Golle Lilaaɓe 2

Garki Ruuhu Ceniiɗo

1No juulɗe bi'eteeɗe *Pantekotu yottii, goonɗinɓe fu hawritii nokkuure woore. 2Ɗon maa ɗon rimmo nanduŋo hande hennu manŋol ƴiwoy dow kammu, hebbi suudu to ɓe jooɗii ɗon fu. 3Den goɗɗum ko wa'i hande ɗelle yiite suppitanii ɓe, ɗe ceennii, ɗe jowii e moy maɓɓe fu. 4Ɓe fu ɓe keewi Ruuhu Ceniiɗo, ɓe puɗɗi batugo ɗelle feere feereeje hande no Ruuhu hokkiri ɓe ɓe batira.

5Foti den, *Yahuduuɓe huluɓe Alla, ƴiwoyno diga leyɗe duuniyaaru fu, wari *Urusaliima. 6No rimmo waɗata, jama'aare fu hawritii, go ɓe jiɓii, gam moy fu nanii ɗenŋal mum e batee. 7Ɓe fu ɓe jiɓii, haaynaare waɗi ɓe, ɓe bi'ontiri: «Batooɓe ɗo fu, Galilinkeeɓe bane baa? 8Noy nanirten eɓe bata ɗenŋal moy meeɗen fu? 9Caka men e woodi ƴiwoyɓe diga Partiya, e Mediya, e Elamiya, e Mesopotamiya, e Yahudiya, e Kapadosiya, e Pontusu, e Asiya, 10e Firigiya, e Panfiliya, e Misira, e weccoore Sirene der leydi Libiya. Woɓɓe meeɗen ƴiwii Roma. 11*Yahuduuɓe e tuubuɓe naati diina *Yahuduuɓe na'on caka men. Woɓɓe kade ƴiwii Kereta e Arabiya, go en fu een nana bo eɓe bata e ɗelle meeɗen haala golle mawɗe ɗe Alla waɗi!»

12Ɓe fu ɓe jiɓii sanne, ɓe ƴamontiri: «Ume ɗum ɗon fillitii?» 13Amma woɓɓe e jaanca goonɗinɓe, e wi'a: «Ɓe jaru nun bagi!»

Waaju Piyer

14Piyer darii caka lilaaɓe sappo e go'o horiiɓe ummii darii, o bati e semme, o wi'i jama'aare: «Onon *Yahuduuɓe, e tawaaɓe *Urusaliima fu, kettinee nanee haala am gam paamon ko waɗata. 15Himɓe ɓee ɗo buusay hande no miilirɗon, gam yanne jeenay subaka tawaɗen taw. 16Kanka nun annabi Yo'el bati, o wi'i:

17"Alla wi'i: Der nyalaaɗe cakitiiɗe mi waanjan Ruuhu am dow himɓe fu.

Ɓiɓɓe mooɗon worɓe e rewɓe waɗan annabaaku,

gojankeeɓe mooɗon yi'an jiiki.

Nayeeɓe mooɗon hoyɗan.

18E gooŋa, mi waanjan Ruuhu am dow maccuɓe am,

e horɓe am der nyalaaɗe ɗen,

ɓe gaɗan annabaaku.

19Mi waɗan haaynaareeji dow kammu,

mi waɗan maaneeji dow leydi.

Ƴiiƴam e yiite e cucculle wangan.

20Go nyalaane Joomiraawo mawne, teddune wara,

naaŋe niɓɓan, lewru wojjan.

21Den neɗɗo fu nodduɗo inne Joomiraawo hisan#2:17-21 Aaya 17-21, Yo'el 3:1-5".

22Onon Isira'iilaaɓe, kettinee haalaaji am ɗii: Yeesu mo Nasaratu laati nun mo Alla yerdii, kan waɗi o hokki mo baawɗe waɗugo haaynaareeji e kaayeefiiji caka mooɗon, hande no onon e ko'e mooɗon annirɗon ɗum. 23Amma enon fu on kokkitirii neɗɗo on der juuɗe halluɓe, accuɗon ɓe tiggi mo dow *leggal palaaŋal, ɓe bari mo. Non non nun Alla resirnoo ɗum e annal mum manŋal. 24Amma Alla fintinii mo, firti mo diga ɓoggi maayde, gam waɗataako maayde waawa ko jogii mo der baawɗe mum. 25Dawda batiino haala makko, wi'i:

"Mii yi'a Joomiraawo wakkati fu yeeso am,

oo woni juunŋo am nyaamo, heɓa to mi yanu.

26Kan waɗi ɓerne am weli,

mii bata e welwelo,

ɓannu am bo siwtoto e doƴƴere,

27gam a accataa yonki am der joonne maayɓe,

a accataa Ceniiɗo maa nyola.

28A hollii am laabi gurnam,

to aa wondi e am, mi nanan belɗum#2:28 Aaya 25-28, Jabuura 16:8-11."

29Onon banniraaɓe, accee mi bata on laaɓuka. Kookiraawo meeɗen Dawda maayii, o uwaama, yanaane makko na'on hakkune meeɗen faa hanne. 30O laatino nun *annabiijo, oo anni Alla haɓɓanii mo alkawal, hunii wi'i, der lenyol makko, gooto mum, burtiiɗo e makko, jooɗoto e gurol laamaare makko#2:30 Aaya 30, Jabuura 132:11. 31O artii o yi'i pintol *Almasiihu, kanŋol o batani o wi'i, yonki makko accataake der joonne maayɓe, ɓannu makko nyolaataa. 32Yeesu on, Alla fintinii mo, men fu men ceedake ɗum bo. 33Alla ettii mo jooni mo juunŋo mum nyaamo. O heɓii Ruuhu Ceniiɗo to Baaba hande no alkawal mum haɓɓirano, o waanji Ruuhu Ceniiɗo on e meeɗen. Jooni oon ji'a ɗum, oon nana ɗum. 34Nani bo Dawda meeɗay ko eenci dow kammu, amma o wi'ii:

"Joomiraawo bati Joomam wi'i:

jooɗa wecco nyaamo am,

35faa mi waɗa jaaɓaa wayɓe maa#2:35 Aaya 34-35, Jabuura 110:1".

36Gam majjum, sey himɓe Isira'iila fu anna laaɓina, Yeesu mo tigguɗon dow palaaŋal, Alla waɗii mo Joomiraawo e *Almasiihu.»

37No ɓe nani ka, ɓerɗe maɓɓe taƴi, ɓe ƴami Piyer e lilaaɓe horiiɓe, ɓe bi'i: «Banniraaɓe, noy men gaɗata?» 38Piyer toontii ɓe, wi'i: «Tuubee, moy mooɗon fu waɗanee *batisi e inne Yeesu *Almasiihu, gam keɓon yaafuye hakkeeji mon, den on keɓan dokkal Alla, kanŋal woni Ruuhu Ceniiɗo. 39Gam alkawal Alla e laatanii on, onon e ɓiɓɓe mooɗon e himɓe ɗuuɓɓe woɗɗuɓe, ɓe Alla Joomiraawo men noddoyta fu.»

40E haalaaji goɗɗi ɗuuɗɗi kade, o waggini ɓe, o eeli ɓe o eelitii, o wi'i: «Ceennee ko'e mon e himɓe halluɓe gam kison.»

41Jaɓuɓe haala makko waɗanaa *batisi. Nyalaane nee ɗon, jaka himɓe ujune tato (3 000) nun goonɗini. 42Ɓe kaɓɓi anniya nanugo janŋinol ŋol lilaaɓe janŋinta ɓe, ɓe kawti, ɓe laatii gootum, eɓe ceenna peen, eɓe gaɗa du'aaje#2:42 Aaya 42 e 46 seennugo peen laati nun kirtaari.

Joonne hakkune goonɗinɓe

43Kulol nanŋi moy fu gam haaynaareeji e kaayeefiiji ɗuuɗɗi ɗi lilaaɓe waɗannoo. 44Goonɗinɓe ɓen fu waɗi hunnuko wooto, ɓe kawti ko ɓe goodi fu. 45Ɓee cippa jawdi maɓɓe e ko ɓe goodi fu, ɓee cennana moy fu ceede mum, jaka no haajaa. 46Nyalaane fu eɓe kaɓɓi anniya, eɓe kawta der suudu Alla, ɓe gaɗi hunnuko wooto, eɓe ceenna peen, eɓe nyaamda der cuuɗi maɓɓe e belɗum ɓerne, munaafitaare walaa. 47Eɓe maanta Alla, ko himɓe fu yiɗi ɓe. Nyalaane fu Joomiraawo e ɓeydana eklesiya hisuɓe.

Iliyochaguliwa sasa

Golle Lilaaɓe 2: BFB

Kuonyesha

Shirikisha

Nakili