Hechos 13
13
Jun a'tel mi kwalkyera'uk
1Sok ja jmoj alijeltik jumasa b'a Antioquia, tey ja Bernabe, ja Simeon it wa cho alji sb'aj —negroili—, ja Lucio sb'a Cirene, ja Menahem sok ja Saulo. Ja Menahemi, ti k'i sok ja Herodes Antipasi. Spetsanil ja ye'nle'i, aluman Dyose sok je'a ju'une.
2Jun k'ak'u yajni wa'ne stoyjel ja Dyosi sok wa'ne skomjel ja swa'ele'i, ti alji yabye yuj ja Espiritu Santo: —Chapawiki ja Bernabe sok ja Saulo. Ke'n jt'ojoweta b'a jun a'tel tsa'ub'al, —x'utjiye.
3Spetsanile mi ya'we kan sk'umajel ja Dyosi, sok wa'ne skomjel ja swa'ele'i; tsa'an ti och sk'umuke ja Dyos yuj ja Bernabe sok ja Saulo, ya'we kajan ja sk'ab'e b'a s'olome'i, yajni ch'ak sk'umuke ja Dyosi ti'xa spila sb'aje'a.
Ja Bernabe sok ja Saulo b'a Chipre
4Ja Espiritu Santo sjeka ja Bernabe sok ja Saulo b'a oj yal'e ja yab'al ja Dyosi. B'ajtan ti wajye b'a Seleucia, man tiwi ti ke'ye jun barco ti wajye b'a Chipre, ja lugar jawi joyb'anub'al yuj ja ja'i. 5Yajni k'otye b'a ti' niwan paman ja' b'a Salamina, ti k'e yal'e ja yab'al ja Dyos b'a wa stsomo sb'aje ja judio jumasa. Waj soke ja Juan Marcos b'a oj koltajuke yuj.
6Tsa'an ek' sk'uts e' spetsanil ja paman ja'i, ti ko'ye b'a niwan paman ja' b'a Pafos. Ti sta'awe tiw ja Barjesusi, ja ye'n jun winik judio wax cho sk'u'lan ya'tel brujo, jaxa jas wax yala sb'aji sb'aj b'i Dyos. 7-8Ja Barjesusi, lek wax yila sb'aj sok ja Sergio Paulo, jun winik je sna'a cho ye'n mandaranum b'a Chipre. Jaxa Sergio Paulo ti sjeka spayjel ja Bernabe sok ja Saulo, yuj ja jel tsamal wax yab' oj smakla ja yab'al ja Dyosi. Jaxa tan brujo Barjesus it wax alji sb'aj Elimas b'a griego, ti och tek'an b'a sti' sat ja Bernabe sok ja Saulo b'a mi oj ya ek'uk yuj ja mi sk'ana oj ya smakla ja mandaranum ja jas oj yal'e ja winik jumasa iti, b'a jach' mi oj b'ob' sk'u'uk ja Kajwaltik Jesusi.
9Jaxa Saulo yuj ja ti yi'oj ja Espiritu Santo, ti tojxta och sk'el ja tan brujo jawi, ti yal yab'a: 10—Ja we'n ja yunina ja tan pukuji, jun tan le'a ab'ala, mini t'un lekuk ja jastal aya'a, mini t'unxa k'ana oj a k'uluk ja b'a leka. —Aktanxa kan t'unuk ja le'uj ab'ali, mi lomxa wala yuj sb'aj ye'n ja Dyos ja jas wa'na sk'u'lajeli. 11Ja ya'n oj ya'wi jun wokol ja Dyosi: Mi oj a wil k'inal, mini ja yijlab' ja k'ak'u oj ja wile, xchi ja Saulo.
Ja mismo ora jaw ja Elimasi, lajan b'i sok jastal jun k'ik'il ason jak makjuk yi' yab' ja sati, mini t'un b'ob' yil k'inala, wa sle'a ma oj yamjuk yi yuj ja sk'ab' b'a oj je'jukyi b'a oj wajuka.
12Yajni yila ja sk'u'lan ja winik jaw ja mandaranumi, jel cham k'ujol kan yuj ja jastal wa'n je'jel ja yab'al ja Kajwaltik Jesusi, ja smeranili cho sk'u'ani, ja ye'na.
Ja Pablo sok ja Bernabe b'a Pisidia
13Ja Pablo sok ja smoj jumasa elye b'a Pafosi, k'e'ye jun barco ti wajye b'a chonab' Perge, tey b'a slujmal Panfilia. Ti spila sb'aj sok tiw ja smoj jumasa ja Juan Marcosi, jaxa ye'n ti kumxi b'a Jerusalen. 14Jaxa Pablo sok ja tuk smoj jumasa mini jijliye'a sok yok wajye man b'a chonab' Antioquia, b'a slujmal Pisidia.
Jun k'ak'u Sabado ti wajye b'a snajtsil tsomjel b'a yoj chonab'i, ti wajye kulan tiwi. 15Ay ma sk'uman xet'an ja yab'al ja Dyosi, yajni ch'ak sk'umuke'i, ja ma'tik niwak ya'tel b'a snajtsil tsomjeli, ti sjekawe spayjel ja Pablo sok ja smoj jumasa: Ti yalawe'a, —Jmoj alijel jumasa ta ay k'a jas oj ja wal'ex yab' ja kristyano b'a oj sak'tes k'inal sb'aje'i, oj b'ob' a wal'ex.
16Ti k'e tek'an ja Pablo, ti slika ja sk'ab b'a oj ch'ajb'ajuk ja kristyano jumasa, ti yala'a:
—Jmoj alijel jumasa, a petsanilex, ja ma'tik wa syajta sok wa sk'u'an ja Dyosi, maklayonik. 17Ja Dyos yuj ja israelenio jumasa, stsa'a ja ma' ek' paxta kujtik b'a oj pojxuke lek ja ye'nle'i. Ja stsa'a ja k'ak'u ti'to aye b'a Egipto. Tsa'an ja swinkil Egipto ch'ak ya'we och ya'tijumil, jaxa Dyosi, sok spetsanil yip ya eluk ja tiwi. 18Ja yuntikil ja Dyosi, mojan chab' tajb'e jab'il, ti ajyiye ek' b'a chayan lugar, spetsanil ja k'ak'u jumasa jawi, ja'ni talnaji ye yuj ja Dyosi. 19Tsa'an ja Dyosi, sch'aka sna'jel juke niwak chonab' b'a slujmal ja Canaani, jaxa lu'um jumasa jawi, ja ya'yi ja israelenio jumasa. 20Spetsanil k'ak'u ja ek' ja iti, alb'i chane syen chab' tajb'e sok lajune jab'il, (450).
—Ja Dyosi ti sjeka chab' oxe winike b'a ye'n ti' oj ajyuke b'a chonab'i, man k'ot ja aluman Dyos Samueli. 21Spetsanile sk'anawe yi ja Dyos b'a oj a'juk yi'e' jun smandaranume b'a oj a'teltajuke yuj. Ja'yuj ja Dyosi ti yala yuj ye'n ja Saul ja ma oj och mandaranumil b'a chonab' jawi.
—Ja Sauli ja' stat ja Quis, ja'ni june ja smoj ja Benjamini, ja Sauli chab' tajb'e (40) jab'il alb'i ja ya'teli. 22Tsa'an ja Dyosi, ti'xa ya elyi ja ya'teli, ja' ya och yajk'achil mandaranumil ja Davidi. Yuj ja Davidi, ti yala ja Dyosi: Ja ke'n jel wax k'ana ja David yunin ja Jese, spetsanil k'ak'u wani sk'u'an spetsanil ja jas wax kala'a, —xchi ja Dyosi.
23—Ja Dyosi, yala june ja yintil ja Davidi ye'n oj jak skoltan ja israelenio jumasa, ja yintil jaw ja Davidi, ja'ni ja Jesusi. 24Ja mi tox jak ja Jesusi, ja Juan it ya'a yi'jel ja'i, jak yal yab' ja kristyano jumasa a sutxuk ja sk'ujole b'a oj sk'u'uke ja Dyosi sok a yi'e ja'. 25Ja'xa yajni ojxa chamuk ja Juani, ti yal yab' ja israelenio jumasa: —Mi ke'nuk ja Mesias yala wabyex ja Dyosi. Ja ye'n tsa'anto jakum, jaxa yajnix jak ja ye'n, mixani b'a sopjel yi ja sxanab' oj makunukon ja ke'n, —xchi ja Juani.
26—Maklayik lek ja jas oj kala wabyex israelenio jumasa yintil ja Abrahami. Cho jach'ni ja we'nlex ma'tik waxa k'u'anex ja Dyosi, a'nima mi israelenio'ukex. Ja ab'al it oj ya jta' koltajeltiki, sb'ajni b'a jpetsaniltik ja ke'ntika. 27Wax na'atik ja swinkil ja Jerusalen sok ja ma'tik ay ya'tel b'a chonab'i, mi sna'awe sb'aj ja Jesusi, spetsanil ja sk'ak'u'il jijlel jumasa wa sk'umane ja sju'un ja aluman Dyos jumasa, yuxta mini jak sk'ujole ta yuj ja wa'n ta'jel ti' ja Jesús ja b'a ju'un jumasa jawi, ja'yuj yalawe a miljuk ja Jesusi, mini sna'awe'a, ja'yuj jach' ya'we k'ot smeranil ja jas yalawe ja aluman Dyos jumasa. 28A'nima mini jun smul sta'awe yi'a, yuxta sk'anaweni yi ja Pilato b'a oj smil'e'a. 29Jaxa yajni ch'ak sk'u'luke spetsanil ja jas yalunej ja aluman Dyos jumasa, ti'xa ya'we ko'uk ja skwerpo ja Jesús b'a Cruzi, ti waj ya'we kan b'a jun k'e'en. 30Jaxa Dyosi ya'ni sak'wuk ja Kajwaltik Jesusi. 31Jitsan k'ak'u, sje'a sb'aj yi spetsanil ja sneb'umani, lajan elye jan sok b'a Galilea man k'otye b'a Jerusalen. Jaxa ya'n ja ye'nle'i, wax yalawe yab' spetsanil ja kristyano jumasa machunk'a Jesusi.
32—Ja Dyosi yal yab' ja ma' ek' paxta kujtiki oj sjek jun koltanum, jaxa ke'ntikoni wax kalatikon a wabyex ja tsamal yab'al ja Dyosi: 33Ja Dyosi, sk'u'lanta ja jas yaluneji, ya sak'wuk ja Jesusi. Spetsanil jach' ek' ja jastal wax yala ja b'a schab'il salmo:
—We'n ja kunina;
man ya'n ke'n a taton.
34—Ja Dyosi yalunej ja b'a ts'ijb'anub'al ja yab'al ja Dyosi, ja Jesusi ojni sak'wuka, sok mi oj ya' k'a'uk ja skwerpo b'a yoj k'e'en. Jach' yalunej, cho yala:
—Jach' oj k'u'luk a wi ja jastal
jk'u'lanyi ja Davidi;
ja jas oj k'u'luki, tsa'ub'al
—kalunej yujni oj k'u'luka—.
35—Ja'yuj wax cho yala ja b'a pilan Salmo:
Mi oj ja wa'kan ja jkwerpo b'a yoj k'e'en;
mi oj ja wa'kan ja ma' lek waxa wila b'aj sok
b'a oj yi' wokol b'a yoj chamel ch'akeli.
36—Ja smeranil ja Davidi, yujni sk'u'an spetsanil ja jas alji yab' yuj ja Dyosi, jaxa yajni chami ti waj mukan ja skwerpo b'a sk'ejnal ja ma' ek' paxta yujile'i, jaxa skwerpo k'a'i. 37Jaxa Jesusi a'ji sak'wuk yuj ja Dyosi, jaxa skwerpo mini k'a'a.
38—Jmoj alijel israelenio jumasa, ja' lo'il it wax kalatikoni: —Ja Jesusi oj b'ob' sch'ay sna'jel ja wa mulexi. Ja mandar it a'ji yi ja Moisesi, mi oj b'ob' sch'ay sna'jel ja wa mulexi, 39Ja Dyosi, oj sch'ay sna'jel spetsanil ja smul ja ma wa sk'u'an ja Jesusi. 40Talna lek a b'ajex b'a mi oj ja wi'ex ja wokol it yaluneje ja aluman Dyos jumasa ja k'ak'u yalawe jastal iti:
41Ja we'nlexi mixa kisawex ja Dyosi,
jaxa ya'n a cham a k'ujolex, pakawik ajnel.
Yujni jel tsats ja wokol oj ka'yi
ja ma' mi sk'u'an ja kab'ali,
sok yujni mi oj sk'u'uke'a
ta yuj k'a ay ma oj aljuk yabye yuji.
42Yajni elye ja Pablo sok ja smoj jumasa b'a snajtsil tsomjeli, ja kristyano jumasa sk'anawe pabor ta oj b'ob' cho kumxuke b'a pilan sk'ak'u'il jijleli, a cho yal'e' ja yab'al ja Dyosi. 43Jitsan judio sok chab' oxe ma' tuk chonab' jakele stsajluneje ja srelijyon ja judio jumasa, sk'u'ane ja jas yalawe ja Pablo sok ja Bernabeji, ja'yuj ti alji yabye'a, mok lom ya'wekan sk'u'ajel ja syajal sk'ujol ja Dyosi.
44Jaxa b'a pilan sk'ak'u'il jijleli, t'usan mi spetsaniluk ja swinkil ja chonab' stsomo sb'aje b'a snajtsil tsomjel b'a oj smaklaye ja yab'al ja Dyos oj yal'e' ja Pablo sok ja Bernabeji. 45Yajni yilawe ja judio jumasa jel a'ay ja kristyano jumasa stsomo sb'aji, jel tajkiye. Ti och yal'e' ja Pablo sok ja Bernabeji mi ni jun sb'ej ja jas wa'ne yaljeli toj le'uj ab'al wa'ne. 46Jaxa Pablo sok ja Bernabeji, mini t'un xiwye'a, ti yalawe'a:
—Ja ma t'ilan oj kaltikon yab' b'ajtan ja yab'al ja Dyosi, we'nlex ja ma'tik judio'exi. Jaxa we'nlexi mixa k'ana oj ja k'u'ukex sok mixa k'ana oj ja ta' wa sak'anilex b'a mi oj ch'akuki, ja'yuj ja ya'ni ja wax kalatikon yab' ja ma mi judio'uki. 47Yujni jach' yala kab'tikon ja Dyosi:
—Israelenio jumasa ke'n ka'awex,
b'a oj ijlab'ananik ja b'a niwak chonab' jumasa;
b'a oj ja wal'ex jastal wa'non koltanel
man b'a stik'anal ja satk'inali—.
48Yajni yabye ja jastal it ja ma mi judio'uki, jel gusto axiye ti och yal'e' ja yab'al ja Dyosi jelni leka. Spetsanil ja ma stsa'unej ja Dyos b'a oj sta' jas sak'anil b'a mi oj ch'akuki sk'u'ane ja Dyosi.
49Ja'yuj ja yab'al ja Dyosi, slo'iltaye ek' ja b'a chonab' jumasa jawi. 50Jaxa judio jumasa, lo'laniye sok ja ixuk jumasa ma'tik wax kisjiye yuj b'a chonab'i, cho jach'ni ja winike jumasa ma' ay lek ya'tel b'a chonab' jumasa, b'a mi oj yil'e lek ja Pablo sok ja Bernabeji b'a oj snutse el b'a chonab' jumasa jawi.
51Ja'yuj ja Pablo sok ja Bernabeji, b'a oj yil ja kristyano jumasa mixa oj kumxuke sok ja ye'nle'i, stsijune kan lek ja ts'ub' lu'um yi'oj ja yoke sb'a chonab' jawi, ti'xa wajye b'a Iconio'a.
52Ja'xa sneb'uman jumasa ja Jesús kanye b'a Antioquia jel gusto aye, yuj ja ti yi'oj je spetsanil ja yip ja Espiritu Santo.
Iliyochaguliwa sasa
Hechos 13: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
