ರೋಮಾಯೆರೆಗ್ 6
6
1ಅಪಗಾಂಡ ದಾದ ಪನ್ಕ? ದೇವೆರೆ ದಯೆ ಹೆಚ್ಚಾವಡ್ ಅಂದ್‌ದ್ ನಮ ಪಾಪ ಮಲ್ತೊಂದೆ ಉಪ್ಪುಗನಾ? ಏಪೊಗ್ಲಾ ಉಪ್ಪೆರೆ ಬಲ್ಲಿ? 2ಪಾಪದ ಪಾಲ್‌ಗ್ ಸೈತಿನಕುಲಾಯಿ ಎಂಕುಲು ನನ ಐಟ್ಟೇ ಬದುಕುನು ಎಂಚ? 3ಕ್ರಿಸ್ತ ಯೇಸುಡೊಪ್ಪ ಸೇರೊನಿಯೆರೆ ದೀಕ್ಷಾಸ್ನಾನ ಮಲ್ತೊಂಡಿನಕುಲಾಯಿ ಎಂಕುಲು ಮಾತೆರ್ ಆಯ ಮರಣೊಡು ಪಾಲ್‌ದಾರೆರ್ ಆವೆರೆ ದೀಕ್ಷಾಸ್ನಾನ ಪಡೆವೊಂದ ಪನ್ಪಿನವು ನಿಕ್ಲೆಗ್ ತೆರಿದಿಜಾ? 4ಇಂಚ ಉಪ್ಪುನಗ ನಮ ದೀಕ್ಷಾಸ್ನಾನ ಮಲ್ತೊಂಡಿನಪಗ ಆಯ ಮರಣೊಡು ಪಾಲ್‌ದಾರೆರಾದ್ ಆಯಡೊಪ್ಪ ಕೌಂತುದಿನಾಕುಲಾಯ. ಐಡ್ದಾವರ ಕ್ರಿಸ್ತೆ ಸೈತ್‌ದ್ ಅಮ್ಮೆರೆನ ಮೈಮೆಡ್ದ್ ಜೀವೊಡು ಲಕ್ಕಾಯಿ ಲೆಕ್ಕನೆ ನಮಲಾ ಜೀವೊಡು ಲಕ್ಕ್‌ದ್ ಪೊಸಬೆರಾದ್ ನಡತೊನೊಡು. 5ಎಂಚಂದ್ಂಡ ಆಯ ಮರಣೊಡು ನಮ ಆಯಡೊಪ್ಪ ಒಂಜಾಯಿ ಬೊಕ್ಕ, ಆಯ ಲೆಕ್ಕನೇ ಸೈತಿನಾಕುಲೆಡ್ದ್ ಜೀವೊಡು ಲಕ್ಕ್‌ದ್ ಆಯಡೊಪ್ಪ ಒಂಜಾದುಪ್ಪುವ. 6ನಮ ಪಾಪದ ಶರೀರಭಾವ ನಾಶಾದ್ ನಮ ನನಲಾ ಪಾಪದ ವಶೊಟ್ಟುಪ್ಪಂದಿಲೆಕ್ಕ ಪರ ನರಮಾನಿನ್ ಕ್ರಿಸ್ತಡೊಪ್ಪ ಕ್ರುಸ್ಸುಗು ಪಾಡ್ದ್ ಆತ್ಂಡ್ ಪಂಡ್ದ್ ನಂಕ್ ಗೊತ್ತುಂಡು. ನಮ ನನ ಪಾಪೊಗು ಗುಲಾಮೆರಾದ್ ಇಜ್ಜ. 7ಸೈತಿನಾಯೆ ಪಾಪದ ವಶೊಡ್ದು ಬುಡುಗಡೆ ಪಡೆತೆ. 8ಉಂದತ್ತಂದೆ ನಮ ಕ್ರಿಸ್ತಡೊಪ್ಪ ಸೈತಿ ಪಕ್ಷೊಡು ಆಯಡೊಪ್ಪ ಬದುಕುವ ಅಂದ್‌ದ್ ನಂಬುವ. 9ಕ್ರಿಸ್ತೆ ಸೈತಿ ಬೊಕ್ಕ ಜೀವಾದ್ ಲಕ್ಕ್‌ದ್ ಬತ್ತ್‌ತ್ತಿನೆಡ್ದ್ ಆಯೆ ನನ ದುಂಬಗ್ ಸೈಯೆರೆ ಉಪ್ಪುನಾಯೆ ಅತ್ತ್. 10ಮರಣ ನನ ಏಪೊಗ್ಲಾ ಆಯನ್ ಆಳುಜಿ ಪನ್ಪಿನವು ನಂಕ್ ತೆರಿದ್‌ಂಡ್. ಆಯೆ ಸೈತಿನವು ಒಂಜೇ ಸರಿ, ಅವು ಪಾಪದ ಪಾಲ್‌ಗ್. ಆಯೆ ಬದುಕುನವು ದೇವೆರೆಗಾದೇ. 11ಅವ್ವೇ ಪ್ರಕಾರ ನಿಕುಲುಲಾ ನಿಕ್ಲೆನ್ ಕ್ರಿಸ್ತ ಯೇಸುಡೊಪ್ಪ ಪಾಪದ ಪಾಲ್‌ಗ್ ಸೈತಿನಾಕುಲುಲಾ ದೇವೆರೆಗಾದ್ ಬದುಕುನಾಕುಲುಲಾ ಅಂದ್‌ದ್ ಎನ್ನೊನ್ಲೆ.
ಪಾಪದ ಗುಲಾಮತನೊಡ್ದು ಬುಡುಗಡೆ
12ಇಂಚಾದುಪ್ಪುನಗ ಸೈಯ್ಯೊಡಾಯಿನ ನಿಕ್ಲೆನ ಶರೀರದ ಮಿತ್ತ್ ಪಾಪ ಆಳಂದೆ ಉಪ್ಪಡ್, ನಿಕುಲು ಶರೀರದ ದುರಾಶೆಗ್ ಗುಲಾಮೆರಾವೊಡ್ಚಿ. 13ಉಂದು ಮಾತ್ರ ಅತ್ತಂದೆ ನಿಕುಲು ನಿಕ್ಲೆನ ಅಂಗೊಲೆನ್ ಪಾಪೊಗು ಒಪ್ಪಿಯಾವುನಕುಲಾದ್ ಪಡಿಕೆ ಉದ್ದೇಶೊಲೆಗಾದ್ ಉಪಯೋಗ ಮಲ್ಪಡೆ. ಮರಣೊಡ್ದು ಜೀವೊಗು ಬೈದಿನಾಕುಲೆ ಲೆಕ್ಕ ನಿಕ್ಲೆನ್ ದೇವೆರೆಗ್ ಒಚ್ಚಿದ್ ಕೊರ್ಲೆ; ಬೊಕ್ಕ ನೀತಿದ ಕಾರ್ಯೊಲೆಗಾದ್ ಉಪಯೋಗ ಆಪಿಲೆಕ್ಕ ನಿಕ್ಲೆ ಇಡೀ ಶರೀರೊನು ಆಯ ವಶೊಕ್ಕು ಕೊರ್ಲೆ. 14ದಾಯೆ ಪಂಡ ಪಾಪ ನಿಕ್ಲೆ ಮಿತ್ತ್ ಅಧಿಕಾರ ನಡಪಾವುಜಿ. ನಿಕುಲು ನ್ಯಾಯಕಟ್ಟ್‌ಗ್ ಒಳಗಾಯಿನಾಕುಲತ್ತ್. ದಯೊಕು ಒಳಗಾಯಿನಾಕುಲು ಆದುಲ್ಲರ್ ಆತೇ.
15ಅಪಗಾಂಡ ದಾನೆ? ನಮ ನ್ಯಾಯಕಟ್ಟ್‌ಗ್ ಒಳಗಾಯಿನಾಕುಲತ್ತ್. ದಯೊಕು ಒಳಗಾಯಿನಾಕುಲು ಪಂಡ್ದ್ ಪಾಪೊನು ಮಲ್ಪೊಲಿಯಾ? ಏಪೊಗ್ಲಾ ಮಲ್ಪೆರೆ ಬಲ್ಲಿ. 16ನಿಕುಲು ಏರೆಗಾಂಡಲಾ ಗುಲಾಮೆರಾದ್ ಆಯೆ ಪಂಡಿನೆನ್ ಮಾತ ಕೇನಿಯೆರೆ ನಿಕ್ಲೆನ್ ಒಚ್ಚಿದ್ ಕೊರ್ಪರಾ ಆ ಯಜಮಾನಗೇ ಗುಲಾಮೆರ್ ಆದುಪ್ಪುವರ್ ಪಂಡ್ದ್ ನಿಕ್ಲೆಗ್ ತೆರಿದಿಜಾ? ಪಾಪೊಗು ಗುಲಾಮೆರ್ ಆಂಡ ಮರಣನೇ ಫಲ, ನಂಬಿಕೆಡ್ದ್ ತಗ್ಗ್‌ತನೊಗು ಗುಲಾಮೆರ್ ಆಯರ್ಡ ನೀತಿಯೇ ಫಲ. 17-18ಆಂಡ ನಿಕುಲು ಪಿರವುಡು ಪಾಪೊಗು ಗುಲಾಮೆರ್ ಆದಿತ್ತರ್ಡಲಾ ನಿಕ್ಲೆಗ್ ಕಲ್ಪಾಯಿ ಬೋಧನೆಲೆಗ್ ನಿಕುಲು ಉಡಲ್‌ಡ್ದ್ ಅಧೀನರಾಯರ್. ಪಾಪೊಲೆಡ್ದ್ ಬುಡುಗಡೆ ಆದ್ ನೀತಿಗ್ ಗುಲಾಮೆರ್ ಆಯಿನೆಡ್ದ್ ದೇವೆರೆಗ್ ಉಪಕಾರ ಆವಡ್. 19ನಿಕ್ಲೆನ ಶರೀರದ ಬಲಹೀನತೆದ ದಿಸೆಡ್ದ್ ಲೋಕದ ರೀತಿಡ್ ಪಾತೆರ್‌ವೆ. ಅನ್ಯಾಯ ಮಲ್ಪೆರೆ ನಿಕ್ಲೆನ ಅಂಗೊಲೆನ್ ಬಂಡ್‌ತನೊಗ್ಲಾ ಅನ್ಯಾಯೊಗ್ಲಾ ಎಂಚ ಗುಲಾಮೆರಾದ್ ಒಚ್ಚಿದ್ ಕೊರಿಯರಾ ಅಂಚೆನೆ ಇತ್ತೆ ಪರಿಶುದ್ಧೆರ್ ಆಪಿಲೆಕ್ಕ ನಿಕ್ಲೆನ ಅಂಗೊಲೆನ್ ನೀತಿಗ್ ಅಡಿಯಾಳಾದ್ ಒಪ್ಪಿಸಾಲೆ.
20ನಿಕುಲು ಪಾಪೊಗು ಗುಲಾಮೆರಾದುಪ್ಪುನಗ ನೀತಿದ ಹಂಗ್‌ದಾಕುಲಾದಿತ್ತಿಜರ್. 21ಆಂಡ ನಿಕುಲು ಅಪಗ ಮಲ್ತಿ ಕಾರ್ಯೊಲೆಡ್ದ್ ನಿಕ್ಲೆಗಾಯಿ ಫಲ ದಾನೆ? ಇತ್ತೆ ಐತ ಸಂಗತಿಡ್ ನಿಕ್ಲೆಗ್ ನಾಚಿಗೆ ಉಂಡತ್ತಾ? ಕಡೆಕ್ಕ್ ಐಕ್ಲೆಡ್ದ್ ಬರ್ಪಿನಿ ಮರಣ ಅತ್ತಾ? 22ಇತ್ತೆ ಆಂಡಲಾ ನಿಕುಲು ಪಾಪೊಡ್ದು ಬುಡುಗಡೆ ಪಡೆದ್ ದೇವೆರೆಗ್ ಗುಲಾಮೆರ್ ಆಯಿನೆಡ್ದ್ ಪರಿಶುದ್ಧೆರಾಪಿನವೇ ನಿಕ್ಲೆಗ್ ಫಲ. ಕಡೆಕ್ಕ್ ತಿಕ್ಕುನಂಚಿನವು ನಿತ್ಯಜೀವ. 23ದಾಯೆಗಂದ್ಂಡ ಪಾಪ ಕೊರ್ಪಿನ ಸಂಬಳ ಮರಣ. ದೇವೆರೆಡ್ದ್ ಧರ್ಮಾರ್ಥ ತಿಕ್ಕುನ ಉಡಿಗೆರೆ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡುಪ್ಪುನ ನಿತ್ಯಜೀವ.
Iliyochaguliwa sasa
ರೋಮಾಯೆರೆಗ್ 6: ತುಳು
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Life Literature
