Pɛɛyeen Korontoosuk 10
10
Jumuran Kolanoŋk Paawuloosuk
1Eet Paawuloos kalɛya kɔnu rikiteet ɛɛkoŋk a mentankaat Kereseek. Saa eet a iinakik agut omoŋ nɛti tonɛɛ kɛ leemkank, ma saa yowɛrkiɗa kɔnek nɛti tonɛɛ kɛ diirkank. 2Kalɛya kɔnu kɛ saakɔɔ kɔrurkuɗak nɛkɔɔti kat kaar ariir a tonɗiika diirikent iinakɛ kɔɔr oko sinɛ tonɗiiɗa diirikent joope a omoŋ omoŋ sigaagɛ beeɗir koɓiiɗ ɗookoŋkuk. 3Kɛygun beeɗii ɗook sineene raŋk, mayakana moko timaakii oko joop, ma timaakii ɓaŋkawukaat wɛɛŋakoŋk. 4Maɓɔrɛ beya sinɛ timaaɗiik moko beya ɗoo sinik, mayakana sinɔ lak ɓaŋkawuka taamɛkɛ Waakoyotoŋk sinɔ aalɛɛɗɛ nyon sinɛ ɓaŋkawu ɛ dɔɔs kaarinak. 5Aalii palamɛ a koɓi etoŋk sinɛ ɓɔŋgɔɔrɛ ɛɛk ɗegerɔɔna Waakoyotoŋk baŋɛ, gaamii kalbiyɛ baŋɛ, nɛ arii sɛɛg kɛnɔ tiiɗi Kereseya. 6Saakɔɔ ege tiyan naŋk daktank, nɛkɔɔ eteŋk ragadtaanak kɛnɔ goopii any sinɔ kɛɛ tiiɗitik Kereseyaak.
7In mermenɛɛ any sinɛ kɔne ar ɔɗɔɔkɛk. Ɔkɔn lakɛ iɗit sinɔ ŋaadi kɛ eet Kereseekiŋ nɛ in koɓuɗ, eteŋk ɓɔrɛ Kereseek oko sinɛ sɛɛn Kereseek. 8Kɛygun mera ɛɛk jɛt agut ɓaŋkawuka sinɛkan tina gaɓɛ Suumiikiŋ kɛnɔ kɔnu kɛnyii, ma moko kɛnɔ kɔnu aalii, nɛte kɛɛ keeny. 9Kat koɓiir kɛ ara kɔnu wargatɛɛ naakɛ kɛnɔ ɓuriikariɗ. 10Tonur kɔne joop ɔgɔɔk kɛ, "Ɗilatu wosɛyɛ gɛɛnɛɛk ɛ ɓaŋkaawar jɛt, mayakana ɛɛk nɛɛkɛ bɔɔlaaŋ ɛ ki oolɛ toni." 11In ɗegerar joop sigɛ tonur sinik kɛ kɛɛ pakakat wosɛyɛɛkɛ sigaagɛ taapɛɛrii ma arkii a yowɛɛɗŋɔŋk a ant sinaanɛ ijaagii ma arkii jɔk a iinak agut omoŋɔŋk.
12Kii paariit ɛɛk a joop sigɔ pɔɔsɛr ɛɛk nɛŋkiŋ. Rɔmɛr sɛɛk ɛkan gɛŋk a ɛkan gɛŋk, ɛ paarir ɛkan gɛŋk a ɛkan gɛŋk, nɛ moko ɗegerar ɛɛk. 13Yakana kii meriiɗ ɛɛk a kaalii saan kan tina gaamɛɛk, mayakana merii ɛɛk ijaag sinaanɛkan tina gaɓɛ Waakoyotuk kɛnɔ mɛlɛɛrii son lak iinakik. 14Kiikan kaalɛt nyon ijaagoŋk sinɛkan tina gaɓɛɛk, agut sinɔ eteŋk joop sigɛkan diileerii Pɛɛni sinɔ Ɓɛlkɛɛstank Kereseek son lak iinakik. 15Kii meriiɗ ɛɛk a kaalɛ saankan tina gaamɛɛk ant sinɔɔnɛkan ijaagir joop ɔgɔɔkuk. Mayakana lakii ŋaadiyɛ sigɛ kookoriik sigɔ kɛ ɓɔlɔɔrɛr ɓɔrɛ ŋaadiyɛ goŋkŋɔŋk ɛ bakaanyir a obiiŋ ijaag naŋk iinakɛ kɔɔr. 16Kii oolɛ a waasii Pɛɛni sinɔ Ɓɛlkɛɛstank ɗokanɛɛkɛ sigaagɛ atu iinakɛ walasikiŋ, maɓɔrɛ kii meriiɗ ɛɛk ijaag sinɔɔnɛkan ijaagɛɛ jeemɛ nyon iɗit omuk.
17Mayakana oko sinɛ toniiɗ Wargatɛ Waakoyotoŋk kɛ, "Iɗit sinɔ meri ɛɛkik, in meri ɛɛk Suumii." 18Agut sinɔ pɔɔsɛɛ iɗit saa sɛɛn pɔɔsɛɛɗ Waakoyotuk, ma moko saa pɔɔsɛɛɗ ɛɛk nɛɛk ɗumaak.
Iliyochaguliwa sasa
Pɛɛyeen Korontoosuk 10: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia