Golle Lilaaɓe 4

Piyer e Yuhaana yeeso dottiiɓe Yahuduuɓe

1Wakkati Piyer e Yuhaana baddata e himɓe, *Liimaamiiɓe e mawɗo reenooɓe suudu Alla e *Sadukiiɓe yotti to maɓɓe. 2Mone waɗi ɓe gam Piyer e Yuhaana e janŋina himɓe, e bata ɓe no Yeesu fintii, gam mum maayɓe bo fintan. 3Ɓe nanŋi ɓe, ɓe maɓɓi e kasu faa weeta, gam tawii kiikiiɗe waɗii. 4Ɗuuɓɓe der nanuɓe waaju ɓen laatii goonɗinɓe, limgal maɓɓe waɗi hande himɓe ujune joyo (5 000).

5Fini mum, hooreeɓe maɓɓe, e *dottiiɓe, e moodiɓɓe tawreeta, hawritoy *Urusaliima, 6kamɓe woni Annasi hooreejo *Liimaamiiɓe, e Kayafasi, e Yuhaana, e Alekisandire, e lenyol hooreeɓe *Liimaamiiɓe fu. 7Ɓe darni Piyer e Yuhaana yeeso maɓɓe, ɓe ƴami ɓe: «E baawɗe ɗey naa e inne moy gaɗirɗon ɗum?» 8Den Piyer, hebbi Ruuhu Ceniiɗo, wi'i ɓe: «Onon hooreeɓe, e *dottiiɓe, 9to oon ƴama men hanne geetum ko moofo on waɗanaa, e no o yooforii, 10oon kaani annineego ɗum on fu, onon e Isira'iilaaɓe fu. E inne Yeesu *Almasiihu, mo Nasaratu, mo onon tigguɗon dow *leggal palaaŋal, go Alla fintini mo e maayde, e barke makko nun neɗɗo dariiɗo yeeso mooɗon on nyawtiraa.

11Kanko woni hayre ne onon mahooɓe boppuɗon,

kayre heennyi laatii jogiine maadi#4:11 Jabuura 118:22.

12To makko tan Kisidam heɓetee. Gam inne gom walaa e duuniyaaru kokkaane gam himɓe hisiniree.»

13No *dawrooɓe ɓen yi'i cuusal Piyer e Yuhaana, ɗum haaynii ɓe, gam ɓe annitii himɓe tedduɓe bane, ɓe janŋay bo. Ɓe annitii bo eɓe goondunoo e Yeesu. 14Amma no ɓe ji'ii gorko nyawtaaɗo on e darodii e maɓɓe, walaa fu ko ɓe baawi wi'ugo. 15Ɓe bi'i Piyer e Yuhaana wurtoo diga der hawriine nen. No ɓe burtii, go ɓe dawri, 16ɓe bi'i: «Noy gaɗeten worɓe ɓen? Laaɓanii himɓe *Urusaliima fu ɓe gaɗii kaayniiɗum, en baawataa bo ko yeddi ɗum. 17Amma en bagginee ɓe, kaɗen ɓe batugo kade goɗɗo haala neɗɗo on, gam to ka yahu ekaa sankitoo der himɓe.»

18Den ɓe nodditii ɓe, ɓe baggini ɓe, ɓe kaɗi ɓe waajaago e janŋingo haala Yeesu. 19Amma Piyer e Yuhaana toontii ɓe, wi'i: «Daaree onon e ko'e mon to e foonnitii yeeso Alla, laawol mon tokkee ŋol makko accee! 20Menen kan, men baawataa ko acci batango ko men ji'i e ko men nani.»

21Ɓe baggini ɓe kade. Ɓaawo majjum, ɓe joofiti ɓe, gam ɓe keɓay laawol no ɓe kiitortoo ɓe, gam jama'aare e teddina Alla gam ko waɗii. 22Neɗɗo nyawtiraaɗo kaayeefi on, duuɓi muuɗum e ɓuri lasoy ɗiɗi (40).

Goonɗinɓe e du'oo, ɓe keɓa cuusal

23No ɓe joofaa, Piyer e Yuhaana witti to himɓe muuɗum, fillanii ɓe ko hooreeɓe *Liimaamiiɓe, e *dottiiɓe wi'i ɓe fu. 24No ɓe nani ka, ɓe fu ɓe gaɗi hunnuko wooto, ɓe eeli Alla e daane towne, ɓe bi'i: «Joomiraawo, taguɗo kammu e leydi, e maayo e ko woni e muuɗum fu, 25an bati e Ruuhu Ceniiɗo, diga e hunnuko Dawda maama amen, laatiiɗo golloowo maa, bi'uɗaa:

Ume acci ko lenyi e ummanoo mo?

Ume acci go himɓe e dawra gam baanji?

26Laamiiɓe duuniyaaru e darta hawre,

ardiiɓe e ummanoo Joomiraawo, e laamiiɗo mo o suɓi#4:25-26 Jabuura 2:1-2."

27E gooŋa, der siire nee ɗo, Eroodu e Ponsu Pilaatu nannantirii e lenyi goɗɗi e himɓe Isira'iila gam haɓa e Yeesu, golloowo maa Ceniiɗo mo cuɓuɗaa, 28gam ɓe gaɗa ko desunoɗaa e baawɗe maa e sago maa diga law. 29Jooni Joomiraawo, daaru bagginol kalluŋol ŋol ɓe baggini men, den kokkaa men menen gollooɓe maa cuusal manŋal gam men baajoroo haala maa. 30Fortu juunŋo maa, nyawtu nyawɓe, waɗu kaayeefiiji, e haaynaareeji, e inne Yeesu, golloowo maa ceniiɗo.»

31No ɓe du'odii, nokkuure to ɓe kawritinnoo dimmii. Ɓe fu ɓe kebbinaa Ruuhu Ceniiɗo, go ɓee baajoroo haala Alla e cuusal.

Goonɗinɓe hawtii jawdi mum

32Jama'aare goonɗinɓe foti, waɗi hunnuko wooto e hakkillo wooto. Ɓe kawti ko ɓe goodi fu, goɗɗo e maɓɓe wi'ataa kanko tan nun jey jawdi makko. 33E baawɗe mawɗe lilaaɓe ɓen seedortonoo pintol Yeesu Joomiraawo, go moƴƴere mawne e woni e maɓɓe ɓe fu. 34Goɗɗo e maɓɓe talkiɗaa, gam wooduɓe jayriije e wurooji fu, sippan ɗi nun, wadda ceede mum, 35hokka ɗe lilaaɓe. Den moy fu hokkee jaka haaju mum.

36Leewinkeejo#4:36 Aaya 36, inne Leewinkeejo wari diga inne Leewi ɓii Yaakuubu. Leewinkeeɓe nun Alla hokki laawol waɗugo golle leesuɗe der suudu Alla. bi'eteeɗo Yusufu, mo lilaaɓe innitiri Barnabasi (ɗum wi'ay maa kokkoowo semme), ƴiwuɗo Kipurusu, 37e woodunoo gesa, sippi ŋa, waddi ceede ɗen, hokki ɗe lilaaɓe.

Iliyochaguliwa sasa

Golle Lilaaɓe 4: BFB

Kuonyesha

Shirikisha

Nakili