɛ ijoopɛ joop gɛɛŋk ariit nɛ tonu kɛ, "Iinak joop Ayuuduk, a iinak joop sigɔ moko Ayuuduk sigɛ ɓurer Waakoyok baŋɛ, in tiyɛ. 17Waakoyo joop sigi Israeelik daamɓa ɔrɛyak gaŋkiŋ. Saaɓa atukuɗ ɗook Gibsik, ijaagɓa sɛɛg a joop sigɔ boobɛrŋɔŋk. Boŋkuɓa sɛɛg ɗook sinaanɛ ɓaŋkawukaat nɛɛkɛ sinɔɔnɛ obiiŋɔŋk. 18Nɛɓa lowu sɛɛg ɓakaawurɔɔn oolaanik emeyika sigɔɔga pɔlpɔlɛ joop pɛɛyk paaton tak. 19Nɛɓa aalɛ ɗook Kɛnɛaanik maŋgistiyɛ a tula pɛɛy, nɛ gaɓɛ ɗoo nɛɛk joopa gɛɛnaak. 20Ɔɔtɛ sinɔɔnɛ emeyi ɗibɛɛ aŋan a pɔlpɔlɛ joop pɛɛyk a aarink.
Saadi baŋiya gaɓɛɓa sɛɛga ɔɗɔweer mɛlɛɛɗa eta pɛrkaakoŋk Saamueela. 21Nɛɓa saadi joop kalɛyir Waakoyo kɛnɔ suume sɛɛga suumi, nɛɓa Waakoyot ari a suumɛɛ sɛɛga tɔɔn Kisinik Saaool, sinɛ komoy Biniyamuk emeyika sigɔɔga pɔlpɔlɛ joop pɛɛyk. 22Nɛɓa ɔɔyɛ Saaool, nɛɓa suume sɛɛga Daawit. Nɛɓa Waakoyot waasiɗi agut Daawit nɛɓa tonu kɛ, "Laŋakɔ tɔɔn Iseyk Daawit sinɛ pora ɓayaayk, sinɛ ijaag any sinɛ ɗɛyakik baŋɛk."
23Ɗɔkuɓa komoy iɗit sinik Yeesee sinɛ ebɔditan joop Israeelik okosinɛɓa kuumɗiiɗ Waakoyotuk. 24A inɓa Yeese kiiki mɛlɛ, nɛɓa Yowanis rɔɔriy joop Israeelik baŋɛ kɛnɔ weeriik tikiyɛɛkɛ Waakoyota nɔ aadɛɛ sɛɛg. 25Saaɓa Yowanis arkiɗ ruumeet ijaag nɛɛkik, nɛɓa tonu kɛ, "Gayikii kɔna a wooɗ? Moko eet Keresee, mayakana mɛlkikɔɔ iɗit om eete baŋi. Kaa saak oolɛ a woora melti saamɛyɛ gɛɛŋkikŋ."
26Iinak manyaakak eeta komoy Abrahamuk a iinak joop sigɛ ɓureer Waakoyok joop sigɔ moko Ayuuduk, wosɛykɛɛɓa pɛɛni sini bɔdɛɗoŋk eteŋka. 27Yakana joop sigɛɓa beeɗir Yorsaleemek a ɔɗɔweer gɛŋk kirɓa ɗegerɔɔn kɛ ege Yeesee ebɔdtan. Nɛɓa sɛɛga ki mɛlɛ wargatɛ Pɛrkaakoŋk sinɛɓa ambabɛɛ wawuykɛ Sambatɛyɛɛkoŋk Ayuuduk nɛɓa pɛrɛdɛrɗi kɛnɔ dusanɛɛ pɛɛni joop Pɛrkaakoŋkuk. 28Kɛygunɓa kirkiɗ laŋiiɗ any sinɔ ɗegeera a rɛrgiɗɛɛŋɔŋkuŋ, yakanaɓa kalɛyir Pilatoos kɛnɔ ɓokotu sɛɛga. 29Saaɓa dusanɛrɗi any sinɛɓa taapɛɛ agut sɛɛgik baŋɛk baŋiya, nɛɓa woorurku laalawutant nɛ kɔwarŋ. 30Yakanaɓa Waakoyot boŋku sɛɛn ret walasa. 31Nɛɓa Yeese yaaŋɛ ɛɛk joopa sigaagaɓa sɛɛg a sɛɛnik a ɗoŋ ɓɔɔkaaŋ a tukiɗi Gɛlilaake nɔ mɛlɛɛɗa Yorsaleema. Nɛ sisɔ sɛɛg joop sigɔ yaaŋɛr sɛɛn joopak.
32Eteŋk ɓɔrɛ waasii kɔna Pɛɛni sinɔ Ɓɛlkɛɛstank, any sinɛɓa kuumɗigeeɗ Waakoyot ɔrɛyakak gaŋkik. 33Agut sinɔkan boŋkuɗ Yeesee ret walasak, dusanɛɛ eteŋka kaakɛyɛɛka gɛŋk, any sinɛɓa kuumɗigeeɗ Waakoyot sɛɛgak. Taapɛɛɓa Iiliyakɛ pɛɛyeene nɛɛkɛ kɛ,
'Iin tɔɔn naak,
ɓartakɔnu ɓenyse.'
34Maɓɔrɛ kɛnɔ yaaŋɛ sinɔ kɛ boŋkuɓa sɛɛn Waakoyot ret walasa kɛnɔ kat mojɛɗ, tonuɓa kɛ,
'Gaɓaakoy kɔna Pɛɛni kuumiyɛɛkoŋk sinɔ geetitank ɛ ŋaadɛɛŋɔŋk sinɛɓa gaɓɛɛ Daawitaak.'
35Maɓɔrɛ tonu Iiliyakɛ ɔgɔɔkɛ kɛ,
'Kin seŋk ijaagɛ buusɛ Tɔɔn Nookuk sinɛ Geetitank kɛnɔ mojɛɗ.'
36Saaɓa Daawit arkiɗ wɛɛŋakɛk, nɛɓa ruume koɓi sinɛɓa gaamgeeɗ Waakoyotukuŋ. Nɛɓa rɛr nɛɓa kɔɔwɛɛ a ɔrɛya gɛɛŋk agut omoŋ, nɛɓa mojɛ buusɛ nɛɛkɛŋ. 37Yakana Yeesee sinɛɓa boŋku Waakoyot ret walasak kiɓa mojɛ buusɛ nɛɛkɛk.
38Sisɔ iinak manyaakak eeta, in ɗegerɛɛ kɛ waasɛɛkɔ kɔna kɛ laŋɛɛ sooy lak Yeeseek tɔŋɔɗ tikiyɛɛkoŋk. 39Iɗit sinɔ ŋaadiɗi sɛɛnek baŋɛ ŋaarki tikiyɛɛkɛ, sigɔɔgɛ ki oolɛ higi Muuseek a boŋu sɛɛnŋɔŋk. 40In koorɛɛ ɛɛk kɛnɔkoy kat laŋirkɔɔ any sinɛɓa tonur joop pɛrkaakoŋk kɛ,
41'Iinak joop sigi anyaayikaanakik,
in ŋaatɛɛ, in badɛɛ,
araakɔɔ eme noŋk any sinɔkɔɔ kiir ŋaaditik,
kɛygunkɔɔ kɔna tonɗi wooɗuk.' "
42Nɛɓa Paawuloos a Barnabaas ŋaararki godeey sinaanɛ tolɛɛɗoŋk Ayuuduk, nɛɓa kalɛyir sɛɛg joop gɛɛnɛ kɛnɔkɔɔ tonur sɛɛga kɛkar Sambatɛɛ Ayuuduk sinaanɛkɔɔ mɛlkik. 43Saaɓa kɛɛtiɗiiɗ joop sigɛɓa tolɗik baŋiya, nɛɓa joop Ayuuduk a ŋaadtaanak sigɔɓa guugunyar ŋaadiyɛɛka joop Ayuuduk a ɓɔɔkaaŋ nomɛrɗi Paawuloos a Barnabaas. Nɛɓa Paawuloos a Barnabaas waasɛr joopa gɛɛnaak nɛ kalɛyir sɛɛg jɛt kɛnɔ beeɗir a ɓaŋkaawurar wookan Waakoyotoŋk ɔɗɔɔka.
44Sambatɛɛ pɛɛyeene nɛɛkɛ, tolɗiɓa joop a ɓɔɔkaaŋ katamɛ nɛɛkik a dakɛrki a tekerŋ kɛnɔ tiyɛr pɛɛni Waakoyotoŋk. 45Saaɓa ɔɗɔweer joop Ayuuduk dɛnɛrɗi joop sigɔ ɓɔɔkaaŋɔŋkuk, nɛɓa ɛnyɛɛri nyeken, nɛɓa ɓooyur toni Paawuloosuk nɛ nyɔɔnarŋ. 46Yakanaɓa Paawuloos a Barnabaas tonur sɛɛga a kir ɓuriit kɛ, "Ɗɛyɛ tɛɛnan jeemɛ a tonɛɛ pɛɛni Waakoyotoŋk iinaka. Ɔkɔn sɔɔk toniir ɗuma kɛ ki kɔna ɗɛyɛ wɛɛŋa sigɛkoy nɔkoy nɔkoykuŋ, nɛ seek weeri ɛɛk nɛ kɛɛɗii sinɔɔnɛ lak joop sigɛ moko Ayuuduk. 47Agut sinɔ tonuɓa Suumii kɛ, 'Arakanni a pɛɗɛrka joopa sigaaga moko Ayuuduk, kɛnɔ bɔdɛr joop ɗookoŋk baŋɛ iine.' "
48Saaɓa joop sigɛ moko Ayuuduk tiyɛrɗi sinik, nɛɓa yaa sɛɛgaŋ nɛ eemɛyar pɛɛni Waakoyotoŋk. Nɛɓa ŋaadiɗi joop sigɛɓa daamɛɛ sɛɛg wɛɛŋaka sigaagakoy nɔkoy nɔkoyk baŋɛ. 49Bakaanyirɓa pɛɛni Suumiyoŋk ɗook sinaanɛ baŋɛ.
50Yakana ɔɗɔweer joop Ayuuduk ɓeesɛrɓa joop sigɛ latu worik, a jartiyatɔk sigɔ ŋaadir Waakoyok, a joop katamɛ nɛɛkik sigɛ boobɛrk, nɛɓa arir kɛnɔ ŋaarki epaayan Paawuloose a Barnabaase raŋk, nɛɓa ɔɔyɛrki sɛɛg ɗook nɛŋk. 51Nɛɓa tɛntɛŋɛɛtar Paawuloos a Barnabaas duudur derakɛ gɛŋk nɛ ŋaarar Ikoniyooka. 52Nɛɓa nomtaanak gɛɛnɛ enya yaaka a Wɛɛŋa sigɔ Geetitaanakik.
Iliyochaguliwa sasa
Ijaag Wosɛytaanakoŋk 13: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
