SEMPANHNAK 29
29
Jacob Tu Laban Inn Hleng I
1Cen Jacob tu feh betbo ai Nisuah lam mite ram lamah feh i. 2Cen rinlopui in hampalak ai namkum pakhat ah hleng ai a hiangah tuurual, rual thum bual tlang khiah hmu i. Ciami namkum ai ti khiah tuute dingruai de i. Namkum sinhnak lungtleppui tu a lianpui i. 3Tuu hmuahhmuah a hleng khim fangin tuukhalte in lungtleppui thawn ai a tuute ti tul de i. Ti ding ben fangin sin leh de i.
4Jacob in anite hnenah, “I rualte, akon lamin kawi i si?” tiin zawt ai anite in, “Haran khua an,” tiin sawn i. 5“Nahor ai fapa Laban ling aw i sim?” tiin a zawt fangin, “Ling i ing,” tiin ti tlang i. 6“Cak aw lai im?” tiin a zawt lala fangin anite in, “I, cak i; sik tu, a fanu Rachel heh a pa tuurual thawn kawi bang hang!” tiin ti tlang i. 7Cen Jacob in, “Ni sangpui lai ai tuu tlun cu lai lo napui zaimanin ning tuute ti tul in hlat leh lo i si?” tiin ti i. 8Anite in, “Ciatih ilo i; tuurualte hleng khim fangin lungto pui heh thawn hmasa tuh i ing; cia hnuaah ti tul tuh i ing,” tiin ti i.
9Ciatihin Jacob le tuukhalte a pon dun laitak ah Rachel tu a pa tuurual thawn hleng i. A pa tuukhaltu heh amah Rachel i. 10Cen a pu Laban ai tuurual thawn Rachel kawi khiah Jacob in a hmu fangin namkum ah kawi ai lungtleppui heh tul ai a pu Laban tuurual heh ti tul sah i. 11Cen Rachel heh thut ai awsuak in kap i. 12Rachel hnenah, “Na pa ai farnu Rebecca ai fapa ing,” tiin rel i. Ciafangin Rachel heh dawp teu ai a pa hnenah rel i. 13A pa Laban in a tupa Jacob thu a za fangin a hmuak tuhin dawp ai a tawk fangin kuah in thut i. Cen a inn ah tlun i. Cen Jacob in a thu hmuahhmuah heh a pu Laban hnenah a khimniu in rel i. 14Laban in, “I thi le i tisa ngaingai isi,” tiin ti i. Ciatihin Jacob tu a pu hnenah hlakhat pum um i.
Jacob In Laban Ai Naper Per I
15Laban in Jacob hnenah, “I songkhat na imanin a lovang in naper tuh tu cang thil lo i; na hlawhman zaizah na pe tuh ing?” tiin zawt i. 16A pu Laban tu fanute pahnih nai i; a fanu upasawn hming tu Leah i ai a nauta sawn hming tu Rachel i.
17Leah tu a mit mawi i;#29:17 A mit mawi i ti heh, A mit cak lo ti khai i thai i. Rachel tu ruangrai pha ai a hmel khai pha i. 18Jacob in Rachel daih manin a pu Laban hnenah, “Na fanu nauta Rachel co tuhin na naper kum sarih song per tuh ing,” tiin ti i. 19Laban in, “Pha tuh i, i hnenah um tu. Midang hnenah i fanu umruai tahin na hnenah umruai i nuam sawn i,” tiin ti i. 20Ciamanin Jacob tu Rachel co tuhin kum sarih song naper i; ikhalselai Rachel a daih ze manin cia kum sarih heh camkhatniu vuah i.
21Cen Jacob in Laban hnenah, “Kin nitiamhnak khim zo ai i nupui tuhin na fanu i hoiruai tuhang,” tiin ngen i. 22Ciamanin Laban in hoidunhnak puai bawn ai khuasen in sawm i. 23Ikhalselai cia zan ah Rachel tumrul ah Leah sawn a pa in Jacob hnenah pe ai Jacob tu Leah thawn it kawm i. 24Laban in a fanu Leah kilkhawltu tuhin a sal nu Zilpah heh Leah hnenah pe i. 25A thangha fang ian in Leah i ti khiah Jacob in ling i. Ciafangin Jacob in Laban khiah, “I vumah zaimanin hetihin bawn isi? Rachel co tuhin na naper per ta lo ing? Zaiman hetihin i zawl isi? tiin ti i. 26Cen Laban in, “Kin ramah fanu upa pasal nai hlanah fanu nauta sawn pasal naidan lo i. 27A dang kum sarih song i naper per rih tuh lesikhaw mopuai zarh khat song iang rih tulai Rachel na pe tuh ing,” tiin ti i. 28Ciami tu Jacob inkhai a lungkhim ai zarh khat song hoidunhnak puai a bo fangin Laban in a fanu Rachel heh Jacob nupui tuhin pe i. 29Rachel kilkhawltu tuhin a sal nu Bilhah khai Rachel hnenah pe i. 30Cen Jacob in Rachel khai itpui ai Rachel tu Leah tahin daih sawn i. Ciatihin Laban ai naper per in a dang kum sarih um lehthio i.
Jacob Ai Fate
31Jacob in Leah tu daih deuh lo i ti khiah Bawipa Pathian in a hmu fangin fa nairuai i. Ikhalselai Rachel tu fa nai loin um ngio i. 32Leah tu naupai ai fapa nai i. Cen, “Bawipa in i rimsuhnak i hmu zo i; tun tu i pasal in i daih tuh ihang,” tiin ti ai a fapa hming ah Reuben#29:32 Reubentihnak tu Hebrew in i rimsuhnak i hmu i tihnak thawn a awsuah bang ai, i hmu i, fapatica i. bawn i. 33Cen fa pai lehsal ai fapa nai i. Cen Leah in, “Pasal ai daihhnak ilo ing ti khiah Bawipa in i ling i; ciamanin fapa i pe i,” tiin ti ai a fapa hming ah Semeon#29:33 Simeon tihnak tu Hebrew in i ling tihnak thawn a awsuah bang dun i. bawn i. 34Fa pai ai fapa nai lala i. Ciafangin, “Fapate pathum nai hang manin i pasal tu i hnenah kop deuh tuh ihang,” tiin ti ai a fa hming ah Levi#29:34 Levi tihnak tu Hebrew in kom tihnak thawn a awsuah bang dun i. tiin bawn i. (Levi tihnak tu Hebrew in kop tihnak thawn a awsuah bang dun i). 35Cia hnuaah naupai ai a dang fapa pakhat nai lehthio ai, “Tun tu Bawipa thangphat tuh ing,” tiin ti ai a hming ah Judah#29:35 Judah tihnak tu Hebrew in thangphat tihnak thawn a awsuah bang dun i. bawn i. Ciahnua tu fa nai lo ihang.
Iliyochaguliwa sasa
SEMPANHNAK 29: RZB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zanniat Bible © Bible Society of Myanmar, 2018.