Marku 8
8
Yeesu onaaciha asilopwana macira miloko mixexe
1Wa mahuku ale yaathukumanatho atthu ancipalexa. Woonaka weera khayaarino etthu weera ece, Yeesu aawiitthana oohuseraawe ni aaweerela: 2“Kinaamorela ikharari atthu ancipale ala. Aamala mahuku mararu ereene ni Miyo ehicaaka. 3Miyo kaalamulela orowa owaani ni etala, eniikomoke mphironi, niwoko akina a yaawo yaakhumme ottai.” 4Oohuseraawe yaamwaakhula: “Woowi aneeraawe aphwanye mutthu yooca yookwana waavaha atthu ancipale ala vanipuroni nna na ottai?” 5Yeesu aahaakoha: “Ipaawu ihayi murinaanyu?”Awo yaamwaakhula: “Ithannapiili.” 6Yeesu aahaalamula atthu ancipale weera ekilaathi vathi. Aakuxa ipaawu ithannapiili, ni atthapenleene, aameyanyiha ipaawu ni aahaavaha oohuseraawe weera yaakawele atthu ancipale, ni awo yaapaka hiiho. 7Yaakhalanotho ihopa sikina sikhaanene. Owo aatthapelatho mooteene yoole, ni aaweerela oohuseraawe weera yaakawele. 8Muloko wa atthu waahooca mpaka waavona. Ni yaathukumanyiha mipapara mithannamiili soosareya mivithe saahanle. 9Yaakhalawo wookwanaka asilopwanaru macira miloko mixexe yaari vaavaale. Aalaxerakaru atthu ancipale, 10Yeesu aavolowa munikulani vamoha ni oohuseraawe ni yaarowa elapo ya oDalmanutha.
aFarisi* amvekela eneneero
11aFarisi* yaahoowa ni yaapacera omukohakoha Yeesu. Etthunaka omweerera, yaamvekela eneneero ya wiirimu. 12Aahihimeraxa ni aaweerela: “Heeni ekhapira ela emvekelaaya eneneero yootikhiniheiya? Miyo kinooleelani ni ekhaikhai weera hata eneneero emoha kheemvahiwa ela.” 13Vano aasusa wa yaawo, anahokoleela munikulani analapuwela okhopela.
Eferementu ya aFarisi* ni ya atthu a Herodi
14Oohusera yaattiwala okuxa ipaawu, ehikhanle epaawu emoha yaarinaaya munikulani. 15Yeesu aawooperera oohusera eeraka: “Mukhale oowiisuwela, ni mwiipasoope wa eferementu ya aFarisi* ni ya atthu a Herodi.” 16Awo yaaheerelana yaaworu: “Ti niwoko na ohikhalanawahu epaawu?” 17Asuwelaka wuulumawaya, Yeesu aahaakoha: “Heeni munuulumaanyu mwaha wa ohikhalanawanyu epaawu? Nlelo khamuniiwexexa, naari khamunsuwela? Mirimasanyu siri soowuuma? 18Nyuwo mookhalano maitho, vano khamunoona? Mookhalano maaru, vano khamuniiwa? Khamunuupuwelela? 19Kaameiyanyinghaaka ipaawu ithanu wa atthu macira miloko mithanu, mipapara mihayi saasareiye mivithe mwaathukumanyinghaanyu?” Awo yaamwaakhula: “muloko ni miili.” 20“Kaameiyanyinghaaka ipaawu ithannapiili wa atthu macira miloko mixexe, mipapara mihayi saasareiye mivithe mwaathukumanyinghaanyu?” Awo yaamwaakhula: “Mithannamiili.” 21Owo aaweerela: “Nlelo khamuniiwexexa?”
Olamihiwa wa mutthu oohoona oBetisayida
22Awo yaarowa oBetisayida, ni atthu akina yaamuruuhela Yeesu mutthu oohoona, emdyoonttelelaka weera amutave. 23Owo aavara ntata na mutthu oohoona ni aamukhumihera vaate wa mmuttettheni. Amusenyelakaru mmaithoni mwa mulopwana ni amwiikaatherakaru matata, Yeesu aamukoha: “Nyuwo munimoona etthu?” 24Aahula maitho ni aamwaakhula: “Kingwoona atthu; awo anlikana ntoko nyiri seettaka.” 25Yeesu aamwiikaatheratho matata mmaithoni mwa mulopwana. Vano maithwaawe yaahuliwa ni ohoonawawe waalamihiwa, ni owo aahoona sootheene nnenesene. 26Yeesu aamurumiha owaani eeraka: “Muhivolowe mmuttettheni.”
Olapa wa Pedru
27Yeesu ni oohuseraawe yaarowa wa mittetthe soowaattamela sa oSesareya-Filipe. Yeettaka, Owo aahaakoha: “Atthu ankeera Miyo taani?” 28Awo yaamwaakhula: “Akina aneera Yohaane mpatisa, akina Eliya, ni akinatho mprofeeti mmoha.” 29Vano Yeesu aahaakoha: “Ankha nyuwo? Munkeera Miyo taani?” Pedru aamwaakhula: “Nyuwo ti Kristu.” 30Yeesu aawooperera weera ehaaleele akina mwaha wa Yoowo.
Yeesu onuuluma sa okhwawawe ni ovenyererawawe
31Owo aapacera waaxuttiha weera waatthuneya Mwaana a mutthu ohaawa ni itthu sincipale, okhoottiwa ni asitokweene, ahooleli a asaserdoti* ni anamawera a nlamulo*, okhwa, ni ovenyerera nihuku nanaararu. 32Owo aahuuluma nnenesene mwaha wa yeeyo. Vano Pedru, amwiitthanaka okhwipi, aapacera omooperera. 33Wa soothesene, Yeesu aarukunuwa, aahaaweha oohuseraawe ni aamuhiiha Pedru, eeraka: “Osuseke wa Miyo, Satana! Weyo khoonuupuwela itthu sa Muluku, mene sa atthu.” 34Vano aawiitthana atthu ancipale vamoha ni oohusera ni aaweerela: “Akhala mukina ontthuna okitthara Miyo, iikhootte muneenaawe, akuxe muttandaawe ni akitthare. 35Vanonto, yoowo ontthuna ovuluxa okumaawe, anaayeleele, mene yoowo ongyeleela okumi niwoko na Miyo ni na masu ooreeraxa, anaavuluxe yoowo. 36yooreera heeni mutthu owina elapo yootheene, ayeleelakatho okumaawe? 37Hoye hoye mutthu anaavahe eheeni yoowaakakhanyiha ni okumaawe? 38Akhala mukina variyari wa ekhapira yooraruwa ni yoottheka ela onuuliwa muru niwoko na Miyo, naari na maswaaka, Mwaana a mutthu anuuliwetho muru wa yoowo aawaaka vamoha ni andyelowaawe ootteela moovuwani mwa Atithawe.”
Iliyochaguliwa sasa
Marku 8: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
