Galatas 3
3
Ja Moisesi, sok ja Kajwaltik Jesusi
1—Jel ajula ab'ajex swinkil Galasia, jas yuj ja jel sonso'exi. Lajan sok ixtalanub'alex yuj tantik brujo jumasa— ke'n oj kala wabyex jastal cham ja Kajwaltik Jesús ja b'a Cruzi. 2Kechan jun kosa ja jas wax k'ana oj ja wal'ex kab'i: Ja k'ak'u a wi'ajex ja Yespiritu ja Dyosi. ¿Ja'ma yuj ja a k'u'anex ja mandar it a'ji yi ja Moisesi, ma ja'yuj ja a k'u'anex ja tsamal yab'al ja Dyosi? —Ja toj leki, ja'yuj ja a k'u'anex ja tsamal yab'al ja Dyosi— 3Ta yuj k'a jach' waj jastal jawi, ¿jasyuj ja mixa wabyex sb'ej b'a? Ja yajni k'e a na'ex t'an ja jas yajk'achili, jel makuni a wujilex ja skoltayex ja Yespiritu ja Dyosi, ¿Jas yuj ja ya'n sok a wip we'nlex waxa k'ana oj ja ch'ak ex ja jas wokol a ta'awex b'a? 4¿Jel a wi'ajex ja wokoli, mi ma' jas a wilawex sat b'a? —A'nima mix k'u'an ta ay jas a k'u'lanex. 5Ja Dyosi, me'x ya'wi'ex ja Yespiritu sok me sk'u'lan a wi'ex milagro yuj ja waxa k'u'anex ja mandar it a'ji yi ja Moisesi. —Miyuk— Wa sk'u'lan a wi'ex, ja'yuj ja waxa k'u'anex ja tsamal yab'ali.
Ja jastal ja Abrami
6K'elawilex ja Abrahami, yuj ja sk'u'an ja Dyosi, ja'yuj i'ji lek. 7Ja'yuj na'awik lek, ja yintil jumasa ja Abrahami, ja' spetsanil ja ma'tik wax k'u'antik ja Dyosi. 8Jitsan k'ak'u ek' jani, ja b'a ts'ijb'anub'al ja yab'al ja Dyosi, wax yala oj i'juke lek yuj ja Dyos ja ma mi judio'uki, ja'ni chikan ta oj sk'u'uke ja Kajwaltik Jesusi. Ja'yuj ja Dyosi, ya' yi ja Abraham ja tsamal ab'al iti: —Ts'akatal lek yuj ja we'n, ja'yuj jel lek oj kil spetsanil ja swinkil ja niwak chonab' jumasa—. 9Ja'yuj ja Dyosi, yuj ja ye'n ja Abrahami, jel lek yila spetsanil ja ma sk'u'an ja Dyos yuj ja jas k'u'lan ja Abrahami.
10Jaxa ma' wax yala yuj wa sk'u'an ja Dyosi, yuj k'a ja wa'n sk'u'ajel ma ja wa'ne sk'u'ajel ja jas k'ajyelni wa sk'u'lane'i, jel xiwela sb'aj ja wokol oj jak sb'aje'i. Yuj ja b'a ts'ijb'anub'al ja yab'al ja Dyosi, jach' wax yala jastal iti: —Jel ajula sb'aj ja ma mi sk'u'an spetsanil ja jas wax yala ja mandar iti.— 11Mini jun ma' oj b'ob' yal yuj wa sk'u'an ja Dyos yuj ja wa sk'u'an ja mandar it a'ji yi ja Moisesi, ja b'a ts'ijb'anub'al ja yab'al ja Dyosi, jach' wax yala jastal iti: —Ja ma' sk'u'anta ja Dyosi sok ja'ni niwan lek sk'ujola, ojni sta' ja sak'anil b'a mi oj ch'akuki.
12Ta yuj k'a ja ti' oj ta'tik ja sak'anil b'a mi oj ch'ak yuj ja oj k'u'uktik ja mandar it a'ji yi ja Moisesi, ta jachuki, lajan sok mi jel t'ilan oj k'u'uktik ja Dyosi; Malan sok ja oj k'u'uktik ja mandar jawi. Ja'yuj jach' wax yala jastal it ja b'a ts'ijb'anub'al ja yab'al ja Dyosi: —Ja ma wa sk'u'an ja jas wax yala ja mandar it a'ji yi ja Moisesi, ojni sta skoltajel yuj ja wa sk'u'ana—. 13Jaxa Kajwaltik Jesusi, ye'n ya' a sb'aj yuj ja ke'ntik b'a oj yi' ja wokol it wax a'ji yi ja ma' mi sk'u'an ja mandar jawi. Jach' jastal jaw b'ob' skoltayotik. Ja b'a ts'ijb'anub'al ja yab'al ja Dyosi, jach' wax yala jastal iti: —Ja Dyosi, mi lek wax yila, chikan ma' ti oj cham lokan b'a jun te'i. 14Ja'yuj ja slekil sk'ujol ja Dyos yal yab' oj ya' yi ja Abrahami, ja slekil jawi, cho ja'ni oj a'juk yi ja ma mi judio'uki. Ja'yuj ta wan k'ax k'u'antik ja Kajwaltik Jesusi, ojni ya'ki'tik ja Espiritu it yaloj kab'tiki.
Ja mandari
15Moj alijel jumasa, oj je'awi'ex jun senya lo'il, chikan ma' oj yab' sb'ej. Yajni ay ma oj ya' jun strato sok otro, ta wan k'a wa sk'u'lan kan pirmari, mini ma oj b'ob' sch'ay ja trato jawi, sok mi ma oj b'ob' ya och tuk lo'il. 16Lek ay, ja jastik yala ja Dyos oj ya'yi ja Abrahami, sb'ajni ye'n sok ja yintil jumasa'a. Jaxa b'a ts'ijb'anub'al ja yab'al ja Dyosi, mix yala, ja jastik yala oj ya' ja Dyos yuj sb'ajuk ye'nle ja ma' —yintilanta miyuk—, wax yala ja sb'aj ja ma' ojto —Yintiluki—, ja jawi, ja'ni ja Kajwaltik Jesusi. 17Ja jas wax k'ana oj kali ja iti: Ja jastik yala oj ya' ja Dyosi, mi oj stukb'es, sok mi oj yal mixa oj ya', ja jastik yala oj ya' ja Dyosi, ek'to chane syen jun tajb'e sok lajune (430) jab'il, ti'to sk'u'lana. 18Ja Dyosi, ja lek kechanuk ja oj ya' yi ja ma wa sk'u'an ja mandar it a'ji yi ja Moisesi, ja jachuki, mixa yuj ojto k'ot smeranil ja jas yaluneji. Yuj ja smeranil ja yajni alji yab' ja Abraham yuj ja Dyos oj a'juk yi meran ja jas alji yab'i, mi jas k'anji yi' b'a oj ya' kambio sok.
19Ta jachuki, ¿Jas oj scholuk ja mandar it a'ji yi ja Moises b'a? Ja'yuj tsa'an ja Dyosi, yajni ch'akta sk'u'luk ja jas yalata yab' ja Abrahami, ti'xa ya'ki'tik ja Dyos ja mandar it ya' yi ja Moises b'a oj sje'ki'tik ja jas mi lek wa'ntik sk'u'lajeli. Ja mandar jawi, kechan ja oj makunuk ja janek' mitox jak ja yintil ja Abrahami, ma ja ye'n ti yala oj sk'u'l ja Dyosi. Ja Dyosi, ya' yi ja smandar ja Moisesi, ja a'ji ek' yi yuj ja anjel jumasa, b'a jach' ye'n oj ya'ki'tik ja Moisesi. 20Ja k'ak'u ya'a strato ja Dyos sok ja Abrahami, mi makuni yuj ma oj yale, ye'n sk'u'lan ja Dyosi.
¿B'a jas makuni ja mandar a'ji yi ja Moises b'a?
21Ja iti, mi yuj wa sk'ana yal yuj ja mandar it a'ji yi ja Moises yuj mi lekuk ja jastik yala oj ya' ja Dyosi. —Miyuk— Ja lek yuj oj ya'ki'tik jsak'aniltik b'a mi oj ch'akuk ja mandar it a'ji yi ja Moisesi, jaxa Dyosi, ojni yi'otik lek ja oj k'u'uktika. 22Ja b'a ts'ijb'anub'al ja yab'al ja Dyosi, wax yala, ja mulali, ye'nani wax yala jas oj k'u'luktik jpetsaniltika, jaxa jas ya'a ja Dyosi ja sb'aj ja ma oj sk'u'uk ja Kajwaltik Jesusi. 23B'ajtan yuj ja jawi, ja mandar it a'ji yi ja Moises yuj ja Dyosi, jach' jastal jun preso ti' lutanotik tiw, man kilatik yuj oj jk'u'uktik ja Kajwaltik Jesusi. 24Ja mandar it a'ji yi ja Moisesi, ye'n sje'a ki'tik jasunk'a lek oj jk'u'luktiki, sok yi'ajotik och man b'a sti sat ja Kajwaltik Jesusi, b'a lek oj yil'otik ja Dyos yuj ja wax k'u'antik ja ye'ni. 25Jaxa ya'ni k'ot ja k'ak'u ye'n oj k'u'uktik ja Kajwaltik Jesusi, mixa ja'ukto oj k'u'utik ma oj sje'ki'tik jastal oj ajyukotik ja mandar it a'ji yi ja Moisesi.
26Ja we'nlex yuj ja a k'u'anex ja Kajwaltik Jesusi, ja'yuj nakaxani yuntikilex ja Dyosi. 27Ja yajni a wi'ajex ja'i' cho ti'xani ajyiyex lajan sok ja Kajwaltik Jesusi, ja ya'n jach' xa ni wala ajyiyex jastal ja ye'na. 28Ja'yuj mi t'ilanuk ta judio ma mi judio'ukex, yib' k'ab'al ayex ma miyuk, winik ma ixuk. Ta yuj k'a ti ayex sok ja Kajwaltik Jesusi, junxtani a wab'alexa. 29Ta yuj k'a ti ayex sok ja Kajwaltik Jesusi, yujni ti cho ti' ayex sok spetsanil ja yuntikil jumasa ja Abrahami, cho ojni b'ob' a wi'ex ja jas yalunej oj ya' ja Dyosi.
Iliyochaguliwa sasa
Galatas 3: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021