Pɛɛyeen Korontoosuk 9
9
Tigi Dooytaanaka Yuudaak
1Ki ɗɛyɛ a kɔna taapiɗiira agut tigi sinɛ ijaagɛɛ dooytaanakɛ sigaagɛ atu Yuudaakekiŋ. 2Ɗegera kɛ ɓaŋkaawakari tɔkɔnyaŋ, ɛkan laka meri ɛɛkoŋk agut joop Mɛkedooniyaak, tonakan sɛɛga eme sɔɔkɔŋk saakan arkiɗii ɗook Akayaak kɛnɔ sɛɛg ragadtaanak tigiya, ɓɔŋgɔɔrɛkan ɗɛyan noŋk sinɛ ɓɛɛlɛ kɛ ɗɔmk joop a ɓɔɔkaaŋ ijaaga sinɔɔna mentanŋɔŋk.
3Ant sineene wosɛyɛɛra kɔɔ manyaakak eteŋka sigi, kɛnɔ meri naŋk ɛɛkoŋk iinakɛ ant sineene sinɔ kat dakɛɛr a ɓɛɛlɛr kanysɛya. Yakana oko sinɛkan kɔna toniiɗa kɛnɔ ragadiir ɛɛk tɔkɔnya a eteŋk agut omoŋ. 4Kɔtarkɔɔ joop Mɛkedooniyaak a eet agut omoŋ son lak iinakik nɛ ɔkɔn kɔɔ laŋirki kɔnu a kɔ kiir ragadɛ ɛɛkiŋ nɛkɔɔ lakii keeny meriiɗ naŋk ɛɛkoŋk iinakɛk, nɛkɔɔɓɔ latukari keeny jɛt. 5Agut sini in ragadɛɛ ɔɗɔɔkɛ tigi noŋk sinɛkan toniir kɛ gaɓɛɛrkɔɔŋɔŋk. Laŋkaakɔ ata ɗɛyɛ a kɔtar manyaakak eeta sigi eete ɔɗɔɔkɛ kɛnɔkɔɔ kɔna kaar koɓurkuɗ. Nɛ agut sini saakɔɔ kɔrurkuɗak ɓɛɛlɛkɔɔ tigi noŋk a ragadtan, makɔɔ ɓɔrɔ gaɓɛɛr ɗɛyaan, ma moko direeɗ. 6In koɓukɛɛ sini. Iɗit sinɔ soowuɗi a tɛmŋɔŋk, nɛkoy ɗootiɗi a tɛm, ma iɗit sinɔ soowuɗi a obiiŋɔŋk nɛkoy ɗootiɗi a obiiŋ. 7Iɗit a omoŋ omoŋ in gaɓɛ any sinɛkan koɓu ɓayaay nɛɛkɛ kɛ gaɓɛkɔɔŋɔŋk, ma moko ɓakɛɛ maŋk direeɗ agut sinɔ poru Waakoyot iɗit sinɔ gijiɗi yaakatik. 8Oolɛ Waakoyot a kɔna gaɓɛ geet nɛɛk a obiiŋ oko sinɛ ɗɛyɛrɗɔk kɛnɔ ɗɛyɛɛr ɓɛɛnyɔ baŋɛ any sinɛ ɗɛyɛ ɛkana goŋk baŋɛk, ɛ kɛnɔ gayɛɛr agut ijaag any sinɔ mentanŋɔŋk a kaalɛŋ. 9Ege sini sinɛɓa taapɛɛ Wargatɛɛ Waakoyotoŋk kɛ,
"Gije sankaanak tigii,
beeɗkoy ɓɔrɛ mentanka nɛɛkɛ nɔkoy nɔkoyk."
10Waakoyo sinɛ gaɓɛ eta sinaana soowuɗik wɛykon ma gaɓɛ kiiwu nɔ ɗamɛɛk, arikoy kɔna a obi wɛykon sinɛ ɗɛyɛɛrik, arikoy kɔnu a iinak worikaanak tigii noŋk. 11Ari kɔnu ɓɛɛnyɔwɛ gɛɛŋk baŋɛ a iinak worikaanak kɛnɔ gayɛɛr tigiya ɓɛɛnyɔwɛ gɛɛŋk baŋɛ, kɛnɔ pɔɔsɛr Waakoyo joop a ɓɔɔkaaŋ agut tigi noŋk sinɛ laŋir eteŋkɛɛk. 12Agut sinɔ tɔkɔny sini ijaagiirik moko enyɛrɗɛ any sinɛkan bitaɗi rakatkaanakɛ sigɔɔgɛ dooytaanakik baŋɛ dakɛɗa, widerkiɗɛ ɓɔrɛ pɔɔsiyɛ a ɓɔɔkaaŋ son lak Waakoyokuŋ. 13Ari kɔnu a eekerkaanak ijaag noŋk sini tigiyoŋk Pɛɛni sinɔɔnɛ Ɓɛlkɛɛstank Kereseek sinɛkan boŋiirik. Agut sinɔ sineene ɗegerɗɛɛ tigi noŋkuk sinɛ gaɓɛɛr sɛɛga a joopa ɔgɔɔkak, nɛ pɔɔsɛr Waakoyo sɛɛg baŋɛ. 14Ɗɛyɛr kɔnu jɛt ɛkɔna ɗanɗama agut wookan Waakoyotoŋk sinɔ obiiŋɔŋk sinɛ ar iinakɛ takik. 15In dakɛr pɔɔsiyɛɛk Waakoyota agut tigi nɛɛk sinɛ ki gayɛ a ikomɛɛŋɔŋk.
Iliyochaguliwa sasa
Pɛɛyeen Korontoosuk 9: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia