Hechos 17
17
Ja ab'al k'umal b'a Tesalonica
1Ja k'ak'u wa'ne b'ejyel ek' ja Pablo sok ja Silasi ek'ye b'a Anfipolis b'a Apolania k'otye man Tesalonica, ja tiwi ay jun snajtsil tsomjel yuj ja judio jumasa. 2Jaxa Pablo yuj ja jach' k'ajyeli, waj ja b'a snajtsil tsomjeli, tik'anxta oxe sk'ak'u'il jijlel waji sk'uman sb'aj sok ja judio jumasa sb'a tiwi. Cho sk'uman ja yab'al ja Dyosi. 3Cho wa'n yaljel yab' ja ye'nle yuj ja Mesiasi, t'ilani oj chamuka, yuxta ojni cho sak'wuka, cho yala: —Ja Jesús it wa'non jan sta'jel ti'i, ja'ni ja Mesiasi, —xchi ja Pablo.
4Chab' oxe judio sk'u'ane ja jas yala ja Pablo ochye sneb'umanil ja Kajwaltik Jesusi, ja' smojan sb'aje sok ja smoj jumasa ja Pablo sok ja Silasi, jitsan griego syajtane sok sk'u'ane ja Dyosi sok jitsan ixuke ja ma'tik wax kisjiye b'a chonab' jawi. 5Jaxa tuk judio jumasa ma mi sk'u'ani, ja' schole ja ilk'ujoli. Sle'awe chab' oxe ja ma lom ti aye tiwi, yalwe yab' ke'a sle'e jastal oj sjom'e yi s'olom ja kristyano jumasa b'a oj schap'e yab'alil ja Pablo sok ja Silasi. Jaxa tantik kistal winik jumasa jawi, cho sle'a tuk smoje b'a waj sjoyb'aye ja snaj ja Jasoni, wax yalawe ti'uk ay tiw ja Pablo sok ja Silas b'a oj ya'we yi b'a sk'ab' ja kristyano jumasa. 6Yuj ja mi sta'awe'i, Ja'yuj ja skichawe och ja Jason sok chab' oxe ja ma' wa sk'u'an ja Kajwaltik b'a sti' sat ja ma' ay scholi. Och le'juk yi smule, ti yalawe'a:
—Ja Pablo sok ja Silasi, ti wa'ne b'ejyel ek' b'a spetsanil ja lugar jumasa b'a wa'ne sjomjel yi s'olom ja kristyano jumasa. Jaxa ya'n ti'xa aye jul ili, 7Ja Jasoni, ti snolonej b'a snaj. Ja wa'ne sk'okjel ja jas wax ya'a ja mandaranum b'a Roma, wax cho yalawe ay yi'oje pilan ma' oj mandaranuk sb'i'il b'i Jesús—.
8Yajni ch'ak yabye ja jastal it ja kristyano jumasa sok ma'tik ay ya'teli, jel tajkiye. 9Ti alji yabye oj b'i stup'e ja Jason sok ja smoj jumasa, ti'to sijpa jiye'a.
Ja Pablo sok ja Silas b'a Berea
10Yajni och ja a'kwali, ja sneb'uman jumasa ja Jesusi ti sjekawe ja Pablo sok ja Silas b'a Berea, yajni k'otye'i, cho wajye b'a na'its b'a wa stsomo sb'aj ja judio jumasa. 11Ja judio jumasa ma' ti aye b'a chonab' jawi, mas lek wa sje'a sb'aj ja ye'nle ke yuj ja judio jumasa b'a Tesalonica. Jel tsamal smaklane ja yab'al ja Kajwaltik Jesusi, sok spetsanil ja k'ak'u jumasa, wa sk'umane ja ju'un b'a ts'ijb'anub'al ja yab'al ja Dyosi, wa sk'elawe ta smeranil ja jastal wax je'ji yi'e'i. 12Jitsan ja judio jumasa jawi, sok jitsan griego sk'u'ane ja Kajwaltik Jesusi, winike sok ixuke jumasa ja ma sk'u'ani. Ja griego jumasa jawi, jel niwan wax iljiye b'a chonab'i.
13Yajni yabye ja judio jumasa b'a Tesalonica yuj ti wa'ne yaljel ja yab'al ja Dyos b'a Berea ja Pablo, ti waj sjom'e yi s'olom ja kristyano jumasa, b'a oj staklaye ja Pablo. 14Jaxa sneb'uman jumasa ja Kajwaltik Jesusi, wego sjekawe ja Pablo b'a sti' niwan paman ja', jaxa Silas sok ja Timoteo ti kanye tiwi. 15Ja ma waj sok ja Pablo smojtaye man chonab' Atenas, ti k'anji yi'e' pabor yuj ja Pablo ja yajnix kumxiye b'a Berea, a yalwe yab' ja Silas sok ja Timoteo, a wajuke b'a Atenas.
Ja Pablo b'a Atenasi
16Ja Pablo yajni wa'n smajlajel ja Silas sok ja Timoteo b'a Atenasi, jel cham sk'ujol ja yajni yila b'ut'el k'u'lub'al dyos b'a chonab' jawi. 17Ti sk'uman sb'aje b'a snajtsil tsomjel sok ja judio jumasa, cho jach'ni sok ja ma mi judio'uk ma' wa sk'u'ane ja Dyos sak'ani. Spetsanil k'ak'u wax waj ye b'a wax chonji kosa, wa sk'umane ja ma'tik wa sta'awe ja tiwi. 18Ay chab' oxe ja mas wa sna'awe'i, ti wax yalawe'a, ja mas t'ilan b'a jsak'aniltiki, ja' yajni jel gusto aytiki, —xchiye. Jaxa tuki wax yalawe yab' ja kristyano jumasa ye'n oj sna'e jastal oj sk'u'luke ja b'a leki. Jasa ay chab' oxe ja ye'nle'i, ti wa sjob'o sb'aje'a: —¿Jas b'i jun wax yala ja tan lo'lanum jawi? Jaxa tuki wax yalawe: —Lajan sok wa'n sta'jel ti tuktukil dyos b'a pilan chonab' tak, jach' wax yalawe yuj ja ja' wa'n sta'jel ti' ja Jesusi ja Pablo sok ja jastal sak'wi.
19-21B'a Atenasi, wa sk'u'lan jun tsomjel ja mandaranumi, ti b'a chonab' sb'i'il Areopago. Ja swinkil ja chonab' jawi sok ja ma'tik jakel tuk chonab'i, jel tsamal wa smaklaye ja jas yajk'achil wax yabye'i, ja'yuj ti yi'aje och ja Pablo b'a sti' sat ja mandaranum jumasa b'a chonab' jawi, jaxa ye'nle'i ti yalawe'a: —Ja jas waxa je'a toj yajk'achil, sok tuk wax kab' ja ke'ntikoni yuj ja mini b'a wax maklantikoni. ¿Mi' ma oj b'ob' a wal kab'tikon t'un ja sb'ej?
22Jaxa Pablo ti k'e tek'an b'a snalan ja junta'anumi, ti yala'a:
—Swinkil chonab' Atenas: Wax kila jel waxa k'u'anex ja wa dyosexi. 23Ja it wajyon paxyal b'a yoj chonab'i, ti kila jachan yamanxta wa dyosex waxa k'u'anexi, sok jta'a jun altar wax yala b'a tsij b'anub'ali —Ja sb'aj ja Dyos it mix na'xi sb'aji —xchi, ja b'a ts'ijb'anub'ali. Ja Dyos jaw waxa toyowexi, mixa na'awex sb'aj, ja Dyos jawi, ja it wax kala wabyexi. 24Ja' Dyos it sk'u'lan ja lu'umi sok spetsanil ja jastik wax ilxi; ye'n swinkil ja satk'inal sok ja lu'umi, sok mi ti' wax ajyi b'a snajtsil tsomjel sk'u'lb'en winik. 25Ja ye'n, mix makuni yuj ma oj koltajuk yuj. Ye'nani wax ya'a ki'tik ja jsak'aniltiki, ja jastal wax ki'ajtik ik'i, sok spetsanil ja jas mey yi'oj ja kristyano jumasa ye'n wax ya'a. 26Kechan june ja ma' sk'u'lan spetsanil ja kristyano jumasa b'a slechanal ja lu'umi, b'a kada chonab' ye'n wa sna'a jaye k'ak'u oj ajyuk sak'anil ja kristyano jumasa sok b'a' oj ajyuke'a.
27—Jach' sk'u'lan ja Dyosi, b'a jach' a petsanilex oj a le'ex ja ye'n sok ojni a ta'exa. Ja smeranili, mini najatuk ay jmoktik ja ye'ni. 28Ye'n wax ya'a kiptik b'a jsak'aniltiki ja jastal oj jnik jb'ajtik, ja jastalotiki yujni jachukotika. Jach' yala jun k'ula ts'eb'oj b'a chonab' iti: Ja smeranili, yujni yuntikilotik ja Dyosi, —xchi.
29—Ja'yuj, ta yuj k'a yuntikilotikxa ja Dyosi, mi sb'ejuk ja ye'n oj ka'tik slaj jun retrato b'a toj k'anal tak'in, sakal tak'in, ma ton. Ja Dyosi mi ma' oj b'ob' sna' jastal ja ye'n, sok mini ma oj b'ob' sk'u'l jun dyos oj b'ob' sb'on lek b'a oj ya slaj ja Dyosi. 30Ja Dyosi ya ek' jitsan k'ak'u mi ya stup ja ma'tik jach' wa sk'u'lan jastal jawi, yuj ja mi wa sna'awe ja jas wa sk'u'lane'i; Ja ya'n wa'n yaljel yab' spetsanil ja kristyano jumasa b'a lu'umi, a sutxuk ja sk'ujol'ei, sok kechan ye'n a k'u'ajuk. 31Yuj ja ye'n yalata ja sk'ak'u'il oj sk'el spetsanil ja smul ja kristyano jumasa, yujni jach' tojol oj sk'u'l b'a apetsanila, ja Dyosi stsa'ata ja Jesús b'a ye'n oj sk'el spetsanil ja kristyano jumasa, sok ja iti, sje'atani smeranilni'a yuj ja ya sak'wuk ja Kajwaltik Jesusi.
32Yajni yabye ja kristyano jumasa ke cham ja Jesusi, cho sak'wi, ay chab' oxe ja ye'nle och stse'uke ja Pablo, jaxa tuki ti yalawe'a: —Jel lek tix kalatik b'a otro k'ak'u ja iti, —xyutaje ja Pablo.
33Ti'xa waj ja Pablo'a, 34Yuxta ay chab' oxe ja ma sk'u'anta ja Kajwaltik Jesusi, ti wajye sok ja Pablo. Sok ja ye'nle'i tey jun ixuk sb'i'il Damaris cho tey ja Dionisio sb'a Areopago.
Iliyochaguliwa sasa
Hechos 17: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
