Epacerero 49
49
Masu ookisera a Yakobe wa anamwanaawe
1Vano Yakobe aawiitthana anamwanaawe aweerelaka: “Mukisuseerelase va weera koothalihereni yeeyo eneera yookhumelelaseni mmahukuni a muhoolo. 2Muthukumane ni mwiiwe, anamwane a Yakobe; ngwiiwelele atithinyu Yixrayeli! 3Rubeni, weyo ntthaaranaka, ikurusaka ni eneneero yoopacera ya olopwanaaka – mutokweene munttittimihoni ni moowerani. 4Oowuupa ntoko maahi, khookhalatho mutokweene, niwoko woowela ekaama ya atithawo vankonaakawo ni khawuumaanle. 5Simeyoni ni Leevi ti axunna. Ikatanasaya ti ikapwiitthi sa nipuhero. 6Nkintthuna ovolowa anthukumanaayawo! Kihiyeke weera kihikhale mpatta wa ediyanxaaya, niwoko musaranimwaya yaawiiva atthu ni yaahintaka mapita a imombe mwayiini. 7Soolaphiwa sikhale isarasaya sootepaxa ni onyoonyiwawaya woonanaraxa! Kinimwaakawanyiha mweelaponi ya Yakobe ni kinimwaamwaramwaxa mwa Yixrayeli. 8Yuda, axunnawo animoottottopela. Ntatanawo nnikhale vaxiko wa amwiittanaawo ni anamwane a atithawo ammookokhorela oholowaawo. 9Yuda, weyo ti mwaaxaana a mwatto; aani mwanaka, ntoko mwatto ahokolowaka woolupatthani. Oniireherera otuphela ntoko mwatto; oniixaatalela ntoko mwatto muthiyana. Taani ongwera ongwanano? 10Ekopo kheerwa ekuxiwa wa Yuda, aani ekopo yoolamula eniikhale eriyari ya nyettosawe mpaka aneeraawe arwe yoowo ori muneene a ekopweene yeeyo. Ni miloko nsimwiiwelele yoowo. 11Owo anaamutthukelele buurwaawe vamwirini wa iwuuva*; aani mwaaxaana a buuru muthiyana vaphandini yooreeraxa ya evideira*. Anaakatthe soowarasawe vaviinyuni; mukaandyowaawe musuumuni mwa iwuuva*. 12Maithwaawe eniikhale ooriipa opwaha eviinyu ni mainwaawe ootteela opwaha mukaka. 13Zebuloni anaamake mukerekhere wa ephareiya ni anaathatuwe nipuro nooweemela makula matokotoko. Nyiinaanosawe nsiphiye mpaka oSidoni. 14Isakari ti buuru oolipaxa iixaatalenleene vamirittiniwawe. 15Oonaka weera nipuronawe na wiitthuuwa ni elapwaawe ti yooreera, anuurame vathi wa yoolemela ni anaavilele miteko soonyesererihiwa. 16Dani anaakihe yoophwanela ya mulokwaawe hiiho ntoko empakaaya yakhalaru epuumba ya aYixrayeli. 17Dani anaakhale ntoko enowa mukerekhere musewe, ntoko evili mukerekhere ephiro enluma etthottobwa ya ekavalu* ni enimmoroxa nttulittuli namweettiha. 18Ii! Yave, miyo kingweherera woopolawanyu! 19Gadi anaakaraweliwe ni alavilavi, mene ti yoowo aneera aakarawele ni aattharelele. 20Meesa a Axeri sinisaatte sooca ni owo anaareherere sooca sa emwene. 21Nafitali ti naahe ootaphuwa. Owo onlaleiya masu ooreeraxa. 22Yoseefe ti mwiri woowiimaxa; wusa wusa wusa mukerekhere naattuuttu. Iphandisaya sinrambela vasulu wa exiri. 23Alipa oolatha nyuupa yaangwanano, yaamvonya nyuupa moota woomwiitta. 24Mene muupaawe waahaanya nnenesene ni nyoonosawe saari soohithukumela niwoko na ntata na Namawera a Yakobe ori Mukukhuli ni Mwala a Yixrayeli. 25Aani ti Mulukweene Yoowo a atithawo onookhavihera; Muluku a ikuru sootheene onooreeliha ni mareeliho a wiirimu, a moowiixera, a mapele ni a oyara. 26Mareeliho a atithawo ti oowaatta, woopwaha mareeliho a nyaako soohimala, woopwaha samahala soowaattaxa sa mattumuxa oohimala. Mareelihowaaka ootheene ekhale vamuru wa Yoseefe, vayuuci ya oothanliwa variyari wa axunneiye. 27Benyamini ti mwiici oxeexelo onkhuura yoolupatthiwa ni wiilaka onkawa ovanraaya.” 28Ti seiya ipuumba muloko ni piili sa Yixrayeli ni ti seiya atithaya yaaleelansaaya yaareelihaka, emvahaka khula mutthu nreeliho naamwaattama.
Okhwa ni ovithiwa wa Yakobe
29Vano Yakobe aahaalamulela eeraka: “Kihanle vakhaani othukumanyiwa ni atthwaaka. Mwakivithe vamoha ni makholowaaka munikhukuni nri mmatta ya muHiti Efroni. 30Ti nikhuku nne nri mmatta ya Makipela, vakhiviru wa oMamre, elapo ya oKanaani. Abrahaamu aathuma ni muHiti Efroni ntoko yawayeene weera evithaneke. 31Weiwe oovithiwa Abrahaamu ni Sara, mwaariye; Isaki ni Rebeka, mwaariye. Weiwetho koomvitha Leya. 32Ematta ni nikhuku nri mwemmo yaathumiheriwe ni aHiti.” 33Yakobe amalihakaru waalamulela anamwanaawe, aahiixaatalela, anakhwa ni aathukumanyihiwa ni atthwaawe.
Iliyochaguliwa sasa
Epacerero 49: VMK2021
Kuonyesha
Shirikisha
Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.