Pɛɛyeen Korontoosuk 8
8
Tigi Dooytaanakoŋk
1Iinak manyaakak eeta, ɗɛyii kɛnɔ ɗegerari wookan sinɛkan gaɓɛ Waakoyot godeyika Sambatɛyɛɛkoŋk sigaaga atu Mɛkedooniyaakeek. 2Sɛɛg laŋirkikan rakatɛ a paariit sinɔ obiiŋɔŋk, yakana agut sinɔ obiikiɗ yaaka nɛŋkŋɔŋk nɛkan gaɓɛr tigi sinɔ obiiŋɔŋk kɛygun aasi sɛɛg sankaanakiŋ. 3Waasa saak kɛ gijiɗikan sɛɛk yaakat nɛŋk a kaalɛ sinɛ oolɛrk, ma moko sinɛ oolɛrk dakɛɗa, 4kalɛyirkan tin a ɓaŋkawuŋ kɛnɔ laŋir milki ijaag sinɔ kɔnyɛrɗi dooytaanakik sigɛ atu Yuudakek. 5Ijaagirkan sɛɛk a kaalɛ sinɛkan kookoriik, tuki nɛɛkɛ gaɓɛrkan ɛɛk nɛŋk Suumiya nɛ saadi gaɓɛr ɛɛk nɛŋk eteŋka ɗɛyaan Waakoyotoŋk. 6Agut sini kalɛyiikan Tiitoo kɛnɔ mɛlɛɛɗ ijaag tigiyoŋk sinaanɛkan tuke iinakɛ kɔɔrk. 7Iinak kaalɗiikari ant baŋɛ kɛygun ŋaadiyɛɛkɛ, a waasiyɛɛkɛ, a ɗegerɔɔn ɛɛkoŋk, a ɓaŋkaawurɔɔn sinaanɛ latukari tɔkɔnya joopoŋkuk, mɛyin sinɛ latukari eteŋkaak, in ɓɔrɛ kaalɗiikɛɛ ijaag sineene tigiyoŋk. 8Moko kɔna tona sini a sekiyɛ, mayakana kɛnɔ paarɛɛ ɓaŋkaawurɔn tigiyoŋk joop ɔgɔɔk kɛnɔ ɗegerɛɛ eekeer mɛyin nɛŋkik. 9Agut sinɔ ɗegerii wookan Suumi naŋk Yeese Kereseekiŋ, kɛygunɓa sɛŋk Sɛɛn worikan, nɛɓa sɛŋk dakɛ giroykan agut iinak, kɛnɔ dakɛɛr a worikaanak goy nɛɛkɛk.
10Ege sini kɔna gaɓaak rɔɔriyɔn sinɔ kɔnyɗi jɛtik. Moko kɔnu kɔnyɛ any sini agut sinɛkɔ ijaagiir eme sɔɔkɔŋkuk dakɛɗa, mayakana ɓɔrɛ kɔnu kɔnyɛ agut sinikɔ tukeer koɓiɗaak. 11In ruumeerɛɛ ijaag sinɛkɔ tukeer sisɔk pediya oko oolan noŋk, kɛnɔ ɓɛɛlɛ a eekeer ɗɛyan noŋk nɛɓɔrɛ sisɔ in ijaagɛɛ sinɛ latukarik. 12Ɔkɔn lakɛ ɗɛyan tigiyoŋk sinɔ mentanŋɔŋkuŋ, nɛ boŋɛɛ tigi etoŋk oko any sinɛ lakik, ma moko oko any sinɛ kiiɗɛk. 13Tona sini kɛnɔ ɓɛɛlɛɛr a rɔmaakari iinak baŋɛ, ma moko kɛnɔ sɔɔk rakatɛɛr tɔkɔny ma sɛɛk imiinyer joop ɔgɔɔkuŋ. 14In badɛ wori noŋk sisɔ rakatɛya nɛŋk kɛnɔkɔɔ badɛ wori nɛŋk agut iinak saakɔɔ rakatɛrɗɔɔk. Nɛkɔɔ lakɛ rɔmaaka iinakɛ kɔɔr oko sinik. 15Oko sinɛɓa toniiɗɛɛ Wargatɛɛ Waakoyotoŋk kɛ, "Iɗit sinɛɓa tolɛ a obiiŋɔŋk nɛɓa kiyaageeɗ ŋayɗiit, ma iɗit sinɛɓa tolɛ a tɛmŋɔŋk nɛɓa kiiɗi bitakɗit."
Tiitoo A Saakomak Gɛɛŋk
16In dakɛr pɔɔsiyɛk Waakoyota sinaanakan riiɓe ɓayaay Tiitook tak koɓi sinɔ mentanŋɔŋk sinɛ laka iinakaak. 17Kɔrukan Tiito son lak iinakik yaakat ɗɛyaan nɛɛkɛk, ma moko agut sinɔkan kalɛyiɗiiŋɔŋk dakɛɗa. 18Wosɛyɛɛrii a sɛɛn agut omoŋ manya eteŋka sinɛ pɔɔsɛɛ agut waasiyɛ Pɛɛni sinɔ Ɓɛlkɛɛstank godeyikɛ Sambatɛyɛɛkoŋk baŋɛk. 19Daamɛɛkan manya eteŋka godeyikɛ Saambatɛyɛɛkoŋk kɛnɔ koyoyowii ijaaga sineena tigiyoŋk ijajagiik, eemɛyɔɔna Suumiyoŋk, ɛ kɛnɔ yaaŋii ɗɛyaan naŋk sinɔ mentanŋɔŋk. 20Koy koorii ɛɛk kɛ ɗɔm saa lowiiɗii wori sinikan gaɓɛɛ a tigik kɛnɔ mokɔɔ laŋii laaganyɔn sinɔ balaaŋɔŋk. 21Koɓi naŋk sinɔ ijaagiiɗii any sinɔ mentanŋɔŋk moko taamɛkɛ Suumiyoŋk dakɛɗak, maɓɔrɛ taamɛkɛ joopoŋkuŋ.
22Agut sini wosɛyɛɛrii manya eteŋka a sɛɛg agut omoŋ sinɛkan paarɛɛ agut ɓɔɔkaaŋɔŋk ɛkan sɛɛn laŋɛɛ ɓɛɛnyɔ baŋɛ a ɓaŋkaawur tɔkɔnya ɛ sisɔ ŋaadɛɛ sɛɛn jɛt iinakɛ, ɓaŋkaawur sɛŋk tɔkɔnya a kaalɗi olatɛ baŋɛ. 23Ɔkɔn lakɛ iɗit sinɔ kɔɔniya agut Tiitookuŋ, nɛ ege Tiitoo saakom naak sinɛ ijaagɗikii a eet agut omoŋ kɛnɔ kɔnyii iinakik, ɛ ɔkɔn lakɛ iɗit sinɔ kɔɔniya agut manyaakak eteŋkaakiŋ, nɛ sɛŋk sɛɛg wosɛytaanak godeyi Sambatɛyɛɛkoŋk a eemɛyɔn Kereseek. 24Sisɔ in sɛɛga yaaŋɛɛ agut mɛyin noŋk sinɛ eekerkank ɛɓɔrɛ agut merii ɛɛkoŋk sinɛ latukar dooytaanakɛ taamɛkɛk.
Iliyochaguliwa sasa
Pɛɛyeen Korontoosuk 8: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia