SEMPANHNAK 30
30
1Ikhalselai a pasal Jacob ca fa pakhat khai a cawi lo Rachel in a ruat fangin a unu Leah heh iksik i. Jacob hnenah, “Fate i pe tu; ciahlahle thi tuh ing,” tiin ti i. 2Ciafangin Jacob a thinraw ai, “Pathian tu akontih in aiawh thil tuh ing? Fate na nairuai lotu heh amah Pathian i,” tiin ti i. 3Cen Rachel in, “Ilekhaw kaimah ca fate nai ai ciatihin kaimah khai nauniu nu cang thai tuhin i sal nu Bilhah thawn pawl dun tu ih,” tiin Jacob khiah ti i. 4Ciatihin Rachel in a sal nu Bilhah heh a pasal hnenah pe ai a pasal in itpui i. 5Bilhah in naupai ai Jacob ca fapa nai sah i. 6Ciafangin Rachel in, “Pathian tu kaimah lam ṭangin thurel i. I sawngenhnak ngai ai fapa i pe zo i,” tiin ti ai a hming ah Dan#30:6Dan tihnak tu Hebrew in I lamah ṭang i ti thawn a awsuah bang dun i. bawn i. 7Cia hnuaah Bilhah in naupai lehsal ai Jacob ai fapa pahnihhnak nai i. 8Ciafangin Rachel in, “I u neh tuhin a roh ngai in zuam ai nehsuak zo ing,” tiin ti ai nau hming ah Naphtali#30:8 Naphtali tihnak tu Hebrew in zuam ing ti thawn a awsuah bang dun i. bawn i.
9Leah inkhai fa nai thil leh zual lo a ling fangin a sal nu Zilpah heh Jacob ai itpui tuhin pe i. 10Cen Zilpah in fapa nai i. 11Ciafangin Leah in, “Bawng i pha i,” ti ai a hming Gad#30:11Gad tihnak tu Hebrew in Bawngpha tica i. bawn i. 12Leah ai sal nu Zilpah in fapa nai lala ai, 13Leah in, “Zaitlukin lung i awi i. Tun tu nupang hmuahhmuah in mi lungawi tiin i ko tuh i,” tiin ti ai a hming ah Asher#30:13Asher tihnak tu Hebrew in ang tica i. bawn i.
14Cen Sangvut at can ah Reuben tu hampalak feh ai lengai thai hmu ai a nu Leah hnenah tlut i. Ciafangin Rachel in Leah hnenah, “Na fapa ai tawkhnak lengai thai tlawmniu in i sum tu ve,” tiin ngen i. 15Ikhalselai Leah in, “I pasal i long sah heh tawk ti lai lo isim? I fapa ai lengai thai khai lang tuhlai isim,” tiin ti i. Cen Rachel in, “Na fapa ai lengai thai i pe lesikhaw tun zan tu Jacob hnenah it tuh isi,” tiin ti i. 16Cia zan lamah Jacob tu hampalak in a tlung fangin Leah in hmuak ai a hnenah, “Tun zan tu nang heh i hnenah it kul isi, zaimantifangin i fapa tawkhnak lengai thai in Rachel hnenin na zawng zo ing,” tiin ti i. Ciatihin cia zan tu Leah thawn it kawm i. 17Cen Pathian in Leah ai sawngenhnak tu ngai sah manin naupai ai Jacob heh fapa a pangahnak nai sah i. 18Ciafangin Leah in, “I sal nu heh i pasal hnenah pe manin Pathian in i lehsawng i pe zo i,” tiin ti i. Ciamanin a fapa heh Issakhar#30:18Issakhar tihnak tu Hebrew in zawngman lehsawng um i ti thawn a awsuah bang dun i. tiin a hming bawn i. 19Leah tu naupai lala ai fapa a parukhnak nai i. 20Ciafangin Leah in, “Pathian in lehsawng songlawi i pe i. Fapate paruk nai sah zo hang manin tun tu i pasal in i daih tuh ihang,” tiin ti i. Ciamanin a fapa hming ah Zebulun#30:20Zebuluntihnak tu Hebrew in lehsawng ngah ingti thawn a awsuah bang dun i. bawn i. 21Cia hnuaah fanu pakhat nai ai a hming ah Dinah bawn i.
22Ikhalselai Pathian in Rachel tu hai lo i. A sawngenhnak ngai sah ai fa nai thai in bawn leh i. 23Rachel tu naupai ai fapa nai i. Ciafangin, “Fate nai thil loin i zakthihnak heh pathian in i lang sah zo i. 24Pathian in a dang fapa i pe rih tu hram seh,” tiin a hming ah Joseph#30:24Joseph tihnak tu Hebrew in a dang i pe rih tu hram seh ti le i lang sah ti thawn a awsuah bang dun i. bawn i.
Jacob le Laban Thu Eldunhnak
25Joseph te hnuaah Jacob in Laban hnenah, “I hlat tuhang, i khua le i ramah tlung i nuam ihang. 26I nupuite le i fate hmuah khai i pe tulai tlung tuh ing; anite co nuam in zaitlukin na naper phatak ngai in per ing ti ling isi,” tiin ti i. 27Ciafangin Laban in, “Thurel can i pe rih tu! Nangmah i hnenah um manin Bawipa in hmuifu i pe ai i khangso i, ti khiah mipol tlahsanhnak in ling ing. 28Ciamanin na hlawhman i rel tulai na pe tuh ing,” tiin ti i. 29Jacob in, “Zaitlukin na naper per ai na sumhnamte i khal songah zaitlukin pungzai i ti khiah ling sio isi. 30Na hnenah i hleng sawng fangin tuu tlawmniu lek na naihnak heh tunah siar cawk lo ihang. Kaimah manin Bawipa in hmuifu na pe taktak i. Tun tu kaimah pumpak ca i ruat can ve ihang,” tiin ti i.
31Ciafangin Laban in, “Ilekhaw ziang na pe tuh ing?” tiin zawt i. Jacob in, “Hlawh man zaikhai i daih lo i. I ngenhnak i pe tuh lesikhaw na sumhnamte heh kilkhawl rih tuh ing. I ngenhnak tu: 32tunnia na sumhnamte lakah vak tuhai, tuuniu a hang hmuahhmuah le tuu ngan hmuahhmuah ngancip ai nganhnak ituseh, ngankau ai ngahhnak ituseh lang tuh ing. Cen me ngan hmuahhmuah ngancip ai nganhnak ituseh, ngankau ai nganhnak ituseh lang tuh ing. Ciami lek heh i hlawhman ah i daih i. 33Ciatihin i fel le fel lo hmai lamah ling tuh isi. I nihlawh heh na ling nuam in na zong fangin tuu a hang lo le me a ngan lo nai i hmu lesikhaw a ru ai ruhnak i ti ling tuh isi,” tiin ti i. 34Ciafangin Laban in, “Pha i, na relhnak angin bawn tuh ing,” ti i. 35Ikhalselai ciami nia rori ah Laban in mecang ngancip le ngankau ai ngan hmuahhmuah, ihlahle a ngo ai ngan hmuahhmuah le tuu hmul hang hmuah khai tumce sek ai a fapate ai khal tuhin dah sek i. 36Cen Jacob umhnak an ni thum ban ah fehpui i. Cen a tanghnak Laban ai tuu le mete ciah Jacob in khal de i.
37Cen Jacob inkhai, nempan le hiang kung ai a kakte lang ai a kawng hrekkhat a ngan in kok sek ai fungkek niuniu bawn i. 38Ciami fungkek ngan tepawl heh sumhnamte ai tikuang songah tung ai sumhnamte lamah hoih in dah i. Zaimanin hetihin dah i tifangin sumhnamte ti ding tuh a kawi tlang fangin pawl dun murhmo de man i. 39Ciatihin fungkek ngan hmaiah mete heh rai dun betbo ai fate a naihnak khiah a ngan, ngancip le ngankau ciang i. 40Cen Jacob in Laban tuupuite heh tumce sek ai a cang thawn a dang ah dah sek i; ciaben fangin Jacob ai tuucang a ngan le a hang tepawl thawn pawldunruai i. Ciatihin Laban ai tuurual songah Jacob in tuu hmulngan suak thai in bawn ai pungzairuai betbo i. 41Cen sumhnam lakai a ci pha le a hat pawl a pawl dun fangin fa ngan nai thai tuhin a fungkek ngan tepawl heh tikuang songah amahte hmaihoih in dah sah i. 42Ikhalselai sumhnam a hnawmtam pawl a pawl dun fangin fungkek ngan dah sah lo i. Ciamanin sumhnam a hnawmtam pawl tu Laban covo cang ai a hat deuh pawl tu Jacob covo cang i. 43Ciatihin a rai hlanah Jacob tu milian ngai cang i. Sumhnam tampui, sal nu le sal pa, kalauk le laak tampui nai i.
Iliyochaguliwa sasa
SEMPANHNAK 30: RZB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zanniat Bible © Bible Society of Myanmar, 2018.