Galatas 4
4
Yuntikilotikxa Dyosi
1-2Ja jas wax k'ana oj kali, jach' jastal iti: Yajni ch'into ja uninali, ja lajan sok ja ma' yib' k'ab'al ay b'a yoj jnajtiki, cho ja'ni chikan jastal ja ma' wax talnaji yuji sok ja ma' wax je'ji yi yuji, asta man oj a'jukan yi b'a sk'ab' yuj ja tatal ja jastik sb'aji, spetsanil ye'nani oj ch'ak sb'ajuk kana. 3Lajan sok jach' aytik jastal jaw ja ke'ntiki, ja yajni mitox na'atik sb'aj ja Kajwaltik Jesusi: Ja tantik espiritu jawi k'atanxta aye ek' b'a lu'um it b'a oj ya'wotik b'a yib' sk'ab'e. 4Jaxa yajni k'ot ja k'ak'u it jastal yalunej ja Dyosi, Ye'n sjekakon ja yunin it ti manxi b'a jun ixuki, ya sk'u'uk spetsanil ja jastal kulan yuj ja judio jumasa. 5Sjeka ja Dyos b'a ya elkotik ja ke'ntik yuj ja t'ilan oj k'u'uk ajyi ja mandar it a'ji yi ja Moisesi, tsa'an ya ochotik jastal yuntikilil. 6Jaxa ya'n, yuj ja ochyexta yuntikilil ja we'nlexi, ja'yuj ja Dyosi, sjekata ja Yespiritu ja yunin b'a oj ajyuk amokex. Ja'yuj ja yajni wax k'umantik ja Dyosi, ja yespiritu wax yala oj k'umuktik jastal iti: —Tatey, jtat jex k'anawa—. 7Ja we'nlexi, mixa oj ja laj ex ja chinkanxta ma' smoso'anexi yuj ja yuntikilexa ja Dyosi. Yuj ja yuntikilexa ja Dyosi, sts'akatal ja ye'n ja'yuj ojni ya'wi'ex spetsanil ja jas yi'oja.
Ja Pablo cham sk'ujol yuj ja swinkil Galasia
8Ja mas b'ajtan mitoxa na'awex sb'aj ja Dyosi, yib' k'ab'al ayex yuj ja k'u'lub'al dyos jumasa. 9Jaxa ya'n wanxa xa na'awex sb'aj ja Dyosi, toj lek yaljel, ja Dyosi, wa'nxa sna'a b'ajex ja we'nlexi. Ja'yuj mix na'a jas yuj ja wa'nto cho a wa'a b'ajex b'a sk'ab' ja tantik pukuj ti aye b'a lu'um iti. —Na'ub'al ja ye'nle'i mi jas yip aye', sok mini t'un wax makuniye'a— 10Ja we'nlexi, ay to k'ak'u, ixaw, jab'il niwan waxa wilawex. 11Ja' yajni wax k'ulan pensar yuj ja we'nlexi wala xiwyon yuj ja mix makuni a wujilex petsanil ja jas jk'u'lan a wi'exi—.
12Moj alijel jumasa, wax kala wabyex k'ulanik ja jastal wax k'ulan ja ke'n, jach' jastal ja ke'n wax k'ulan ja jas waxa k'ulanex ja we'nlexi. Ja we'nlexi, mi jas mi lek a k'u'lanex ki', 13yuj ja ko'yon chameli ja'yuj ti kanyon chab' oxe k'ak'u b'a Galasia, b'a kala wabyex ja yab'al ja Dyosi. 14A'nima jela wi'ajex ja wokol ja k'ak'u syamawon chameli, mi a wilawonex k'elan sok mi b'a mi a kisawonexa. A wi'ajonex b'a wa najex jach' a wilawonex jastal jun yanjel Dyosi, —ma jun yanjel Kajwaltik Jesusi— 15Ja ke'n wax na'a lek ja t'usan mi' wa eluk wa satex b'a oj ja wa'wex ki'i. ¿B'a ch'ak waj spetsanil ja stsamalil jumasa jaw b'a? 16—Jaxa ya'n yuj ja lom wax kala wabyex ja smeranili, mi lek waxa wilawonex.
17Ja ma'tik wa sk'ana oj st'en'ex t'ilan oj ja k'u'ukex ja jas wax yalawe ja judio jumasa wa sje'a sb'aje yuj jel wa syajtayex. Ja smeranili, yuj kechan wa sk'ana oj sk'u'luk a wi'ex b'a mi sb'ejuk, ja' wa sk'ana oj ja chay'on a k'ujolex ja ke'n, b'a ye'n oj ja kis ex lek. 18Lek ja oj k'antik ja tuk jmojtiki, ta yuj k'a wax na'atik yuj lek ja jas oj k'u'ltiki. Jaxa we'nlexi, ta yuj k'a meran ja waxa k'anawonexi, k'u'lanik b'a spetsanil k'ak'u, mi kechanuk ja yajni ti ayon a mokexi. 19Ja ke'n jach' wax k'anawex jastal kuntikil, Ta yuj k'a me' la k'otyex jastal ja Kajwaltik Jesusi, jel oj ja wa'wex ki' ja wokoli, jach' jastal wax k'e' swokol jun nanal ja yajni oj tojb'uk sok niwan chameli. 20—Jelni wax k'ana ti oj ajyukon a mokex ja k'ak'u jumasa iti, b'a oj le'tik jastal oj lo'lanukotikik. Jel jomel olom ayon, mix na'a jas oj k'u'luk a wi'ex.
Ja jastal ja Agar sok ja Sara
21Ja we'nlex ja ma'tik waxa k'ana oj ja k'u'ukex ja mandar it a'ji yi ja Moisesi, alawik kab jun kosa: ¿Mi' ma b'a waxa k'umanex ja jas ts'ijb'anub'al b'a yab'al ja Dyos, yuj ja jas wax yala kab'tik yuj ja Abraham b'a? 22Wax yala yuj ja ye'n ajyi chab' yuntikil, june yal ja ya'tijum ixuki, jaxa juni ja sb'a sche'um Sara it libre ayi. 23Ja yal ja ya'tijum ixuki, jach' manxi jastal wala manxitik jpetsaniltik, jaxa yal ja sche'umi, manxi yuj ja sts'akatal lek ja Dyos yuj ja jas yal yab' ja Abrahami. 24-25Schab'il ja jastal iti, jel oj makunuk kujtik yuj ja jastal ek'i. Ja chab' ixuki, wa sk'ana yale chab' trato. Ja Agari, ja wa sk'ana slaj ja trato b'a wits Sinai it tey b'a Arabia, yuj spetsanil ja yintil jumasa wax manxi yib' k'ab'alxa aye. Ja wits jawi, ja wa slaja ja chonab' Jerusalen sok spetsanil ja ma' tey b'a yib' sk'ab' ja mandar it a'ji yi ja Moisesi. 26Jaxa Sara, ja wa slaja ja yajk'achil trato, ja jawi ja'ni jb'ajtika, yuj ja' Jerusalen b'a satk'inali, ja schonab'il spetsanil ja ma libre aytiki. 27Ja b'a ts'ijb'anub'al ja yab'al ja Dyosi, jach' wax yala jastal it yuj ja Sara:
—Ixuk, gusto ajyan,
yuj ja minixa wila sat untikanel ja we'n—
—Ixuk awanan jel gusto aya
yuj ja mey a wuntikili—
—Jaxa we'n ixuk mey a tatam,
—ja ya'n, mas oj ajyuk a wuntikil ja we'n
ke yuj ja ixuk ma' ay statami—
28Jmoj alijel jumasa, ja we'nlexi ja lajanex sok ja Isaac yal kerem it alji yab' oj a'juk yi ja Abraham yuj ja Dyosi. Wax kala lajanex sok ja ye'n, yuj ja we'nlex ni ja yuntikilex ja Dyos it yaluneji. 29Ja yunin ja Abraham it ajyi sok ja Agari, mix yila sb'aj sok lek ja Isaaki, yuj ja ye'n sts'akatal ja yip ja Espiritu manxi ja ye'n. Man ya'n jach' wa'n ek'el: Ja ma'tik wa sk'ana ja oj sk'u'uk ja mandar it a'ji yi ja Moises yuj ja Dyosi, mi oj yil'otike lek ja ke'ntik yuj ja ti manxitik b'a jastal yala ja Dyosi. 30Jaxa b'a ts'ijb'anub'al ja yab'al ja Dyosi jach' wax yala kab'tik jastal it ja Abrahami: —Nutsu el ja wa wa'tijum ixuk sok ja yali; ja ye'n mey sb'ej lajan oj sk'ep sb'aje ja sdote ja wa wunin Isaaki, yuj ja ti manxi b'a jun ixuk mey statami.
31Jmoj alijel jumasa, ja ke'ntiki mi yib' k'ab'al ayukotik yuj ja mandar it a'ji yi ja Moises yuj ja Dyosi, ja ke'ntiki, libre aytik. Mi lajanukotik sok ja jastal ja yal ja a'tijum ixuki, ja ke'ntiki ja oj lajtik jastal ja yal ja ixuk libre ayi.
Iliyochaguliwa sasa
Galatas 4: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021