Hechos 15
15
Ja jas oj k'u'laxuki
1Ja k'ak'u jumasa jawi, ti k'otye b'a Antioquia chab' oxe winike sb'a Judea. Ye'n och sje'e yi ja ma'tik wanxa sk'u'ane ja Kajwaltik Jesús yuj ja t'ilan oj kupjuk yi ja sk'unil ja winiki,#15:1 Ja iti wa sk'ana yale sirkunsidar. yuj ja jach'ni wa'n yaljel ja mandar it a'ji yi ja Moises yuj ja Dyosi. Wax cho sje'awe yuj k'a mi oj kupxuk ja sk'unile'i, ja Dyosi mi oj koltajuke yuj. 2Jaxa Pablo sok ja Bernabeji mi lek yabye ja jastal jawi, ti och k'e'uke k'umal sok ja kristyano jumasa jawi, ja'yuj ja ma' wa sk'u'an ja Kajwaltik b'a Antioquia, sk'anawe yi ja Pablo sok ja Bernabe ke'a wajuke b'a Jerusalen a sle'e jastal oj stojb'ese ja ab'al k'umal sok ja sjekab'anum ja Kajwaltiki, cho jak'ni sok ja ma'tik ay ya'tel yuj ja jmoj alijeltik jumasa b'a chonab' jawi, ja ab'al k'umal ayi. Ja'yuj ti waj ja Pablo sok ja Bernabeji, cho mojtajiye yuj chab' oxe ja ma' ti' nochonane'i.
3Yajni ti wajume b'a sb'ejlal Jerusaleni, ek' ye b'a Fenicia sok b'a Samaria. Ti yalwe yab' ja judio jumasa ma wa sk'u'an ja Kajwaltiki, jitsan ja ma mi judio'uk sk'u'aneta ja Dyosi, yajni yabye ja lo'il it ja judio jumasa ma wa sk'u'an ja Dyosi jel gusto yabye.
4Yajni k'otye ja Pablo sok ja Bernabe b'a Jerusaleni, jel gusto iljiye yuj ja ma'tik wa sk'u'an ja Dyosi, jach'ni ja jekab'anum sok ja ma'tik ay ya'tel yuj ja jmoj alijeltik jumasa. Ti och yal'e' spetsanil ja jas k'u'lajita yi'e' yuj ja Dyosi. 5Jasa, ay chab' oxe fariseo sutxita ja sk'ujol'ei, sk'u'aneta ja Kajwaltik Jesusi, ti yalawe'a: —Ja ma sk'u'anta ja Kajwaltik Jesús ke mi judio'uki, t'ilan oj kaltik yabye a sk'u'uke ja mandar it a'ji yi ja Moises yuj ja Dyosi, cho jel t'ilan oj kupxuk ja sk'unile'i.
6Ja sjekab'anum jumasa sok ja ma'tik ay ya'tel b'a snajtsil tsomjeli, stsomo sb'aje b'a oj yal'e jasunk'a oj sk'u'luke'i. 7Yajni jelxa wajta el ja slo'ile'i, ti'xa yala ja Pedro:
—Jmoj alijel jumasa, ja we'nlexi waxa na'awex lek ayxa t'un k'ak'u stsa'awon ja Dyos b'a oj kal yab' ja ma' mi judio'uk ja jas jel tsamal wa'n sk'u'lajel ja Kajwaltik Jesusi, b'a jach' oj cho sk'u'uke ja ye'nle'i. 8Ja Dyosi, wani sna'a ja jastal wa'n ek'el jk'ujoltiki, a'nima cho sje'ata jastal wa syajta ja ma mi judio'uki, ya'ta yi ja Espiritu Santo jastal ya'ki'tik ja ke'ntiki. 9Ja Dyosi, mi yuj tukuk wax yila ja jaw jumasa sok ja ke'ntiki, cho jach'ni ja ye'nle'i, sch'aya yi ja smule ja k'ak'u sk'u'ane ja Kajwaltik Jesusi.
10—¿Jasyuj ja lom ay smalo'il waxa wilawex ja jas sk'u'lanta ja Dyos b'a? ¿Jasyuj ja t'ilan waxa t'enawex ja ma'tik wa sk'u'an ja Kajwaltik Jesús ke t'ilan oj sk'u'uke ja mandar jumasa, mini ja ma' ek' paxta kujtiki sok mini ja ke'ntiki, mix b'ob' jk'u'uktikta? 11Ja ke'ntiki wax na'atik jastal jta'a koltajeltik ja'ni yuj ja sts'akatal ja Kajwaltik Jesús yuj ja jel wa syajtayotiki, cho jach'ni ja ye'nle'i, wani sk'u'ane'a—.
12Spetsanile mi ma k'umani yujile. Ti'xta'a och smaklaye ja jas yalawe ja Bernabe sok ja Pablo, ti och yal'e' ja jas tsamal sk'u'lane'ta sok ja milagro jumasa a'ji sk'u'luke yuj ja Dyos b'a yojol ja ma mi judio'uki.
13Yajni ch'ak k'umanuke'i, ti yal yab' spetsanil ja kristyano jumasa ja Santiago smoj alijel ja Jesusi:
—Jmoj alijel jumasa maklayonik. 14Ja Simon Pedro yalata kab'tik jastal sk'u'lan ja Dyosi, man najate jel wa syajta ja ma' mi judio'uki, cho stsa'a b'a oj och kwenta sok ja yuntikil jumasa. 15Ja iti, cho ja'ni ja jas yala ja Dyos b'a ts'ijb'anub'al ja yab'al b'a it ya yal jastal it ja aluman Dyos jumasa:
16—Ke'n ja ajwalal Dyos ayon awujilexi
oj cho kumxukon pilan majke
b'a jach' oj cho k'e stul ja ya'tel
june ja yintil ja Davidi.
17Yajni waj ek'uk ja jastal jawi,
kristyano b'a tuktukil chonab' jumasa
oj jakuke jmok,
ye'nle'ni ja ma' tsa'ub'ale kuji.
18Ke'n ja ajwalal Dyos ayon awujilexi.
Desde najate ke'n
kalune ja iti.
19—Ja ma mi judio'uki, yalaweta oj sk'u'uke ja Dyosi. Wax kala ja ke'n mi t'ilanuk oj t'entike b'a oj sk'u'uke ja mandar jumasa b'a mi jel t'ilanuki. 20Kechan oj jts'ijb'atik yi'e' jun ju'un b'a oj kaltik yabye, mok lom yabye jun wa'el b'a ya'weta yi b'a smajtan dyos k'u'lub'al. Mini sb'ak'tel chante b'a el jorka, mini b'ak'et b'a ay schik'el. Mok lom yi sb'aje sok tuk ixuk, ja ab'al it ja a'ji yi ja Moises yuj ja Dyosi, wax yala mi lekuk ja jawi. 21Jel t'ilan oj jak jk'ujoltik sok ja swinkil b'a chonab' jumasa jawi, ja wa'n je'jel yi'e sok ja wa'n aljel yabye ja mandar it a'ji yi ja Moises yuj ja Dyosi. Ja iti, ja'ni wa'n je'jel b'a snajtsil tsomjel kada sk'ak'u'il jijleli.
Ja ju'uni
22Ja'yuj ja jekab'anum jumasa, ja ma'tik ay ya'teli, sok spetsanil ja jmoj alijeltik ma wa'nxa sk'u'ajel ja Dyosi, yalawe oj stsa'e chab' oxuk ja janek' aye b'a oj sjek e b'a Antioquia, sok ja Pablo sok ja Bernabeji. Ti stsa'awe ja Judas it wax cho a'ji sb'i'iluk Barsabasi, sok ja Silasi. Ja cha'wane iti ayni ya'tele b'a snajtsil tsomjeli. 23Ye'n jekji yi'e' ja ju'un jawi:
—Jaxa ke'ntikon janek' jekab'anumotikon sok ja ma'tik ay ka'teltikon b'a snajtsil tsomjel b'a Jerusaleni, wax jekatikon jun spatulab'il a k'ujolex a petsanilex ja we'nlex ma'tik ti ayex b'a lugar jumasa sb'a Antioquia, b'a Siria sok b'a Cilicia, b'a mi judio'ukexi, a k'u'anexta ja Kajwaltik Jesusi. 24Kab'tikonta yab'alil ay ma wajta yulatayex ja swinkil ili, jasa, mini jas wax kalatikon yabye ja ke'ntikoni, jachuk sjomota a olomex ja jastal wa sje'awe'i. 25Ja'yuj kalatikon oj jektikon a wi'ex chab' oxuk ja jmoj alijeltik b'a stsome ke'ntikoni. Ye'n oj smojtaye ja jmoj alijeltik Bernabe sok ja jmoj alijeltik Pablo, 26Ja ye'nle'i ya'unejxa sb'aje ti chikan jastal oj ek' yujile yuj ja wa sk'u'ane ja Kajwaltik Jesusi, ta yuj ti chamye'a ja ye'nle'i, mi yajuk wax yabye. 27Cho jach'ni ti wax jekatikon awi'ex ja Judas sok ja Silasi. Ye'n oj yala wabyex ja jas jlajatikoni.
28—Jel lek wax yab' ja Espiritu Santo sok ja ke'ntikon ja mi oj t'en'extikon b'a oj ja k'u'ukex pilan ab'al yuj ja jun ab'al it mi oj b'ob' ka'tikan sk'u'lajeli. 29Mok a k'ux'ex b'ak'et b'a a'jita yi b'a smajtan dyos k'u'lub'al; mok a wabyex ja schik'eli, mini ja sb'ak'tel chante b'a ayto schik'eli, mok ek' ak'ujolex oj a le'ex pilan ixuk b'a oj ja wi'a b'ajex sok yuj ja mandar it a'ji yi ja Moises yuj ja Dyosi, wax yala mi sb'ejuk ja jachuki. Ta yuj k'a a k'u'anex ja we'nlex ja jastal iti, jelni lek oj ja wil'exa. Wax jekatikon jun spatulab'il a k'ujolex.
30Ja'yuj ja Bernabeji, ja Pablo, ja Judas sok ja Silasi, ti'xa wajye b'a Antioquia. Yajni k'otye ja tiwi, ti stsomo sb'aje sok ja jmoj alijeltik jumasa b'a chonab' jawi, ya'we yi b'a sk'ab'e ja ju'un yi'aje ochi. 31Yajni sk'umane ja ju'un jawi, spetsanil ja kermanotik jumasa, jel gusto yabye yuj ja jas wax yala ja ju'uni, jel a'ji kulan sk'ujole'. 32Jaxa Judas sok ja Silasi, aluman Dyose ja ye'nle'i, ja'yuj ti sk'umane ja sneb'uman jumasa ja Kajwaltik Jesusi, b'a ya'we kulan sk'ujole' sok stsatsal k'ujolane.
33Tsa'an yajni alb'iye'ta sok ja jmoj alijeltik jumasa b'a Antioquia, jaxa ma ti jakele b'a Jerusaleni, ti'xa spila sb'aje sok tiwi. 34-35Jaxa Silasi, ja Pablo sok ja Bernabeji ti kanye b'a Antioquia, lajanxa sok ja tuk sneb'uman jumasa ja Kajwaltiki, sje'awe sok yalawe ja tsamal yab'al ja Kajwaltik Jesusi.
Spila sb'aje ja Pablo sok ja Bernabeji
36Tsa'an ja Pablo, ti yal yab' ja Bernabeji: —Ja ya'an oj cho ek' kulatatik spetsanil ja chonab' jumasa b'a kalunejtikxa ja yab'al ja Kajwaltiki, b'a oj cho jk'eltik jastal aye ja sneb'uman ja Kajwaltik Jesusi, —xchi ja Pablo.
37Jaxa Bernabeji, wa sk'ana k'e oj waj soke ja Juan Marcosi, 38Ja Pablo mixa sk'ana, yuj ja lom jipwani kan ja Juan Marcos b'a Panfilia, sok mixani sk'ana oj a'tijuk sok ja ye'nle'a.
39Ja'yuj ja Pablo sok ja Bernabeji, mixa b'ob' slaj sb'aje', jachuk ti spila sb'aj je'a. Jaxa Bernabe sok Marcosi, k'e'ye jun barco ti wajye b'a chipre. 40Jaxa ye'n ja Pablo ti yal yab' ja Silas oj smojta sb'aje. Tsa'an ti'xa spila sb'aje sok ja jmoj alijeltik jumasa b'a chonab' Antioquia, wax k'anatik yi ja Dyos ye'n oj syajtayex sok oj stalnayex, —xchiye. Ti'xa elye ja Pablo sok ja Silas ja tiwa 41Ti ek'ye b'a Siria sok b'a Silicia, b'a ek' stsatsal k'ujoluke ja jmoj alijeltik jumasa mok b'i ya'we kan sk'u'ajel ja Kajwaltik Jesusi.
Iliyochaguliwa sasa
Hechos 15: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
