Marku 7
7
Yeesu ni ekhovelelo ya aYuda
1aFarisi* ni akina a anamawera a nlamulo* erweelaka oYerusaleemu yaathukumana ni Yeesu. 2Yaawoona oohuseraawe akina ecaaka ni matata oohitteela, eyo tiiyo woohinyawa. 3Vano, aFarisi* ni aYuda ootheene khaanca ehinyangwe mmatatani, ettharihaka hiiho ekhovelelo ya asitokweene. 4Yaahokolowaka omerekadu, khaanca ehinaaye onyawa. Antthariha ikhovelelo sikina sincipale ntoko orapiha ikoomixi, nyaapu ni ipirinka sa eyuuma. 5Vano aFarisi* ni anamawera a nlamulo* yaamukoha Yeesu: “Heeni oohuseraanyu ahinttharihaaya ikhovelelo sa asitokweene, ecaaka yooca ni matata oohitteela?” 6Owo aawaakhula: “Mprofeeti Yesaya aahuuluma nnene mwaha wa nyuwo, anamwiixeera, aalempaawe: ‘Muloko ola onkittittimiha ni eyano, mene mirimasaya sookirakamela. 7Ankilapa siiyo. Mahusihowaaya ari malamulo a atthu paahi.’ 8Nyuwo munkhootta malamulo a Muluku ni muntthariha ikhovelelo sa atthu.” 9Ni aaweerelatho: “Nyuwo munnavaanela nnenesene weera mukhootte malamulo a Muluku weera muttharihe ikhovelelosanyu. 10Vano Moisesi aaheera: ‘Mwaattittimihe atithinyu ni amayinyu,’ ni ‘yoole onaaveiha atithawe, naari amayawe anaathorihiwe mpaka okhwa.’ 11Nyuwotho munaakhulela mukina aweerelaka atithawe, naari amayawe: ‘yakhalaru ekhavihero nyuwo muneeraanyu mwaakhele wa miyo ti Korobani’ (eyo entaphulela: yootteeliheriwa Muluku). 12Hiiho nyuwo khamunimunyesereriha yoole waakwaniherela yakhalaru etthu atithawe, naari amayawe. 13Hiihotho nyuwo munkhaliha a siiyo masu a Muluku ni ekhovelelowaanyu nyuwo mummwaramwaxaanyu. Mumpakatho itthu sincipale ntoko yeela.” 14Yeesu aawiitthanatho atthu ancipale ni aaweerela: “Mukiiweke ootheene ni mwiiwexexe ela: 15Kheewowo yakhalaru etthu eri omokoni wa mutthu eneera yavolowa mwa yoowo, enoowera omutatuxa oohitteela. Ohiyanawaya, ti yeeyo enkhuma mwa mutthu enimutatuxa oohitteela.”* 17Aahiyaka atthu ancipale ni evolowaka mpaani, oohusera yaamvekela Yeesu weera aathalihere yoolikanyiha ele. 18Yeesu aahaakoha: “Weeraka nyuwotho khamungwera wiiwexexa? Khamunsuwela weera kheewo etthu emvolowa mwa mutthu engwera omtatuxa ole oohitteela? 19Kheemvolowa mmurimanimwawe, mene munipwiipwini, ni vahoolo eniikhume.” Ahimaka yeeyo, Yeesu aaheera weera sooca sootheene ti sootteela. 20Owo aapwaherera eeraka: “Itthu sinkhuma wa mutthu sinimutatuxa oohitteela. 21Vano, ti wa mmurimani wa mutthu sinkhumaaya soowuupuwela soonanara, olavilavi, soowiiya, soowiiva, sooraruwa, 22wiinlela mihakhu, soonanara murima, soolokottha, soohiisuumaaliha, nrima, waapa, wiixoona ni ololo. 23Soonanara sootheene iya sinkhuma mpuwa ni sinimutatuxa mutthu oohitteela.”
Nroromelo na muthiyana oSiro-Fenisiya
24Yeesu aavenya nipuro nne ni aarowa elapo ya oTiro. Aavolowa mpaani ni khaatthuna weera akina emusuwele. Wa soothesene, aahooceela wiivitha weera ahisuweliwe. 25Mwa yeeyo, iiwakaru wuulummwa sa Yoowo, muthiyana mmoha, mwanawe muthiyana aarino munepa woonanara, aahoowa ni aahuuwela vanaawoniwawe. 26Muthiyana ole aari muGrego, aayariwe oSiro-Fenisiya, ni aamdyoonttelela Yeesu weera oomole munepa woonanara wa mwanawe ole. 27Owo aamweerela: “Mwaahiye toko weera anamwane ece mpaka evone, niwoko khoontthuneya ovenxa yooca ya anamwane ni waavonyera alapwa.” 28Owo aamwaakhula: “Apwiya, mene mpaka alapwa vathi vameesa anca inyenyeeri sa anamwane.” 29Vano Owo aamweerela: “Niwoko na yoowaakhula ela, nyuwo muroweke, munepa woonanara woovenya wa mwaninyu.” 30Owo aarowa owaani ni aamphwanya mwanawe iixaatalenleene vabeettini, ni munepa woonanara omuhiyaleene.
Olamihiwa wa mutthu oohuuluma ni oohiiwa
31Vahoolowaya Yeesu aavenya mweelaponi mwa oTiro ni aaheetteetta oSidoni, mpaka ephareiya ya oGalileiya ni elapo ya oDekapolisi. 32Weiwo atthu akina yaamuruuhela Yoowo mulopwana aari oohiiwa ni oohuuluma nnene, emudyoonttelelaka weera Owo amwiikaathere matata. 33Amuronghakaru mulopwana okerekhere, ottaiwene wa atthu ancipale, Yeesu aamvoleiha ikathasawe mmaarunimwawe. Vahoolowaya, Yeesu aasenya, anatava nlumi na mulopwana, 34anattukhula maitho, awehaka wiirimu, ni ahihimeraxaka, aamweerela mulopwana: “Efata,” entaphulela: “Muhuleiyeke!” 35Ni hiiho, maaru a mulopwana yaahuleiya, nluminawe naataphuleiya, ni owo aapacera wuuluma nnenesene. 36Yeesu aahaalamula weera ehaaleele akina. Wa soothesene, atepaka waahiiha, awo yaatepaxatho wuuluma. 37Muloko wa atthu waatikhinaxa ni waaheera: “Owo ompaka sootheene sooreera. Onoowera mpaka omwiiwiha oohiiwa ni omuulumiha oohuuluma.”
Iliyochaguliwa sasa
Marku 7: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
