Hechos 14
14
Ja Pablo sok ja Bernabe b'a Iconio
1Yajni k'otye ja Pablo sok ja Bernabe b'a chonab' Iconio lajan ochye b'a wa stsomo sb'aj ja judio jumasa. Ti yalawe yab' ja kristyano jumasa ja jas wax yala ja yab'al ja Kajwaltik Jesusi, ja'yuj jitsan judio sok ma' mi judio'uk sk'u'ane ja yab'al ja Kajwaltik Jesusi. 2Jaxa judio jumasa ma' mi sk'u'an ja Jesusi, och sle'e jastal ya'we tajkuk ja ma mi judio'uki, b'a jach' och staklaye ja sneb'uman ja Jesusi.
3Jaxa Pablo sok ja Bernabeji, ti ajyiye' jitsan k'ak'u b'a Iconio ja' niwan lek sk'ujole ja Dyosi, ti wax yalwe yab' ja kristyano jumasa yuj ja jastal jel ja syajal sk'ujol ja Dyosi. Ye'n wax a'ji yipe yuj ja Kajwaltik b'a oj sk'u'luke milagro b'a jach' oj sk'u'uke ja kristyano jumasa spetsanil ja jas wax yalawe'i.
4Jaxa kristyano jumasa b'a Iconio mi sna'a jas oj sk'u'luke, chab' oxe ti aye sok ja judio jumasa, cho ay chab' oxe ti aye sok ja Pablo sok ja Bernabeji. 5Ja'yuj ja judio jumasa sok ja ma' mi judio'uki, ti slajawe sok ja ma'tik ay ya'tel b'a Iconio ti yalawe oj yixtala'uke ja Pablo sok ja Bernabeji, yalawe oj sch'oj e' ton. 6-7Jaxa Pablo sok ja Bernabeji, yabye yab'alil ke wa'n cha'pjel yab'alile'i, ja'yuj elye ja tiwi, ti wajye b'a Listra sok b'a Derbe b'a slujmal Licaonia, ti yalawe tiw ja yab'al ja Dyosi.
Ja ab'al k'umal b'a Listra
8B'a chonab' Listra ajyi jun winik mini t'un b'ob' b'ejyuka. Yujni jach' mix b'ob' b'ejyuk man k'ak'u manxi. Ja winik jawi, ti kulan tiw 9Wa'n smaklajel ja jas wax yala ja Pablo, ti tojxta sk'ela'a, ya' lek sniwanil k'ujol ja winik jaw b'a oj a'ji tojb'uk yuj. 10Ti K'umani tsats lek ja Pablo: —K'e'an, b'ejyan, —xchi ja Pablo.
Jaxa winik jawi, b'ajti cha'an, ti'xa och b'ejyuka. 11Jaxa yajni yilawe ja jas k'u'lan ja Pablo ja ma'tik tey tiwi, ti och awaljuke'a ja'ni b'a sk'umale Licaonio: —Ja dyos jumasa, lajane'xa sok jastal jun winik, jakta yulatayotike, —xchiyexta sok ja sk'umale'i.
12-13Ja pagre sok ja kristyano jumasa, wa sk'ana oj ya'we yi smajtan b'a oj stoy'e ja Bernabe sok ja Pablo, yuj ja wax ek sk'ujole ja Bernabe ye'n ja dyos Zeusi, jaxa Pablo ye'n ja dyos Ermesi, yuj ja ye'n k'umani, yuj ja snajtsil stsomjel ja dyos Zeusi, tey b'a spwerta'il ja chonab'i, jaxa Pagre yi'aj och wakax sok nichim ja b'a snajtsil tsomjel yujile'i.
14Yajni sna'awe k'inal ja Bernabe sok ja Pablo ja jas wa'ne ja kristyano jumasa, ti ch'ak sch'i' ja sk'u'e'i, ti ochye b'a snalan ja kristyano jumasa, ti och k'umanuke tsats leka:
15—Maklayik— ¿Jasyuj jach' waxa k'u'lanex jastal it b'a? Ja ke'ntikoni mi dyosukotikon, lom winikotikon jastal we'nlex a' wa paborexi, mokxa a k'u'lukex ja jastik mey sb'eji, jel lek a'wik b'a sk'ab' ye'n ja Dyosi, yuj ja ye'nani sk'u'lan ja satk'inali, ja lu'umi, ja niwan paman ja' sok spetsanil ja jas ayi. 16A'nima ja k'ak'u jumasa ek'ta, a k'u'lanex spetsanil ja jas waxa k'ana oj ja k'ulukexi, 17ja ye'n mix ya'kan sje'jel ja b'a leki, ja wa syajta spetsanil ja kristyano jumasa. Ye'n wax ya jakuk ja ya'lel ja jasa b'ajex b'a oj ajyuk ja sati, b'a oj ja ta' jas oj a wabyex, b'a jach' tsamal oj ajyanik.
18A'nima jach' yalawe ja Bernabe sok ja Pablo jaxa kristyano jumasa jel wokol yabye ja mi oj ya'we yi ja smajtan chapan yujile'i. 19Ti k'otye chab' oxe judio sb'a Iconio sok sb'a Antioquia, och sjom'e yi s'olom ja kristyano jumasa, b'a oj staklaye ja Pablo. Ja'yuj ja kristyano jumasa, ti och sch'oj'e' tona, ek' sk'ujole yuj chamta yujile, ti'xa waj sjip'e' kan b'a sti' chonab'a. 20Jaxa sneb'uman jumasa ja Jesusi, ti ochye joyan sb'aj ja Pablo, waj yil'e' stulu sb'aj cho och pilan majke b'a yoj chonab'i, b'a schab'il k'ak'u ti'xa waj sok ja Bernabe b'a chonab' Derbe.
Pablo sok ja Bernabe wajye b'a Antioquia
21Ja Pablo sok ja Bernabeji, yalawe ja yab'al ja Dyos b'a Derbe, jitsan kristyano jumasa, sk'u'ane ja yab'al ja Jesusi. Tsa'an ti kumxiye b'a chonab' jumasa b'a Listra, b'a Iconio sok b'a Antioquia. 22Ti yulataye tiw ja ma' sk'u'anta ja Jesusi, yalawe yabye mok ya'e kan sk'u'ajel ja ye'ni. Cho yalawe yabye: —B'a oj ochkotik ja b'a wa skulan k'ot ja Dyosi, b'ajtan jel oj ki'tik ja wokoli, —xchi ja Pablo.
23B'a kada tsome ja jmoj alijeltik jumasa ja Pablo sok ja Bernabeji st'ojowe ma'tik oj och ya'tel b'a oj skoltaye ja sneb'uman jumasa ja Jesusi, tsa'an yajni ch'ak sk'umuke ja Dyos yuj ja cho skomo ja swa'ele'i, ti'xa ya' kajan ja sk'ab'e b'a s'olome ja ma'tik ay ya'tele'i, cho sk'anawe yi ja Dyos a koltajuke, yuj ja sk'u'aneta ja ye'nle'i.
24Jaxa Pablo sok ja Bernabeji elye ja tiwi ek' ye b'a Pisidia ko'ye man b'a Panfilia. 25Ti cho yalawe ja yab'al ja Dyos ja tiwi, ja' yalawe yab' b'ajtan ja swinkil ja Perge tsa'anto yalawe yab' ja swinkil ja Atalia. 26Tsa'an k'e'ye jun barco wajye b'a Antioquia, b'a slujmal Siria. Jaxa ma'tik wa sk'u'ane ja Dyos b'a chonab' jawi sk'anaweta yi' ja Dyos sok syajal sk'ujole ke'a talnajuke ja Pablo sok ja Bernabe b'a mi jas oj ek' yujile ja yajni wa'ne yaljel ek' ja yab'al ja Dyosi.
27Yajni k'otye b'a Antioquia, ti stsomo sb'aje sok ja ma'tik wa sk'u'an ja Dyosi, ti och yal'e' spetsanil ja jas ch'akta k'ulajuk yi'e' yuj ja Dyosi. Cho yalawe ja jastal koltajiye yuj ja Kajwaltik ja yajni wa'ne yaljel yab' ja yab'al ja Dyos ja ma mi judio'uki, b'a jach' oj cho sk'u'uke ja Jesús ja ye'nle'i. 28Ja Pablo sok ja Bernabeji ti kanye jitsan k'ak'u sok ja ma'tik wa sk'u'an ja Dyos ja tiwi.
Iliyochaguliwa sasa
Hechos 14: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
