SEMPANHNAK 31
31
Jacob Tu Laban Hnenin Tlan I
1Vaikhat tu Laban ai fapate in, “Kin pa naih hmuahhmuah Jacob in lang sek i. Kin pa naih lang manin hetihin milian cang i,” ti ai anite tihnak khiah Jacob in za i. 2Ciahlaiah Laban tu a hlan bangin a vumah a mithmai pha nawn lo ti khiah Jacob in hmu i. 3Ciafangin Bawipa in Jacob hnenah, “Na songkhat le na suahpuite ramah tlung tuhang. Na hnenah um tuh ing,” tiin ti i.
4Ciamanin sumrual khal hmunah amah tawk tuhin Leah le Rachel hnenah cah i. 5Anite hnenah, “Ning pa ai mithmai heh a hlan bang nawn lo ihang ti ling ing; ikhalselai i pa ai Pathian khiah i hnenah um hlen i. 6I thazang hmuahhmuah thawn ning pa ai naper i per sah heh ning pahnih in ling kawm i si. 7Ikhalselai ning pa in i zawl ai i nihlawh heh vel sawm zahra thawn zo i. Ikhalselai i vumah siatsuahhnak hlengruai tuh heh Pathian in siang lo i. 8Ning pa Laban in, ‘A ngancip me hmuahhmuah heh na hlawhman tuh i,’ i ti fangin me hmuahhmuah heh a ngancip in suak i. Cen ‘A ngankau me hmuahhmuah heh na hlawhman tuh i,’ iti ai me hmuahhmuah in a ngankau in suak i. 9Pathian in ning pa hnenin sumhnamte heh lang sah ai kaimah i pe i.
10“Cen sumhnam a hur can ah mang pakhat man ai i mang ah mepui a pawltu mecang hmuahhmuah heh a ngan, ngancip le ngankau lekin hmu ing. 11Cen Pathian vancungmi in i mang ah, ‘Jacob’ tiin i ko ai, ‘Heta ah um ing!’ tiin ti ing. 12Cen vancungmi in, ‘Sik tu, mepui a pawltu mecang hmuahhmuah heh a ngan, a ngancip le ngankau lek i. Hetihin cang tuhin kaimah ai bawnhnak i. Zaimantifangin na vumah Laban ai thil bawndan heh hmu zo sek ing. 13Kai tu olive thau pawh ai hihhnak lungto bir in thu na khamhnak Bethel ah na hnenai a lartu Pathian ing. Tun tu ralring tulai he ram heh hlum in na suakhnak khua le ramah tlung tuhang,’ iti i,” tiin rel i.#Sem 28:18-22 14Ciafangin Rachel le Leah in, “Kin pa hnenin kin cohnak tuh ro zaikhai um lo i? 15Kinmah khai ramdang mi bangin kin ruat ilo im? kin tu kin zuar ai kin man ai a ngahhnak paisa hmuahhmuah khai hmang zo sek fawn i. 16Pathian in kin pa hnenai langhnak lianhnak hmuahhmuah heh kinmah le kin fate ai cang zo sek ihang. Ciamanin Pathian ai a relhnak bangin bawn tu,” tiin ti kawm i.
17Ciamanin Jacob tu Canaan ramai a pa hnen feh tuhin ralring i. A nupui le a fate tu kalauk toruai i. 18A sumhnam hmuahhmuah a hmaiah fehruai ai Masopotamia ram a um songai a ngahhnak thilri hmuahhmuah thawn feh i. 19Laban tu a tuute hmul met tuhin feh ai a um lo songah Rachel in a pa innsang biahnak milimte lo ru sah i. 20Aram mi Laban tu Jacob in zawl ai a feh tuhhnak thu heh rel loniu in um i. 21A naihnak hmuahhmuah keng ai tlan i. Com loin feh ai Euphrates runpui tan ai Gilead mual lamah feh i.
Laban In Jacob Hnawh I
22Nithum hnuaah Jacob tlan i tiin Laban rel i. 23Ciafangin Laban in a hnenumte ko ai Jacob heh ni sarih song hnawh ai Gilead mual ah man i. 24Cia zan ah Laban mang ah Pathian lar ai a hnenah, “Ralring tu, Jacob heh akontih in khai hring citcet mah,” tiin ti i. 25Laban in a man fangin Jacob tu mual vumah a riahbuk sa zo ihang. Laban khai Gilead mual vumah riahbuk sa ve i.
26Ciafangin Laban in Jacob hnenah, “Zaimanin i zawl ai i fanute heh ralpomhnak nupang bangin tlanpui isi? 27Zaimanin i zawl ai kaimah i rel loin a thupruk in tlan ziar isi? I rel ta silai, ning feh fangin anghnak le lasahnak thawn khuang le dar le congcing tum kongin vai ning hla bang tatur ing. 28I fanute le i tupate khai i thutruai ta lo isi? Na bawnhnak heh mivoidan, thil pha lo ze i. 29Nangmah siatsuahthilhnak nai ve ing; ikhalselai mizan ah na pa ai Pathian in, “Ralring tu, Jacob heh akontih in khai hring citcet mah,” tiin iti i. 30Na tlanhnak heh na pa ai inn hleng na nuam taito manin i ti na ling ing. Ikhalselai zaimanin i milimte khai ru isi?” tiin ti i.
31Ciafangin Jacob in, “Na fanute heh khengkhebel in i long pang fangin tiin thin i lau manin i. 32Ikhalselai kin innkua songai mi pakhatkhat vumah na milim hmu lesikhaw ani tu rek tuar tuseh. Kin minungte in he thu lingpuitu i tuhai, na thil si tulai na thil hmuahhmuah lang tu,” tiin ti i. Rachel in a pa milimte ru i ti Jacob in ling lo i.
33Ciafangin Laban tu Jacob riahbuk songah lut in si i, cia hnuaah Leah ai riahbuk songah feh i, cen salnute pahnih riahbuk songah lut lala i. Ikhalselai a milimte heh hmu lo i. A hnuataber ah Rachel riahbuk songah lut i. 34Rachel in ciami innsang milimte heh lang ai kalauk phurhnak dip songah thun ai toh nen meng i. Laban in riahbuk song pumpalah ah si dekdo napui tawk lo i. 35Ciafangin Rachel in a pa hnenah, “Na lut fangin i ding lo heh i bawipa na thinraw malaw; nupangdan nai teng ing,” tiin ti i. Ciatihin Laban in si dekdo napui a innsang milimte heh hmu lo i.
36Ciafangin Jacob tu a thinraw ai, “Zaibang mawhhnak nai ai zaibang dan ti sual manin hetihin i hnawh ai i si dekdo isi. 37I thilri veksen sik zo isi; na thilri zaital hmu aw sim? Hmu lesikhaw na songkhat le i songkhatte hmaiah suah tu, aisu kin dik sawn relcat tlang tuseh. 38Na hnenah kum kul song rori um ai cia songah na tuu le me vel khat bang khai fazulh awng lo i; na tuurual songin tuucang lu khat bangkhai ro in ai awng lo ing. 39Sahrang in na tuu a dawp fangin i sualhnak ilo i, ti larruai nuam in a sa na hnenah na tlut de lo ing, a aiawh kaimah tuu in na rul de sawn ing. Sun ah ituseh, zan ah ituseh, rukote in a ru fangin i kuan tu, iti de isi. 40Vel tam ze sun nisa tuar ai zan khuasik khai tuar ing. Mitmu thil de lo ing. 41Kum kul song rori na hnenai i um song hmuahhmuah ciatihin tuar cuahco de ing. Na fanute pahnih co tuhin kum hlaili hnenum per ai, kum ruk song na tuurual khal ing. Cia cing rori in i hlawhman vel sawm zahra thawn isi. 42I pa ai Pathian, Abraham ai Pathian le Isaac ai biahnak Pathian i hnenah um hlah selai, kut lolek in i hnawt tuh zo isi. Ikhalselai Pathian in i naperhnak le i rimsuhnak i hmu sah manin mizan ah na hau dek i,” tiin ti i.
Jacob Le Laban Thukhamdunhnak
43Cen Laban in, “Hemi nupangte heh i fanute i; na fate khai i fate i ai he sumrual khai kaimah ai ciang i. Na hmuhnak hmuahhmuah heh kaimah ai liang i. Ikhalselai tun hnuaah tu hemi i fanute le a fate ca zaikhai bawn thil lo ihang ing. 44Ciamanin kawi tulai thukhamhnak bawn tuh sawn ai hnikhnaihhnak ah lungdawl bawn kawm tuh ising,” tiin ti i. 45Ciamanin Jacob in lungpek pakhat lang ai hihhnak hrangah bir i. 46Cen a hnenumte tu lungto pum tlang tuhin ruai i. Lungto pum tlang ai cia lungpup cingkim ah rong ai tlang i. 47Cia lungpup heh Laban in Jegar Sahadutha#31:47Jegar Sahadutha tihnak tu Aramaic in hihhnak lungtlep tica i. tiin a hming bawn ai Jacob in Galeed#31:47Galeed tihnak tu Hebrew in hihhnak lungtlep tica i. tiin bawn i. 48Laban in, “Hemi lungpup heh nangmah le kaimah lakah thulingtu tuh i,” ti i. Ciatihin cia hmun heh Galeed tiin ko i. 49Cen Laban in, “Kin khek tlang fangin Bawipa in kin umhnak ṭen ah kin kilkhawl tuseh,” tiin ti i. Ciamanin cia hmun heh Mizpah#31:49Mizpah tihnak tu Hebrew in I kilkhawlhnak hmun ti thawn a awsuah bang dun i. tiin a hming bawn lala i. 50Laban in Jacob hnenah, “I fanute heh zohsuam ai, nupui dang nang in hoi lesikhaw kaimah in ling lo inkhai Pathian in kin hmu ngio i ti ling tu. 51Heta ah kin pahnih karlak ah hihhnak lungphum le lungpup khai um ai hmu hlen isi. 52Hemi lungpup le hihhnak lungphum heh kin thulingtu tuh i. Nangmah tawng tuhin hemi lungpup lan tuh lo ing, nangmah inkhai i tawng tuhin hemi lungpup, ihlahle lungphum kan tuh ve lo isi. 53Abraham ai Pathian le Nahor ai Pathian tu kin karlak ah thukhantu tuh i,” tiin ti i. Ciafangin Jacob in a pa Isaac ai biahnak Pathian hming in cukcam ai thukham i. 54Jacob in sumhnam pakhat ro ai mual vumah hibawlhnak sel i. A songkhatte ko sio ai zanfak ai tlang hnuaah mual vumah cam tlang i. 55A thangha zingniu ah Laban tu tho ai a fasuante le a fanute thut zianzo ai sawnget hnuaah a khua ah tlung i.
Iliyochaguliwa sasa
SEMPANHNAK 31: RZB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zanniat Bible © Bible Society of Myanmar, 2018.