Epacerero 50
50
Yoseefe onaalevelela axunneiye
1Yoseefe aawuuramela atithawe awiinlelaka, anaabeca. 2Vahoolowaya Yoseefe aahaalamulela mameediku yeemenle muteko nihuku nenenenne weera ettikitthele murette woopisiha wuntta muttembo wa atithawe Yixrayeli, enapaka yeeyo. 3Yaavira mahuku miloko mixexe ookwaneleene, niwoko eyo yaari ehuhu yoottikitthela murette woohunttiha. Ni awExipitu yaahiinla okhwawawe Yakobe mahuku miloko mithannamiili. 4Eviraka mahuku oolalamika, Yoseefe aahuuluma ni atthu a vaate wa Farawu* aweerelaka: “Mwatthuna okoonihera murima wooreera, mwamuleeleke Farawu* mukeerelaka miyo: 5‘Atithaka yaakilipeliha yeeraka: ‘Kihanle vakhaani okhwa. Mwakivitheke munihiyeni kiirehererenlaaka mweelaponi ya oKanaani.’ Vano, dyoontte mukitthunihere orowa waavitha atithaka ni kamaliha, kinoohokolowa.’” 6Farawu* aaheera: “Murowe, mwaavithe atithinyu ntoko yoolipelinghaayani.” 7Hiiho Yoseefe aapwaha waavitha atithawe ni anamalaka ootheene a Farawu* vamoha ni asitokweene ootheene a vaate wa Farawu* ni a wExipitu yaamuhoola. 8Waahiya yaawosa, emusi yootheene ya Yoseefe, axunneiye ni ootheene a vaate wa atithawe yaarowatho. Paahi anamwane, imombe ni ikhondoolo saahanle oGoxeni. 9Ikaaro ni anamweettiha a ikavalu* yaamuhoolatho. Aari nakupa. 10Yaaphiyalaaya nipuro nimveeriwa* etrigu na wAtadi, mukerekhere mwa Yordanu, yaahiikhupanyera ni ekuttho etokweene ya malatta. Yoseefe aawiinlela atithawe ekuttho ya mahuku mathannameeli. 11Akanaani yaamankewo yiiwakaru ekuttho ele vanipuroni nimveeriwa* etrigu na wAtadi, yaaheera: “awExipitu antthara ekhovelelo ya ekuttho ya malatta. Tiwawo nniitthaniwaaya nipuro nne vakhiviru wa Yordanu Abeli-Mizerayimi. 12Hiiho anamwane a Yakobe yaapaka yeeyo aalamulenlaawe: 13Yaamurongha oKanaani, enamvitha munikhukuni nri mmatta mwa Makipela, vakhiviru wa oMamre – nikhuku nne Abrahaamu aathummaawe wa muHiti Efroni weera nikhale nawaya noovithanamo. 14Aavithakaru atithawe, Yoseefe aahokoleela wExipitu vamoha ni axunneiye ni ootheene yaale yaamuhoonle.
Okhwa wa Yoseefe
15Vano, axunneiye Yoseefe yoonaka weera atithaya ahookhwa, yaaheerelana: “Ankha Yoseefe nlelo anithanya, uupuwelelaka ikukuttula mwa sootheene seiye naampankaahu?” 16Yaamurumihela Yoseefe mutthenga ola: “Atithinyu ehinaaye okhwa yaanilamulela 17weera nooleeleni ha: ‘Kinoovekani weera mulevelele soohiyanyiha ni soottheka sa axunninyu yoopankaayani moota woonanara! Vano mulevelele soottheka sa arumeiyi a Muluku a atithinyu.’” Aleeliwakaru, Yoseefe aahiinla. 18Vahoolowaya yaahoorwa axunneiye, yaamukokhorela ohoolowawe, enamweerela: “Hiyo va ti ipotthasanyu.” 19Wa soothesene, Yoseefe aawaakhula: “Muhoove. Nkikhanle vanipuroni na Muluku! 20Nyuwosa mwaakivaanelela yoonanara, mene Muluku ootatuxa yooreera moota wooweera olelo wuureliwe okumi wa atthu ancipale. 21Tivawo, muhoove. Miyo nkoocihaseni nyuwosa ni anamwaniinyu.” Ni hiiho aahaakurunuxa ni aawuulumela moosivelani. 22Yoseefe aapwaherera okhala wExipitu vamoha ni emusi yootheene ya atithawe. Aakhala ni okumi iyaakha ncira ni muloko mmoha 23ni aahoona osuulu wa Efrayimi. Ohiya hiiho, aawaakhela ntoko awawe anamwane a Makiri, mwaana a Manaxe. 24Ahinaaye okhwa, Yoseefe aaweerela axunneiye: “Miyo kihanle vakhaani okhwa. Vekhaikhai, Muluku anookhavihereni ni anoovenxeni mweelaponi ela, ooronghakani elapo aamuroromelinghaawe ni nlipelo Abrahaamu, Isaki ni Yakobe. 25Yoseefe aahaalipeliha anamwane a Yixrayeli eeraka: “Vekhaikhai, Muluku anookhavihereni okhuma ni ehuhuweene yeeyo mukuxe makhuvaaka nno. 26Yoseefe okhwiiye areereno iyaakha ncira ni muloko mmoha. Ni attikittheliwakaru murette woohunttiha, aaheliwa munipokosini wExipitu.
Iliyochaguliwa sasa
Epacerero 50: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.