Ijaag Wosɛytaanakoŋk 15
15
Tolɛɛ Yorsaleeme
1Kaarɓa joop a omoŋ omoŋ Yuudaake Ansokiyaaka, nɛ tuker rɔɔriyɔɔna ŋaadtaanak kɛ, "Ɔkɔnkɔɔ kɔnu kɛɛ yawɛɛɗ oko higi Muuseekiŋ, kiirkoy bɔdɛ." 2Nɛɓa palamɗi Paawuloos a Barnabaas ɛɓa ɗaaki a joop sigɛ a ɓaŋkawuŋ agut any sini. Nɛɓa tonɛɛ kɛnɔ kaar Yorsaleema Paawuloos a Barnabaas a ŋaadtaana ɔgɔ a tekerŋ sigɔ atu Ansokiyaakek kɛnɔ kaar tonur any sini wosɛytaanaka a gutarɛyɛɛka. 3Nɛɓa wosɛyɛr sɛɛg joop gode Sambatɛyoŋk nɛ kaarŋ. Saaɓa ɗoyurɗu sinɔɔnɛ Pinkeek a Sɛmaariyaak, nɛɓa tonur weerɛɛt Waakoyotak joopa sigɔɔga moko Ayuuduk yaaŋɛrɓa waasiyɛ sigi ŋaadtaanaka baŋɛ.
4Saaɓa mɛlɛrɗi Yorsaleemak, nɛɓa boŋur sɛɛg joop gode Sambatɛyoŋk, a wosɛytaanak, a gutarɛyɛ. Nɛɓa tonur sɛɛga any sinɛkɔ ijaag Waakoyot goy nɛŋk baŋɛ. 5Yakana ŋaadtaanak sigɔ komoy joop Paarisik a omoŋ omoŋ ŋaararɓa raŋana nɛ tonur kɛ, "Joop sigɔ moko Ayuuduk ɗɛyɛ a arɛɛ sɛɛg a yawɛɛ sɛɛgiŋ kɛnɔ koorɛr higi Muuseek."
6Nɛɓa wosɛytaanak a gutaryɛ tolɗi kɛnɔ mermenar any sini. 7Palamɗiikɛɛɓa jɛt, nɛɓa saadi baŋiya Petros ŋaar raŋana nɛ tonu sɛɛga kɛ, "Iinak manyaakak eeta, ɗegerari kɛ daamkanti Waakoyot jeemɛ iinakɛ kɔɔr, kɛnɔ waasa Pɛɛni sinɔ Ɓɛlkɛɛstank joopa sigaaga moko Ayuuduk kɛnɔ tiyɛr nɔ ŋaadiɗi. 8Waasɛkan sɛɛga Waakoyot sinɛ ɗeger ɓayɛ etoŋkuk, a gaɓɛ sɛɛga Wɛɛŋa sigɔ Geetitaanakik oko sinɛkan gaɓɛɛɗ eteŋkaak. 9Kiɓatin pakaatɛ a sɛɛg, ijaagɓa ɓayɛtun gɛŋk a mentaanaŋ ŋaadiyɛɛkɛ. 10Sisɔ paariir Waakoyo kɛnɔ riiɓeer ŋaadtaanakɛ tigoneerɛ toloy sinɔɓa ɔrɛyak gaŋk maŋk eteŋk kii oolɛ a ɓatakiiŋɔŋk agut jikon? 11Ŋaadii kɛ bɔdɛɛɗii wookan Suumi Yeeseek oko sɛɛg."
12Nɛɓa joop gɛɛnɛ baŋɛ dakɛr kɛ many, nɛ geleewɛr Barnabaasa, a Paawuloosa, saaɓa waasɛrɗi sɔɔriyɛ a ola sigɔ reemɗi ɓayɛk sigɛɓa ijaag Waakoyot goy nɛŋk joope sigɔɔgɛ moko Ayuuduk kɔɔrk. 13Saaɓa tonɗiiɗ nɔ ruumerk, nɛɓa Yaykoob tonu kɛ, "Iinak manyaakak eeta, inta tiyɛ. 14Waasɛɓa Petros kɛ kɛɛɓa Waakoyot tuki nɛɛkɛ ɛk, son lak joop sigɔ moko Ayuuduk, kɛnɔ daam joop sigɔ riyɛɛ tiriyaakɛ gɛɛnɛkik. 15Lalaŋi sini a pɛɛni sinɛɓa taapɛr joop pɛrkaakoŋk kɛ,
16'Weerikaakoy seedi baŋiyaaŋ,
kɛnyakoy burɛ Daawitik sinɛɓa aalɗiikiŋ.
Tootokaakoy ola sigɛɓa aalɗiiɗikiŋ,
nɛkoy ijaaga sɛɛg a ɛtɛr kɛkar,
17kɛnɔ joop ɔgɔɔk a joop sigɔ moko Ayuuduk
sigɛkan riyɛɛ sɛɛg tiriyaakɛ gaanɛkik ɗɛyɛr Waakoyo.
18Tonɗi oko sinik Waakoyo, sinɛɓa yaaŋɛ any sini aɓa tukiɗi ɗeeŋk.'
19"Agut sini koɓi naak kɛnɔ kat ooɗii joop sigɔ moko Ayuuduk sigɛ weerik son lak Waakoyok. 20Ma ɗɛyɛ tina a taapɛɛrii sɛɛga wargatɛ sinɔ tonu kɛ, 'Kat ɗamɛɛ any sinɔ somkaank sinɔkɔ uduŋɛɛ raŋawotak. Kat ijaagɛɛ ruunyikeen. Kat ɗamɛɛ taar keegun sinɔkɔ rɛr akɔ ubuŋɗi makɔ kɛɛ ŋɔɔlɛɛtik, ɛ kat ɗamɛɛ yɛrom.' 21Agut sinɔ aɓa tukiɗi ɗeeŋ ambabɛɛɓa higi Muuseek wawuykɛ Sambatɛyɛɛkɛ sinɔɔnɛ godeyi tolɛɛɗoŋk Ayuuduk, waasɛɛɓa pɛɛni nɛɛk sinɔɔnɛ katamɛɛkoŋk."
Wargatɛ Sinɛɓa Taapɛɛrɛ Ŋaadtaanaka Sigɔɔga Moko Ayuuduk
22Saadi baŋiya tonɗiiɓa nomtaanak, a gutarɛyɛ, a joop gode Sambatɛyoŋkuk baŋɛ kɛnɔ daamɛɛ sɛɛge joop a tekerŋ kɛnɔ wosɛyɛɛ sɛɛg Ansokiyaaka sɛɛg a Paawuloos a Barnabaas. Nɛɓa daamar ŋaadtaanakɛ kɔɔr Yuudaa sinɛɓa riyɛ kɛ Bɛrsiyank a Siilaas sigɛ ɔɗɔweerk. 23Wosɛyɛrɓa wargatɛ sinɛɓa taapɛɛk sɛɛga sinɔ tonu kɛ, "Eteŋk, wosɛytaanak, a gutarɛyɛ, a masookoyak, digoyɛɛrii kɔnu iinak sigɛ komoy joop sigɔ moko Ayuuduk sigɛ atu Ansokiyaake, a Sooriyaake, a Kilkiyaakek. 24Tiyiikan kɛ kɔtarkannɔ joop eteŋkɛ kɔɔr son lak iinakik, a kan sɛɛga kii toniiɗ nɛnɔ kɔnu ooɗɛr ɛnɔ kɔnu arir a kɔna ki mɛlɛ pɛɛni sinɛ kɔna tonurk. 25Nɛkɔ waasiɗiikii a koɓi omoŋ kɛnɔ daamii joop sigɔ wosɛyɛɛriiŋɔŋk, nɛ kɔtar son lak iinakik a manyaakak eteŋka sigɛ porɛɛ sɛɛgik Barnabaas a Paawuloos agut omoŋ. 26Barnabaas a Paawuloos sɛɛg sigɛkan gaɓɛr wɛɛŋa gɛŋk agut Suumi naŋk Yeese Kereseek. 27Agut sini wosɛyɛɛriikɔ Yuudaa a Siilaas kɛnɔ kɔna kaar topur toniiɗa ola sigɛkɔ taapiik.
28Laŋkiikɔ a mentanŋ eteŋk a Wɛɛŋa sigɔ Geetitaanakik, kɛnɔ kɔna kat gaɓii diil sinɔ ɗiliŋɔŋk olaatɛ sigeegekɔɔ dɛnɛɛrik sigeege dɔɔsuk sɔgɔɔsɔyk. 29Kat ɗamɛɛ any sinɔkɔ uduŋɛɛ raŋawotak. Kat ɗamɛɛ taar keegun sinɔkɔ rɛr akɔ ubuŋɗi makɔ kɛɛ ŋɔɔlɛtik. Kat ɗamɛɛ yɛrom. Kat ijaagɛɛ ruunyikeen. Ɔkɔn koorɛɛr ɛɛk olaatɛ sigeege baŋɛŋ, ijaagiir any sinɔ mentanŋɔŋk. Inɓɔ dakɛɛ digoya."
30Nɛɓa wosɛyɛɛ joop gɛɛŋk nɛ ŋaarar Ansokiyaaka. Nɛɓa tolɛr ŋaadtaana gɛɛŋk nɛ gaɓɛr sɛɛga wargatɛ nɛɛk. 31Saaɓa ŋaadtaana gɛɛnɛ ambabɛrɗi wargatɛ nɛɛkik, nɛɓa gaananɛ sɛɛg wosɛ sinɛ gaɓɛ ɓaŋkaawurɔnk nɛɓa yaa sɛɛga jɛt. 32Agut sinɔɓa Yuudaa a Siilaas sɛɛg joop pɛrkaakoŋk, nɛɓa rɔɔriyar ŋaadtaanak pɛɛnii sinɔɔnɛ obiiŋɔŋk, nɛɓa gaananɛr sɛɛgiŋ, ɛɓa arir sɛɛg a ɓaŋkaawurarŋ. 33Yuudaa a Siilaas ɗeegararɓa saadi a ɗoŋ tekeriŋ, nɛɓa pakakati nɛ digogoyi a ŋaadtaanak. Nɛɓa weeri son lak joop sigɛɓa wosɛyɛrki sɛɛgik. 34[Yakanaɓa Siilaas ɗɛyɛ a gaala sooy a sɛɛg agut omoŋ.] 35Paawuloos a Barnabaas beeɗirɓa a rɔɔriyaaɗ ɛ waasɛr Pɛɛni Suumiyoŋk sɛɛg a ŋaadtaanak ɔgɔ a ɓɔɔkaaŋ agut omoŋ.
Pakakat Paawuloos A Barnabaasik
36Ɗoŋikɛ sigɔɔgɛ tekeriŋɔŋk baŋiya, tonuɓa Paawuloos Barnabaasa kɛ, "Koy weerikii, nɔ lɛɛwii manyaakak eteŋka sigɛ atu katamɛɛkɛ sigaagɛkan rɔɔriyaaɗii jeemɛ Pɛɛnii Suumiyoŋkuk kɛnɔ ɗegerii kɛ ɓɛɛlɛr ɛk. 37Nɛɓa ɗɛyɛ Barnabaas a kaar a Yowanis sinɛɓa riyɛ kɛ Markoosuk a sɛɛn agut omoŋ. 38Yakanaɓa Paawuloos ki ɗɛyɛɛ a kaar iɗit sini a sɛɛg agut omoŋ, agut sinɔɓa sɛŋk pakatiiɗ ɛɛk sɛɛge nɛ dakik Pinpiliyaakek nɛɓa ki deran ijaaga a sɛɛgik agut omoŋɔŋk. 39Nɛɓa ŋaarki sɛɛge kɔɔr palamɛ sinɔ obiiŋɔŋk agut any sini, nɛɓa pakakatiiŋ. Nɛɓa Barnabaas boŋu Markoos nɛ kaar emɗ Kopiroosa, 40yakanaɓa Paawuloos daam Siilaas. Nɛɓa ŋaadtaanak gaɓɛr Paawuloos a adarat ariita Suumiyoŋk, nɛɓa ŋaarŋ. 41Nɛɓa sɛŋk ɗoyu sinɔɔnɛ Sooriyaak a Kilkiyaak a ari dooytaanak a ɓaŋkaawurarŋ.
Iliyochaguliwa sasa
Ijaag Wosɛytaanakoŋk 15: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
