Golle Lilaaɓe 3

Nyawtugo moofo

1Nyalaane gom Piyer e Yuhaana e yaha suudu Alla wakkati juura gam waɗugo du'aare. 2Tawi gorko gom dimdaaɗo e moofaaku, na'on to dammugal suudu Alla bi'eteeŋal ‹Dammugal booɗuŋal›. Nyalaane fu himɓe makko yaaran mo nun, joonna to dammugal ŋal gam o eela naatooɓe ton sadaka. 3No o yi'i Piyer e Yuhaana e naata, o eeli ɓe sadaka. 4Ɓe tiggi mo gite, go Piyer wi'i: «Daaru men!» 5O daari ɓe, oo miili heɓugo goɗɗum to maɓɓe. 6Piyer wi'i: «Mi walaa ceede, naa bo kanŋeeri, amma mi hokkete ko goodumi: E inne Yeesu *Almasiihu mo Nasaratu, umma, yahu!»

7O nanŋi juunŋo makko nyaamo, o darni mo. Ɗon maa ɗon koyɗe makko e kolɓuli makko semmiɗi. 8O fitti, o darii, oo yaha. O naatidi e maɓɓe der suudu Alla, oo yaha, oo fitta, oo maanta Alla. 9Himɓe fu yi'i mo, oo yaha, oo yetta Alla. 10Ɓe anniti, kanko woni jooɗotonooɗo to Dammugal booɗuŋal, oo eela sadaka. Haaynaare e jiɓayeere nanŋi ɓe sanne gam ko o waɗanaa.

Waaju Piyer

11Gorko on salii accugo Piyer e Yuhaana, himɓe fu ɓe ɗum haaynii ɗon doggoy fotti e maɓɓe ley danki bi'eteeki ‹danki Suleymaanu›. 12No Piyer yi'i ɗum, wi'i himɓe: «Onon Isira'iilaaɓe, ko waɗi e ɗum haaynoo on? Ko waɗi oon tiggi men gite, hande baawɗe amen naa bo kulol Alla amen waɗi gorko on e yaha e koyɗe muuɗum? 13Alla Iburaahiima, e Isiyaaku e Yaakuubu, Alla kookiraaɓe meeɗen, teddini jaggiiɗo muuɗum Yeesu mo gattuɗon e juuɗe mawɓe leydi, go caliɗon mo yeeso Pilaatu, jiɗunooɗo yoofitingo mo. 14Amma onon, on calake Ceniiɗo, Poonnitiiɗo, on daartii yoofitaneego baroowo himɓe. 15Joom gurnam nun baruɗon, go Alla fintini mo. Emen ceedoo ɗum. 16Inne Yeesu nen e goonɗingo ne, kan nyawti neɗɗo mo daaroton, mo annuɗon on. Goonɗinki Yeesu on nun hokki mo jamu yeeso mooɗon on fu.»

17«Jooni, onon banniraaɓe, ko onon e hooreeɓe mooɗon gaɗanɗon Yeesu on, mii anni der bumdam nun. 18Amma, hande non Alla hebbiniri ka o batunoo e hunnuko *annabiiɓe makko fu o wi'i *Almasiihu makko tooroto. 19To non tuubee, bittoon to Alla, heɓa hakkeeji mooɗon moytee, 20gam Joomiraawo wadda wakkatiiji belɗi, lildaa on *Almasiihu, waato Yeesu mo o suɓani on diga ɓooyi. 21Doole Yeesu on e woni dow kammu, faa to Alla laatinii kujje fu kese, hande no *annabiiɓe seniiɓe fu batirnoo diga den. 22Gam Muusa wi'ii: "Alla Joomiraawo mooɗon lildaan on *Annabiijo hande am, ƴiwoowo e mooɗon. Jaɓon huune fu ko o batata on. 23Neɗɗo fu mo jaɓay haala *Annabiijo on, suttete diga der himɓe mum#3:23 Aaya 22 e 23, Tokkitaaki tawreeta 18:15 e 19". 24Diga Samuyiila faa e *annabiiɓe waruɓe ɓaawo mum fu, ɓe bataniino nyalaaɗe ɗen. 25Onon on ɓiɓɓe *annabiiɓe. Alkawal ŋal Alla haɓɓani kookiraaɓe meeɗen e laatanii on hande no o wi'unoo Iburaahiima: "Kookiragel maa barkiɗiniranmi lenyi duuniyaaru fu#3:25 Aaya 25: Fuɗɗoode 25:18, 26:4". 26Onon Alla arti lildanoy jaggiiɗo muuɗum. O lildoy mo gam o barkiɗina on, o waylita moy mon fu diga baadi mon bonni.»

Iliyochaguliwa sasa

Golle Lilaaɓe 3: BFB

Kuonyesha

Shirikisha

Nakili