Marku 6
6
Mprofeeti ohinttittimihiwa mweelaponimwawe
1Yeesu aavenya vaavaale ni aarowa wa esidadaawe, ahooliwaka ni oohuseraawe. 2Niphiyakaru nihuku na eSaabadu, aapacera oxuttiha muSinagogani*, ni ancipale yaamwiiwale, yaatikhina. Awo yannakohana: “Itthu seiya ophwannye woowi Mulopwana Ola? Miruku heeni ovahiwaawe weera mpaka apake sootikhiniha? 3Khahiyono Ola kalipinteiro, Mwaana a Mariya ni munna a Yakobe, Yoseete, Yudasi ni Simeyoni? Axirokoriye khaakhanle va ni hiyo?” Ni awo yaamunyoonyeriwa Yoowo. 4Yeesu aaweerela: “Paahi mweelaponimwawe muneenaawe, variyari wa emusaawe ni vaatewawe, mprofeeti khanttittimiheya.” 5Ni khaawera opaka weiwo sootikhiniha, ohikhanle owiikaathera matata oovoreiwa akina ni waalamiha. 6Ni Yeesu aatikhina mwaha wa ohiroromelawaya. Vano Yeesu aavenya eetteettaka mmittettheni, axuttihaka.
Yeesu onaarumiha muloko neeli
7Awiitthanaka muloko neeli wa Yoowo, aahaarumiha eeli-eeli, ni aahaavaha ikuru soolamula minepa soonanara. 8Malamulowaawe yaari ala: “Muhikuxe naari etthu mphironi, ahikhanle ttootto. Muhikuxe yooca, hata esaakho, naari musurukhu mmahotthanimwanyu. 9Ngwareke ikwakwaatta, muhikuxetho mukaandyo wanaaveeli. 10Imaara sootheene muneeraanyu mwavolowe vatthokoni, mwakhale weiwo mpaka ovenyawanyu. 11Wakhala muttetthe wakhalaru oneera ohiwaakheleni, naari ohiwiiweni, mwatathe ntthupi na inaawosanyu, mwaavenyaka ntoko eneneero ya nthorihelonaya.” 12Awo yaavenya ni yaalaleiya weera muloko orukunxe mirimasaya. 13Yaahoomola minepa soonanara sincipale ni yaahaattikitthela aretta ancipale ni makhura, ni yaahaalamiha.
Ohitiwa wa Yohaane mpatisa
14Mwene Herodi aahiiwa suulummwaka itthu iye, niwoko Nsina na Yeesu naasuwanyeyaxa. Atthu akina yeera: “Yohaane mpatisa oovenyerera mookhwaani. Tivawo simpakeyaaya mwa yoowo ikuru sootikhiniheiya.” 15Akina yeeratho: “Owo ti Eliya,” ni akinatho yaanaakhulela yeeraka: “Owo ti mprofeeti ntoko maprofeeti a khalayi.” 16Iiwalaawetho Herodi itthu iye, aaheera: “Yohaane – mulopwana kaamuhitalaaka – oovenyerera mookhwaani.” 17Ti Herodi muneenaawe aavanghe nlamulo weera emvare Yohaane, emutthuke, ni engwalele mukaliposo, niwoko Herodi aathelanne ni Herodiya, mwaara a munneiye iitthaniwa Filipe. 18Vano, waari niwoko Yohaane aamweerenlaawe Herodi: “Khamuntthuniheriwa okhala ni mwaara a munninyu.” 19Hiiho, Herodiya aamuthanya ni aatthuna omwiiva, mene khaawera opaka, 20niwoko Herodi aamoova Yohaane ni aamwaakiha, asuwelaka weera aari mulopwana oororomeleya ni ootteela. Aamwiiwaawe Yohaane, aatikhinaxa. Waarookhalaru hiiho, annatthuna omwiiwa. 21Nihuku nimoha yaaphiya ehuhu yootthuneya. Nihuku na wuupuwelela oyariwawawe, Herodi aahaavaha yooca ya efesta etokotoko ahooleli oottittimiheyaxa, ahooleli a anakhotto ni atthu oosunwanyeiyaxa a mweelaponi ya oGalileiya. 22Avolowaka mwaana muthiyana a Herodiya ni iinalaawe, aamusiveliha Herodi ni oolattuliwa. Mwene aamweerela mwaamwali ole: “Okivekeleke yakhalaru etthu ontthunaawo, ni miyo kinimoovaha.” 23Ni aamuroromeliha ni olipela: “Yakhalaru etthu oneeraawo okivekele, miyo kinimoovaha, mpaka mpatta wa eriyari ya omwenaaka.” 24Owo aavenya ni aahaavekela amayawe: “Kivekele eheeni?” Awo yaamwaakhula: “Muru wa Yohaane mpatisa.” 25Woowaakuveya mwaamwali aahaakuveya weera amuleele mwene yeeyo aatthunaawe, eeraka: “Kintthuna vaanaano vaava weera mukivahe muru wa Yohaane mpatisa musasaanini.” 26Mwene aathananaxa vancipale, mene niwoko na olipela ni na oolattuliwa, khaatthunne okhootta yoovekela ya mwaamwali. 27Hiiho aamurumiha nakhotto oowiiva weera amuruuhele muru wa Yohaane. Mulopwana aarowa, anamuhita Yohaane mukaliposo, 28anaruuha muruwaawe musasaanini. Owo aamvaha muru mwaamwali ni owo aahaavaha amayawe. 29Yiiwalaaya yeeyo, oohusera a Yohaane yaahoowa, yaakuxa muttembwaawe ni yaavitha munihiyeni.
Yeesu onaaciha atthu macira miloko mithanu
30Arummwa yaathukumana ni Yeesu ni yaamuthalihera sootheene yaapankaaya ni yaaxuttinghaaya. 31Yaakhala atthu ancipale erowaka ni erwaaka, moota wooweera awo khayaarino ehuhu weera ece. Yeesu aaweerela: “Ngwe ni Miyo vanipuroni na wiiphiini, ni mwiitthuuwe vakhaani.” 32Hiiho awo yaasusa munikulani mpaka nipuro na wiiphiini. 33Ancipaletho a yaale yaawoonne evenyaka, emusuwelaka Yeesu, yaatthimakela isidade sootheene ni yaaphiya weiwe Yeesu ahinaaye. 34Avenyaka Yeesu munikulani ni awoonaka atthu ancipale, aahaamorela ikharari, niwoko yaari ntoko ikhondoolo soohikhalano mukukhuli. Vano aapacera waaxuttiha itthu sincipale. 35Waari oxekuwa, tivawo oohuseraawe yaamwaattamenlaaya Yoowo, emweerelaka: “Nna nri nipuro na ottaiwene, ni wooxekuwa. 36Mwaarumihe atthu weera erowe mmawaani ni mmittettheni soowaattamana weera yathume etthu yooca.” 37Wa soothesene, Owo aawaakhula: “Mwaavahe nyuwo etthu weera ece.” Awo yaamweerela: “Eyo entthuneya idinaariyu* macira meeli! Ninanariheke musurukhu mwincipale ni ipaawu weera naavahe yooca?” 38Owo aahaakoha: “Murino ipaawu ihai? Ngwehe!” Ewehakaru, yaamweerela: “Ipaawu ithanu ni ihopa piili.” 39Vano Yeesu aahaalamula weera awo yaakilaathihe atthu ootheene mapuro mapuro munnyepuni. 40Hiiho awo yaakilaathi mmapuroni, ekhalaka ncira ncira, naari miloko mithanu mithanu. 41Akuxaka ipaawu ithanu ni ihopa piili ni awehaka wiirimu, aatthapela ni aameiyanya ipaawu. Vahoolowaya aahaavaha oohuseraawe weera yaakawele atthu. Ni aahaakawelatho ihopa piili ootheene. 42Ootheene yaahooca ni yaavona, 43ni oohusera yaathukumanyiha mipapara muloko ni miili soosareya mivithe sa ipaawu ni ihopa. 44Yaaciiye yaari asilopwanaru macira miloko mithanu.
Yeesu oneetta vasulu wa maahi
45Vahoolo vakhaani, Yeesu aahaanyesereriha oohuseraawe weera evolowe munikulani ni ehoolele erowaka oBetisayida, Owo aalaxeraka atthu ancipale. 46Aalaxenreene, Yeesu aawela vamwaakoni weera avekele. 47Wiilaka, nikula naari eriyari ya ephareiya, ni Yeesu aahanle meekhaawe vatthayani. 48Owo aawoona oohuseraawe ehaawanaka weettiha, niwoko epheyo yaaweela weiwo yaakelaayawo. Oyaaka ni oxa, Yeesu aarowa wa yaawo, eettaka vasulu wa ephareiya. Vanonto eeraka avire wa yaawosa. 49Awo emoonakaru eettaka vasulu wa ephareiya, yuupuwela weera aari namanxepaani. Vano yaakhuwela, 50niwoko ootheene yaamoona ni yaahookhwa maririmela. Woowaakuveyatho Yeesu aaweerela: “Mwiilipihere! Ti Yoomi. Muhoove!” 51Aavolowa munikulani vamoha ni yaawo, ni epheyo yaamaala. Awo yaatikhinaxa, niwoko 52khayiiwexenxe yootikhiniha ya ipaawu, woonaka weera mirimasaya saari soowuuma. 53Elapuwakaru ephareiya, yaaphiya oGenesarete, ni weiwo yaatthukelela nikula. 54Evenyakaru munikulani, atthu yaamusuwela Yeesu. 55Awo yanneetteetta elapo yootheene ele, ni yannaakuxa mmarepani aretta, yaaronghaka weiwo yiiwaaya weera Owo aakhalawo. 56Mapuro ootheene aakhalaawewo, hata mmittettheni, musidade, mmawaani, awo yaawiikaathi aretta mmitthekoni sa mwemmo. Yannamudyoonttelela weera naari yaatamve mmakoteloni wa mukaandyowaawe. Vano, ootheene yaamutamve, yaalama.
Iliyochaguliwa sasa
Marku 6: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
